යෙරෙමියා 33:1-26
33 මුරකරුගේ මළුවේ රඳවලා හිටිය යෙරෙමියාට දෙවෙනි පාරටත් යෙහෝවා දෙවියන්ගෙන් පණිවිඩයක් ලැබුණා.+ දෙවියන් මෙහෙම කිව්වා.
2 “පොළොවේ සැදුම්කරු යෙහෝවායි. පොළොව හදලා ඒක ස්ථිරව පිහිටෙව්වේ ඔහුයි. ඔහුගේ නම යෙහෝවායි. යෙහෝවා මෙහෙම කියනවා.
3 ‘මට කතා කරන්න. මම ඔබට උත්තර දෙනවා. ඔබ දැනන් හිටියේ නැති, ඔබට තේරුම්ගන්න බැරි ශ්‍රේෂ්ඨ දේවල් ගැන මම හරිම කැමැත්තෙන් ඔබට කියලා දෙනවා.’”+
4 “මේ නගරයේ ගෙවල් සහ යූදාවල රජවරුන්ගේ මාලිගා කඩලා දාන්න වුණා. එහෙම කළේ නගරයට පහර දෙන්න සතුරන් හදපු බැම්මෙන් සහ කඩු පහරෙන් ආරක්ෂා වෙන්නයි. ඒ විදිහට කඩලා දාපු ගෙවල් ගැන ඊශ්‍රායෙල්වරුන්ගේ දෙවි වන යෙහෝවාට කියන්න දෙයක් තියෙනවා.+
5 කල්දිවරුන්ට විරුද්ධව සටනට එන අය ගැනත් මගේ ඇවිළෙන කේන්තිය නිසා මැරුම් කන අයගේ මළ කඳන්වලින් පිරිලා යන මේ තැන් ගැනත් මට කියන්න දෙයක් තියෙනවා. ඔවුන්ගේ දුෂ්ටකම් නිසා මම මේ නගරය අතහැරියා.
6 මට කියන්න තියෙන්නේ මේකයි. ‘මම ඇයව සුව කරනවා. මම ඇයව ශක්තිමත් කරනවා.+ මම ඔවුන්ව සනීප කරලා සමාදානය සහ සත්‍යය කිසිම අඩුවක් නැතුව ඔවුන්ට ලබා දෙනවා.+
7 වහලුන් විදිහට ඉන්න යූදා සහ ඊශ්‍රායෙල් සෙනඟව මම ආපහු ගේනවා.+ මම ඔවුන්ව ගොඩනඟනවා. ඔවුන් ආයෙත් කලින් හිටපු විදිහටම ඉඳියි.+
8 ඔවුන් මට විරුද්ධව කරලා තියෙන හැම වරදක්ම මකලා දාලා මම ඔවුන්ව පිරිසිදු කරනවා.+ ඔවුන් මට විරුද්ධව කරපු වැරදිවලට මම ඔවුන්ට සම්පූර්ණයෙන්ම සමාව දෙනවා.+
9 මම ඇය වෙනුවෙන් කරන යහපත් දේවල් ගැන පොළොවේ ඉන්න හැම ජාතියකටම අහන්න ලැබෙයි. ඇය නිසා ඔවුන් අතරේ මට ප්‍රසිද්ධියක්, සතුටක්, ප්‍රශංසාවක් සහ අලංකාරයක් ලැබෙයි.+ මම ඇය වෙනුවෙන් කරන යහපත් දේවල් නිසාත් ඇයට ලබා දෙන සමාදානය නිසාත්+ ඔවුන් බයෙන් වෙවුලයි.’”+
10 “යෙහෝවා මෙහෙම කියනවා. ‘කිසිම මිනිසෙක්වත් සතෙක්වත් නැතුව මේ දේශය පාළුවට ගිහින් කියලා ඔබ කියයි. ඒත් මේ දේශයෙන් ඒ කියන්නේ මිනිසුන්වත් සතුන්වත් නැතුව පාළුවට ගිය යූදාවල නගරවලින් සහ යෙරුසලමේ පාරවල්වලින්
11 සතුටින් කෑගහන හඬත් ප්‍රීති ඝෝෂා නඟන හඬත්+ මනාලයාගේ සහ මනාලියගේ හඬත් ආයෙත් ඇහෙයි. “ස්වර්ගයේ සේනාවල අධිපති වන යෙහෝවාට ස්තුති කරන්න. මොකද යෙහෝවා යහපත්.+ ඔහුගේ ඉමහත් ආදරේ* කවදාවත් වෙනස් වෙන්නේ නැහැ”+ කියලා කියන අයගේ හඬත් ඇහෙයි.’
“‘ඔවුන් දෙවියන්ට ස්තුති කරන්න පූජා අරගෙන යෙහෝවා දෙවියන්ගේ මාලිගාවට එයි.+ මොකද මම වහලුන් විදිහට ඉන්න අයව ආපහු ගේනවා. ඔවුන් කලින් වගේම මේ දේශයේ ජීවත් වෙයි’ කියලා යෙහෝවා කියනවා.”
12 “ස්වර්ගයේ සේනාවල අධිපති වන යෙහෝවා මෙහෙම කියනවා. ‘කිසිම මිනිසෙක්වත් සතෙක්වත් නැතුව පාළුවට ගිය මේ ස්ථානයේ වගේම හැම නගරයක් අවටම එඬේරුන්ට තමන්ගේ රැළ ගෙනියන්න තණබිම් තියෙයි.’+
13 “‘කඳුකරයේ තියෙන නගරවලත් පහත් බිම්වල සහ දකුණේ තියෙන නගරවලත් බෙන්ජමින් දේශයෙත් යෙරුසලම අවට තියෙන ප්‍රදේශවලත්+ යූදාවල නගරවලත්+ එඬේරු තමන්ගේ රැළේ බැටළුවන්ව ගණන් කරන කාලයක් ආයෙත් එනවා’ කියලා යෙහෝවා කියනවා.”
14 “යෙහෝවා මෙහෙම කියනවා. ‘ඊශ්‍රායෙල්ගෙන් පැවතෙන අයටත් යූදාගෙන් පැවතෙන අයටත් මම දුන්න පොරොන්දුව ඉටු කරන කාලය අනිවාර්යයෙන්ම එනවා.+
15 ඒ දවස්වලදී දාවිත්ගේ පෙළපතින් ධර්මිෂ්ඨ කෙනෙක්ව මම නැඟිට්ටවනවා.*+ ඔහු දේශය පුරා යුක්තිය සහ ධර්මිෂ්ඨකම පිහිටුවයි.+
16 ඒ කාලේදී යූදාව බේරගන්නවා.+ ඊශ්‍රායෙල් සුරක්ෂිතව ජීවත් වෙනවා.+ ‘අපි ධර්මිෂ්ඨව ඉන්නේ යෙහෝවා නිසයි’ කියන නමින් ඇයව හඳුන්වනවා.’”+
17 “මොකද යෙහෝවා මෙහෙම කියනවා. ‘ඊශ්‍රායෙල් දේශයේ රජකම් කරන්න හැමදාමත් දාවිත්ගේ පෙළපතේ කෙනෙක් ඉඳියි.+
18 මං ඉස්සරහා දවන පූජා ඔප්පු කරන්නත් ධාන්‍ය පූජා ගින්නෙන් දවලා ඔප්පු කරන්නත් අනිත් පූජා ඔප්පු කරන්නත් ලෙවී ගෝත්‍රයේ පූජකයෙක් හැමදාම ඉඳියි.’”
19 යෙහෝවාගෙන් යෙරෙමියාට ආයෙත් පණිවිඩයක් ලැබුණා. ඔහු මෙහෙම කිව්වා.
20 “යෙහෝවා මෙහෙම කියනවා. ‘රාත්‍රිය එක්කත් දවාල එක්කත් මං ඇති කරගෙන තියෙන ගිවිසුම කඩ කරලා නියම වෙලාවට දවාල සහ රාත්‍රිය එන එක වළක්වන්න ඔබට පුළුවන්ද?+
21 එහෙම කරන්න ඔබට පුළුවන් වුණොත් විතරයි දාවිත්ගේ සිංහාසනයේ ඉඳගන්න ඔහුගේ පුතෙක් හැමදාම ඉන්නවා කියලා+ දාවිත් එක්ක මං ඇති කරගත්ත ගිවිසුම මං කඩ කරන්නේ.+ මගේ සේවකයන් වන ලෙවී ගෝත්‍රයේ පූජකයන් එක්ක මං ඇති කරගත්ත ගිවිසුම+ මං කඩ කරන්නේ.
22 අහසේ තරු ගණන් කරන්නවත් මුහුදු වෙරළේ වැලි මැනලා බලන්නවත් බැහැ වගේ මගේ සේවකයා වන දාවිත්ගෙන් පැවතෙන අයගේ ගාණත් මට සේවය කරන ලෙවීවරුන්ගේ ගාණත් කාටවත් ගණන් කරන්න බැරි වෙනවා. මම ඔවුන්ගේ ගාණ ඒ තරමටම වැඩි කරනවා.’”
23 යෙහෝවා ආයෙත් යෙරෙමියාට මෙහෙම කිව්වා.
24 “‘යෙහෝවා තෝරගත්ත පවුල් දෙක ඔහුම ප්‍රතික්ෂේප කරයි’ කියලා මේ සෙනඟ කියනවා ඔයාට ඇහුණේ නැද්ද? විරුද්ධවාදීන් මගේ සෙනඟට අගෞරව කරනවා. ඒ අය ආයෙත් ඔවුන්ව ජාතියක් විදිහට සලකන්නේ නැහැ.
25 “යෙහෝවා මෙහෙම කියනවා. ‘දවාල සහ රාත්‍රිය එක්ක මං ඇති කරගත්ත ගිවිසුමත්+ අහස සහ පොළොවට මං දුන්න නීතිත්+ කවදාවත් වෙනස් වෙන්නේ නැහැ වගේ
26 යාකොබ්ගේ පෙළපතත් මගේ සේවක දාවිත්ගේ පෙළපතත් ප්‍රතික්ෂේප කරන්නේ නැහැ කියලා මං කියපු දේ කවදාවත් වෙනස් වෙන්නේ නැහැ. ඒ නිසා ආබ්‍රහම්, ඊසාක් සහ යාකොබ්ගෙන් පැවතෙන අයව පාලනය කරන්න මම දාවිත්ගෙන් පැවතෙන අයව තෝරගන්නවා. වහලුන් විදිහට ඉන්න අයව මම ආයෙත් එකට එකතු කරනවා.+ මම ඔවුන්ට අනුකම්පාව පෙන්නනවා.’”+
පාදසටහන්
^ හෝ, “නොසැලෙන ආදරේ.”
^ මූ.අ., “ඒ දවස්වලදී දාවිත් වෙනුවෙන් ධර්මිෂ්ඨ අංකුරයක් හටගන්න සලස්වනවා.”
