මාක් 12:1-44
12 ඊටපස්සේ යේසුස් උදාහරණ පාවිච්චි කරලා එයාලට මෙහෙම කිව්වා. “එක මනුස්සයෙක් මිදිවත්තක් වැව්වා.+ එයා ඒක වටේ වැටක් බැඳලා මිදි පාගන්න තැනකුත් ලෑස්ති කළා. ඒකේ මුරකොටුවකුත් හදලා+ ඒ මිදිවත්ත වගා කරන අයට බද්දට දුන්නා. ඊටපස්සේ එයා වෙන රටකට ගියා.+
2 පලදාව නෙළන කාලය ආවාම එයා පලදාවෙන් කොටසක් ලබාගන්න බද්දට දීපු ඒ අය ළඟට දාසයෙක්ව යැව්වා.
3 ඒත් එයාලා ඒ දාසයාව අල්ලගෙන එයාට හොඳටම ගහලා එයාව හිස් අතින් යැව්වා.
4 ඊටපස්සේ ඒ මනුස්සයා තවත් දාසයෙක්ව එයාලා ළඟට යැව්වා. එයාලා ඒ දාසයාගේ ඔළුව තුවාල කරලා එයාට නින්දා කළා.+
5 ඒ මනුස්සයා තවත් දාසයෙක්ව යැව්වාම එයාලා ඒ දාසයාව මරලා දැම්මා. ඔය විදිහට එයා තව දාසයන් හුඟදෙනෙක්ව යැව්වා. ඒ දාසයන්ගෙන් සමහරදෙනෙක්ට එයාලා හොඳටම ගැහුවා. තවත් සමහරුන්ව මරලා දැම්මා.
6 අන්තිමට ඒ මනුස්සයාට යවන්න ඉතුරු වෙලා හිටියේ එක් කෙනෙක් විතරයි. ඒ එයාගේ ආදරණීය පුතා.+ ‘එයාලා මගේ පුතාට ගරු කරයි’ කියලා හිතලා එයා පුතාව යැව්වා.
7 ඒත් මිදිවත්ත වගා කරපු අය මෙහෙම කතා වුණා. ‘මෙයා තමයි මිදිවත්තේ උරුමක්කාරයා.+ එන්න, අපි කට්ටිය එකතු වෙලා මෙයාව මරලා දාමු. එතකොට අපිට මේක අයිති කරගන්න පුළුවන්.’
8 ඉතින් එයාලා පුතාව අල්ලගෙන එයාව මරලා මිදිවත්තෙන් එළියට ඇදලා දැම්මා.+
9 දැන් මිදිවත්තේ අයිතිකරු මොනවා කරයිද? එයා ඇවිත් ඒ කට්ටියව මරලා දාලා මිදිවත්ත වෙනත් කට්ටියකට භාර දෙයි.+
10 ඔයාලා ශුද්ධ ලියවිල්ලෙන් මේ දේ කවදාවත් කියවලා නැද්ද? ‘ඉදි කරන්නන් ඉවතට දාපු ගල දැන් ප්‍රධාන ගල* වෙලා!+
11 ඒ දේ කළේ යෙහෝවායි.* ඒක අපේ ඇස්වලට අදහාගන්න බැරි පුදුම දෙයක්!’”+
12 ඒක ඇහුවාම කොහොමහරි ඔහුව අල්ලගන්න* ඕනෙ කියලා ඔහුගේ විරුද්ධකාරයන් හිතුවා. මොකද යේසුස් ඒ උදාහරණේ කිව්වේ ඒ අයව මනසේ තියාගෙන කියලා එයාලා තේරුම්ගත්තා. ඒත් එයාලා සෙනඟට බය වුණ නිසා එතනින් යන්න ගියා.+
13 ඊටපස්සේ යේසුස් කියන දේකින් ඔහුගේ වරදක් අල්ලගන්න හිතාගෙන පරිසිවරු කීපදෙනෙකුයි, හෙරොද්ගේ පක්ෂයට සම්බන්ධ වෙලා හිටපු කීපදෙනෙකුයි ඔහු ළඟට ආවා.+
14 එයාලා යේසුස්ට මෙහෙම කිව්වා. “ගුරුතුමනි, අපි දන්නවා ඔබ හැම තිස්සේම ඇත්ත කතා කරනවා කියලා. ඔබ අනිත් අයගේ හිත දිනාගන්න දේවල් කරන කෙනෙක් නෙමෙයි. මොකද ඔබට කෙනෙක්ගේ තනතුර, තරාතිරම වැඩක් නැහැ. දෙවියන් ගැන ඔබ උගන්නන්නෙත් සත්‍ය දේවල්. ඉතින් අපිට කියන්න සීසර්ට බදු ගෙවන එක හරිද වැරදිද?
15 අපි ගෙවන්න ඕනෙද? ගෙවන්නේ නැතුව ඉන්නද?” එයාලාගේ කුහකකම තේරුම්ගත්ත යේසුස් එයාලට මෙහෙම කිව්වා. “ඔයාලා මගේ වරදක් අල්ලගන්න හදන්නේ ඇයි? මට ඩිනාරි* කාසියක් දෙන්න.”
16 ඉතින් එයාලා කාසියක් දුන්නා. ඔහු එයාලාගෙන් මෙහෙම ඇහුවා. “මේකේ තියෙන්නේ කාගේ රූපේද? කාගේ නමද?” එයාලා “සීසර්ගේ” කියලා උත්තර දුන්නා.
17 එතකොට යේසුස් එයාලට මෙහෙම කිව්වා. “සීසර්ට අයිති දේ සීසර්ට දෙන්න.+ දෙවියන්ට අයිති දේ දෙවියන්ට දෙන්න.”+ ඔහු කියපු දේ අහලා එයාලා ඇත්තටම පුදුම වුණා.
18 නැවත නැඟිටීමක් නැහැ කියලා කියන සද්දුසිවරු*+ ඔහු ළඟට ඇවිත් මෙහෙම කිව්වා.+
19 “ගුරුතුමනි, දරුවෝ නැතුව කෙනෙක් මැරුණොත් එයාගේ සහෝදරයා එයාගේ බිරිඳව විවාහ කරගන්න ඕනෙ කියලත් එයාලට ලැබෙන දරුවන්ව මැරුණ සහෝදරයාගේ දරුවන් විදිහට සලකන්න ඕනෙ කියලත් මෝසෙස් ලියලා තියෙනවා.+
20 එක පවුලක අයියලා, මල්ලිලා හත්දෙනෙක් හිටියා. වැඩිමලා විවාහ වුණා. ඒත් එයාගේ බිරිඳට දරුවෙක් ලැබෙන්න කලින් එයා මැරුණා.
21 ඉතින් දෙවෙනියා ඒ ස්ත්‍රියව විවාහ කරගත්තා. ඒත් එයාත් දරුවන් ලැබෙන්න කලින් මැරුණා. තුන්වෙනියාත් එයාව විවාහ කරගත්තා. එයාත් ඒ විදිහටම මැරුණා.
22 ඔය විදිහට ඒ හත්දෙනාම එයාව විවාහ කරගත්තත් දරුවන් නැතුව එයාලා මැරුණා. අන්තිමට ඒ ස්ත්‍රියත් මැරුණා.
23 නැවත නැඟිට්ටාම ඒ ස්ත්‍රිය කාගේ බිරිඳ වෙයිද? මොකද අයියලා, මල්ලිලා හත්දෙනාම එයාව විවාහ කරගත්තානේ.”
24 යේසුස් එයාලට මෙහෙම කිව්වා. “ඔයාලට ශුද්ධ ලියවිලි ගැනවත් දෙවියන්ගේ බලය වැඩ කරන විදිහ ගැනවත් හරි අවබෝධයක් නැහැ. ඉතින් ඔයාලා හිතන විදිහ වැරදියි.+
25 මැරිලා ඉන්න අය ආයෙත් ජීවත් වෙද්දී පුරුෂයන් විවාහ වෙන්නෙවත් ස්ත්‍රීන්ව විවාහ කරලා දෙන්නෙවත් නැහැ. එයාලා හරියට ස්වර්ගයේ ඉන්න දේවදූතයන් වගේ වෙනවා.+
26 කටු පඳුර ළඟ සිද්ධිය ගැන මෝසෙස්ගේ ලියවිල්ලෙන් ඔයාලා කියවලා නැද්ද? එතනදී දෙවියන් මෝසෙස්ට කිව්වා ‘ආබ්‍රහම්ගෙත් ඊසාක්ගෙත් යාකොබ්ගෙත් දෙවියන් මමයි’ කියලා. ඒ වෙලාවේ ඔහු කතා කළේ මිය ගිහින් හිටපු, ඒත් ආපහු නැඟිට්ටවන්න යන අය ගැනයි.+
27 ඔහු මැරුණ අයගේ නෙමෙයි ජීවත් වෙන අයගේ දෙවියන්. ඔයාලා හිතන විදිහ සම්පූර්ණයෙන්ම වැරදියි.”+
28 එයාලා අතරේ වුණ සාකච්ඡාව අහගෙන හිටපු නීතිය පිටපත් කරන අයගෙන් එක් කෙනෙක්ට තේරුණා යේසුස් ඒ මිනිස්සුන්ට හොඳට උත්තර දුන්නා කියලා. ඉතින් එයා යේසුස්ගෙන් මෙහෙම ඇහුවා. “හැම ආඥාවකින්ම වැදගත්ම ආඥාව මොකක්ද?”+
29 එතකොට යේසුස් එයාට මෙහෙම කිව්වා. “වැදගත්ම ආඥාව මේකයි. ‘ඊශ්‍රායෙල්වරුනි, ඇහුම්කන් දෙන්න. යෙහෝවා* අපේ දෙවියන්. යෙහෝවා* කියන නමින් ඉන්නේ ඔහු විතරයි.
30 ඔයාලාගේ දෙවි වන යෙහෝවාට* මුළු හදවතින්ම ආදරේ කරන්න. ඒ ආදරේ ඔයාලාගේ මුළු ජීවිතෙන්ම* දකින්න තියෙන්න ඕනේ. ඔයාලාගේ හැම සිතුවිල්ලකින්ම ඒක පැහැදිලි වෙන්න ඕනේ. ඔහුට තියෙන ආදරේ වෙනුවෙන් ඔයාලාගේ මුළු ශක්තියම* වැය කරන්න.’+
31 දෙවෙනි එක මේකයි. ‘ඔයාලා තමන්ට ආදරේ කරනවා වගේ ඔයාලාගේ අසල්වැසියාට ආදරේ කරන්න.’+ ඒ දෙකට වඩා උතුම් ආඥාවක් තවත් නැහැ.”
32 එතකොට නීතිය පිටපත් කරන කෙනා යේසුස්ට මෙහෙම කිව්වා. “ගුරුතුමනි, ඔබ කියපු දේ හරි. ඒක තමයි සත්‍යය. ‘ඉන්නේ එක දෙවි කෙනෙක්. ඔහු හැර වෙන කිසිම දෙවි කෙනෙක් නැහැ.’+
33 ඔහුට මුළු හදවතින්ම ආදරේ කරන එක, ඒ ආදරේ හැම සිතුවිල්ලකින්ම පැහැදිලිව පේන්න තියෙන එක, ඔහුට තියෙන ආදරේ වෙනුවෙන් මුළු ශක්තියම වැය කරන එක, තමන්ට වගේ තමන්ගේ අසල්වැසියාට ආදරේ කරන එක ඇත්තටම දවන පූජාවලට සහ අනිත් හැම පූජාවකටම වඩා ගොඩක් වටිනවා.”+
34 එයා හොඳට හිතලා බලලා කතා කළා කියලා තේරුම්ගත්ත යේසුස් එයාට මෙහෙම කිව්වා. “දෙවියන්ගේ රාජ්‍යයට ඇතුල් වෙන්න ඔයාට තව වැඩි දුර යන්න ඕනෙ නැහැ.” ඊටපස්සේ යේසුස්ගෙන් තව ප්‍රශ්න අහන්න එයාලා හැමෝම බය වුණා.+
35 යේසුස් දේවමාලිගාවේ උගන්න උගන්න ඉද්දී මෙහෙම කිව්වා. “ක්‍රිස්තුස් දාවිත්ගේ පුතා කියලා නීතිය පිටපත් කරන අය කියන්නේ ඇයි?+
36 දෙවියන්ගේ බලයේ මඟ පෙන්වීමෙන්+ දාවිත්ම මෙහෙම කිව්වා. ‘යෙහෝවා* දෙවියන් මගේ ස්වාමීන්ට මෙහෙම කිව්වා. “මම ඔබේ සතුරන්ව ඔබේ පාද යටට දාන කල් මගේ දකුණු පැත්තේ ඉඳගන්න.”’+
37 දාවිත්ම ඔහුට ස්වාමීන් කියලා කියනවා නම් ඔහු දාවිත්ගේ පුතා වෙන්නේ කොහොමද?”+
ඔහු කියපු දේවල් විශාල සෙනඟක් හරිම ආසාවෙන් අහගෙන හිටියා.
38 ඔහු මෙහෙමත් ඉගැන්නුවා. “නීතිය පිටපත් කරන අයගෙන් පරෙස්සම් වෙන්න. දිග ඇඳුම් ඇඳගෙන එහෙට මෙහෙට ඇවිදින්නත් වෙළඳපොළේදී හැමෝම එයාලට ආචාර කරනවාටත් එයාලා හරිම කැමතියි.+
39 එයාලට ඕනෙ සිනගෝගවල ඉස්සරහින්ම තියෙන* ආසනවල ඉඳගන්න. උත්සවවලට ගියාම විශේෂ අමුත්තන්ට වෙන් කරපු ආසනවල ඉඳගන්නයි එයාලා ආස.+
40 එයාලා වැන්දඹුවන්ගේ ගෙවල් දොරවල් උදුරගන්නවා. හැමෝටම පේන්න දිග යාච්ඤා කරනවා. එයාලට ලැබෙන්නේ අනිත් අයට වඩා බරපතළ විනිශ්චයක්.”
41 ඊටපස්සේ ඔහු මුදල් බඳුන්+ පේන තැනක ඉඳගෙන සෙනඟ ඒවාට සල්ලි දාන විදිහ බලාගෙන හිටියා. පොහොසත් අය හුඟදෙනෙක් ගොඩක් සල්ලි ඒවාට දැම්මා.+
42 ඔහොම ඉද්දී දුප්පත් වැන්දඹුවක් එතනට ඇවිත් හරිම සුළු වටිනාකමක් තියෙන පොඩි කාසි දෙකක්* බඳුනට දැම්මා.+
43 ඉතින් යේසුස් ඔහුගේ ගෝලයන්ට ඔහු ළඟට එන්න කියලා මෙහෙම කිව්වා. “ඇත්තටම මං කියන්නේ මේ දුප්පත් වැන්දඹුව බඳුනට දාපු සල්ලි අනිත් හැමෝම දාපු සල්ලිවලට වඩා ගොඩක් වටිනවා.+
44 මොකද ඒ හැමෝම දැම්මේ එයාලට වැඩිපුර තිබුණ දේ. ඒත් මේ දුප්පත් වැන්දඹුව දැම්මේ එයාට ජීවත් වෙන්න ඉතුරු වෙලා තිබුණ දේ. එයාට තිබුණ ඔක්කොම එයා දැම්මා.”+
පාදසටහන්
^ මූ.අ., “ඉහළින්ම තියෙන ප්‍රධාන ගල.”
^ හෝ, “අත්අඩංගුවට ගන්න.”
^ “පැහැදිලි කිරීමක්” බලන්න.
^ ග්‍රීක භාෂාවෙන් සීකී. “පැහැදිලි කිරීමක්” බලන්න.
^ හෝ, “ඔයාට තියෙන හැම දෙයක්ම.”
^ හෝ, “හොඳම.”
