මාක් 9:1-50
-
යේසුස්ගේ පෙනුම වෙනස් වෙයි (1-13)
-
භූතයෙක් වැහුණු දරුවාව සුව කරයි (14-29)
-
විශ්වාසය තියෙනවා නම් සැක කරන්නේ නැහැ (23)
-
-
යේසුස් තමන්ගේ මරණය ගැන ආයෙත් කියයි (30-32)
-
උසස්ම කෙනා කවුද කියලා ගෝලයෝ වාද කරයි (33-37)
-
අපිට විරුද්ධ නැති කෙනා ඉන්නේ අපේ පැත්තේ (38-41)
-
විශ්වාසය අතහරින්න හේතු වෙන දේවල් (42-48)
-
‘ඔයාලත් ලුණු වගේ වෙන්න’ (49, 50)
9 ඔහු එයාලට මෙහෙමත් කිව්වා. “ඇත්තටම මං කියන්නේ මෙතන ඉන්න සමහරදෙනෙක්ට එයාලා මැරෙන්න කලින් දෙවියන්ගේ රාජ්‍යය පාලනය කරන විදිහ දකින්න පුළුවන් වෙනවා කියලා.”+
2 දවස් හයකට පස්සේ පේතෘස්, යාකොබ් සහ යොහන්ව විතරක් එක්කගෙන යේසුස් උස කන්දකට ගියා. එතකොට එයාලා ඉස්සරහා ඔහුගේ පෙනුම වෙනස් වුණා.+
3 ඔහුගේ ඇඳුම් සුදු පාටින් දිලිසෙන්න පටන්ගත්තා. ඒක කොච්චරද කියනවා නම් රෙදි හෝදන කිසිම කෙනෙක්ට සුදු කරන්න බැරි තරමට ඒවා සුදු වෙලා තිබුණා.
4 මෝසෙස් සහ එලියා යේසුස් එක්ක කතා කරකර ඉන්නවත් එයාලා දැක්කා.
5 එතකොට පේතෘස් යේසුස්ට මෙහෙම කිව්වා. “ගුරුතුමනි,* අපිට මෙතන ඉන්න ලැබුණ එක ලොකු සතුටක්. අපි කූඩාරම් තුනක් ගහන්නද? එකක් ඔයාට. එකක් මෝසෙස්ට. අනික එලියාට.”
6 ඇත්තටම කියන්නේ මොනවාද කියලවත් පේතෘස්ට හිතාගන්න බැරි වුණා. මොකද එයාලා හැමෝම ගොඩක් බය වෙලයි හිටියේ.
7 එතකොට එයාලට ඉහළින් වලාකුළක් පෙනුණා. ඒ වලාකුළෙන් මෙහෙම කියන හඬක්+ ඇහුණා. “මේ මගේ ආදරණීය පුතා.+ එයාට ඇහුම්කන් දෙන්න.”+
8 ඒ තුන්දෙනා වටපිට බැලුවාම දැක්කා එයාලා එක්ක ඉන්නේ යේසුස් විතරයි කියලා.
9 එයාලා කන්දෙන් බැහැගෙන එද්දී යේසුස් එයාලට හරිම පැහැදිලිව කිව්වා මනුෂ්‍ය පුත්‍රයා මරණයෙන් නැඟිටින කල්+ එයාලා දැක්ක දේවල් කාටවත් කියන්න එපා කියලා.+
10 එයාලා ඔහු කියපු දේ හිතට ගත්තත්* ඔහු මරණයෙන් නැඟිටිනවා කියන එකේ තේරුම මොකක්ද කියලා එයාලා අතරේ කතා වුණා.
11 එයාලා ඔහුගෙන් මෙහෙම ඇහුවා. “මුලින්ම එන්න ඕනෙ+ එලියා+ කියලා නීතිය පිටපත් කරන අය කියන්නේ ඇයි?”
12 ඔහු එයාලට මෙහෙම කිව්වා. “එලියා අනිවාර්යයෙන්ම මුලින්ම එන්න ඕනේ. එයා ඇවිත් හැම දෙයක්ම සූදානම් කරයි.+ ඒත් මනුෂ්‍ය පුත්‍රයා ගැන ලියවිලිවල කියන්නේ එයා ගොඩක් දුක් විඳිනවා,+ එයාව ප්‍රතික්ෂේප කරනවා කියලයි.+ එහෙම කියලා තියෙන්නේ ඇයි?
13 ඒත් මං ඔයාලට කියන්නේ එලියා+ දැනටමත් ඇවිල්ලා ඉවරයි. ලියවිලිවල එයා ගැන කියලා තියෙන විදිහටම+ මිනිස්සු තමන්ට කැමති කැමති දේවල් එයාට කළා.”
14 එයාලා අනිත් ගෝලයන් ඉන්න තැනට ආවාම ලොකු සෙනඟක් ඒ ගෝලයන් වටේ ඉන්නවා දැක්කා. නීතිය පිටපත් කරන අය ඒ ගෝලයන් එක්ක වාද කරකරයි හිටියේ.+
15 ඒත් ඔහුව දැක්ක ගමන්ම සෙනඟ පුදුම වෙලා ඔහුව හම්බ වෙන්න දුවගෙන ආවා.
16 එතකොට ඔහු මෙහෙම ඇහුවා. “එයාලා එක්ක ඔයාලා වාද කරකර ඉන්නේ මොනවා ගැනද?”
17 ඒ වෙලාවේ සෙනඟ අතරේ හිටපු කෙනෙක් මෙහෙම කිව්වා. “ගුරුතුමනි, මගේ පුතාව මං ඔබ ළඟට ගෙනාවා. එයාට භූතයෙක් වැහිලා. ඒ නිසා එයාට කතා කරන්න බැහැ.+
18 භූතයා වැහෙන හැම වෙලාවකම ඒ භූතයා පුතාව බිමට වට්ටනවා. ඊටපස්සේ පුතාගේ කටින් පෙණ දානවා. එයා දත්මිටි කනවා. ඇඟ පණ නැතුව යනවා. මං ඔබේ ගෝලයන්ගෙන් ඉල්ලුවා භූතයාව එළවන්න කියලා. ඒත් එයාලට ඒක කරන්න බැරි වුණා.”
19 ඔහු සෙනඟට මෙහෙම කිව්වා. “අනේ, විශ්වාසයක් නැති පරම්පරාව,+ ඔයාලට විශ්වාසයක් ඇති වෙන්න මං තව කොච්චර කාලයක් ඔයාලා එක්ක ඉන්න ඕනෙද? තව කොච්චර කාලයක් ඔයාලා කරන දේවල් ඉවසන්නද? දරුවාව මං ළඟට ගේන්න.”+
20 ඉතින් එයාලා දරුවාව යේසුස් ළඟට ගෙනාවා. යේසුස්ව දැක්ක ගමන්ම ඒ භූතයා දරුවාව හොඳටම ගැහෙන්න සැලැස්සුවා. බිම ඇදගෙන වැටුණ දරුවා කටින් පෙණ දදා, බිම පෙරළි පෙරළි හිටියා.
21 දරුවාගේ තාත්තාගෙන් යේසුස් මෙහෙම ඇහුවා. “පුතාට මේක කොච්චර කාලයක් තිස්සේ වෙනවාද?” එතකොට තාත්තා මෙහෙම උත්තර දුන්නා. “පොඩි කාලේ ඉඳන්.
22 පුතාව මරන්න භූතයා නිතරම වගේ එයාව ගින්දරටයි, වතුරටයි ඇදලා දානවා. අනේ, මොනවා හරි කරන්න ඔබට පුළුවන් නම් අපිට අනුකම්පා කරලා උදව් කරන්න.”
23 එතකොට යේසුස් මෙහෙම කිව්වා. “‘පුළුවන් නම්’ කියලා ඇයි ඔයා කියන්නේ? විශ්වාසයක් තියෙන කෙනෙක් කිසිම දෙයක් ගැන සැක කරන්නේ නැහැ.”+
24 ඒ වෙලාවෙම දරුවාගේ තාත්තා කෑගහලා මෙහෙම කිව්වා. “මට විශ්වාසයක් තියෙනවා! ඒත් මගේ විශ්වාසය තව වැඩි කරගන්න මට උදව් කරන්න.”+
25 එයාලා හිටපු තැනට සෙනඟ දුවගෙන එනවා දැකලා යේසුස් භූතයාට සැරෙන් මෙහෙම කිව්වා. “දරුවාව ගොළු බිහිරි කරන භූතයාට මං අණ කරනවා මේ දරුවාගෙන් එළියට එන්න කියලා. ආපහු එයාට වැහෙන්න අවසර නැහැ!”+
26 භූතයා දරුවාට හයියෙන් කෑගහන්නයි, හොඳටම ගැහෙන්නයි සලස්වලා දරුවාගෙන් එළියට ආවා. දරුවා මැරිලා වගේ පෙනුණ නිසා හුඟක් අය මෙහෙම කිව්වා. “දරුවා මැරිලා!”
27 ඒත් යේසුස් දරුවාගේ අතින් අල්ලලා එයාට නැඟිටින්න උදව් කළා. එතකොට දරුවා නැඟිටලා හිටගත්තා.
28 ඊටපස්සේ යේසුස් ගෙදරකට ගියා. එතනදී ඔහුගේ ගෝලයෝ විතරක් ඇවිල්ලා “අපිට ඒ භූතයාව එළවන්න බැරි වුණේ ඇයි” කියලා ඇහුවා.+
29 ඔහු එයාලට මෙහෙම කිව්වා. “ඒ වගේ භූතයෙක්ව එළවන්න පුළුවන් යාච්ඤා කළොත් විතරයි.”
30 එයාලා එතනින් පිටත් වෙලා ගලීලය හරහා ගමන් කළා. ඒත් ඒ ගමන ගැන කවුරුත් දැනගන්නවාට යේසුස් කැමති වුණේ නැහැ.
31 මොකද ඔහුට ඕනෙ වුණා ඔහුගේ ගෝලයන්ට දෙයක් පැහැදිලි කරලා දෙන්න. ඔහු එයාලට මෙහෙම කිව්වා. “මනුෂ්‍ය පුත්‍රයාව ඔහුගේ සතුරන් අතට පාවලා දෙනවා. එයාලා ඔහුව මරලා දායි.+ ඒත් ඔහුගේ මරණයෙන් දවස් තුනකට පස්සේ ඔහු නැඟිටිනවා.”+
32 ඔහු කියපු දේවල් එයාලට තේරුණේ නැහැ. ඒත් ඔහුගෙන් ඒ ගැන ප්‍රශ්න අහන්න එයාලා බය වුණා.
33 එයාලා කපර්ණවුමට ආවා. ගේ ඇතුළේ ඉද්දී යේසුස් එයාලාගෙන් මෙහෙම ඇහුවා. “මඟදී ඔයාලා වාද කරකර ආවේ මොනවා ගැනද?”+
34 ඒත් ගෝලයෝ ඔහුට කිසිම උත්තරයක් දුන්නේ නැහැ. මොකද එයාලා මඟදී වාද කරකර ආවේ එයාලා අතරේ උසස්ම කෙනා කවුද කියන එක ගැනයි.
35 ඉතින් ඔහු වාඩි වෙලා දොළොස්දෙනාට කතා කරලා මෙහෙම කිව්වා. “කාට හරි පළවෙනියා වෙන්න ඕනෙ නම් එයා අන්තිමයා වෙලා හැමෝගෙම සේවකයා වෙන්න ඕනේ.”+
36 ඊටපස්සේ ඔහු පොඩි දරුවෙක්ව එයාලා ඉස්සරහට අරගෙන ඔහුගේ අත් දෙක දරුවාගේ උරහිසේ තියාගෙන මෙහෙම කිව්වා.
37 “මට තියෙන ගෞරවය නිසා* කෙනෙක් මේ වගේ පොඩි දරුවෙක්ව ආදරෙන් පිළිගන්නවා නම්+ එයා මාවත් පිළිගන්නවා. මාව ආදරෙන් පිළිගන්න කෙනා මාව විතරක් නෙමෙයි මාව එවපු තැනැත්තාවත් පිළිගන්නවා.”+
38 යොහන් ඔහුට මෙහෙම කිව්වා. “ගුරුතුමනි, ඔයාගේ නම පාවිච්චි කරලා මනුස්සයෙක් භූතයන් එළවනවා අපි දැක්කා. එයා අපේ කෙනෙක් නෙමෙයි. ඉතින් එයා කරන දේ අපි නතර කරන්න හැදුවා.”+
39 ඒත් යේසුස් මෙහෙම කිව්වා. “එයාව නතර කරන්න හදන්න එපා. මොකද මගේ නමින් බලවත් දෙයක් කරන්න පුළුවන් කෙනෙක්ට ඒක කරන ගමන් මං ගැන නරකක් කියන්න බැහැ.
40 අපිට විරුද්ධව වැඩ කරන්නේ නැති කෙනා ඇත්තටම ඉන්නේ අපේ පැත්තේ.+
41 ඔයාලා ක්‍රිස්තුස්ගේ අනුගාමිකයන් නිසා කවුරු හරි කෙනෙක් ඔයාලට බොන්න වතුර කෝප්පයක් දුන්නොත්+ ඇත්තටම මං කියන්නේ එයාට එයාගේ තෑග්ග අනිවාර්යයෙන්ම ලැබෙනවා කියලා.+
42 ඒත් මං ගැන විශ්වාසය තියන මේ පොඩි දරුවන් වගේ ඉන්න කෙනෙක් වැටිලා යන්න හේතු වෙන දෙයක් කවුරු හරි කරනවා නම් ඒ කෙනාගේ බෙල්ලේ විශාල ඇඹරුම් ගලක්* එල්ලලා එයාව මුහුදට දාන එක හොඳයි.+
43 “ඔයාගේ අත වරදක් කරන්න ඔයාව පොලඹවනවා* නම් ඒක කපලා දාන්න. අත් දෙකම එක්ක නිවන්න බැරි ගින්නක් තියෙන ගෙහෙන්නාවට* යනවාට වඩා අතක් පයක් නැතුව ජීවනය ලබාගන්න එක හොඳයි.+
44 * ——
45 ඔයාගේ කකුල වරදක් කරන්න ඔයාව පොලඹවනවා* නම් ඒක කපලා දාන්න. කකුල් දෙකම එක්ක ගෙහෙන්නාවට*+ යනවාට වඩා කොරෙක් විදිහට ජීවනය ලබාගන්න එක හොඳයි.
46 * ——
47 ඔයාගේ ඇහැ වරදක් කරන්න ඔයාව පොලඹවනවා* නම් ඒක උගුල්ලලා වීසි කරන්න.+ ඇස් දෙකම එක්ක ගෙහෙන්නාවට*+ යනවාට වඩා එක ඇහැක් එක්ක දෙවියන්ගේ රාජ්‍යයට ඇතුල් වෙන එක හොඳයි.
48 ගෙහෙන්නාව කියන්නේ පණුවෝ මැරෙන්නෙවත් නැති, ගින්න නිවලා දාන්නවත් බැරි තැනක්.+
49 “කෑමවලට ලුණු ඉහිනවා වගේ ඒ හැමෝම පිටට ගින්නක් එවනවා.+
50 ලුණු කියන්නේ හොඳ දෙයක්. ඒත් ලුණුවල ලුණු රස නැති වුණොත් ඒ රස ආපහු ගන්නේ කොහොමද?+ ඔයාලත් ලුණු වගේ වෙලා+ ඔයාලා අතරේ තියෙන සමාදානය රැකගන්න.”+
පාදසටහන්
^ මූ.අ., “රබ්බි.”
^ හෝ සමහරවිට, “ඒ ගැන කාටවත් කිව්වේ නැති වුණත්.”
^ හෝ, “මගේ නම නිසා.”
^ හෝ, “බූරුවෙක් කරකවන ඇඹරුම් ගලක්.”
^ මූ.අ., “වැටෙන්න සලස්සනවා.”
^ “පැහැදිලි කිරීමක්” බලන්න.
^ මූ.අ., “වැටෙන්න සලස්සනවා.”
^ “පැහැදිලි කිරීමක්” බලන්න.
^ මූ.අ., “වැටෙන්න සලස්සනවා.”
^ “පැහැදිලි කිරීමක්” බලන්න.
