මීකා 2:1-13
2 “නපුරු දේ කරන්න සැලසුම් කරන අයට දුක් වෙන්න වෙයි!ඔවුන් යහනට ගිහින් දුෂ්ට දේවල් කුමන්ත්‍රණය කරනවා.
උදෙන්ම නැඟිටලා ඒ දේ කරන්න පිටත් වෙනවා.ඔවුන්ගේ අතේ බලය තියෙන නිසා ඔවුන් සැලසුම් කරපු දේ ඒ විදිහටම කරනවා.+
2 ඔවුන් කෙතකට ආශා වුණොත් ඒක පැහැරගන්නවා.+ගේකට ආශා වුණොත් ඒකත් අයිති කරගන්නවා.වෙන කෙනෙක්ගේ ගෙයක් වංචාවෙන් අයිති කරගන්නවා.+අනිත් අයගේ උරුමය පැහැරගන්නවා.
3 ඒ නිසා යෙහෝවා දෙවියන් මෙහෙම කියනවා.
‘මම මේ සෙනඟට* දඬුවම් කරන්න තීරණය කරලා තියෙනවා.+මම ගේන දඬුවමෙන් ගැලවෙන්න ඔබෙන් කිසිම කෙනෙක්ට බැහැ.+
ඒකෙන් පස්සේ ඔබ ආයේ නම් උඩඟු විදිහට+ හැසිරෙන්නේ නැහැ.
මොකද ඒක විපත්තිවලින් පිරුණු කාලයක් වෙයි.+
4 ඒ කාලයේදී මිනිස්සු ඔබ ගැන කියමනක් හදයි.*ඔවුන් ඔබ ගැන හඬා වැලපෙයි.+
ඔවුන් මෙහෙම කියයි. “අපි නැත්තටම නැති වෙලා!+
ඔහු අපේ සෙනඟට අයිති දේශය වෙනත් සෙනඟකට දුන්නා. ඔහු ඒක අපෙන් උදුරගත්තා!+
දෙවියන්ට නමස්කාර නොකරන සෙනඟකට අපේ කෙත්වතු ලබා දුන්නා.”
5 ඔබට බෙදලා දුන්න ඉඩම් ලණුවලින් මනින්න කිසිම කෙනෙක් ඉතුරු වෙන්නේ නැහැ.යෙහෝවා වන මගේ සෙනඟ අතරේ ඉඩම් වෙන් කරලා දෙන්න කවුරුත්ම ඉන්න යන්නේ නැහැ.
6 “දේශනා කරන* එක නවත්තන්න” කියලා ඔවුන් කියනවා.“ඔය පණිවිඩය කියන එක දැන් නවත්තලා දාන්න!අපි කවදාවත් නින්දාවට පත් වෙන්නේ නැහැ” කියලත් ඔවුන් කියනවා.
7 යාකොබ්ගේ පුත්‍රයෙනි, ඔබ මෙහෙම කතා වෙනවාද?
“යෙහෝවාගේ ඉවසීම නැති වෙලාද?
ඔහු ඇත්තටම ඒ වගේ දේවල් කරයිද?”
ඒත් නිර්දෝෂ ජීවිතයක් ගත කරන අයට යහපත කරනවා කියලා මම පොරොන්දු වෙලා නැද්ද?
8 හැබැයි ළඟකදී ඉඳන් මගේ සෙනඟ සතුරෙක් වගේ වැඩ කරන්න පටන් අරන්.
යුද්ධයක් ජය අරන් ආපහු ගෙදර එන අය වගේ සමහරු කිසිම බයක් නැතුව ඇවිදන් යද්දීඔබ එළිමහනේදීම ඒ අය පැලඳගෙන ඉන්න වටිනා දේවල් ඔවුන්ගේ ඇඳුමත් එක්කම* උදුරගන්නවා.
9 මගේ සෙනඟ අතරේ ඉන්න ස්ත්‍රියක් නිවසේ සතුටින් කල් ගෙවනවා දැක්කාමඔබ ඇයව එතනින් පන්නලා දානවා.ඇගේ දරුවන්ට මම දීපු යහපත් දේවල් ඔබ ඔවුන්ගෙන් උදුරගන්නවා.
10 ජනයෙනි, මෙහෙන් පිට වෙලා යන්න. මොකද සැනසීමෙන් ඉන්න පුළුවන් තැනක් මෙහේ නැහැ.
දේශයේ සිද්ධ වෙන අපවිත්‍ර දේවල්+ නිසා දේශය පිටට මහත් විනාශයක් එනවා.+ඒ නිසා ඔවුන්ට හුඟක් දුක් විඳින්න වෙයි.
11 හුළඟ පස්සේ යන, වංක දේවල් කරන කෙනෙක් ඇවිත්
“ඔබට වයින්, මත්පැන් ඇති වෙන්න බොන්න පුළුවන්” කියලා බොරුවට කිව්වොත්
මේ සෙනඟ ඔවුන්ගේ පණිවිඩකරු* විදිහට ඔහුව ඉහළින්ම පිළිගනියි!+
12 යාකොබ්ගේ සෙනඟෙනි, මම අනිවාර්යයෙන්ම ඔබව ආයෙත් එකට එකතු කරගන්නවා.+ඊශ්‍රායෙල්වරුන් අතරින් ඉතුරු වෙලා ඉන්න අයව මම එකතු කරනවා.
එකම ගාලක ඉන්න බැටළුවන් වගෙත් තණබිමේ ඉන්න බැටළු රැළක් වගෙත්+මම ඔවුන්ට එකමුතුව එකට ඉන්න සලස්වනවා.එතන සෙනඟ පිරිලා ඉඳියි. ඔවුන්ගේ හඬ ඈතට විහිදෙයි.’+
13 වැටකඩුලු බිඳලා දාන කෙනා ඔවුන්ට ඉදිරියෙන් යයි.ඔවුනුත් එතනින් නිදහස් වෙලා දොරටුව පහු කරගෙන එළියට යයි.+
ඔවුන්ගේ රජු ඔවුන්ට ඉදිරියෙන් ගමන් කරයි.ඔවුන් හැමෝටම ඉස්සරහින් ගමන් කරන්නේ යෙහෝවා දෙවියන්.”+
පාදසටහන්
^ මූ.අ., “පවුලට.”
^ හෝ, “ප්‍රසිද්ධ කරයි.”
^ හෝ, “අනාවැකි කියන.”
^ හෝ සමහරවිට, “ඔවුන්ගේ ඇඳුම්වල තියෙන වටිනා දේ.”
^ හෝ, “අනාගතවක්තෘ.”
