මතෙව් 15:1-39
15 පරිසිවරුයි, නීතිය පිටපත් කරන අයයි+ යෙරුසලමේ ඉඳන් යේසුස් ළඟට ඇවිත් මෙහෙම කිව්වා.
2 “ඔබේ ගෝලයෝ ඇයි අපේ මුතුන්මිත්තන් ඇති කරපු චාරිත්‍ර කඩන්නේ? උදාහරණෙකට කෑම කන්න කලින් එයාලා අත් හෝදන්නේ නැහැ.”*+
3 එතකොට යේසුස් එයාලාගෙන් මෙහෙම ඇහුවා. “එහෙනම් ඔයාලා ඇයි ඔයාලාගේ චාරිත්‍ර නිසා දෙවියන්ගේ ආඥා කඩන්නේ?+
4 උදාහරණෙකට ‘ඔබේ පියාටත් මවටත් ගෞරව කරන්න’+ කියලත් ‘මවට හරි පියාට හරි නින්දා කරන* කෙනාව මරලා දාන්න ඕනෙ’+ කියලත් දෙවියන් කියනවා.
5 ඒත් ඔයාලා කියන්නේ මෙහෙමයි. ‘කෙනෙක් තමන්ගේ අම්මා තාත්තාට කිව්වොත් “මං ඔයාලාගේ ප්‍රයෝජනයට දෙන්න ඕනෙ දේ තෑග්ගක් විදිහට දෙවියන්ට කැප කළා” කියලා+
6 ඒ කෙනා එයාගේ අම්මා තාත්තාට ගෞරවයෙන් සලකන්න ඕනෙ නැහැ.’ ඔයාලාගේ ඒ චාරිත්‍රවලින් ඔයාලා කරන්නේ දෙවියන්ගේ වචනය වටිනාකමක් නැති දෙයක් විදිහට සලකලා අහක දාන එකයි.+
7 ඔයාලා හරිම කුහකයි! යෙසායා ඔයාලා ගැන කියපු මේ දේ හරියටම හරි.+
8 ‘මේ මිනිස්සු මට ගෞරව කරන්නේ තොල්වලින් විතරයි. ඒත් එයාලාගේ හිත් මගෙන් ගොඩක් ඈත් වෙලා.
9 එයාලා ඔය විදිහට නමස්කාර කළාට මට ඒකෙන් වැඩක් නැහැ. මොකද එයාලා දෙවියන්ගේ ඉගැන්වීම් විදිහට උගන්වන්නේ මිනිස්සු හදාගත්ත නීති.’”+
10 ඊටපස්සේ යේසුස් සෙනඟට ඔහු ළඟට එන්න කියලා මෙහෙම කිව්වා. “මං කියන දේට ඇහුම්කන් දීලා ඒක හොඳට තේරුම්ගන්න.+
11 කෙනෙක් අපවිත්‍ර වෙන්නේ එයාගේ කට ඇතුළට දාගන්න දේවල්වලින් නෙමෙයි, එයාගේ කටින් පිට වෙන දේවල්වලින්.”+
12 පස්සේ ගෝලයෝ ඇවිත් ඔහුට මෙහෙම කිව්වා. “ඔයා කියපු දේවල් නිසා පරිසිවරු ඉන්නේ ගොඩක් කේන්තියෙන් කියලා ඔයා දන්නවාද?”+
13 එතකොට යේසුස් මෙහෙම කිව්වා. “ස්වර්ගයේ ඉන්න මගේ තාත්තා පැළ කරපු නැති හැම පැළයක්ම උදුරලා දානවා.
14 එයාලා කියන දේවල් ගණන් ගන්න එපා. එයාලා අන්ධ මඟ පෙන්වන්නෝ. අන්ධ කෙනෙක් තවත් අන්ධ කෙනෙක්ට මඟ පෙන්නුවොත් ඒ දෙන්නාම වළක වැටෙයි.”+
15 එතකොට පේතෘස් “කලින් කියපු උදාහරණේ අපිට පැහැදිලි කරලා දෙන්න” කියලා යේසුස්ට කිව්වා.
16 ඉතින් යේසුස් මෙහෙම කිව්වා. “ඔයාලටත් තාම ඒක තේරුණේ නැද්ද?+
17 කටට දාගන්න හැම කෑමක්ම බඩට ගිහින් වැසිකිළියේදී ඒවා ඇඟෙන් පිට වෙලා යනවා. ඔයාලත් ඒක හොඳටම දන්නවා.
18 ඒත් කෙනෙක්ගේ කටින් පිට වෙන්නේ එයාගේ හිතේ තියෙන දේවල්. ඒ දේවල්වලින් තමයි කෙනෙක් අපවිත්‍ර වෙන්නේ.+
19 උදාහරණෙකට දුෂ්ට අදහස් එන්නේ කෙනෙක්ගේ හිතෙන්.+ මිනී මරන්න, අනාචාරයේ* යෙදෙන්න, ලිංගික දුරාචාරයේ* යෙදෙන්න, හොරකම් කරන්න, බොරු සාක්ෂි දෙන්න, අපහාස කරන්න වගේ දේවල් කරන්න කෙනෙක් පෙලඹෙන්නෙත් එයාගේ හිතේ තියෙන දේවල් නිසයි.
20 කෙනෙක් අපවිත්‍ර වෙන්නේ ඒ දේවල්වලිනුයි. අත් හෝදන්නේ නැතුව* කෑවා කියලා කෙනෙක් අපවිත්‍ර වෙන්නේ නැහැ.”
21 යේසුස් එතනින් පිටත් වෙලා තීර් සහ සීදොන්වලට අයිති ප්‍රදේශයට ගියා.+
22 ඒ ප්‍රදේශයේම හිටිය ෆිනීෂියානු ජාතික කාන්තාවක් ඇවිත් කෑගහලා මෙහෙම කිව්වා. “දාවිත්ගේ පුතා, ස්වාමීනි, මට අනුකම්පා කරන්න.* මගේ දුවට භූතයෙක් ආවේශ වෙලා. ඒකෙන් එයා දරුණු විදිහට හිරිහැර විඳිනවා.”+
23 ඒත් යේසුස් එයාට කිසිම දෙයක් කිව්වේ නැහැ. ඉතින් ඔහුගේ ගෝලයෝ ඇවිත් “එයා කෑගගහා අපේ පස්සෙන් එනවා. එයාට යන්න කියන්න” කියලා ඔහුට කිව්වා.
24 එතකොට ඔහු මෙහෙම කිව්වා. “නැති වුණ බැටළුවන් වගේ ඉන්න ඊශ්‍රායෙල්වරුන්ට උදව් කරන්නයි මාව එව්වේ. වෙන අයට උදව් කරන්න නෙමෙයි.”+
25 ඒත් ඒ කාන්තාව ඇවිත් යේසුස් ඉස්සරහා දණින් වැටිලා “ස්වාමීනි, මට උදව් කරන්න” කියලා ඔහුට කිව්වා.
26 එතකොට යේසුස් කිව්වා “දරුවන්ගේ රොටි අරගෙන බලු පැටවුන්ට දාන එක හරි නෑනේ” කියලා.
27 ඒත් ඒ කාන්තාව මෙහෙම කිව්වා. “ස්වාමීනි, ඔබ කියන දේ හරි. ඒත් බලු පැටවුනුත් තමන්ගේ ස්වාමිවරුන්ගේ මේසයෙන් වැටෙන කෑම කනවා නේද?”+
28 එතකොට යේසුස් “ඔයාට කොච්චර ලොකු විශ්වාසයක් තියෙනවාද! ඒ නිසා ඔයා ඉල්ලපු දේ ඒ විදිහටම වෙයි” කියලා කිව්වා. ඒ වෙලාවෙම එයාගේ දුව සුව වුණා.
29 යේසුස් ඒ ප්‍රදේශයෙන් පිටත් වෙලා ගලීල මුහුද ළඟට ආවා.+ ඊටපස්සේ ඔහු කන්දකට නැඟලා එක තැනක ඉඳගත්තා.
30 එතකොට ලොකු සෙනඟක් එතනට ආවා. කොර, අබ්බගාත, අන්ධ, ගොළු අයවත් වෙනත් අසනීප හැදිලා හිටිය හුඟක් අයවත් එයාලා එක්කගෙන ඇවිත් යේසුස්ගේ කකුල් ළඟ තිබ්බා. ඔහු ඒ හැමෝවම සුව කළා.+
31 ගොළු අය කතා කරනවා කියලත් කොර අය ඇවිදිනවා කියලත් අන්ධ අයට පෙනීම ලැබිලා කියලත් දැක්කාම සෙනඟ පුදුම වෙලා ඊශ්‍රායෙල්වරුන්ගේ දෙවියන්ට ප්‍රශංසා කළා.+
32 යේසුස් ඔහුගේ ගෝලයන්ට එන්න කියලා මෙහෙම කිව්වා. “මට මේ සෙනඟ ගැන දුකයි.+ දවස් තුනක් තිස්සේ එයාලා මාත් එක්ක මෙතන ඉන්නවා. දැන් එයාලට කන්න දේකුත් නැහැ. එයාලව බඩගින්නේ යවන්න මම කැමති නැහැ. එහෙම වුණොත් අතරමඟදී එයාලට කලන්තේ හැදෙයි.”+
33 ඒත් ගෝලයෝ ඔහුට මෙහෙම කිව්වා. “මේ වගේ පාළු තැනකින් කොහොමද අපි මෙච්චර ලොකු සෙනඟකට කන්න රොටි හොයාගන්නේ?”+
34 එතකොට යේසුස් ඇහුවා “ඔයාලා ළඟ රොටි කීයක් තියෙනවාද” කියලා. “රොටි හතකුයි, මාළු කූරි ටිකකුයි අපි ළඟ තියෙනවා” කියලා එයාලා කිව්වා.
35 ඊටපස්සේ ඔහු සෙනඟට බිම ඉඳගන්න කියලා
36 රොටි හතයි, මාළු කූරි ටිකයි අරගෙන දෙවියන්ට ස්තුති කරලා ඒවා කඩලා ගෝලයන්ට දෙන්න පටන්ගත්තා. ගෝලයෝ ඒවා අරගෙන සෙනඟට බෙදලා දුන්නා.+
37 සෙනඟ හැමෝම ඇති වෙන කල් කෑවා. පස්සේ ගෝලයෝ ඉතුරු කෑම ටික එකතු කරලා ලොකු කූඩ හතක් පුරවගත්තා.+
38 කෑම කාපු අය අතරේ ස්ත්‍රීන් සහ පොඩි දරුවන් ඇරෙන්න පුරුෂයෝ 4,000ක් හිටියා.
39 අන්තිමේදී යේසුස් සෙනඟව පිටත් කරලා බෝට්ටුවට නැඟලා මගදානය කියන පළාතට ගියා.+
පාදසටහන්
^ ඒ කියන්නේ චාරිත්‍රානුකූලව අත් හේදුවේ නැහැ.
^ හෝ, “පහත් විදිහට බැණවදින.”
^ ග්‍රීක භාෂාවෙන් පෝර්නියා. “පැහැදිලි කිරීමක්” බලන්න.
^ ඒ කියන්නේ බිරිඳට හරි සැමියාට හරි ද්‍රෝහි වෙන එක.
^ ඒ කියන්නේ චාරිත්‍රානුකූලව අත් හේදුවේ නැහැ.
^ මූ.අ., “දයාව පෙන්නන්න.”
