යෙරෙමියා 32:1-44
32 යූදාවල රජ වන ශෙදකියා පාලනය කරපු 10වෙනි අවුරුද්දේ ඒ කියන්නේ නෙබුකද්නෙෂර්* රජ පාලනය කරපු 18වෙනි අවුරුද්දේ+ යෙරෙමියාට යෙහෝවා දෙවියන්ගෙන් පණිවිඩයක් ලැබුණා.
2 ඒ කාලේදී බැබිලෝනියේ රජගේ හමුදාව යෙරුසලම වටලගෙනයි හිටියේ. ඒ වෙද්දී අනාගතවක්තෘ යෙරෙමියාව යූදාවල රජමාලිගාවේ තිබුණ මුරකරුගේ මළුවේ රඳවලා තිබුණා.+
3 යූදාවල රජ වන ශෙදකියා එයාව රඳවලා තිබ්බේ+ මෙහෙම කියලයි. “ඇයි ඔයා මේ වගේ අනාවැකි කියන්නේ? ඔයා කියනවා ‘යෙහෝවා කියන්නේ මේකයි. “මම මේ නගරය බැබිලෝනියේ රජගේ අතට භාර දෙනවා. ඔහු ඒක යටත් කරගන්නවා”+ කියලා.
4 “යූදාවල රජ වන ශෙදකියාට කල්දිවරුන්ගේ අතින් බේරෙන්න හම්බ වෙන්නේ නැහැ. මොකද ඔහුව අනිවාර්යයෙන්ම බැබිලෝනියේ රජගේ අතට අල්ලලා දෙනවා. ඔහුට ඒ රජව මූණට මූණ හම්බ වෙලා කතා කරන්න වෙනවා.”’+
5 ‘බැබිලෝනියේ රජ ශෙදකියාව බැබිලෝනියට අරන් යයි. මම ඔහු ගැන තීරණයක් ගන්න කල් එහෙට වෙලා ඉන්න ඔහුට සිද්ධ වෙනවා’ කියලා යෙහෝවා කියනවා. ‘ඔබ කල්දිවරුන්ට විරුද්ධව කොච්චර සටන් කළත් ඒකෙන් වැඩක් වෙන්නේ නැහැ.’”+
6 යෙරෙමියා මෙහෙම කිව්වා. “යෙහෝවාගෙන් මට මේ පණිවිඩය ලැබුණා.
7 ‘යෙරෙමියා, ඔයාගේ තාත්තාගේ සහෝදරයා වන ෂල්ලුම්ගේ පුතා හනමෙල් ඔයා ළඟට ඇවිත් මෙහෙම කියයි. “අනාතොත්වල+ තියෙන මගේ ඉඩම සල්ලි දීලා බේරගන්න. මොකද ඒකට මුල්ම අයිතිය තියෙන්නේ ඔයාට.”’”+
8 යෙහෝවා කියපු විදිහටම මගේ තාත්තාගේ සහෝදරයාගේ පුතා හනමෙල් මුරකරුගේ මළුවේ හිටපු මං ළඟට ඇවිල්ලා මෙහෙම කිව්වා. “බෙන්ජමින් දේශයේ අනාතොත්වල තියෙන මගේ ඉඩම සල්ලි දීලා ගන්න. ඒක උරුම කරගන්න අයිතිය තියෙන්නේ ඔයාටයි. ඔයාට තමයි පුළුවන් ඒ ඉඩම බේරගන්න. අනේ, ඒක ඔයා ගන්න.” එතකොට මට තේරුණා ඒක යෙහෝවාම කරන්න කියපු දෙයක් කියලා.
9 ඉතින් මම අනාතොත්වල තිබුණ ඉඩම මගේ තාත්තාගේ සහෝදරයාගේ පුතා වුණ හනමෙල්ගෙන් සල්ලි දීලා ගත්තා. මම එයාට රිදී ෂෙකෙල් 17ක්* කිරලා දුන්නා.+
10 ඊටපස්සේ මම ඔප්පුවක් හදලා+ ඒක මුද්‍රා කළා. සාක්ෂිකරුවන්ට එන්න කියලා+ එයාලා ඉස්සරහා සල්ලි කිරලා දුන්නා.
11 ඉතින් නීතිරීතිවලට අනුව මම ගත්ත ඉඩමේ මුද්‍රා කරපු විකුණුම් ඔප්පුවයි, මුද්‍රා කරලා තිබුණේ නැති ඔප්පුවයි අරගෙන
12 විකුණුම් ඔප්පුව මං මසේයාගේ පුතා වුණ නෙරියාගේ පුතා+ බාරුක්ගේ+ අතට දුන්නා. මං ඒක දුන්නේ මගේ තාත්තාගේ සහෝදරයාගේ පුතා වුණ හනමෙල්, ඔප්පුවට අත්සන් කරපු සාක්ෂිකරුවන් සහ මුරකරුගේ මළුවේ ඉඳගෙන හිටපු යුදෙව්වන් හැමෝම ඉස්සරහයි.+
13 ඊටපස්සේ හැමෝම ඉස්සරහා මම බාරුක්ට මෙහෙම අණ කළා.
14 “ස්වර්ගයේ සේනාවල අධිපති සහ ඊශ්‍රායෙල්වරුන්ගේ දෙවි වන යෙහෝවා මෙහෙම කියනවා. ‘මේ ලියවිලි ඒ කියන්නේ මුද්‍රා කරපු විකුණුම් ඔප්පුවයි, මුද්‍රා කරපු නැති එකයි අරගෙන ඒවා මැටි බඳුනකට දාන්න. එතකොට ඒවා සෑහෙන කාලයක් ආරක්ෂා වෙලා තියෙයි.’
15 මොකද ස්වර්ගයේ සේනාවල අධිපති සහ ඊශ්‍රායෙල්වරුන්ගේ දෙවි වන යෙහෝවා මෙහෙම කියනවා. ‘ගෙවල් දොරවල්, වතුපිටි, මිදිවතු සල්ලි දීලා ගන්න කාලයක් ආපහු මේ දේශයට එනවා.’”+
16 නෙරියාගේ පුතා වුණ බාරුක්ගේ අතට ඉඩමේ ඔප්පුව දුන්නාට පස්සේ මම යෙහෝවාට මෙහෙම යාච්ඤා කළා.
17 “ශ්‍රේෂ්ඨතම පාලකයාණන් වන යෙහෝවා දෙවියනි, ඔබ ඔබේ අත දිගහැරලා ඔබේ මහත් බලය පාවිච්චි කරලා අහසත් පොළොවත් හැදුවා.+ ඔබට කරන්න බැරි දෙයක් නැහැ.
18 පරම්පරා දහස් ගාණකට ඔබ නොසැලෙන ආදරයක් පෙන්නනවා. ඒත් පියවරුන්ගේ වැරදි නිසා දරුවන්ට ලැබෙන්න ඕනෙ ප්‍රතිඵල ඔබ නොදී ඉන්නෙත් නැහැ.+ සැබෑ දෙවියන් ඔබයි. ශ්‍රේෂ්ඨ, බලවත් තැනැත්තා ඔබයි. ස්වර්ගයේ සේනාවල අධිපති වන යෙහෝවා කියලා හඳුන්වන්නේ ඔබවයි.
19 ඔබ කරන්න අදහස් කරන දේවල් හරිම ශ්‍රේෂ්ඨයි. ඔබේ ක්‍රියාවන් බලවත්.+ ඔබ මිනිස්සු කරන හැම දෙයක්ම දිහා බලාගෙන ඉන්නවා.+ එහෙම කරන්නේ එක් එක් කෙනා ජීවත් වෙන විදිහට, වැඩ කරන විදිහට අනුව ප්‍රතිඵල දෙන්නයි.+
20 ඊජිප්තු දේශයේදී ඔබ ආශ්චර්යයන් සහ පුදුම ක්‍රියා කළා. ඒවා අදටත් ප්‍රසිද්ධයි. ඒ දේවල් කරලා ඔබ ඔබේ නම ඊශ්‍රායෙල් දේශයෙත් හැම මනුෂ්‍යයෙක් අතරෙත් ප්‍රසිද්ධ කරලා තියෙනවා.+ අදටත් ඔබේ නම මිනිස්සු දන්නවා.
21 ඔබ ඔබේ අත දිගහැරලා ඔබේ මහත් බලය පාවිච්චි කරලා පුදුමසහගත ක්‍රියා, ආශ්චර්යයන් සහ හරිම භයානක දේවල් කරලා ඔබේ සෙනඟ වන ඊශ්‍රායෙල්වරුන්ව ඊජිප්තුවෙන් පිටතට ගෙනාවා.+
22 “කාලයක් ගියාට පස්සේ ඔබ මේ සෙනඟට එයාලාගේ මුතුන්මිත්තන්ට පොරොන්දු වුණ+ කිරියෙන් සහ පැණියෙන් ඉතිරෙන මේ දේශය+ දුන්නා.
23 එයාලා මේ දේශයට ඇවිත් ඒක අයිති කරගත්තා. ඒත් එයාලා ඔබ කියපු දේවලට කීකරු වුණේවත් ඔබේ නීතිය පිළිපැද්දෙවත් නැහැ. ඔබ එයාලට කරන්න අණ කරපු කිසිම දෙයක් එයාලා කළේ නැහැ. මේ හැම විපතක්ම ඔබ සෙනඟ පිටට ගෙනාවේ ඒ නිසයි.+
24 බලන්න! නගරය අල්ලගන්න මිනිස්සු ඒක වටේ බැම්මක් බැඳලා.+ කල්දිවරුන් මේ නගරයට විරුද්ධව සටන් කරනවා. කඩුවත්+ සාගතයත් වසංගතත්*+ නිසා එයාලා මේ නගරය අනිවාර්යයෙන්ම අල්ලගන්නවා. ඔබ කිව්ව විදිහටම ඒ හැම දෙයක්ම වුණා.
25 ශ්‍රේෂ්ඨතම පාලකයාණන් වන යෙහෝවා දෙවියනි, මේ නගරය අනිවාර්යයෙන්ම කල්දිවරුන්ගේ අතට භාර දෙනවා කියලා තියෙද්දී ඔබ මට කිව්වා ‘සල්ලි දීලා ඉඩම ගන්න. ඒකට සාක්ෂිකරුවන්ව කැඳවන්න’ කියලා.”
26 එතකොට යෙහෝවා දෙවියන් යෙරෙමියාට මෙහෙම කිව්වා.
27 “මම යෙහෝවා. මුළු මිනිස් වර්ගයාගේම දෙවියන් මමයි. මට කරන්න බැරි කිසිම දෙයක් තියෙනවාද?
28 ඉතින් යෙහෝවා කියන්නේ මෙහෙමයි. ‘මම මේ නගරය කල්දිවරුන්ගේ අතටත් බැබිලෝනියේ රජ වන නෙබුකද්නෙෂර්ගේ* අතටත් භාර දෙනවා. ඔහු ඒක අල්ලගන්නවා.+
29 මේ නගරයට විරුද්ධව සටන් කරන කල්දිවරු ඇවිත් ඒකට ගිනි තියලා ඒක සම්පූර්ණයෙන්ම අළු කරලා දානවා.+ මාව කේන්ති ගස්සන්න පැතලි වහල උඩ බාල්ට පූජාත් වෙනත් දෙවිවරුන්ට පාන පූජාත් ඔප්පු කරපු හැම ගෙයක්ම+ නගරයත් එක්ක පුච්චලා දානවා.’
30 “‘මොකද ඊශ්‍රායෙල්වල සහ යූදාවල සෙනඟ ඔවුන්ගේ තරුණ කාලේ ඉඳන්ම කළේ මම වැරදියි කියලා සලකන දේවල්.+ ඊශ්‍රායෙල් සෙනඟ ඔවුන් කරන වැඩවලින් දිගින් දිගටම මාව කේන්ති ගැස්සුවා කියලා’ යෙහෝවා කියනවා.
31 ‘මේ නගරය ගොඩනඟපු දවසේ ඉඳන් අද වෙන කල්ම එහේ වෙලා තියෙන්නේ මාව ගොඩක් කේන්ති ගස්සන දේවල්මයි.+ ඒ නිසා ඒක මගේ ඉස්සරහින් අයින් කරන්න ඕනේ.+
32 මොකද ඊශ්‍රායෙල්වල සහ යූදාවල සෙනඟ නරක දේවල් ගොඩක් කළා. ඔවුන් හැමෝම ඒ කියන්නේ ඔවුන්ගේ රජවරුන්,+ අධිපතීන්,+ පූජකයන්, අනාගතවක්තෘවරුන්,+ යූදාවල පුරුෂයන් සහ යෙරුසලමේ ඉන්න අය ඒ දේවල් කරලා මාව කේන්ති ගැස්සුවා.
33 ඔවුන් මං දිහාවට හැරෙනවා වෙනුවට දිගටම මට පිටුපෑවා.+ මම ආයේ ආයේ* ඔවුන්ට උගන්නන්න උත්සාහ කළත් එක් කෙනෙක්වත් ඇහුම්කන් දීලා හික්මවීම් පිළිගත්තේ නැහැ.+
34 ඔවුන් මගේ නම දරන ගෘහය අපවිත්‍ර කරන්න පිළිකුල්සහගත රූප ඒකේ තිබ්බා.+
35 ඒ විතරක් නෙමෙයි ඔවුන් බෙන්හින්නොම් නිම්නයේ*+ බාල්ට පූජාසන* ගොඩනැඟුවා. එහෙම කළේ ඔවුන්ගේ දූදරුවන්ව ගින්නෙන් දවලා මෝලෙක්ට ඔප්පු කරන්න.+ ඒ වගේ දෙයක් කරන්න කියලා මම ඔවුන්ට අණ කළේ නැහැ.+ ඒ වගේ පිළිකුල් දෙයක් කරන්න කියනවා තියා ඒ වගේ අදහසක් මගේ හිතට ආවේවත් නැහැ. ඒකෙන් යූදා කොච්චර බරපතළ වරදකට වැටුණාද!’
36 “ඔබ කියනවා මේ නගරය කඩුව, සාගතය සහ වසංගත නිසා බැබිලෝනියේ රජ අල්ලගන්නවා කියලා. ඒත් ඊශ්‍රායෙල්වරුන්ගේ දෙවි වන යෙහෝවා මේ නගරය ගැන කියන්නේ මේකයි.
37 ‘මම ලොකු කේන්තියකින්, කෝපයකින් ඔවුන්ව විසුරුවාහැරපු හැම දේශයකින්ම ඔවුන්ව ආපහු එකට එකතු කරගන්නවා.+ මම ඔවුන්ව ආපහු මේ දේශයට ගෙනල්ලා ඔවුන්ට සුරක්ෂිතව ජීවත් වෙන්න අවස්ථාව දෙනවා.+
38 ඔවුන් මගේ සෙනඟ වෙනවා. මම ඔවුන්ගේ දෙවියන් වෙනවා.+
39 මම ඔවුන්ට එක හිතක් දෙනවා.+ එක මාර්ගයක් පෙන්නනවා. එතකොට හැමදාටම මට ගරුබිය පෙන්නන්න ඔවුන්ට පුළුවන් වෙයි. මම එහෙම කරන්නේ ඔවුන්ගෙත් ඔවුන්ගේ දරුවන්ගෙත් යහපතටයි.+
40 මම හැමදාටම තියෙන ගිවිසුමක් ඔවුන් එක්ක ඇති කරගන්නවා.+ ඒ ගිවිසුමට එකඟව ඔවුන් වෙනුවෙන් යහපත් දේවල් කරන එක මම කවදාවත් නතර කරන්නේ නැහැ.+ ඒ වගේම මං ගැන ගරුබියක් ඔවුන්ගේ හිත්වල මම ඇති කරනවා. එතකොට ඔවුන් මාව කවදාවත් අතහැරලා යන්නේ නැහැ.+
41 මම හරිම සතුටින් ඔවුන් වෙනුවෙන් යහපත් දේවල් කරනවා.+ මම ඔවුන්ව මේ දේශයේ ස්ථිරව පිහිටුවනවා.+ මං ඒ දේවල් කරන්නේ මගේ මුළු හදවතින්මයි, මුළු ශක්තියම යොදවලයි.’”*
42 “මොකද යෙහෝවා මෙහෙම කියනවා. ‘මම මේ සෙනඟ පිටට මේ හැම දරුණු විපතක්ම ගෙනාපු විදිහටම ඔවුන්ට පොරොන්දු වෙන හැම යහපත් දෙයක්මත් මම ලබා දෙනවා.+
43 “කිසිම මිනිසෙක්වත් සතෙක්වත් නැතුව මේ දේශය පාළුවට ගිහින්. මේ දේශය දැන් කල්දිවරුන්ගේ අතට භාර දීලා” කියලා ඔබ කිව්වාට මේ දේශයේ වතුපිටි සල්ලි දීලා ගන්න කාලයක් ආයේ එනවා.’+
44 “‘මිනිස්සු සල්ලි දීලා වතුපිටි ගන්න, විකුණුම් ඔප්පු හදන, ඒවා මුද්‍රා කරන, සාක්ෂිකරුවන්ව කැඳවන කාලයක් එනවා.+ බෙන්ජමින් දේශයෙත් යෙරුසලම අවට තියෙන ප්‍රදේශවලත් යූදාවල නගරවලත්+ කඳුකරයේ තියෙන නගරවලත් පහත් බිම්වල+ සහ දකුණේ තියෙන නගරවලත් එහෙම කරන කාලයක් එනවා. මොකද වහලුන් විදිහට ඉන්න සෙනඟව මම ආපහු අරන් එනවා’+ කියලා යෙහෝවා කියනවා.”
පාදසටහන්
^ මූ.අ., “නෙබුකද්රෙෂර්.” ඒ නම ලියන වෙන විදිහක්.
^ හෝ සමහරවිට, “රන් ෂෙකෙල් හතකුත් රිදී ෂෙකෙල් දහයකුත් කිරලා දුන්නා.” ෂෙකෙලයක් කියන්නේ ග්‍රෑම් 11.4ක්. උප. B14 බලන්න.
^ හෝ, “ලෙඩ රෝගත්.”
^ මූ.අ., “නෙබුකද්රෙෂර්ගේ.” ඒ නම ලියන වෙන විදිහක්.
^ මූ.අ., “උදේ පාන්දර නැඟිටලා.”
^ හෝ, “හින්නොම්ගේ පුතාගේ නිම්නයේ.” “පැහැදිලි කිරීමක්” යටතේ තියෙන “ගෙහෙන්නාව” බලන්න.
^ මූ.අ., “උස් තැන්.”
^ හෙබ්‍රෙව් භාෂාවෙන් නෙෆෙෂ්. “පැහැදිලි කිරීමක්” බලන්න.
