මතෙව් 26:1-75
-
පූජකයන් යේසුස්ව මරන්න කුමන්ත්‍රණය කරයි (1-5)
-
සුවඳ තෙල් යේසුස්ගේ ඇඟට වක් කරයි (6-13)
-
අන්තිම පාස්කුව සහ පාවා දීම (14-25)
-
ස්වාමීන්ගේ සන්ධ්‍යා භෝජනය හඳුන්වලා දෙයි (26-30)
-
පේතෘස් තමන්ව අඳුරන්නේ නැහැ කියලා කියනවා කියලා යේසුස් කලින්ම කියයි (31-35)
-
යේසුස් ගෙත්සෙමනයට ගිහින් යාච්ඤා කරයි (36-46)
-
යේසුස්ව අත්අඩංගුවට ගනියි (47-56)
-
යේසුස්ව මන්ත්‍රණ සභාව ඉස්සරහට අරන් යයි (57-68)
-
පේතෘස් යේසුස්ව අඳුරන්නේ නැහැ කියලා කියයි (69-75)
26 ඒ හැම දෙයක්ම කියලා ඉවර වුණාම යේසුස් ඔහුගේ ගෝලයන්ට මෙහෙම කිව්වා.
2 “තව දවස් දෙකකින් පාස්කුව පවත්වනවා කියලා ඔයාලා දන්නවා.+ එතකොට මනුෂ්‍ය පුත්‍රයාව කණුවක ඇණ ගහලා මරන්න කියලා මිනිස්සු ඔහුව සතුරන්ගේ අතට භාර දෙයි.”+
3 නායක පූජකයනුයි, සෙනඟ අතරේ හිටිය වැඩිමහල්ලනුයි කායෆස්+ කියන උත්තම පූජකයාගේ ගෙදර මැද මිදුලේ රැස් වුණා.
4 එහෙදී එයාලා කතා වෙවී හිටියේ+ යේසුස්ව අල්ලගෙන* ඔහුව මරලා දාන්න පුළුවන් කපටි විදිහක් ගැන.
5 ඒත් “අපි එයාව උත්සව දවස්වලදී අල්ලගන්න එක හොඳ නැහැ. එහෙම කළොත් මිනිස්සු ඇවිස්සෙන්න පුළුවන්” කියලා එයාලා කතා වුණා.
6 යේසුස් බෙතානියේ හිටපු සීමොන් කියන කෙනාගේ ගෙදරට ආවා. එයා කලින් ලාදුරු රෝගියෙක්.+
7 යේසුස් එහේ ඉද්දී ස්ත්‍රියක් හුඟක් ගණන්, සුවඳ තෙලක් තියෙන ඇලබැස්ටර් බඳුනක් අරගෙන එතනට ආවා. යේසුස් කෑම කකා ඉද්දී* ඒ ස්ත්‍රිය ඒකේ තිබුණ තෙල් ඔහුගේ ඔළුවට වක් කරන්න පටන්ගත්තා.
8 ඒක දැක්කාම ගෝලයන්ට කේන්ති ගිහින් මෙහෙම කිව්වා. “ඇයි මේක නාස්ති කරන්නේ?
9 මේක ලොකු ගාණකට විකුණලා දුප්පත් අයට දෙන්න තිබුණානේ!”
10 එයාලා කියපු දේ දැනගෙන යේසුස් එයාලට මෙහෙම කිව්වා. “ඔයාලා මේ ස්ත්‍රියට කරදර කරන්නේ ඇයි? එයා මං වෙනුවෙන් කළේ හොඳ දෙයක්.
11 දුප්පත් අය ඔයාලා එක්ක හැමදාම ඉන්නවා.+ ඒත් මං ඔයාලා එක්ක හැමදාම ඉන්නේ නැහැ.+
12 එයා මේ සුවඳ තෙල් මගේ ඇඟට වැක් කෙරුවේ මාව තැන්පත් කරන්න සූදානම් කරන්නයි.+
13 ඇත්තටම මං ඔයාලට කියන්නේ, ලෝකේ පුරාම ශුභාරංචිය දේශනා කරන හැම තැනකදීම මේ ස්ත්‍රිය කරපු දේ ගැන කියලා එයාව මතක් කරනවා.”+
14 ඊටපස්සේ දොළොස්දෙනාගෙන් කෙනෙක් වුණ යූදස් ඉස්කාරියොත්+ නායක පූජකයන්ව හම්බ වෙන්න ගිහින්,+
15 “මං යේසුස්ව ඔයාලට අල්ලලා දුන්නොත් ඔයාලා මට මොනවාද දෙන්නේ”+ කියලා ඇහුවා. එයාලා යූදස්ට රිදී කාසි 30ක් දෙන්න එකඟ වුණා.+
16 ඉතින් එයා ඒ වෙලාවේ ඉඳන් යේසුස්ව පාවලා දෙන්න හොඳ අවස්ථාවක් එන කල් බලාගෙනයි හිටියේ.
17 මුහුන් නොදැමූ රොටි උත්සවයේ පළවෙනි දවසේදී+ ගෝලයෝ යේසුස්ගෙන් මෙහෙම ඇහුවා. “ඔයාට පාස්කු කෑම වේල ගන්න අපි කොහෙද ලෑස්ති කරන්න ඕනේ?”+
18 එතකොට යේසුස් මෙහෙම කිව්වා. “නගරෙට ගිහින් අහවල් කෙනාව හම්බ වෙලා එයාට මෙහෙම කියන්න. ‘මගේ වෙලාව ඇවිල්ලයි තියෙන්නේ. මට ඕනෙ මගේ ගෝලයන් එක්ක ඔයාගේ ගෙදරදී පාස්කුව පවත්වන්න’ කියලා ගුරුතුමා කියනවා.”
19 ඉතින් යේසුස් කියපු විදිහටම ගෝලයෝ පාස්කුව පවත්වන්න ඕනෙ කරන හැම දෙයක්ම ලෑස්ති කළා.
20 හවස් වුණාම+ ඔහු ගෝලයෝ 12දෙනා එක්ක මේසේ වටේට ඉඳගෙන කෑම කකා හිටියා.+
21 එතකොට යේසුස් මෙහෙම කිව්වා. “ඇත්තටම මං ඔයාලට කියන්නේ ඔයාලාගෙන් එක් කෙනෙක් මාව පාවලා දෙනවා.”+
22 ඒක ඇහුවාම එයාලට ලොකු දුකක් දැනුණා. ඉතින් එයාලා එක් එක් කෙනා “ස්වාමීනි, ඒ මම නෙමෙයි නේද” කියලා ඔහුගෙන් අහන්න පටන්ගත්තා.
23 ඔහු එයාලට මෙහෙම කිව්වා. “මාත් එක්ක එකම වෙලාවේ බඳුනට අත දාලා කෑම ගන්න කෙනා තමයි මාව පාවලා දෙන්නේ.+
24 ඇත්ත, ශුද්ධ ලියවිලිවල ලියලා තියෙන විදිහටම මනුෂ්‍ය පුත්‍රයා ඔයාලාගෙන් වෙන් වෙලා යනවා. ඒත් මනුෂ්‍ය පුත්‍රයාව පාවලා දෙන කෙනාට+ හරිම දරුණු දෙයක් වෙයි.+ ඇත්තටම එයා ඉපදෙන්නේ නැතුව හිටියා නම් ඊට වැඩිය හොඳයි.”+
25 ටික වෙලාවකින් යේසුස්ව පාවලා දෙන්න ලෑස්ති වෙලා හිටපු යූදස් “රබ්බි, ඒ මම නෙමෙයිනේ” කියලා ඇහුවා. එතකොට යේසුස් මෙහෙම කිව්වා. “ඒකට උත්තරේ ඔයාම දන්නවා.”*
26 එයාලා දිගටම කෑම කකා ඉද්දී යේසුස් රොටියක් අරගෙන යාච්ඤාවක් කළා. ඊටපස්සේ ඔහු රොටිය කඩලා+ ගෝලයන්ට දීලා “මේක අරන් කන්න. මේකෙන් නියෝජනය වෙන්නේ මගේ ශරීරයයි”+ කියලා කිව්වා.
27 ඊටපස්සේ ඔහු වයින් තිබුණ කුසලානයක් අරගෙන යාච්ඤා කරලා එයාලට ඒක දෙන ගමන් මෙහෙම කිව්වා. “ඔයාලා හැමෝම මේකෙන් බොන්න.+
28 මොකද මේ වයින්වලින් නියෝජනය වෙන්නේ මගේ ලේ.+ මගේ ‘ලේවලින් තමයි ගිවිසුම ස්ථිර වෙන්නේ.’+ හුඟදෙනෙක්+ වෙනුවෙන් ඒ ලේ වගුරුවනවා. ඒ, එයාලාගේ පව්වලට සමාව ලබාගන්න පුළුවන් වෙන්නයි.+
29 මං ඔයාලට කියන්නේ මගේ තාත්තාගේ රාජ්‍යයේදී ඔයාලත් එක්ක අලුත් වයින් බොන කල් මං ආයේ වයින් බොන්නේ නැහැ.”+
30 අන්තිමට එයාලා ප්‍රශංසා ගී* ගායනා කළාට පස්සේ ඔලීව කන්දට යන්න පිටත් වුණා.+
31 ඊටපස්සේ යේසුස් එයාලට මෙහෙම කිව්වා. “මට වෙන්න යන දේ නිසා ඔයාලා හැමෝම අද රෑ මාව අතහැරලා යනවා.* මොකද ‘මම එඬේරාට පහර දෙනවා. එතකොට රැළේ බැටළුවන් හැම තැනටම විසිරිලා යයි’ කියලා ලියලා තියෙනවා.+
32 ඒත් මාව ආපහු නැඟිට්ටෙව්වාට පස්සේ මං ගලීලයට යනවා. ඔයාලා එන කල් මං එහෙට වෙලා බලන් ඉන්නවා.”+
33 ඒත් පේතෘස් ඔහුට මෙහෙම කිව්වා. “ඔයාට වෙන දේ නිසා අනිත් හැමෝම ඔයාව අතහැරලා ගියත් මම නම් කවදාවත් ඔයාව අතහැරලා යන්නේ නැහැ!”*+
34 එතකොට යේසුස් පේතෘස්ට මෙහෙම කිව්වා. “ඇත්තටම මං ඔයාට කියන්නේ අද රෑම ඔයා මාව අඳුරන්නේ නැහැ කියලා තුන් පාරක් කියනවා. කුකුළෙක් හඬලන්න කලින් ඔයා ඒක අනිවාර්යයෙන්ම කියනවා.”+
35 ඒ වෙලාවේ පේතෘස් “මට ඔයාත් එක්ක මැරෙන්න සිද්ධ වුණත් මං ඔයාව අඳුරන්නේ නැහැ කියලා නම් කොහොමටවත් කියන්නේ නැහැ” කියලා කිව්වා.+ අනිත් ගෝලයෝ හැමෝමත් ඒ දේම කිව්වා.
36 ඊටපස්සේ යේසුස් එයාලා එක්ක ගෙත්සෙමනය කියන තැනට ආවා.+ එතකොට යේසුස් ගෝලයන්ට මෙහෙම කිව්වා. “මං යාච්ඤා කරන්න අතනට යනවා. ඔයාලා මෙතන ඉඳගෙන ඉන්න.”+
37 ඔහු පේතෘස්වයි, සෙබදීගේ පුතාලා දෙන්නාවයි ඔහුත් එක්ක එක්කගෙන ගියා. ඔහුට ඒ වෙලාවේ හිතට ලොකු දුකකුත් දරාගන්න බැරි වේදනාවකුත් දැනුණා.+
38 ඔහු එයාලට මෙහෙම කිව්වා. “මට දරාගන්න බැරි වේදනාවක් දැනෙනවා. මට දැනෙන්නේ මං මැරෙන්න යනවා වගේ. ඔයාලා මෙතනට වෙලා දිගටම මාත් එක්ක අවදියෙන් ඉන්න.”+
39 ඔහු එයාලාගෙන් ටිකක් එහාට ගිහින් දණින් වැටිලා ඔළුව බිමටම පහත් කරලා මෙහෙම යාච්ඤා කරන්න පටන්ගත්තා.+ “තාත්තේ, පුළුවන් නම් මේ කුසලානය+ මගෙන් අයින් කරන්න. ඒත් වෙන්න ඕනෙ මං කැමති දේ නෙමෙයි ඔයා කැමති දේ.”+
40 යේසුස් ගෝලයන් ඉන්න තැනට ඇවිත් බැලුවාම එයාලා නිදාගෙන ඉන්නවා දැක්කා. ඉතින් ඔහු පේතෘස්ට මෙහෙම කිව්වා. “එක පැයක්වත් මාත් එක්ක අවදියෙන් ඉන්න ඔයාට බැරි වුණාද?+
41 වැරදි දෙයක් කරන්න එන පෙලඹීමට අහු වෙන්නේ නැතුව ඉන්න නම්+ දිගටම අවදියෙන් ඉන්න.+ අත්හරින්නේ නැතුව යාච්ඤා කරන්න.+ හරි දේ කරන්න හිත කොච්චර කැමති වුණත් පව්කාර ශරීරය ඒකට ඉඩ දෙන්නේ නැහැ.”+
42 යේසුස් දෙවෙනි වතාවටත් ගිහින් මෙහෙම යාච්ඤා කළා. “තාත්තේ, පුළුවන් නම් මේ කුසලානය මගෙන් අයින් කරන්න. ඒත් එහෙම බැරි නම් ඔයා කැමති විදිහට වෙන්න දෙන්න.”+
43 ඔහු ආපහු සැරයක් ගෝලයන් හිටපු තැනට එද්දී එයාලා නිදාගෙනයි හිටියේ. මොකද එයාලා හිටියේ හොඳටම නිදිමතේ.
44 ඉතින් ඔහු තුන්වෙනි වතාවටත් ගිහින් කලින් යාච්ඤා කරපු විදිහටම යාච්ඤා කළා.
45 ඊටපස්සේ ඔහු ගෝලයන් ළඟට ඇවිත් එයාලට මෙහෙම කිව්වා. “මේ වගේ වෙලාවක ඔයාලා නිදාගෙන විවේක ගන්නවාද? බලන්න! මනුෂ්‍ය පුත්‍රයාව පව්කාරයන්ගේ අතට පාවලා දෙන වෙලාව ඇවිත්.
46 දැන් නැඟිටින්න, අපි යමු. බලන්න, මාව පාවලා දෙන කෙනා දැන් ළඟටම ඇවිල්ලා.”
47 යේසුස් කතා කරකර ඉද්දීම දොළොස්දෙනාගෙන් කෙනෙක් වුණ යූදස් එතනට ආවා. එයාත් එක්ක කඩු, පොලු අරගෙන ලොකු සෙනඟකුත් ආවා. නායක පූජකයන් සහ සෙනඟ අතරේ හිටපු වැඩිමහල්ලන් තමයි ඒ පිරිසව එවලා තිබුණේ.+
48 යේසුස්ව පාවලා දෙන කෙනා එයාලට මේ වගේ ලකුණක් දෙනවා කියලා කලින්ම කියලා තිබුණා. “මං ගිහින් ඉඹින කෙනාව තමයි ඔයාලා අල්ලගන්න ඕනේ. එයාව අත්අඩංගුවට ගන්න.”
49 යූදස් කෙළින්ම යේසුස් ළඟට ගිහින් “සුබ දවසක් රබ්බි” කියලා ඔහුගේ මූණ ඉම්බා.
50 ඒත් යේසුස් “ඔයා ආවේ මොනවා කරන්නද” කියලා එයාගෙන් ඇහුවා.+ ඊටපස්සේ එතන හිටපු අය ඉස්සරහට ඇවිත් යේසුස්ව අත්අඩංගුවට ගත්තා.
51 යේසුස් එක්ක හිටපු අයගෙන් කෙනෙක් එයාගේ කඩුව අරගෙන උත්තම පූජකයාගේ දාසයාට පහර දුන්නා. ඒ දාසයාගේ කන කැපිලා ගියා.+
52 ඒ වෙලාවේ යේසුස් මෙහෙම කිව්වා. “ඔයාගේ කඩුව ආයෙත් කොපුවට දාගන්න.+ මොකද කඩු ගන්න හැම කෙනෙක්ම කඩුවෙන්ම මැරෙනවා.+
53 මේ දැන් වුණත් දේවදූත සේනාංක 12කටත් වඩා මගේ උදව්වට එවන්න කියලා මගේ තාත්තාගෙන් ඉල්ලන්න මට බැහැ කියලා ඔයා හිතනවාද?+
54 මං එහෙම කළොත් මේ විදිහට සිද්ධ වෙන්න ඕනෙ කියලා ශුද්ධ ලියවිල්ලේ සඳහන් වෙන දේවල් ඉටු වෙන්නේ කොහොමද?”
55 ඒ වෙලාවේ යේසුස් එතන හිටපු සෙනඟට මෙහෙම කිව්වා. “ඔයාලා මාව අත්අඩංගුවට ගන්න කඩු, පොලු අරගෙන ආවේ මං හොරෙක් කියලා හිතාගෙනද? මං හැම දවසකම දේවමාලිගාවේ ඉඳගෙන ඉගැන්නුවා.+ ඇයි ඔයාලා මාව එතකොට අත්අඩංගුවට ගත්තේ නැත්තේ?+
56 ඒත් මේ හැම දෙයක්ම මේ විදිහට වුණේ අනාගතවක්තෘවරුන් ලියලා තියෙන දේවල්* ඉටු වෙන්න ඕනෙ නිසයි.”+ ඊටපස්සේ ගෝලයෝ හැමෝම ඔහුව අතහැරලා එතනින් පැනලා ගියා.+
57 යේසුස්ව අත්අඩංගුවට ගත්ත අය උත්තම පූජකයා වුණ කායෆස්+ ළඟට ඔහුව අරන් ගියා. නීතිය පිටපත් කරන අයයි, සෙනඟ අතරේ හිටපු වැඩිමහල්ලෝයි එහේ රැස් වෙලා හිටියා.+
58 පේතෘස් යේසුස්ට ටිකක් ඈතින් ඔහු පිටිපස්සෙන් උත්තම පූජකයාගේ ගෙදර මැද මිදුල වෙන කල්ම ගියා. ඊටපස්සේ මොකක්ද වෙන්නේ කියලා බලන්න එයා ඇතුළට ගිහින් ගෙදර සේවකයන් එක්ක ඉඳගත්තා.+
59 ඔය අතරේ නායක පූජකයෝයි, මුළු මන්ත්‍රණ සභාවයි* යේසුස්ට විරුද්ධව බොරු සාක්ෂි දෙන්න කැමති අයව හොයහොය හිටියා. එයාලට ඕනෙ වුණේ ඔහුට මරණ දණ්ඩනය නියම කරන්නයි.+
60 බොරු සාක්ෂිකරුවන් හුඟදෙනෙක් ඉදිරිපත් වුණත්+ ඔහු වැරදිකරුවෙක් කියලා ඔප්පු කරන්න පුළුවන් විදිහේ කිසිම සාක්ෂියක් හොයාගන්න එයාලට බැරි වුණා. පස්සේ දෙන්නෙක් ඉස්සරහට ඇවිත්
61 මෙහෙම කිව්වා. “‘දේවමාලිගාව කඩලා දාලා දවස් තුනකින් ඒක ආයෙත් හදන්න මට පුළුවන්’ කියලා මේ මිනිහා කිව්වා.”+
62 එතකොට උත්තම පූජකයා නැඟිටලා “මේ මිනිස්සු ඔයාට විරුද්ධව කියන දේවල් ඇහෙනවා නේද?+ ඒ ගැන ඔයාට කියන්න මුකුත්ම නැද්ද” කියලා යේසුස්ගෙන් ඇහුවා.
63 ඒත් යේසුස් එයාට කිසිම උත්තරයක් දුන්නේ නැහැ.+ ඉතින් උත්තම පූජකයා මෙහෙම කිව්වා. “දැන් ජීවමාන දෙවියන් ඉස්සරහා දිවුරලා කියන්න ඔයා දෙවියන්ගේ පුතා වන ක්‍රිස්තුස්ද?”+
64 යේසුස් එයාට මෙහෙම කිව්වා. “ඔව්, ඒක හරි.* ඒත් මං ඔයාලට කියන්නේ මෙහෙමයි. මනුෂ්‍ය පුත්‍රයා+ බලවත් තැනැත්තාගේ දකුණු පැත්තේ ඉඳගෙන ඉන්න විදිහත්+ අහසේ වලාකුළු මත ඔහු එන විදිහත්+ ඔයාලා ඉස්සරහට දකියි.”
65 ඒක අහලා උත්තම පූජකයා එයාගේ පිට වස්ත්‍රය ඉරාගෙන මෙහෙම කිව්වා. “ඒක දේවඅපහාසයක්! අපිට තවත් සාක්ෂිකාරයන් මොකටද? ඔයාලටම ඇහුණා නේද දෙවියන්ට කරපු අපහාසේ.
66 ඔයාලා මොකක්ද හිතන්නේ?” “එයාට මරණ දණ්ඩනය නියම කරන්න”+ කියලා එයාලා කිව්වා.
67 එයාලා ඔහුගේ මූණට කෙළ ගහලා+ මිට මොළවලා ඔහුට ගැහුවා.+ තවත් අය ඔහුගේ කම්මුලට ගහලා,+
68 “ඔයා ක්‍රිස්තුස් නේද? ඔයා අනාගතවක්තෘවරයෙක් නම් ඔයාට ගැහුවේ කවුද කියලා කියන්න” කියලා කිව්වා.
69 ඒ වෙලාවේ පේතෘස්, මැද මිදුලේ ඉඳගෙන හිටියා. එතකොට සේවිකාවක් එයා ළඟට ඇවිත් “ඔයාත් අර ගලීලයේ ඉඳන් ආපු යේසුස් එක්ක හිටපු කෙනෙක් නේද?”+
70 ඒත් එයා හැමෝම ඉස්සරහා ඒක එහෙම නෙමෙයි කියලා පෙන්නන්න මෙහෙම කිව්වා. “ඔයා මේ මොනවා කියනවාද කියලා මං නම් දන්නේ නැහැ.”
71 පස්සේ, එයා මැද මිදුලට ඇතුල් වෙන තැනට ගියාම වෙන තරුණියක් එයාව දැකලා “මේ මිනිහා අර නාසරෙත්වලින් ආපු යේසුස් එක්ක හිටපු කෙනෙක්” කියලා එතන හිටපු අයට කිව්වා.+
72 පේතෘස් ආයෙත් එහෙම නෙමෙයි කියලා පෙන්නන්න “මම ඒ මිනිහාව අඳුරන්නේ නැහැ” කියලා දිවුරලා කිව්වා.
73 ටික වෙලාවකට පස්සේ එතන හිටපු අය “ඔයා එයාලාගෙන් කෙනෙක් තමයි. ඔයා කතා කරන විදිහෙන්ම ඒක තේරෙනවා” කියලා පේතෘස්ට කිව්වා.
74 එතකොට එයා තමන්ටම ශාප කරකර “ඔයාලා කියන ඔය මනුස්සයාව මං දන්නේ නෑ” කියලා දිවුරන්න පටන්ගත්තා. ඒත් එක්කම කුකුළෙක් හැඬලුවා.
75 එතකොට පේතෘස්ට මතක් වුණා “කුකුළෙක් හඬලන්න කලින් ඔයා මාව අඳුරන්නේ නැහැ කියලා තුන් පාරක් කියනවා” කියලා යේසුස් කියපු දේ.+ ඒ නිසා එයා එළියට ගිහින් හොඳටම අඬන්න පටන්ගත්තා.
පාදසටහන්
^ හෝ, “අත්අඩංගුවට අරන්.”
^ හෝ, “කෑමට ඉඳගෙන ඉද්දී.”
^ යේසුස් ඒකෙන් අදහස් කළේ “ඒ ඔයා තමයි” කියන එක.
^ හෝ, “ගීතිකා.”
^ මූ.අ., “මං නිසා ඔයාලා හැමෝම අද රෑ වැටිලා යනවා.”
^ මූ.අ., “ඔයා නිසා හැමෝම වැටිලා ගියත් මම නම් වැටිලා යන්නේ නැහැ.”
^ හෝ, “ශුද්ධ ලියවිලි.”
^ “පැහැදිලි කිරීමක්” බලන්න.
^ මූ.අ., “ඔබම ඒක කිව්වා.” ඒක ප්‍රශ්නයකට “ඔව්” කියලා උත්තර දෙන විදිහක්.
