යෙරෙමියා 23:1-40
23 “මගේ තණබිමේ ඉන්න බැටළුවන්ව විනාශ කරන, උන්ව විසුරුවාහරින එඬේරු කොච්චර දරුණු විපතක් අද්දකියිද” කියලා යෙහෝවා කියනවා.+
2 ඊශ්‍රායෙල්වරුන්ගේ දෙවි වන යෙහෝවා තමන්ගේ සෙනඟව රැකබලා ගන්න පත් කරපු එඬේරුන්ට විරුද්ධව කියන්නේ මේකයි. “ඔබ මගේ බැටළුවන්ව විසුරුවාහැරියා. ඔබ ඔවුන්ව බලාගන්නවා වෙනුවට ඔවුන්ව ඒ මේ අත යවනවා.”+
“ඔබේ ඒ දුෂ්ට වැඩ නිසා මමත් ඔබ ගැන බලන්නේ නැහැ” කියලා යෙහෝවා කියනවා.
3 “විවිධ දේශවලට විසුරුවාහැරිය මගේ බැටළුවන්ගෙන් ඉතුරු වෙලා ඉන්න අයව මම එකට එකතු කරනවා.+ මම ඔවුන්ව ආපහු ඔවුන්ගේ තණබිමට අරගෙන එනවා.+ ඔවුන් දරුවන් බිහි කරලා ගණනින් ගොඩක් වැඩි වෙයි.+
4 මම ඔවුන්ව හොඳින් රැකබලා ගන්න එඬේරුන්ව පත් කරනවා.+ ඔවුන් ආයේ කලබල වෙන්නෙවත් බය වෙන්නෙවත් නැහැ. ඔවුන්ගෙන් එක් කෙනෙක්වත් නැති වෙන්නේ නැහැ” කියලා යෙහෝවා කියනවා.
5 “බලන්න! මම දාවිත්ගේ පෙළපතින් ධර්මිෂ්ඨ කෙනෙක්ව* නැඟිට්ටවන කාලයක් එනවා”+ කියලා යෙහෝවා කියනවා. “ඔහු අනිවාර්යයෙන්ම රජකම් කරනවා.+ ඔහු අවබෝධයෙන් වැඩ කරන, දේශය පුරා යුක්තිය ඉටු කරන, ධර්මිෂ්ඨකමින් පාලනය කරන රජ කෙනෙක්.+
6 ඔහු රජකම් කරන කාලේදී යූදාව බේරගන්නවා.+ ඊශ්‍රායෙල් සුරක්ෂිතව ජීවත් වෙනවා.+ ‘අපි ධර්මිෂ්ඨව ඉන්නේ යෙහෝවා නිසයි’ කියන නමින් ඔහුව හඳුන්වනවා.”+
7 යෙහෝවා මෙහෙම කියනවා. “‘ඊශ්‍රායෙල්වරුන්ව ඊජිප්තුවෙන් පිටතට ගෙනාපු යෙහෝවා ජීවමානයි කියන දේ ස්ථිරයි’ කියලා ඔවුන් තවත් දිවුරන්නේ නැති කාලයක් එනවා.+
8 ඒ වෙනුවට ඔවුන් මෙහෙම දිවුරයි. ‘ඊශ්‍රායෙල් සෙනඟගෙන් පැවතෙන අයව උතුරු දේශයෙනුත් ඔවුන්ව විසුරුවාහැරිය අනිත් දේශවලිනුත් ආපහු ගෙනාව යෙහෝවා ජීවමානයි කියන දේ ස්ථිරයි.’ මොකද ඔවුන් තමන්ගෙම දේශයේ ජීවත් වෙයි.”+
9 මේ පණිවිඩය අනාගතවක්තෘවරුන්ටයි.
මගේ හිතට ලොකු වේදනාවක් දැනෙනවා.
මගේ ඇටකටු ගැහෙනවා.
යෙහෝවා නිසාත් ඔහුගේ ශුද්ධ වදන් නිසාත්මම ඉන්නේ මත් වෙලා.හරියට වයින් බීලා මත් වුණ කෙනෙක් වගෙයි.
10 අනාචාරයේ යෙදෙන අයගෙන්* දේශය පිරිලා.+දේශයට ශාප කරලා තියෙන නිසා දේශය වැලපෙනවා.+පාළුකරයේ තණබිම් වේළිලා ගිහින්.+
ඔවුන් වැඩ කරන්නේ දුෂ්ට විදිහටයි. තමන්ගේ බලය ඔවුන් අයුතු විදිහට පාවිච්චි කරනවා.
11 “අනාගතවක්තෘවරු වගේම පූජකයොත් හරිම දූෂිතයි.*+
මගේ ගෘහය ඇතුළෙත් ඔවුන් දුෂ්ට දේවල් කරනවා”+ කියලා යෙහෝවා කියනවා.
12 “ඒ නිසා ඔවුන්ගේ මාර්ගය ලිස්සනසුලු, අඳුරු මාර්ගයක් වෙනවා.+ඔවුන්ව තල්ලු කරලා දානවා. ඔවුන් වැටිලා යනවා.
විනිශ්චය ලැබෙන අවුරුද්දේදීමම ඔවුන් පිටට විපත්ති ගේනවා” කියලා යෙහෝවා කියනවා.
13 “සමාරියේ අනාගතවක්තෘවරු+ කරන පහත් දේවල් මම දැක්කා.
ඔවුන් බාල්ගේ නමින් අනාවැකි කියනවා.ඔවුන් මගේ සෙනඟ වන ඊශ්‍රායෙල්වරුන්ව නොමඟ යවනවා.
14 යෙරුසලමේ අනාගතවක්තෘවරු කරන පිළිකුල්සහගත දේවල් මම දැක්කා.
ඔවුන් අනාචාරයේ යෙදෙනවා.+ ඔවුන්ගේ මුළු ජීවිතේම බොරුවක්.+ඔවුන් දුෂ්ටයන්ට අනුබල දෙනවා.ඒ නිසා කිසිම කෙනෙක් ඔවුන්ගේ දුෂ්ට මාර්ග අතහරින්නේ නැහැ.
මට ඔවුන් හැමෝවම පේන්නේ සොදොම්වල මිනිස්සු වගෙයි.+නගරයේ ඉන්න සෙනඟ ගොමෝරාවේ වැසියන් වගෙයි.”+
15 ඒ නිසා ස්වර්ගයේ සේනාවල අධිපති වන යෙහෝවා අනාගතවක්තෘවරුන්ට විරුද්ධව මෙහෙම කියනවා.
“මම ඔවුන්ට තිත්ත පැල කන්න දෙනවා.විෂ වතුර බොන්න දෙනවා.+
මොකද යෙරුසලමේ අනාගතවක්තෘවරු නිසා දේශය පුරාම ඉන්න අය දෙවියන්ට විරුද්ධව කැරලිගහනවා.”
16 ස්වර්ගයේ සේනාවල අධිපති වන යෙහෝවා කියන්නේ මේකයි.
“ඔබට අනාවැකි කියන අනාගතවක්තෘවරුන්ට ඇහුම්කන් දෙන්න එපා.+
ඔවුන් ඔබව මුළා කරනවා.*
දර්ශන දැක්කා කියලා කිව්වත් ඔවුන් කියන්නේ හිතින් මවාගත්ත දේවල්+ මිසක්යෙහෝවාගෙන් ලැබුණ දේවල් නෙමෙයි.+
17 මට අගෞරව කරන අයට ඔවුන් ආයේ ආයේ කියන්නේ‘“ඔබට සාමයෙන්, සතුටින් ඉන්න පුළුවන්” කියලා යෙහෝවා කියනවා’ කියලයි.+
තමන්ගේ මුරණ්ඩු හිත කියන විදිහට වැඩ කරන හැමෝටම ඔවුන් කියන්නේ‘ඔබට කරදරයක් වෙන්නේ නැහැ’ කියලයි.+
18 යෙහෝවාගේ වචනය අහන්නත් ඒක දකින්නත් පුළුවන් වුණේ කාටද?ඒක අහන්නත් දකින්නත් ඔහුට කිට්ටුවෙන් ඉන්න අය අතරේ හිටියේ කවුද?
ඔහුගේ වචනය හිතට ගත්තෙත් ඒකට ඇහුම්කන් දුන්නෙත් කවුද?
19 බලන්න! යෙහෝවාගේ කේන්තිය සුළි කුණාටුවක් වගේ හමාගෙන එනවා.ඒක සුළිසුළඟක් වගේ ඇවිත් දුෂ්ටයාගේ ඔළුවට කඩන් වැටෙනවා.+
20 යෙහෝවා කරන්න හිතපු දේ කරලා ඉවර වෙන කල්ඔහුගේ කේන්තිය නිවිලා යන්නේ නැහැ.
අවසාන කාලේදී ඔබ ඒ ගැන හොඳින්ම තේරුම්ගනියි.
21 මම අනාගතවක්තෘවරුන්ව එව්වේ නැහැ. ඒත් ඔවුන් ගියා.
මම ඔවුන්ට කිසිම දෙයක් දැනුම් දුන්නේ නැහැ. ඒත් ඔවුන් අනාවැකි කිව්වා.+
22 මට කිට්ටුවෙන් ඉන්න අය අතරේ ඔවුන් හිටියා නම්ඔවුන් මගේ සෙනඟට මගේ වචන කියයි.සෙනඟ ගිය වැරදි මාර්ගයෙන් සහ දුෂ්ට වැඩවලින් ඉවත් වෙන්න උදව් කරයි.”+
23 “මාව දෙවියන් විදිහට සලකන්නේ මං ඔබ ළඟින් ඉද්දී විතරද? ඈතින් ඉද්දීත් මං දෙවියන් නෙමෙයිද” කියලා යෙහෝවා අහනවා.
24 “කිසිම මනුස්සයෙක්ට මගෙන් හැංගෙන්න පුළුවන්ද”+ කියලා යෙහෝවා අහනවා.
“ස්වර්ගයෙත් පොළොවෙත් තියෙන හැම දෙයක්ම මට පේන්නේ නැද්ද”+ කියලා යෙහෝවා අහනවා.
25 “අනාගතවක්තෘවරු ‘මම සිහිනයක් දැක්කා! මම සිහිනයක් දැක්කා’ කියලා මගේ නමින් කියන බොරු අනාවැකි මට ඇහුණා.+
26 අනාගතවක්තෘවරු තව කොච්චර කාලයක් මේ විදිහට බොරු අනාවැකි කියන්න හිතාගෙන ඉන්නවාද? ඔවුන් අනාවැකි කියන්නේ ඔවුන්ගේ හිතේ තියෙන වංචනික අදහස්වලට අනුවයි.+
27 මේ අනාගතවක්තෘවරුන් හදන්නේ ඔවුන් දැක්කයි කියලා කියන සිහින ගැන එකිනෙකාට කියලා මගේ නම මගේ සෙනඟට අමතක කරවන්න. හරියට ඔවුන්ගේ පියවරුන් බාල්ට නමස්කාර කරලා මගේ නම අමතක කළා වගේ.+
28 සිහිනයක් දැක්ක අනාගතවක්තෘවරයාට පුළුවන් ඒ ගැන කියන්න. ඒත් මගේ පණිවිඩය ලැබුණ කෙනා ඒ ගැන අවංකව කියන්න ඕනේ.”
“ධාන්‍ය එක්ක බලද්දී පිදුරුවල වටිනාකමක් තියෙනවාද” කියලා යෙහෝවා අහනවා.
29 “මගේ වචනය ගින්නක් වගේ නෙමෙයිද”+ කියලා යෙහෝවා අහනවා. “ඒවා පර්වතයක් කුඩු කරන කුළු ගෙඩියක්* වගේ නෙමෙයිද?”+
30 යෙහෝවා මෙහෙම කියනවා. “අනිත් අනාගතවක්තෘවරුන්ගෙන් මගේ වචන හොරකම් කරලා ඒවා විකෘති කරලා කියන අනාගතවක්තෘවරුන්ට මම දඬුවම් කරනවා.”+
31 “‘දෙවියන් මෙහෙම කියනවා’ කියකිය තමන්ගේ අදහස් කියන අනාගතවක්තෘවරුන්ට මම දඬුවම් කරනවා” කියලා යෙහෝවා කියනවා.+
32 “බොරු සිහින කියන අනාගතවක්තෘවරුන්ට මම දඬුවම් කරනවා” කියලා යෙහෝවා කියනවා. “මොකද ඔවුන් තමන්ගේ බොරුවලින් සහ මහ ලොකුවට කියන කතාවලින් මගේ සෙනඟව නොමඟ යවනවා.”+
“මම ඔවුන්ව එව්වෙවත් අනාවැකි කියන්න කියලා අණ කළේවත් නැහැ. ඒ නිසා ඔවුන් කියන දේවලින් මේ සෙනඟට කිසි ප්‍රයෝජනයක් ලැබෙන්නේ නැහැ”+ කියලා යෙහෝවා කියනවා.
33 “‘යෙහෝවාගේ පණිවිඩය අපිට ලොකු බරක්’ කියලා මේ සෙනඟ හරි අනාගතවක්තෘවරයෙක් හරි පූජකයෙක් හරි ඔබට කිව්වොත් ඔවුන්ට මෙහෙම කියන්න. ‘“ලොකු බරක් වෙලා තියෙන්නේ ඔබයි! ඉතින් මම ඔබව අයින් කරලා දානවා”+ කියලා යෙහෝවා කියනවා.’
34 අනාගතවක්තෘවරයෙක් හරි පූජකයෙක් හරි සෙනඟගෙන් කෙනෙක් හරි ‘යෙහෝවාගේ පණිවිඩය ලොකු බරක්’ කියලා කිව්වොත් මම ඒ කෙනාටත් ඔහුගේ පවුලේ අයටත් දඬුවම් කරනවා.
35 ඒ හැම කෙනෙක්ම තමන්ගේ අසල්වැසියාටයි, සහෝදරයාටයි මෙහෙම කියකිය ඉන්නවා. ‘යෙහෝවා දුන්න උත්තරේ මොකක්ද? යෙහෝවා කියලා තියෙන්නේ මොකක්ද?’
36 ඒත් යෙහෝවාගේ පණිවිඩය ලොකු බරක් කියලා ආයේ කියන්න එපා. ජීවමාන අපේ දෙවියන්ගේ, ස්වර්ගයේ සේනාවල අධිපති වන යෙහෝවාගේ පණිවිඩය ඔබ වෙනස් කරලා ඔබේම අදහස් කියන නිසයි ඒක ඔබට ලොකු බරක් වෙලා තියෙන්නේ.
37 “ඔබ අනාගතවක්තෘගෙන් මෙහෙම අහන්න. ‘යෙහෝවා දුන්න උත්තරේ මොකක්ද? යෙහෝවා කියලා තියෙන්නේ මොකක්ද?
38 “යෙහෝවාගේ පණිවිඩය ලොකු බරක්” කියලා ඔබ දිගින් දිගටම කියනවා නම් යෙහෝවා මෙහෙම කියනවා. “‘යෙහෝවාගේ පණිවිඩය ලොකු බරක්’ කියලා කියන්න එපා කියලා මම කිව්වාට පස්සෙත් ඔබ ‘යෙහෝවාගේ පණිවිඩය ලොකු බරක්’ කියලා කියන නිසා
39 මම ඔබව අරගෙන මගේ ඉස්සරහින් අහකට වීසි කරනවා. මම ඔබව විතරක් නෙමෙයි ඔබටයි, ඔබේ මුතුන්මිත්තන්ටයි දුන්න නගරයත් අතහැරලා දානවා.
40 මම සදහටම ඔබව නින්දාවට පත් කරනවා. ඔබ අද්දකින ලැජ්ජාව කවදාවත් අමතක වෙන්නේ නැහැ.”’”+
පාදසටහන්
^ මූ.අ., “අංකුරයක්.”
^ හෝ, “දෙවියන්ට අවිශ්වාසවන්ත වුණ අයගෙන්.”
^ හෝ, “දෙවියන්ව අතහැරලා.”
^ හෝ, “ඔවුන් ඔබට බොරු බලාපොරොත්තු දෙනවා.”
^ ඒ කියන්නේ විශාල මිටියක්.
