මාක් 11:1-33
11 එයාලා යෙරුසලම කිට්ටුව තිබුණ ඔලීව කන්දට ආවා. ඒ කන්දේ තමයි බෙත්පාගය සහ බෙතානිය+ කියන ගම් තිබුණේ. එයාලා ඔලීව කන්දට ආවාම යේසුස් ඔහුගේ ගෝලයන් දෙන්නෙක්ව පිටත් කරලා යැව්වා.+
2 ඔහු එයාලට මෙහෙම කිව්වා. “අර පේන ගමට යන්න. එහෙට ගියාම ඔයාලා දකියි කිසිම මනුස්සයෙක් මේ වෙන කල් ඉඳගෙන නැති බූරු නාම්බෙක් බැඳලා ඉන්නවා. ඌව ලිහලා අරගෙන එන්න.
3 කවුරු හරි ඇහුවොත් ‘මොනවාද ඔය කරන්නේ’ කියලා එයාට මෙහෙම කියන්න. ‘ස්වාමීන්ට ඌව ඕනේ. ඔහු ඉක්මනින්ම ඌව ආපහු ඔයාට භාර දෙයි.’”
4 ඉතින් ඒ දෙන්නා ගියාම පාරට කිට්ටුවෙන් තිබුණ ගේක දොරකඩ ළඟ බූරු නාම්බෙක් බැඳලා ඉන්නවා දැක්කා. එයාලා ඌව ලිහුවා.+
5 එතකොට එතන හිටගෙන හිටපු කීපදෙනෙක් “මොනවාද ඔයාලා ඔය කරන්නේ, ඇයි ඔය බූරු නාම්බාව ලිහන්නේ” කියලා ඇහුවා.
6 යේසුස් කියන්න කියපු දේ එයාලා ඒ මිනිස්සුන්ට කිව්වා. ඉතින් ඒ කට්ටිය එයාලට යන්න දුන්නා.
7 එයාලා බූරු නාම්බාව+ යේසුස් ළඟට අරගෙන ඇවිත් උගේ පිට උඩට එයාලාගේ පිට වස්ත්‍ර දැම්මා. ඊටපස්සේ යේසුස් උගේ පිට උඩ ඉඳගත්තා.+
8 හුඟදෙනෙක් තමන්ගේ පිට වස්ත්‍ර පාර දිගේ දැම්මා. තවත් අය පාර දෙපැත්තේ තිබුණ ගස්වලින් අතු කපලා ඒවා පාර දිගේ ඇතිරුවා.+
9 යේසුස්ට ඉස්සරහින් සහ පිටිපස්සෙන් ගිය අය කෑගගහා මෙහෙම කිව්වා. “අනේ දෙවියනි, ඔහුව ආරක්ෂා කරන්න!*+ යෙහෝවාගේ* නමින් එන තැනැත්තාට ආශීර්වාද ලැබේවා!+
10 ඉදිරියේදී එන්න තියෙන අපේ පියා වුණ දාවිත්ගේ රාජ්‍යයට ආශීර්වාද ලැබේවා!+ ස්වර්ගයේ ඉන්න දෙවියනි, අනේ ඔහුව ආරක්ෂා කරන්න!”
11 යේසුස් යෙරුසලමට ඇවිත් දේවමාලිගාවට ඇතුල් වෙලා එහේ තිබුණ හැම දෙයක් දිහාම හොඳට බැලුවා. ඒත් ගොඩක් හවස් වෙලා තිබුණ නිසා ඔහු දොළොස්දෙනාත් එක්ක බෙතානියට ගියා.+
12 පහුවෙනිදා එයාලා බෙතානියෙන් පිටත් වෙලා යද්දී යේසුස්ට බඩගින්නක් දැනුණා.+
13 ඔහු කොළ තියෙන අත්තික්කා ගහක් ඈතදීම දැකලා ඒකේ ගෙඩි තියෙනවාද කියලා බලන්න ගහ ළඟට ගියා. ඒත් ඒකේ ගෙඩි නැහැ කොළ විතරයි තියෙන්නේ කියලා ඔහු දැක්කා. මොකද ඒක අත්තික්කා වාරය නෙමෙයි.
14 ඉතින් යේසුස් ඒ ගහ දිහා බලලා මෙහෙම කිව්වා. “ආයේ කවදාවත් කිසිම කෙනෙක්ට මේ ගහෙන් පලතුරු කන්න ලැබෙන්නේ නැහැ.”+ ඒක ඔහුගේ ගෝලයන් අහගෙනයි හිටියේ.
15 ඊටපස්සේ එයාලා යෙරුසලමට ආවා. යේසුස් දේවමාලිගාවට ඇතුල් වෙලා එහේ වෙළඳාම් කරපු අයවයි, ඒවා ගන්න ආපු අයවයි එළියට එළවලා දාන්න පටන්ගත්තා. ඔහු මුදල් මාරු කරන අයගේ මේසයි, කොබෙයියන් විකුණන අයගේ බංකුයි පෙරළලා දැම්මා.+
16 ඔහු කාටවත් දේවමාලිගාව මැදින් කිසිම දෙයක් අරගෙන යන්න ඉඩ දුන්නෙත් නැහැ.
17 ඔහු සෙනඟට මෙහෙමත් ඉගැන්නුවා. “‘හැම ජාතියකටම අයිති අය වෙනුවෙන් තියෙන යාච්ඤා ගෘහයක් විදිහට මගේ ගෘහය හඳුන්වනවා’+ කියලා ලියලා තියෙනවා නේද? ඒත් ඔයාලා ඒක හොරුන්ගේ ගුහාවක් කරලා.”+
18 නායක පූජකයන්ටයි, නීතිය පිටපත් කරන අයටයි ඒ දේවල් ගැන අහන්න ලැබුණාම යේසුස්ව මරලා දාන්න විදිහක් එයාලා හෙව්වා.+ මොකද ඔහු උගන්නපු දේවල් අහලා සෙනඟ පුදුම වුණ නිසා එයාලට ඔහු ගැන බයක් ඇති වෙලා තිබුණා.+
19 අඳුර වැටීගෙන එද්දී යේසුස් සහ ඔහුගේ ගෝලයෝ නගරයෙන් එළියට ගියා.
20 ඊළඟ දවසේ උදේ පාන්දර යද්දී එයාලා දැක්කා අත්තික්කා ගහේ මුලේ ඉඳන් ඒක සම්පූර්ණයෙන්ම වේළිලා ගිහින් තියෙනවා.+
21 කලින් දවසේ වෙච්ච දේ මතක් වෙලා පේතෘස් යේසුස්ට මෙහෙම කිව්වා. “අර බලන්න ගුරුතුමනි! ඔයා ශාප කරපු අත්තික්කා ගහ වේළිලා ගිහින්.”+
22 එතකොට යේසුස් මෙහෙම කිව්වා. “දෙවියන් ගැන විශ්වාසයෙන් ඉන්න.
23 හිතන්න, කෙනෙක් කියනවා කියලා මේ කන්දට ‘මෙතනින් අයින් වෙලා ගිහින් මුහුදේ ගිලෙන්න’ කියලා. ඒක වෙනවා කියලා එයාගේ හිතේ කිසිම සැකයක් නැත්නම්, ඒ ගැන එයාට ලොකු විශ්වාසයක් තියෙනවා නම් ඇත්තටම මම කියනවා එයා කියපු දේ අනිවාර්යයෙන්ම වෙනවා.+
24 ඒ නිසයි මං ඔයාලට කියන්නේ ඔයාලා යාච්ඤා කරද්දී විශ්වාසයෙන් ඉල්ලන්න කියලා. ඉල්ලන දේ දැනටමත් ලැබිලයි තියෙන්නේ කියලා හිතන්න. එතකොට ඒ දේවල් අනිවාර්යයෙන්ම ලැබෙයි.+
25 ඔයාලට කාත් එක්ක හරි ප්‍රශ්නයක් තියෙනවා නම් ඒ ප්‍රශ්නේ මොකක් වුණත් ඔයාලා යාච්ඤා කරද්දී ඒ කෙනාට සමාව දෙන්න. එහෙම කළොත් ස්වර්ගයේ ඉන්න ඔයාලාගේ තාත්තා ඔයාලාගේ වැරදිවලටත් සමාව දෙයි.”+
26 * ——
27 එයාලා ආපහු යෙරුසලමට ආවා. යේසුස් දේවමාලිගාවේ ඇවිද ඇවිද ඉද්දී නායක පූජකයනුයි, නීතිය පිටපත් කරන අයයි, වැඩිමහල්ලෝයි ඔහු ළඟට ඇවිල්ලා
28 මෙහෙම ඇහුවා. “මේ දේවල් කරන්න ඔයාට තියෙන අයිතිය මොකක්ද? කවුද ඔයාට මේවා කරන්න අවසර දුන්නේ?”+
29 එතකොට යේසුස් මෙහෙම කිව්වා. “මමත් ඔයාලාගෙන් එක ප්‍රශ්නයක් අහනවා. ඔයාලා ඒකට උත්තර දුන්නොත් මං මේ දේවල් කරන්නේ කාගේ අවසරෙන්ද කියලා කියන්නම්.
30 මට කියන්න, යොහන් මිනිස්සුන්ව බව්තීස්ම කළේ+ දෙවියන්ගේ* අවසරෙන්ද නැත්නම් මිනිස්සුන්ගේ අවසරෙන්ද කියලා?”+
31 එතකොට එයාලා මෙහෙම කතා වුණා. “අපි ‘දෙවියන්ගේ අවසරෙන්’ කියලා කිව්වොත් එයා අහයි ‘එහෙනං ඇයි ඔයාලා යොහන්ව විශ්වාස කළේ නැත්තේ’ කියලා.
32 ඒත් අපි ‘මිනිස්සුන්ගේ අවසරෙන්’ කියලා කිව්වොත් අපිට මොනවා කරයිද දන්නෑ.” සෙනඟ යොහන්ව අනාගතවක්තෘවරයෙක් විදිහට පිළිගත්ත නිසා සෙනඟ එයාලට මොනවා හරි කරයි කියලා එයාලා බය වුණා.+
33 ඒ නිසා එයාලා යේසුස්ට මෙහෙම උත්තර දුන්නා. “අපි දන්නෑ.” ඉතින් යේසුස් “එහෙනං මේ දේවල් මං කරන්නේ කාගේ අවසරෙන්ද කියලා මාත් ඔයාලට කියන්නේ නෑ” කියලා කිව්වා.
