යෙරෙමියා 22:1-30
22 යෙහෝවා දෙවියන් මෙහෙම කියනවා. “යූදාවල රජගේ මාලිගාවට ගිහින් මේ පණිවිඩය කියන්න.
2 ‘දාවිත්ගේ සිංහාසනයේ ඉඳගෙන ඉන්න යූදාවල රජ්ජුරුවෙනි, යෙහෝවා කියන මේ දේට ඇහුම්කන් දෙන්න. ඔබත් මේ දොරටුවලින් ඇතුල් වෙන ඔබේ සේවකයනුත් ඔබේ සෙනඟත් මේ දේට සවන් දෙන්න.
3 යෙහෝවා කියන්නේ මේකයි. “යුක්තිය ඉටු කරන්න. හරි දේ කරන්න. වංචා කරන අයගෙන් බැට කන අයව බේරගන්න. කිසිම විදේශිකයෙක්ට හිංසා පීඩා කරන්න එපා. පියා නැති දරුවෙක්ටවත්* වැන්දඹුවකටවත් හිරිහැර කරන්න එපා.+ මේ ස්ථානයේදී අහිංසක අයගේ ලේ හලන්න එපා.+
4 ඔබ ඒ දේවල් පිළිපදින්න වගබලා ගත්තොත් දාවිත්ගේ සිංහාසනයේ ඉඳගන්න රජවරු+ අශ්ව රථවල සහ අශ්වයන් පිටේ නැඟලා මේ මාලිගාවේ දොරටුවලින් ඇතුල් වෙයි. ඔවුන් එක්ක ඔවුන්ගේ සේවකයනුත් සෙනඟත් ඇතුල් වෙයි.”’+
5 “යෙහෝවා මෙහෙම කියනවා. ‘ඒත් ඔබ ඒ දේවලට කීකරු වුණේ නැත්නම් මේ මාලිගාව පාළුවට ගිය තැනක් වෙනවා කියලා මම මං ගැනම දිවුරලා කියනවා.’+
6 “යූදාවල රජගේ මාලිගාව ගැන යෙහෝවා මෙහෙම කියනවා.‘ඔබ හරියට ගිලියද්වල තියෙන වනාන්තරය වගෙයි.ලෙබනොන්වල කඳු මුදුනක් වගෙයි.
ඒත් මම ඔබව පාළුකරයක් කරනවා.ඔබේ එක නගරයකවත් කිසිම කෙනෙක් ඉතුරු වෙන්නේ නැහැ.+
7 මම විනාශ කරන්නන්ව පත් කරනවා.ඔවුන් තමන්ගේ අවි අරගෙන ඔබට විරුද්ධව එයි.+
ඔවුන් ඔබේ හොඳම දේවදාර ගස් කපලාඒවා ගින්නට දායි.+
8 බොහෝ ජාතීන්ට අයිති සෙනඟ මේ නගරය පහු කරගෙන යද්දී එකිනෙකාගෙන් මෙහෙම අහයි. “මේ ශ්‍රේෂ්ඨ නගරයට යෙහෝවා දෙවියන් මෙහෙම කළේ ඇයි?”+
9 එතකොට මිනිස්සු මෙහෙම උත්තර දෙයි. “එහෙම වුණේ ඔවුන්ගේ දෙවි වන යෙහෝවා එක්ක ඇති කරගත්ත ගිවිසුම ඔවුන් කඩ කරපු නිසයි. ඔවුන් වෙනත් දෙවිවරු ඉස්සරහා වැඳ වැටිලා ඒ දෙවිවරුන්ට නමස්කාර කරපු නිසයි.”’+
10 මිය ගිය රජ ගැන අඬා වැලපෙන්න එපා.ඔහු ගැන ශෝක වෙන්න එපා.
ඒ වෙනුවට වහලෙක් විදිහට යන කෙනා ගැන අඬා වැලපෙන්න.මොකද ඔහුට ආයේ ඔහුගේ උපන් දේශය දකින්න ලැබෙන්නේ නැහැ.
11 මේ දේශයෙන් අරන් ගිය යූදාවල රජ වුණ ෂල්ලුම්*+ ගැන ඒ කියන්නේ යොෂියාගෙන්+ පස්සේ රජකමට පත් වුණ ඔහුගේ පුතා ගැන යෙහෝවා කියන්නේ මේකයි. ‘ඔහු ආයේ මෙහෙට එන්නේ නැහැ.
12 මොකද වහලෙක් විදිහට ඔහුව අරන් ගිය දේශයේම ඔහු මැරෙනවා. ඔහු මේ දේශය ආයේ දකින්නේ නැහැ.’+
13 වංක විදිහට වැඩ කරලා තමන්ට මාලිගාවක් ගොඩනඟාගන්න කෙනා,අසාධාරණකම් කරලා ඒකේ උඩුමහල් කාමර හදාගන්න කෙනා මොන තරම් දරුණු විපතක් අද්දකියිද!ඔහු සේවකයන්ගෙන් නිකම් වැඩ ගන්නවා.ඔවුන්ට දෙන්න ඕනෙ කුලිය ඔහු ගෙවන්නේ නැහැ.+
14 ඔහු මෙහෙම කියනවා. ‘මම විශාල උඩුමහල් කාමර තියෙන මන්දිරයක් හදාගන්නවා.මම ඒකට ජනෙල් සවි කරනවා.
ඒකේ බිත්තිවලට දේවදාර ලී අල්ලලාඒවාට රතු සායම් ගානවා.’
15 කාටවත් දෙවෙනි නොවන විදිහට දේවදාර ලී පාවිච්චි කරලා මාලිගාව හදාගත්ත නිසා ඔබ දිගටම රජකම් කරයි කියලා හිතනවාද?
ඔබේ පියාටත් ඇති තරම් කෑම බීම තිබුණා.ඒත් ඔහු නම් සාධාරණ විදිහට වැඩ කළා. හරි දේ කළා.+ඔහු සාර්ථක වුණේ ඒ නිසයි.
16 අසරණ, දුප්පත් අය වෙනුවෙන් ඔහු යුක්තිය ඉටු කළා.ඒ නිසා හැම දෙයක්ම හොඳින් සිද්ධ වුණා.
‘මාව හොඳින් අඳුරගත්ත කෙනෙක් වැඩ කරන්න ඕනෙ එහෙම නෙමෙයිද’ කියලා යෙහෝවා අහනවා.
17 ‘ඒත් ඔබ හැම වෙලාවෙම බලන්නේ වංක විදිහට වාසි ප්‍රයෝජන ලබාගන්න. ඔබ හිතන්නෙම ඒ ගැනයි.ඔබ බලන්නේ අහිංසකයන්ගේ ලේ හලන්නයි.වංචාවෙන් සහ බලහත්කාරයෙන් දේවල් ලබාගන්නයි.’
18 “ඒ නිසා යොෂියාගේ පුත්, යූදාවල රජ වුණ යෙහෝයාකිම්+ ගැන යෙහෝවා කියන්නේ මේකයි.‘ඔහු මැරුණාම කිසිම කෙනෙක්
“අනේ මගේ සහෝදරයා! අනේ මගේ සහෝදරී,
බලන්නකෝ වෙච්ච දේ” කියලා අඬා වැලපෙන්නේ නැහැ.
“අනේ අපේ ස්වාමියා! අනේ අපේ රජතුමා” කියලා කිසිම කෙනෙක් අඬන්නේ නැහැ.
19 ඔහු මැරුණාම කරන්නෙත් බූරුවෙක් මැරුණාම කරන දේමයි.+ඔහුගේ මළ කඳ ඇදගෙන ගිහින්යෙරුසලමේ දොරටුවලින් එළියට වීසි කරලා දානවා.’+
20 ලෙබනොන්වලට ගිහින් අඬා වැලපෙන්න.බාෂාන්වල ඉඳන් කෑගහන්න.අබරිම්වල+ ඉඳන් කෑ මොර ගහන්න.මොකද දැන් ඔබේ පෙම්වතුන් හැමෝවම පොඩි කරලා දාලා.+
21 ඔබ බයක් සැකක් නැතුව ජීවත් වුණ කාලේදී මම ඔබට කතා කළා.
ඒත් ඔබ කිව්වා ‘මං කීකරු වෙන්නේ නැහැ’ කියලා.+
තරුණ කාලේ ඉඳන්ම ඔබ ජීවත් වුණේ එහෙමයි.මොකද ඔබ මගේ හඬට සවන් දුන්නේ නැහැ.+
22 ඔබේ එඬේරුන් හුළඟකට ගහගෙන යනවා.+ඔබේ පෙම්වතුන්ව වහල්කමට ගෙනියනවා.
ඔබ අද්දකින විපත් නිසා ඔබ ලැජ්ජාවටත් නින්දාවටත් පත් වෙනවා.
23 ලෙබනොන්වල ජීවත් වෙන ඔබට,+දේවදාර ගස් අතරේ තමන්ගේ කැදැල්ල හදාගන්න ඔබට,+දරුවෙක් බිහි කරද්දී දැනෙන වේදනාවට සමාන වේදනාවක් දැනෙයි.+එතකොට ඔබ අඬන්නේ කොහොමද?”
24 “යෙහෝවා මෙහෙම කියනවා. ‘යෙහෝයාකිම්ගේ+ පුත්, යූදාවල රජ වුණ කොනියා*+ මගේ දකුණතේ පැලඳගෙන ඉන්න වටින මුද්දක්* වගේ වුණත් මම ඔහුව අයින් කරලා දානවා කියලා ජීවමාන දෙවි වන මම මං ගැනම දිවුරලා කියනවා.
25 ඔහුව මරලා දාන්න හොයන අයගේ අතටත් ඔහු බයෙන් ඉන්න අයගේ අතටත් බැබිලෝනියේ රජ වන නෙබුකද්නෙෂර්ගේ* අතටත් කල්දිවරුන්ගේ අතටත් මම ඔහුව හසු කරලා දෙනවා.+
26 මම ඔහුවත් ඔහුගේ අම්මාවත් මව්බිමෙන් වෙනත් දේශයකට පන්නලා දානවා. එහෙදී ඔහු මැරෙනවා.
27 ආපහු එන්න ආසාවෙන් බලාගෙන ඉන්න දේශයට ඔවුන්ට ආයේ කවදාවත් එන්න ලැබෙන්නේ නැහැ.+
28 කොනියා කියන තැනැත්තා වැඩකට නැති මැටි බඳුනක්ද?කාටවත් ඕනෙ නැති බිඳුණු මැටි බඳුනක්ද?
ඔහුවත් ඔහුගෙන් පැවතෙන්නන්වත් පහතට ඇදලා දැම්මේ ඇයි?ඔවුන් නොදන්න දේශයකට ඔවුන්ව වීසි කළේ ඇයි?’+
29 පොළොවේ* ජීවත් වෙන සියල්ලෙනි, යෙහෝවාට හොඳින් ඇහුම්කන් දෙන්න.
30 යෙහෝවා මෙහෙම කියනවා.
‘මේ මිනිසා දරුවන් නැති කෙනෙක් කියලත්ජීවිත කාලේ පුරාම කිසිම සාර්ථකත්වයක් අද්දකින්නේ නැති කෙනෙක් කියලත් ලියාගන්න.මොකද ඔහුගෙන් පැවතෙන කිසිම කෙනෙක්ට දාවිත්ගේ සිංහාසනයේ ඉඳගන්න ලැබෙන්නේ නැහැ.ඔවුන්ට ආයේ යූදා දේශය පාලනය කරන්න ලැබෙන්නේ නැහැ.’”+
පාදසටහන්
^ හෝ, “අම්මා තාත්තා නැති දරුවෙක්ටවත්.”
^ යෙහෝයහාෂ් කියලත් හඳුන්වනවා.
^ මූ.අ., “මුද්‍රා තියන මුද්දක්.”
^ යෙහෝයාකින් සහ යෙකොනියා කියලත් හඳුන්වනවා.
^ මූ.අ., “නෙබුකද්රෙෂර්ගේ.” ඒ නම ලියන වෙන විදිහක්.
^ හෝ, “දේශයේ.”
