මාක් 10:1-52
10 ඔහු එතනින් පිටත් වෙලා යොර්දාන් ගඟෙන් එගොඩ, යුදයේ මායිම්වල තියෙන ප්‍රදේශයට ගියා. එහෙදී ආයෙත් සෙනඟ ඔහු ළඟට එකතු වුණා. ඉතින් ඔහු සාමාන්‍යයෙන් කරපු විදිහට එයාලට උගන්නන්න පටන්ගත්තා.+
2 එතකොට පරිසිවරු ඔහු ළඟට ඇවිත් කෙනෙක් තමන්ගේ බිරිඳව දික්කසාද කරන එක නීත්‍යනුකූලද කියලා ඔහුගෙන් ඇහුවා. එයාලට ඕනෙ වුණේ ඒ ගැන ඔහු මොනවා කියයිද කියලා බලලා ඔහුගේ වරදක් අල්ලගන්න.+
3 ඔහු එයාලට මෙහෙම උත්තර දුන්නා. “මෝසෙස් ඔයාලට දීපු ආඥාව මොකක්ද?”
4 එතකොට එයාලා කිව්වා “දික්කසාද ලියවිල්ලක් හදලා ඒක එයාට දීලා එයාව අතහරින්න මෝසෙස් ඉඩ දුන්නා” කියලා.+
5 ඒත් යේසුස් එයාලට මෙහෙම කිව්වා. “මෝසෙස් ඒ ආඥාව ඔයාලට ලියලා දුන්නේ+ ඔයාලා හරිම මුරණ්ඩු සෙනඟක් නිසයි.+
6 ඒත් පටන්ගැන්මේදී ‘දෙවියන්* පුරුෂයෙක් සහ ස්ත්‍රියක් විදිහට තමයි එයාලව නිර්මාණය කළේ.+
7 ඒ නිසා පුරුෂයෙක් තමන්ගේ තාත්තාගෙනුයි, අම්මාගෙනුයි වෙන් වෙලා යනවා.+
8 ඊටපස්සේ එයායි, එයාගේ බිරිඳයි එක් කෙනෙක්* වගේ වෙනවා.’+ එදා ඉඳන් එයාලා දෙන්නෙක් නෙමෙයි එක් කෙනෙක්.
9 ඉතින් දෙවියන් එකතු කරපු දෙයක් කිසිම මිනිසෙක් වෙන් නොකළ යුතුයි.”+
10 යේසුස් ගෝලයොත් එක්ක ගෙදරක ඉද්දී එයාලා ඔහුගෙන් ඒ ගැන ප්‍රශ්න කරන්න පටන්ගත්තා.
11 ඔහු එයාලට මෙහෙම කිව්වා. “තමන්ගේ බිරිඳව දික්කසාද කරලා වෙන කාන්තාවක්ව විවාහ කරගන්න කෙනෙක් බිරිඳට ද්‍රෝහි වෙලා අනාචාරයේ යෙදෙනවා.+
12 කාන්තාවක් තමන්ගේ ස්වාමිපුරුෂයාව දික්කසාද කරලා වෙන පුරුෂයෙක් එක්ක විවාහ වුණොත් ඒ කාන්තාව කරන්නෙත් අනාචාරයේ යෙදෙන එකයි.”+
13 මිනිස්සු පොඩි ළමයින්ව ඔහු ළඟට අරන් එන්න පටන්ගත්තා. එහෙම කළේ යේසුස් දරුවන් පිට අත් තියලා එයාලට ආශීර්වාද කරයි කියලා ඒ මිනිස්සු හිතුව නිසයි. ඒත් ගෝලයෝ එයාලට බැන්නා.+
14 යේසුස් ඒක දැක්කා. ගෝලයන් කරපු දේට ඔහු පොඩ්ඩක්වත් කැමති වුණේ නැහැ. ඔහු එයාලට මෙහෙම කිව්වා. “එහෙම කරන්න එපා. පොඩි දරුවන්ට මං ළඟට එන්න දෙන්න. මොකද දෙවියන්ගේ රාජ්‍යය අයිති වෙන්නේ මේ දරුවන් වගේ ඉන්න අයටයි.+
15 ඇත්තටම මං ඔයාලට කියන්නේ කෙනෙක් පොඩි දරුවෙක් වගේ වෙලා දෙවියන්ගේ රාජ්‍යය පිළිගත්තේ නැත්නම් එයාට ඒකට ඇතුල් වෙන්න බැහැ.”+
16 ඊටපස්සේ ඔහු දරුවන්ව තමන් ළඟට අරගෙන එයාලව ඔඩොක්කුවේ තියාගෙන එයාලා පිට අත් තියලා ආශීර්වාද කළා.+
17 ඔහු එතනින් පිටත් වෙලා යද්දී මනුස්සයෙක් ඔහු ළඟට දුවගෙන ඇවිත් ඔහු ඉස්සරහා දණින් වැටිලා “යහපත් ගුරුතුමනි, සදාකාල ජීවනය ලබාගන්න මං මොනවාද කරන්න ඕනෙ” කියලා ඔහුගෙන් ඇහුවා.+
18 යේසුස් එයාට මෙහෙම කිව්වා. “ඇයි ඔයා මට යහපත් කියලා කියන්නේ? යහපත් කියලා කිසිම කෙනෙක්ව හඳුන්වන්න බැහැ. එහෙම හඳුන්වන්න පුළුවන් එක් කෙනෙක්ව විතරයි. ඒ දෙවියන්.+
19 ‘මිනී මරන්න එපා,+ අනාචාරයේ* යෙදෙන්න එපා,+ හොරකම් කරන්න එපා,+ බොරු සාක්ෂි දෙන්න එපා,+ වංචා කරන්න එපා,+ ඔබේ පියාටත් මවටත් ගෞරව කරන්න’+ කියන ආඥා ගැන ඔයා හොඳට දන්නවා නේද?”
20 එතකොට ඒ මනුස්සයා කිව්වා “ගුරුතුමනි, මම ඒ හැම දෙයක්ම පොඩි කාලේ ඉඳන්ම පිළිපදිනවා” කියලා.
21 යේසුස් එයා දිහා බැලුවාම ඔහුට එයා ගැන ආදරයක් ඇති වුණා. ඉතින් ඔහු එයාට මෙහෙම කිව්වා. “ඔයාගේ එක අඩුවක් තියෙනවා. ගිහින් ඔයාට තියෙන දේවල් විකුණලා ඒ සල්ලි දුප්පත් අයට දෙන්න. එතකොට ඔයාට ස්වර්ගයේ වස්තු හම්බ වෙයි. ඊටපස්සේ ඇවිත් මගේ අනුගාමිකයෙක් වෙන්න.”+
22 ඒත් යේසුස් දීපු උත්තරේ ඇහුවාම ඒ මනුස්සයා හරිම දුකෙන් එතනින් යන්න ගියා. මොකද එයාට ගොඩක් ධන සම්පත් තිබුණා.+
23 යේසුස් ඔහු වටේ හිටපු අය දිහා බැලුවා. ඊටපස්සේ ඔහුගේ ගෝලයන්ට මෙහෙම කිව්වා. “ගොඩක් සල්ලි තියෙන අයට දෙවියන්ගේ රාජ්‍යයට ඇතුල් වෙන එක කොච්චර අමාරු දෙයක් වෙයිද!”+
24 යේසුස් කියපු දේ අහලා ගෝලයෝ පුදුම වුණා. ඉතින් යේසුස් එයාලට ආයෙත් මෙහෙම කිව්වා. “දරුවෙනි, දෙවියන්ගේ රාජ්‍යයට ඇතුල් වෙන එක කොච්චර අමාරු දෙයක්ද!
25 පොහොසත් කෙනෙක්ට දෙවියන්ගේ රාජ්‍යයට ඇතුල් වෙන එකට වඩා ඔටුවෙක්ට ඉඳිකටුවක සිදුරෙන් ඇතුල් වෙන එක ලේසියි.”+
26 ඒක අහලා ගෝලයෝ තවත් පුදුම වෙලා “එහෙමනම් කාටවත් ගැලවෙන්න බැරිද” කියලා ඔහුගෙන් ඇහුවා.*+
27 යේසුස් එයාලා දිහා බලලා මෙහෙම කිව්වා. “මිනිස්සුන්ගේ පැත්තෙන් බලද්දී නම් ඒක කොහොමටවත් කරන්න බැහැ තමයි. හැබැයි දෙවියන්ට ඕනෙම දෙයක් කරන්න පුළුවන්.”+
28 එතකොට පේතෘස් “බලන්න! අපි හැම දෙයක්ම අතහැරලා ඔයාගේ පස්සෙන් ආවා” කියලා කිව්වා.+
29 යේසුස් මෙහෙම කිව්වා. “ඇත්තටම මම කියන්නේ මං නිසාත් ශුභාරංචිය නිසාත් කෙනෙක් ගෙවල් දොරවල් හරි සහෝදර සහෝදරියන් හරි අම්මා, තාත්තා හරි දරුවන් හරි වතුපිටි හරි අතහැරියොත්+
30 එයාට මේ කාලේදී 100 ගුණයකින් ගෙවලුත් සහෝදර සහෝදරියනුත් අම්මලත් දරුවනුත් වතුපිටි වගේම හිංසා පීඩාත් ලැබෙනවා.+ ඉස්සරහට එන කාලේදී* සදාකාල ජීවනයත් ලැබෙනවා.
31 ඒත් පළවෙනියට ඉන්න හුඟදෙනෙක් අන්තිමයන් වෙනවා. අන්තිමයන් වෙලා ඉන්න අය පළවෙනියන් වෙනවා.”+
32 එයාලා යෙරුසලමට නැඟගෙන යන්න තියෙන පාර දිගේ ගියා. ඒ හැමෝටම ඉස්සරහින් ගියේ යේසුස්. ඒ ගැන ගෝලයෝ පුදුම වුණා. ඒත් එයාලට පිටිපස්සෙන් ආපු අනිත් අයට දැනුණේ බයක්. යේසුස් ආපහු සැරයක් දොළොස්දෙනාව පැත්තකට එක්කගෙන ගිහින් තමන්ට වෙන්න යන මේ දේවල් ගැන කියන්න පටන්ගත්තා.+
33 “අහන්න, අපි මේ යන්නේ යෙරුසලමට. එහෙදී මනුෂ්‍ය පුත්‍රයාව නායක පූජකයන්ගෙයි, නීතිය පිටපත් කරන අයගෙයි අතට භාර දෙනවා. එයාලා ඔහුව මරණයට නියම කරලා වෙනත් ජාතීන් අතට භාර දෙනවා.
34 ඒ අය ඔහුට සමච්චල් කරලා ඔහුට කෙළ ගහලා, කසයෙන් පහර දෙනවා. ඊටපස්සේ ඔහුව මරලා දානවා. ඒත් දවස් තුනකින් ඔහු නැඟිටිනවා.”+
35 සෙබදීගේ පුතාලා වුණ යාකොබ් සහ යොහන්+ යේසුස් ළඟට ඇවිත් “ගුරුතුමනි, අපි ඉල්ලන දේ ඔයා අපි වෙනුවෙන් කරනවාට අපි කැමතියි”+ කියලා කිව්වා.
36 එතකොට ඔහු එයාලාගෙන් මෙහෙම ඇහුවා. “මං මොනවාද ඔයාලා වෙනුවෙන් කරන්න ඕනේ?”
37 ඒ දෙන්නා මෙහෙම උත්තර දුන්නා. “ඔයාට ඔයාගේ රාජ්‍යය ලැබුණාම අපි දෙන්නාගෙන් එක් කෙනෙක්ට ඔයාගේ දකුණු පැත්තෙත් අනිත් කෙනාට වම් පැත්තෙත් ඉඳගන්න අවස්ථාව දෙන්න.”+
38 ඒත් යේසුස් එයාලට මෙහෙම කිව්වා. “ඔයාලා ඉල්ලන්නේ මොකක්ද කියලවත් ඔයාලා දන්නේ නැහැ. මම බොන කුසලානෙන් බොන්න ඔයාලට පුළුවන්ද? මාව බව්තීස්ම කරන විදිහට බව්තීස්ම වෙන්න ඔයාලත් ලෑස්තිද?”+
39 එයාලා “ඔව්, අපි ලෑස්තියි” කියලා උත්තර දුන්නා. එතකොට යේසුස් එයාලට මෙහෙම කිව්වා. “මම බොන කුසලානෙන් ඔයාලා අනිවාර්යයෙන්ම බොනවා. මාව බව්තීස්ම කරන විදිහටම ඔයාලවත් බව්තීස්ම කරනවා.+
40 ඒත් මගේ දකුණු පැත්තෙයි, වම් පැත්තෙයි ඉඳගන්නේ කවුද කියලා තීරණය කරන්නේ මම නෙමෙයි. එතන ඉඳගන්නේ කවුද කියලා තීරණය කරන්නේ දෙවියන්.”
41 අනිත් දහදෙනාට ඒ ගැන අහන්න ලැබුණාම යාකොබ් සහ යොහන් එක්ක එයාලට කේන්ති ගියා.+
42 ඒත් යේසුස් එයාලට ඔහු ළඟට එන්න කියලා මෙහෙම කිව්වා. “ඔයාලා හොඳටම දන්නවා ජාතීන්ව පාලනය කරන අය මිනිස්සුන්ව යටත් කරගෙන ඉන්නවා කියලා. උසස් තනතුරුවල ඉන්න අය හරිම දැඩි විදිහට මිනිස්සුන්ව පාලනය කරනවා කියලත් ඔයාලා දන්නවා.+
43 ඒත් ඔයාලා අතරේ ඒ වගේ දෙයක් වෙන එක හොඳ නැහැ. ඔයාලා අතරේ උසස් වෙන්න කැමති කෙනෙක් ඉන්නවා නම් එයා ඔයාලාගේ සේවකයා වෙන්න ඕනේ.+
44 ඔයාලා අතරේ පළවෙනියා වෙන්න කැමති කෙනෙක් ඉන්නවා නම් එයා ඔයාලාගේ දාසයා වෙන්න ඕනේ.
45 මොකද මනුෂ්‍ය පුත්‍රයා ආවේ සේවය ලබන්න නෙමෙයි සේවය කරන්නයි.+ ඒ වගේම ඔහුගේ ජීවිතය වන්දියක් විදිහට දීලා හුඟදෙනෙක්ව මිල දීලා ගන්නයි.”*+
46 ඊටපස්සේ එයාලා යෙරිකෝවට ආවා. ඔහු තමන්ගේ ගෝලයන් සහ විශාල සෙනඟක් එක්ක යෙරිකෝවෙන් පිටත් වෙලා යද්දී අන්ධ හිඟන්නෙක් පාර අයිනේ ඉඳගෙන හිටියා. එයා (තිමේයස්ගේ පුතා වුණ) බාතිමේයස්.+
47 එතනින් යන්නේ නාසරෙත්වලින් ආපු යේසුස් කියලා දැනගත්තාම එයා මෙහෙම කෑගහන්න පටන්ගත්තා. “දාවිත්ගේ පුතා+ යේසුස්, මට අනුකම්පා කරන්න.”*+
48 ඒක ඇහුණ හුඟදෙනෙක් කෑගහන්න එපා කියලා එයාට සැර කරන්න පටන්ගත්තා. ඒත් එයා තව තවත් හයියෙන් කෑගහලා මෙහෙම කිව්වා. “දාවිත්ගේ පුතා, මට අනුකම්පා කරන්න.”*
49 ඉතින් යේසුස් නැවතිලා “එයාට එන්න කියන්න” කියලා කිව්වා. එතකොට මිනිස්සු අන්ධ මනුස්සයාට අඬගහලා මෙහෙම කිව්වා. “බය වෙන්න එපා. නැඟිටලා යන්න. ඔහු ඔයාට අඬගහනවා.”
50 එයා පිට වස්ත්‍රය ගලවලා දාලා ඉක්මනින්ම නැඟිටලා යේසුස් ළඟට ගියා.
51 එතකොට යේසුස් “මං මොනවාද ඔයා වෙනුවෙන් කරන්න ඕනෙ” කියලා එයාගෙන් ඇහුවා. අන්ධ මනුස්සයා මෙහෙම කිව්වා. “ගුරුතුමනි,* මට පෙනීම ලබා දෙන්න.”
52 යේසුස් එයාට මෙහෙම කිව්වා. “දැන් යන්න. ඔයාගේ විශ්වාසය නිසා ඔයා සුව වුණා.”+ ඒ වෙලාවෙම එයාට පෙනීම ලැබුණා.+ ඊටපස්සේ එයා සෙනඟත් එක්ක යේසුස්ගේ පස්සෙන් ගියා.
පාදසටහන්
^ මූ.අ., “ඔහු.”
^ හෝ, “එක ශරීරයක්.”
^ ඒ කියන්නේ බිරිඳට හරි සැමියාට හරි ද්‍රෝහි වෙන එක.
^ හෝ සමහරවිට, “එයාලා අතරේ කතා වුණා.”
^ මූ.අ., “සමාජ ක්‍රමයේදී.” “පැහැදිලි කිරීමක්” බලන්න.
^ හෝ, “බේරගන්නයි.”
^ මූ.අ., “දයාව පෙන්නන්න.”
^ මූ.අ., “දයාව පෙන්නන්න.”
^ මූ.අ., “රබ්බෝනි.”
