මතෙව් 21:1-46
21 එයාලා යෙරුසලම කිට්ටුවට ඇවිත් ඔලීව කන්දේ තිබුණ බෙත්පාගයට ආවා. එහෙදී යේසුස් ඔහුගේ ගෝලයන් දෙන්නෙක්ව පිටත් කරලා යැව්වා.+
2 ඔහු එයාලට මෙහෙම කිව්වා. “අර පේන ගමට යන්න. එහෙට ගිය ගමන්ම ඔයාලා දකියි ගැටගහලා ඉන්න බූරුදෙනක්ව. ඌත් එක්ක බූරු නාම්බෙකුත් ඉඳියි. උන්ව ලිහලා මං ළඟට අරගෙන එන්න.
3 කවුරු හරි මොනවා හරි කිව්වොත් ඒ කෙනාට කියන්න ‘ස්වාමීන්ට උන්ව ඕනෙ’ කියලා. එහෙම කියපු ගමන්ම උන්ව අරන් යන්න එයා ඔයාලට ඉඩ දෙයි.”
4 ඒකෙන් අනාගතවක්තෘ මාර්ගයෙන් කියපු මේ දේ ඉටු වුණා.
5 “සියොන් දියණියට මෙහෙම කියන්න. ‘බලන්න! ඔයාලාගේ රජ බූරුවෙක් පිටේ නැඟලා ඔයාලා ළඟට එයි.+ ඔහු හුඟක් නිහතමානී* කෙනෙක්.+ ඔහු බර අදින සතෙක්ගේ පැටියෙක් පිටේ, ඒ කියන්නේ බූරු නාම්බෙක් පිටේ නැඟලා එයි.’”+
6 ඉතින් ගෝලයෝ ගිහින් යේසුස් එයාලට කියපු විදිහටම කළා.+
7 එයාලා බූරුදෙනවයි, බූරු නාම්බාවයි අරගෙන ඇවිත් උන්ගේ පිටේ එයාලාගේ පිට වස්ත්‍ර දැම්මා. ඊටපස්සේ යේසුස් බූරු නාම්බාගේ පිටේ ඉඳගත්තා.+
8 සෙනඟ අතරේ ඉන්න වැඩිදෙනෙක් එයාලාගේ පිට වස්ත්‍ර පාර දිගේ දැම්මා.+ අනිත් අය ගස්වල අතු කපලා ඒවාත් පාර දිගේ දැම්මා.
9 ඔහුට ඉස්සරහින් සහ පිටිපස්සෙන් ගිය සෙනඟ කෑගගහා මෙහෙම කිව්වා. “අනේ දෙවියනි, දාවිත්ගේ පුතාව ආරක්ෂා කරන්න!*+ යෙහෝවාගේ* නමින් එන තැනැත්තාට ආශීර්වාද ලැබේවා!+ ස්වර්ගයේ ඉන්න දෙවියනි, අනේ ඔහුව ආරක්ෂා කරන්න.”+
10 ඔහු යෙරුසලමට ආවාම නුවරේ ඉන්න හැමෝම කලබල වෙලා “මේ කවුද” කියලා ඇහුවා.
11 එතකොට සෙනඟ “මේ යේසුස්. ගලීලයේ නාසරෙත් ඉඳන් ආපු අනාගතවක්තෘවරයා”+ කියලා කිව්වා.
12 යේසුස් දේවමාලිගාවට ඇතුල් වෙලා එහේ වෙළඳාම් කරන අයවයි, ඒවා ගන්න ආපු අයවයි එළවලා දැම්මා. ඔහු මුදල් මාරු කරන අයගේ මේසයි, කොබෙයියන් විකුණන අයගේ බංකුයි පෙරළලා දාලා+
13 මෙහෙම කිව්වා. “‘මගේ ගෘහය යාච්ඤා ගෘහයක් විදිහට හඳුන්වනවා’+ කියලා ලියලා තියෙනවා. ඒත් ඔයාලා ඒක හොරුන්ගේ ගුහාවක් කරනවා.”+
14 ඔහු දේවමාලිගාවේ ඉද්දී අන්ධ, කොර මිනිස්සු ඔහු ළඟට ආවා. යේසුස් එයාලව සුව කළා.
15 යේසුස් කරපු පුදුමාකාර දේවලුයි, “දාවිත්ගේ පුතාව ආරක්ෂා කරන්න”+ කියලා පිරිමි ළමයි දේවමාලිගාවේ කෑගහන විදිහයි දැක්කාම පූජකයන්ටයි, නීතිය පිටපත් කරන අයටයි හුඟක් කේන්ති ගියා.+
16 “මේගොල්ලෝ කියන දේවල් ඔයාට ඇහෙන්නේ නැද්ද” කියලා එයාලා ඔහුගෙන් ඇහුවා. එතකොට යේසුස් එයාලට මෙහෙම කිව්වා. “ඔව්, මට ඇහෙනවා. ‘බිලිඳුන්ගෙත් කිරි බොන ළදරුවන්ගෙත් මුවින් ඔබට ප්‍රශංසාව ලැබෙන්න සැලැස්සුවා’+ කියලා ලියලා තියෙන දේ ඔයාලා කවදාවත් කියවලා නැද්ද?”
17 ඊටපස්සේ ඔහු එතනින් ගිහින් නුවරින් පිට වෙලා බෙතානියේ රැය ගත කළා.+
18 උදේ පාන්දරින් යේසුස් ආයෙත් නුවරට යද්දී ඔහුට බඩගින්නක් දැනුණා.+
19 පාර අයිනේ අත්තික්කා ගහක් තියෙනවා දැකලා ඔහු ඒ ගහ ළඟට ගියා. ඒත් ඒකේ තියෙන්නේ කොළ විතරයි කියලා දැක්කාම+ ඔහු ඒ ගහ දිහා බලලා මෙහෙම කිව්වා. “ආයේ කවදාවත් මේ ගහෙන් ගෙඩි එන්නේ නැහැ.”+ ඒ වෙලාවෙම අත්තික්කා ගහ මැලවිලා ගියා.
20 ගෝලයෝ ඒක දැක්කාම “මෙච්චර ඉක්මනට අත්තික්කා ගහ මැලවිලා ගියේ කොහොමද” කියලා පුදුමයෙන් ඇහුවා.+
21 යේසුස් එයාලට මෙහෙම කිව්වා. “ඇත්තටම මං ඔයාලට කියන්නේ, ඔයාලා පොඩ්ඩක්වත් සැක කරන්නේ නැතුව විශ්වාස කරනවා නම් මං අත්තික්කා ගහට කරපු දේ ඔයාලටත් කරන්න පුළුවන්. ඔයාලා මේ කන්දට ‘මෙතනින් අයින් වෙලා මුහුදේ ගිලෙන්න’ කියලා කිව්වොත් ඒකත් සිද්ධ වෙයි.+
22 ඒ වගේම ඔයාලා ලොකු විශ්වාසයකින් යාච්ඤා කරලා ඉල්ලන හැම දේමත් ඔයාලට අනිවාර්යයෙන්ම ලැබෙයි.”+
23 ඔහු දේවමාලිගාවට ගිහින් උගන්වමින් ඉද්දී නායක පූජකයනුයි, වැඩිමහල්ලෝයි ඔහු ළඟට ඇවිල්ලා මෙහෙම ඇහුවා. “මේ දේවල් කරන්න ඔයාට තියෙන අයිතිය මොකක්ද? කවුද ඔයාට මේවා කරන්න අවසර දුන්නේ?”+
24 එතකොට යේසුස් මෙහෙම කිව්වා. “මමත් ඔයාලාගෙන් දෙයක් අහන්නම්. ඔයාලා ඒකට උත්තර දුන්නොත් මං මේ දේවල් කරන්නේ කාගේ අවසරෙන්ද කියලා කියන්නම්.
25 යොහන් මිනිස්සුන්ව බව්තීස්ම කළේ කාගේ අවසරෙන්ද කියලා මට කියන්න. දෙවියන්ගේද* නැත්නම් මිනිස්සුන්ගේද?” ඒත් එයාලා මෙහෙම කතා වුණා. “අපි ‘දෙවියන්ගේ අවසරෙන්’ කියලා කිව්වොත් එයා අහයි ‘එහෙනම් ඇයි ඔයාලා යොහන්ව විශ්වාස කළේ නැත්තේ’ කියලා.+
26 ඒත් ‘මිනිස්සුන්ගේ අවසරෙන්’ කියලා කිව්වොත් සෙනඟ අපිට අනතුරක් කරයි. මොකද මේ හැමෝම පිළිගන්නවා යොහන් අනාගතවක්තෘවරයෙක් කියලා.”
27 ඒ නිසා එයාලා යේසුස්ට “අපි දන්නේ නැහැ” කියලා උත්තර දුන්නා. එතකොට යේසුස් කිව්වා “එහෙනම් මාත් ඔයාලට කියන්නේ නැහැ මං මේ දේවල් කරන්නේ කාගේ අවසරෙන්ද කියලා.”
28 “මේ ගැන ඔයාලා හිතන්නේ මොකක්ද? මිනිසෙක්ට දරුවෝ දෙන්නෙක් හිටියා. එයා වැඩිමල් පුතා ළඟට ගිහින් ‘පුතා අද ගිහින් මිදිවත්තේ වැඩ කරන්න’ කියලා කිව්වා.
29 එතකොට පුතා කිව්වා ‘මට බැහැ’ කියලා. ඒත් පස්සේ එයා කියපු දේ ගැන දුක් වෙලා මිදිවත්තේ වැඩ කරන්න ගියා.
30 ඊටපස්සේ ඒ මිනිසා බාල පුතා ළඟටත් ගිහින් ඒ දේම කිව්වා. ඒ පුතා ‘හා තාත්තේ මං යන්නම්’ කියලා කිව්වත් මිදිවත්තේ වැඩට ගියේ නැහැ.
31 ඔයාලා හිතන විදිහට ඒ දෙන්නාගෙන් තාත්තා කැමති දේ කළේ කවුද?” එයාලා කිව්වා “වැඩිමල් පුතා” කියලා. එතකොට යේසුස් එයාලට මෙහෙම කිව්වා. “ඇත්තටම මං ඔයාලට කියන්නේ, බදු එකතු කරන අය සහ ගණිකාවන් ඔයාලට කලින් දෙවියන්ගේ රාජ්‍යයට ඇතුල් වෙනවා.
32 මොකද යොහන් ඔයාලා ළඟට ඇවිත් ධර්මිෂ්ඨ දේ මොකක්ද කියලා පෙන්නලා දුන්නා. ඒත් ඔයාලා එයාව විශ්වාස කළේ නැහැ. හැබැයි බදු එකතු කරන අයයි, ගණිකාවනුයි එයාව විශ්වාස කළා.+ ඒක දැක්කාමවත් ඔයාලා පසුතැවිලි වෙලා එයාව විශ්වාස කළේ නැහැ.
33 “මං ඔයාලට තවත් උදාහරණයක් කියන්නම්. එක වතුහිමියෙක් හිටියා. එයා මිදිවත්තක් වැව්වා.+ එයා ඒක වටේ වැටක් බැඳලා මිදි පාගන්න තැනකුත් ලෑස්ති කළා. එයා ඒකේ මුරකොටුවකුත් හදලා වගා කරන අයට ඒක බද්දට දුන්නා.+ ඊටපස්සේ එයා පිටරටකට ගියා.+
34 මිදි නෙළන කාලය ආවාම තමන්ට අයිති කොටස ගන්න එයා මිදිවත්ත වගා කරන අය ළඟට එයාගේ දාසයන්ව යැව්වා.
35 ඒත් වගා කරන අය ඒ දාසයන්ව අල්ලගෙන එක් කෙනෙක්ට හොඳටම ගැහුවා. තව කෙනෙක්ව මරලා දැම්මා. තවත් දාසයෙක්ට ගල් ගහලා මැරුවා.+
36 ඊටපස්සේ එයා කලින් යවපු දාසයන්ගේ ගාණට වඩා වැඩි පිරිසක්ව එයාලා ගාවට යැව්වා. ඒත් ඒ දාසයන්ටත් එයාලා ඒ දේම කළා.+
37 අන්තිමට ඒ මිනිසා එයාගේ පුතාව එයාලා ළඟට යැව්වා. මොකද එයා හිතුවා ‘එයාලා මගේ පුතාට ගරු කරයි’ කියලා.
38 ඒත් මිදිවත්ත වගා කරපු අය පුතාව දැක්කාම මෙහෙම කතා වුණා. ‘මෙයා තමයි මිදිවත්තේ උරුමක්කාරයා.+ එන්න, අපි කට්ටිය එකතු වෙලා මෙයාව මරලා දාමු. එතකොට එයාට ලැබෙන උරුමය අපිට අයිති කරගන්න පුළුවන්.’
39 ඉතින් එයාලා පුතාව අල්ලගෙන එයාව මිදිවත්තෙන් එළියට අරන් ගිහින් මරලා දැම්මා.+
40 මිදිවත්තේ අයිතිකරු ආවාම වගා කරන අයට එයා මොනවා කරයිද?”
41 එයාලා මෙහෙම උත්තර දුන්නා. “එයාලා හරිම දුෂ්ට අය නිසා ඒ මිනිසා එයාලව සම්පූර්ණයෙන්ම* විනාශ කරලා දායි. ඊටපස්සේ එයාට නියම කාලයේදී පලදාව ලබා දෙන වෙනත් වගාකරුවන්ට එයා ඒ මිදිවත්ත බද්දට දෙයි.”
42 යේසුස් එයාලට මෙහෙම කිව්වා. “ඔයාලා ශුද්ධ ලියවිල්ලෙන් මේ දේ කවදාවත් කියවලා නැද්ද? ‘ඉදි කරන්නන් ඉවතට දාපු ගල දැන් ප්‍රධාන ගල* වෙලා!+ ඒ දේ කළේ යෙහෝවායි.* ඒක අපේ ඇස්වලට අදහාගන්න බැරි පුදුම දෙයක්!’+
43 ඒ නිසයි මං ඔයාලට කියන්නේ, දෙවියන්ගේ රාජ්‍යයෙන් ලැබෙන ආශීර්වාද ඔයාලාගෙන් අයින් කරලා පල දරන වෙනත් ජාතියකට ඒ ආශීර්වාද ලබා දෙනවා කියලා.
44 කෙනෙක් මං කතා කරපු ගල උඩට වැටුණොත් එයාට දරුණු විදිහට තුවාල වෙයි.+ ඒ වගේම ඒ ගල කාගේ හරි ඇඟ උඩට වැටුණොත් ඒ කෙනා සුනුවිසුනු වෙලා යයි.”+
45 යේසුස් කියපු උදාහරණ අහගෙන හිටපු නායක පූජකයෝයි, පරිසිවරුයි තේරුම්ගත්තා යේසුස් ඒවා කිව්වේ එයාලව මනසේ තියාගෙනයි කියලා.+
46 එයාලට යේසුස්ව කොහොමහරි අල්ලගන්න* ඕනෙ වුණත් එයාලා සෙනඟට බය වුණ නිසා එහෙම කළේ නැහැ. මොකද සෙනඟ ඔහුව සැලකුවේ අනාගතවක්තෘවරයෙක් විදිහට.+
පාදසටහන්
^ හෝ, “මෘදු.”
^ මූ.අ., “බේරගන්න.”
^ මූ.අ., “ස්වර්ගයෙන්ද?”
^ හෝ, “දරුණු විදිහට.”
^ මූ.අ., “ඉහළින්ම තියෙන ප්‍රධාන ගල.”
^ හෝ, “අත්අඩංගුවට ගන්න.”
