මතෙව් 14:1-36
14 ඒ කාලයේදී දිසාපති වෙලා හිටිය හෙරොද්ට යේසුස් ගැන ආරංචි වුණා.+
2 ඉතින් එයා එයාගේ සේවකයන්ට මෙහෙම කිව්වා. “ඔය කියන කෙනා යොහන් බව්තීස්ත වෙන්න ඕනේ. එයාව මරණයෙන් නැඟිට්ටවලා. ඒකයි එයාට ඔය තරම් බලවත් දේවල් කරන්න පුළුවන් වෙලා තියෙන්නේ.”+
3 ඒ සිද්ධියට කලින්, හෙරොද්* යොහන්ව අත්අඩංගුවට අරන් එයාව දම්වැල්වලින් බැඳලා හිරේ දාලා තිබුණා. එයා එහෙම කළේ එයාගේ සහෝදරයාගේ ඒ කියන්නේ ෆිලිප්ගේ භාර්යාව වුණ හෙරෝදියස් නිසයි.+
4 මොකද යොහන් කීප සැරයක්ම හෙරොද්ට කියලා තිබුණා “හෙරෝදියස්ව ඔබේ බිරිඳ විදිහට තියාගන්න එක නීතියට විරුද්ධයි” කියලා.+
5 යොහන්ව මරන්න හෙරොද්ට ඕනෙ වෙලා තිබුණත් සෙනඟට තිබුණ බය නිසා එයා එහෙම කළේ නැහැ. මොකද එයාලා යොහන්ව සැලකුවේ අනාගතවක්තෘවරයෙක් විදිහට.+
6 හෙරොද්ගේ උපන් දිනය සමරන දවසේදී+ හෙරෝදියස්ගේ දුව හෙරොද් ඉස්සරහා නටලා එයාව ගොඩක් සතුටු කළා.+ හෙරොද් කොච්චර සතුටු වුණාද කිව්වොත්
7 ඉල්ලන ඕනෙම දෙයක් දෙන්නම් කියලා එයා දුවට දිවුරලා පොරොන්දු වුණා.
8 එතකොට එයා එයාගේ අම්මාගේ කීමට “මට යොහන් බව්තීස්තගේ ඔළුව තැටියක තියලා ගෙනත් දෙන්න” කියලා කිව්වා.+
9 ඒක අහලා හෙරොද් රජට ගොඩක් දුක හිතුණා. ඒත් එයා දිවුරලා තිබුණ නිසාත් එයා වුණ පොරොන්දුව එයාත් එක්ක හිටපු අමුත්තන්ට* ඇහුණ නිසාත් ඒ දේ කරන්න කියලා හෙරොද් අණ කළා.
10 එයා මිනිස්සුන්ව යවලා හිරේ හිටපු යොහන්ගේ හිස ගසා දැම්මා.
11 ඊටපස්සේ යොහන්ගේ ඔළුව තැටියක තියලා තරුණියට දුන්නා. එයා ඒක අරන් ගිහින් එයාගේ අම්මාට දුන්නා.
12 පස්සේ යොහන්ගේ ගෝලයෝ ඇවිත් එයාගේ මළ සිරුර අරන් ගිහින් තැන්පත් කළා. එයාලා ඒ ගැන යේසුස්ටත් දැන්නුවා.
13 ඒක දැනගත්තාම යේසුස් එතනින් පිටත් වෙලා බෝට්ටුවකින් පාළු තැනකට ගියා. ඒත් සෙනඟට ඒක ආරංචි වුණාම එයාලා නගරවලින් පිටත් වෙලා ඔහු යන තැනට පයින්ම ගියා.+
14 යේසුස් බෝට්ටුවෙන් ගොඩ බැස්සාම ඔහු දැක්කා එතන ලොකු සෙනඟක් ඉන්නවා. එයාලා ගැන ඔහුට ඇති වුණේ ලොකු අනුකම්පාවක්.+ ඒ වෙලාවේ එතන හිටපු අසනීප අයව ඔහු සුව කළා.+
15 හවස් වේගන එද්දී යේසුස්ගේ ගෝලයෝ ඇවිත් මෙහෙම කිව්වා. “දැන් හවස් වෙලා. අපි ඉන්නෙත් පාළු තැනක. සෙනඟව දැන් යවමු. එතකොට එයාලට පුළුවන් ගම්වලට ගිහින් කන්න මොනවා හරි සල්ලිවලට ගන්න.”+
16 ඒත් යේසුස් මෙහෙම කිව්වා. “එයාලා යන්න ඕනෙ නැහැ. ඔයාලට බැරිද එයාලට මොනවා හරි කන්න දෙන්න.”
17 ඒත් එයාලා “අපි ගාව තියෙන්නේ රොටි පහකුයි, මාළු කූරි දෙකකුයි විතරයි” කියලා කිව්වා.
18 එතකොට යේසුස් කිව්වා “ඒවා මං ළඟට අරන් එන්න” කියලා.
19 ඊටපස්සේ ඔහු සෙනඟට තණබිමේ ඉඳගන්න කිව්වා. ඔහු රොටි පහයි, මාළු කූරි දෙකයි අරගෙන ස්වර්ගය දිහා බලලා යාච්ඤාවක් කළාට+ පස්සේ රොටි කඩලා ඒවා ගෝලයන්ගේ අතට දුන්නා. ගෝලයෝ ඒවා සෙනඟට බෙදලා දුන්නා.
20 එයාලා හැමෝම ඇති වෙන කල් කෑවා. ඉතුරු වුණ රොටි කෑලි එකතු කරලා එයාලා කූඩ 12ක් පුරවගත්තා.+
21 කෑම කාපු අය අතරේ ස්ත්‍රීන් සහ පොඩි දරුවන් ඇරෙන්න පුරුෂයන් 5,000ක් හිටියා.+
22 ඊටපස්සේ ඔහු ඉක්මනටම ඔහුගේ ගෝලයන්ව බෝට්ටුවට නග්ගලා තමන්ට කලින් එගොඩට යන්න කියලා එයාලට කිව්වා. ඒ අතරේ ඔහු සෙනඟවත් පිටත් කරලා යැව්වා.+
23 සෙනඟව පිටත් කරලා යැව්වාට පස්සේ යේසුස් යාච්ඤා කරන්න ඕනෙ නිසා තනියම කන්දකට ගියා.+ හවස් වෙද්දීත් ඔහු තනියෙන් එතන හිටියා.
24 ඒ වෙද්දී බෝට්ටුව තිබුණේ ඉවුරේ ඉඳන් මීටර්* සිය ගාණක් ඈතින්. ගෝලයෝ බෝට්ටුව පදවමින් හිටියේ හරිම අමාරුවෙන්. මොකද එයාලා යන්න හදපු පැත්තෙන්ම තද හුළං හමපු නිසා රළ පහර වේගයෙන් බෝට්ටුවට වැදුණා.
25 රාත්‍රියේ හතරවෙනි රැකවල් යාමයේදී* යේසුස් වතුර උඩ ඇවිදගෙන එයාලා හිටපු තැනට ආවා.
26 ඔහු වතුර උඩ ඇවිදගෙන එනවා දැක්කාම ගෝලයෝ හොඳටම බය වෙලා “ඒ මොකක්ද”* කියලා හයියෙන් කෑගැහුවා.
27 ඒත් ඒ වෙලාවෙම යේසුස් එයාලට මෙහෙම කිව්වා. “බය වෙන්න එපා. මේ මම. හිතට ධෛර්යය ගන්න.”+
28 එතකොට පේතෘස් මෙහෙම කිව්වා. “ස්වාමීනි, ඒ ඔයා නම් වතුර උඩ ඇවිදගෙන ඔයා ළඟට එන්න කියලා මට කියන්න.”
29 ඉතින් යේසුස් කිව්වා “එන්න” කියලා. එතකොට පේතෘස් බෝට්ටුවෙන් බැහැලා වතුර උඩ ඇවිදගෙන යේසුස් ළඟට යන්න පටන්ගත්තා.
30 ඒත් එයා කුණාටුව දිහා බැලුව නිසා බය වෙලා ගිලෙන්න පටන්ගත්තා. එතකොට එයා කෑගැහුවා “ස්වාමීනි, මාව බේරගන්න” කියලා.
31 යේසුස් ඉක්මනටම ඔහුගේ අත දික් කරලා පේතෘස්ව අල්ලගෙන එයාගෙන් මෙහෙම ඇහුවා. “ඔයාගේ විශ්වාසය දුර්වල වුණේ ඇයි? ඔයාගේ හිතේ සැකයක් ඇති වෙන්න ඉඩ දුන්නේ ඇයි?”+
32 ඒ දෙන්නා බෝට්ටුවට නැග්ගාම කුණාටුව නතර වුණා.
33 එතකොට බෝට්ටුවේ හිටපු අය ඔහු ඉස්සරහා දණින් වැටිලා “ඔබ නම් ඇත්තටම දෙවියන්ගේ පුතා” කියලා කිව්වා.
34 ඊටපස්සේ එයාලා එගොඩ වෙලා ගෙනසරෙත් කියන තැනට ගියා.+
35 එහේ හිටපු සෙනඟ ඔහුව අඳුරගෙන අවට පැතිවල හිටපු අයට ඒ ගැන දන්වලා යැව්වා. එතකොට අසනීප වෙලා හිටපු හැමෝවම ඔහු ළඟට අරන් ආවා.
36 ඔහුගේ ඇඳුමේ වාටිය විතරක්වත් අල්ලන්න ඉඩ දෙන්න කියලා එයාලා ඔහුට බැගෑපත් වුණා.+ ඒක අල්ලපු හැමෝම සම්පූර්ණයෙන්ම සුව වුණා.
පාදසටහන්
^ ඒ කියන්නේ හෙරොද් අන්තිපස්. “පැහැදිලි කිරීමක්” බලන්න.
^ මූ.අ., “එයාත් එක්ක එකට මේසයේ ඉඳගෙන හිටපු අයට.”
^ මූ.අ., “ස්ටේඩියා ගණනාවක්.” ස්ටේඩියා එකක් කියන්නේ මීටර් 185ක් (අඩි 606.95ක්).
^ ඒ කියන්නේ පාන්දර 3ත් ඉර පායන (පාන්දර 6 විතර) වෙලාවත් අතර කාලය.
^ හෝ, “ඒක දර්ශනයක්; හීනයක්.”
