යොෂුවා 1:1-18
1 යෙහෝවා දෙවියන්ගේ සේවකයා වුණ මෝසෙස් මිය ගියාට පස්සේ මෝසෙස්ගේ සේවකයා+ වුණ නූන්ගේ පුත් යොෂුවාට*+ යෙහෝවා මෙහෙම කිව්වා.
2 “මගේ සේවක මෝසෙස් මිය ගිහින්.+ ඉතින් ඔයා මේ මුළු සෙනඟත් එක්ක යොර්දාන් ගඟෙන් එගොඩ වෙලා ඊශ්‍රායෙල්වරුන්ට මං දෙන්න යන දේශයට යන්න.+
3 මං මෝසෙස්ට පොරොන්දු වුණ විදිහටම ඔයාලා යන හැම ප්‍රදේශයක්ම මං ඔයාලට උරුමයක් හැටියට දෙනවා.+
4 හිත්තීවරුන්ට+ අයිති මුළු ප්‍රදේශයම ඔයාලට අයිති වෙනවා. පාළුකරයේ ඉඳන් ලෙබනොන් දේශය දක්වා සහ යුප්‍රටීස් කියන මහ ගඟ දක්වා තියෙන ප්‍රදේශයත් බස්නාහිර පැත්තේ තියෙන මහ මුහුද*+ දක්වා තියෙන ප්‍රදේශයත් මම ඔයාලට දෙනවා.
5 ඔයා ජීවත් වෙන තාක් කල් ඔයාට විරුද්ධව සටන් කරන කිසිම කෙනෙක් සාර්ථක වෙන්නේ නැහැ.+ මම මෝසෙස් එක්ක හිටියා වගේ ඔයා එක්කත් ඉන්නවා.+ මං කවදාවත් ඔයාව තනි කරන්නෙවත් අත්හැරලා යන්නෙවත් නැහැ.+
6 දැන් හිතට ධෛර්යය ගන්න. එඩිතරව ඉන්න.+ මේ සෙනඟගේ මුතුන්මිත්තන්ට දෙනවා කියලා මං දිවුරලා පොරොන්දු වුණ දේශයට එයාලව අරන් යන්නේ ඔයායි.+
7 “ඒත් ඔයා හිතට ධෛර්යය අරන් එඩිතරව ඉන්න ඕනේ. මගේ සේවකයා වන මෝසෙස් ඔයාලට කියලා දුන්න නීතියට පිටු පාලා වැරදි මාර්ගයක යන්න එපා.*+ ඒ නීතියේ තියෙන හැම දෙයක්ම ඒ විදිහටම කරන්න. එතකොට ඔයා කරන හැම දෙයක්ම ඥානවන්තව කරන්න ඔයාට පුළුවන් වෙයි.+
8 මේ නීතියේ තියෙන හැම දෙයක්ම පිළිපදින අරමුණින් රෑ දවල් දෙකේම ඒක කියවලා ඒ ගැන හොඳට කල්පනා කරන්න.*+ ඒ ගැන නිතරම අනිත් අය එක්ක කතා කරන්න.+ එතකොට ඥානවන්ත තීරණ අරන් ජීවිතය සාර්ථක කරගන්න ඔයාට පුළුවන්.+
9 කලින් කියපු දේම මම දැන් ආයෙත් ඔයාට කියනවා. හිතට ධෛර්යය අරන් එඩිතරව ඉන්න. ඔයා කොහේ ගියත් ඔයාගේ දෙවි යෙහෝවා වන මම ඔයාත් එක්ක ඉන්නවා. ඒ නිසා කිසිම දේකට බය වෙන්නවත් කලබල වෙන්නවත් එපා.”+
10 ඊටපස්සේ සෙනඟව බලාගන්න පත් කරපු නිලධාරීන්ට යොෂුවා මෙහෙම අණ කළා.
11 “කඳවුරේ හැම තැනටම ගිහින් සෙනඟට මෙහෙම කියන්න. ‘තව දවස් තුනකින් ඔයාලා යොර්දාන් ගඟෙන් එගොඩ වෙලා ඔයාලාගේ දෙවි යෙහෝවා ඔයාලට දෙන්න යන දේශය යටත් කරගන්නවා. ගමනට ඕනෙ කරන කෑම බීම දැන් ලෑස්ති කරගන්න.’”+
12 ඊටපස්සේ රූබෙන් ගෝත්‍රයේ අයටත් ගාද් ගෝත්‍රයේ අයටත් මනස්සේ ගෝත්‍රයෙන් එක කොටසකටත් යොෂුවා මෙහෙම කිව්වා.
13 “යෙහෝවාගේ සේවකයා වුණ මෝසෙස් ඔයාලට කියපු දේ මතක් කරගන්න.+ ‘ඔයාලාගේ දෙවි යෙහෝවා ඔයාලට කරදරයක් නැතුව නිදහසේ ජීවත් වෙන්න මේ දේශය දීලා තියෙනවා.
14 යොර්දාන් ගඟෙන් මේ පැත්තේ* තියෙන ප්‍රදේශය මෝසෙස් ඔයාලට දුන්නා. ඔයාලාගේ භාර්යාවන්ටත් දරුවන්ටත් සත්තුන්ටත් මෙහේ නවතින්න පුළුවන්.+ ඒත් ඔයාලාගේ සහෝදරයන්ට ඔයාලා උදව් කරන්න ඕනේ. ඔයාලා අතරේ ඉන්න යුද්ධයට දක්ෂ හැම පුරුෂයෙක්ම+ හමුදාවක් වගේ පෙළ ගැහිලා ඔයාලාගේ සහෝදරයන්ට ඉස්සරහින් ගිහින් ගඟෙන් එගොඩ වෙන්න ඕනේ.+
15 යෙහෝවා ඔයාලට වගේම ඔයාලාගේ සහෝදරයන්ටත් කරදරයක් නැතුව නිදහසේ ජීවත් වෙන්න අවස්ථාව දෙයි. යෙහෝවා දෙවියන් එයාලට දෙන දේශය අයිති කරගන්න කල් එයාලට උදව් කරන්න. ඊටපස්සේ ඔයාලට පුළුවන් ආයෙත් යොර්දාන් ගඟෙන් නැඟෙනහිර පැත්තට ඇවිත් යෙහෝවාගේ සේවකයා වුණ මෝසෙස් ඔයාලට දුන්න මේ දේශයේ පදිංචි වෙන්න.’”+
16 ඒක ඇහුවාම ඒ අය යොෂුවාට මෙහෙම කිව්වා. “ඔයා කියන හැම දෙයක්ම අපි කරන්නම්. ඔයා අපිට යන්න කියන ඕනෙම තැනකට අපි යන්නම්.+
17 මෝසෙස් කියපු හැම දේකටම අපි කීකරු වුණා වගේ අපි ඔයා කියන දේවල්වලටත් කීකරු වෙනවා. ඔයාගේ දෙවි යෙහෝවා මෝසෙස් එක්කම හිටියා වගේ ඔයා එක්කත් ඉඳියි.+
18 කවුරු හරි කෙනෙක් ඔයාට විරුද්ධව කැරලිගැහුවොත් නැත්නම් ඔයා කියන දේවල්වලට අකීකරු වුණොත් ඒ කෙනාව මරලා දාන්න ඕනේ.+ ඔයාට කරන්න තියෙන්නේ හිතට ධෛර්යය අරන් එඩිතරව ඉන්න එකයි.”+
පාදසටහන්
^ හෝ, “යෙහොෂුවාට.” තේරුම, “යෙහෝවා දෙන ගැලවීම.”
^ ඒ කියන්නේ මධ්‍යධරණී මුහුද.
^ මූ.අ., “මං දුන්න නීතියෙන් දකුණටවත් වමටවත් යන්න එපා.”
^ මූ.අ., “සිහින් හඬකින් ඔයාටම ඇහෙන්න කියවන්න.”
^ ඒ කියන්නේ නැඟෙනහිර පැත්තේ.
