නෙහෙමියා 1:1-11
1 මේ හකලියාගේ පුතා වුණ නෙහෙමියා*+ ලියපු වාර්තාවයි. 20වෙනි අවුරුද්දේ* කිස්ලෙව්* මාසයේ මම හිටියේ ෂූෂන්*+ මාලිගාවේ.*
2 ඒ දවස්වලදී මගේ සහෝදරයෙක් වන හනානි+ තවත් පුරුෂයන් කීපදෙනෙක් එක්ක යූදා දේශයේ ඉඳලා මාව හම්බ වෙන්න මාලිගාවට ආවා. වහල්කමින් නිදහස් වෙලා ආපු යුදෙව්වන් ගැනයි,+ යෙරුසලමේ තිබුණ තත්වය ගැනයි මං එයාලාගෙන් ඇහුවා.
3 එයාලා මට මෙහෙම කිව්වා. “වහල්කමින් නිදහස් වෙලා, යූදා පළාතට ගිහින් පදිංචි වුණ අය ඉන්නේ ගොඩක් අසරණ තත්වයක. එයාලා හැමෝගෙම අපහාසෙට ලක් වෙලා.+ ඒ මදිවට යෙරුසලමේ පවුරුත් කැඩිලා බිඳිලා ගිහින්.+ දොරටුවලටත් ගිනි තියලා!”+
4 ඒක අහපු ගමන්ම මං ඉඳගෙන අඬන්න පටන්ගත්තා. මං දවස් ගාණක් තිස්සේ කිසි දෙයක් කන්නේ නැතුව+ ස්වර්ගය පාලනය කරන දෙවියන්ට ගොඩක් දුකෙන් අඬඅඬ යාච්ඤා කළා.
5 මං දෙවියන්ට මෙහෙම කිව්වා. “ස්වර්ගය පාලනය කරන යෙහෝවා දෙවියනි, ඔයා ලොකු ගෞරවයක්* ලබන්න වටින, ශ්‍රේෂ්ඨ දෙවි කෙනෙක්. ඔයාට ආදරේ කරන, ඔයාගේ නීතිවලට කීකරු වෙන අයට ඔයා නොසැලෙන ආදරයක්* පෙන්නනවා. එයාලා එක්ක ඇති කරගත්ත ගිවිසුම ඔයා කවදාවත් කඩ කරන්නේ නැහැ.+
6 අනේ දෙවියනි, මං දිහා බලන්න. මං කියන දේට ඇහුම්කන් දෙන්න. ඔයාගේ සෙනඟ වන ඊශ්‍රායෙල්වරුන් ගැන ඔයාගේ සේවකයා වන මම දවස තිස්සේම*+ කරන යාච්ඤාවලට ඇහුම්කන් දෙන්න. ඊශ්‍රායෙල්වරු ඔයාට විරුද්ධව පව් කළා කියලා මං පිළිගන්නවා. මමත් මගේ පෙළපතේ* හැමෝමත් ඔයාට විරුද්ධව පව් කළා.+
7 අපි වැඩ කළේ ඔයාගේ හිතට ලොකු දුකක් දැනෙන විදිහට.+ ඔයාගේ සේවකයා වන මෝසෙස්ට ඔයා දුන්න අණපනත්, නීතිරීති, තීන්දුවලට අපි අකීකරු වුණා.+
8 “අනේ දෙවියනි, මං ඔයාගෙන් ඉල්ලන්නේ ඔයාගේ සේවකයා වන මෝසෙස්ට ඔයා කිව්ව දේ* සිහි කරන්න කියලයි. ඔයා එයාට මෙහෙම කිව්වා. ‘ඔයාලා මට ද්‍රෝහි වුණොත් මං ඔයාලව ජාතීන් අතරට විසුරුවාහරිනවා.+
9 ඒත් ඔයාලා ආයෙත් මාව සිහි කරලා මගේ නීතිවලට කීකරු වුණොත් පොළොවේ ඈත කෙළවරක විසිරිලා හිටියත් මං ඔයාලව එකතු කරගන්නවා.+ මගේ නම ගෞරවයට පත් කරන්න* මං තෝරගත්ත තැනට+ ආයෙත් ඔයාලව ගේනවා.’
10 ඊශ්‍රායෙල්වරු කියන්නේ ඔයාගේ සෙනඟ. ඔයාගේ අතිමහත් බලයෙන් නිදහස් කරපු+ ඔයාගේ සේවකයන්.
11 අනේ යෙහෝවා, ඔයාගේ සේවකයා වන මගේ යාච්ඤාවට ඇහුම්කන් දෙන්න. ඔයාගේ නමට මුළු හදවතින්ම ගෞරවය කරන* ඔයාගේ අනිත් සේවකයන්ගේ යාච්ඤාවලටත් ඇහුම්කන් දෙන්න. අනේ දෙවියනි, මං දැන් කරන්න හිතන් ඉන්න දේට ආශීර්වාද කරන්න. රජුගෙන් කරුණාව ලබන්න මට උදව් කරන්න.”+
ඒ දවස්වල මං සේවය කළේ රජුගේ කුසලාන දරන්නා විදිහටයි.+
පාදසටහන්
^ තේරුම, “යාහ් සැනසීම දෙයි.”
^ පර්සියානු රජ වුණ 1වෙනි අර්තක්ෂස්තාගේ 20වෙනි අවුරුද්දේ.
^ හෝ, “සූසා.”
^ හෝ, “බලකොටුවේ.”
^ “පැහැදිලි කිරීමක්” බලන්න.
^ හෝ, “ගරුබිය.”
^ මූ.අ., “රෑ දවල් දෙකේම.”
^ මූ.අ., “මගේ පියාගේ පෙළපතට අයිති.”
^ හෝ, “දුන්න අනතුරු ඇඟවීම.”
^ මූ.අ., “නම දරන්න.”
^ මූ.අ., “ගරුබිය දැක්වීමෙන් ලොකු සතුටක් ලබන.”
