යොෂුවා 7:1-26
7 යූදා ගෝත්‍රයේ ආකාන් කියලා කෙනෙක් හිටියා. (ආකාන්ගේ+ තාත්තා කාමී. කාමීගේ තාත්තා සබ්දී. සබ්දීගේ තාත්තා සේරා.) ආකාන් දෙවියන් විනාශ කරන්න කියපු* දේවලින් සමහරක් හොරකම් කළා.+ එයා කරපු ඒ දේ නිසා යෙහෝවා දෙවියන්ට ඊශ්‍රායෙල්වරු එක්ක ලොකු කේන්තියක් ඇති වුණා.+ ඔය විදිහට ඊශ්‍රායෙල්වරු දෙවියන්ට අකීකරු වුණා.
2 යොෂුවා යෙරිකෝවේ ඉඳන් ආයි+ කියන නගරයට කීපදෙනෙක්ව යැව්වා. ආයි තියෙන්නේ බෙතෙල්+ නගරයට නැඟෙනහිරෙන් තියෙන බෙත්ආවෙන් ළඟ. එයාලව පිටත් කරලා යවද්දී යොෂුවා මෙහෙම කිව්වා. “ගිහින් නගරය ගැන තොරතුරු හොයාගෙන එන්න.” ඉතින් එයාලා ආයි කියන නගරයට ගිහින් තොරතුරු හොයලා බැලුවා.
3 එයාලා ආයෙත් ඇවිත් යොෂුවාට මෙහෙම කිව්වා. “ඒ නගරයේ ඉන්නේ හරිම ටිකදෙනායි. මොකටද මුළු හමුදාවම යවලා හැමෝවම මහන්සි කරවන්නේ? සෙබළු 2,000ක් 3,000ක් විතර ගියොත් නගරය අල්ලගන්න පුළුවන් වෙයි.”
4 ඉතින් ආයි කියන නගරය අල්ලගන්න සෙබළුන් 3,000ක් විතර ගියා. හැබැයි ආයි නගරයේ අය ඊශ්‍රායෙල්වරු පස්සේ පන්නගෙන ආවා.+
5 එයාලා නගරයේ දොරටුවේ ඉඳන් කඳු බෑවුම දිගේ ෂෙබාරීම්* වෙන කල් ඊශ්‍රායෙල්වරුන්ව පන්නගෙන ඇවිත් එයාලට පහර දීලා 36දෙනෙක්ව මරලා දැම්මා. ඒ නිසා ඊශ්‍රායෙල්වරු හොඳටම බය වෙලා අධෛර්යය වුණා.
6 ඒක ඇහුවාම යොෂුවා එයාගේ ඇඳුම් ඉරාගෙන යෙහෝවා දෙවියන්ට අයිති ගිවිසුම් පෙට්ටිය ඉස්සරහා මුණින් අතට බිම වැටිලා ඔළුවට දූවිලි දාගෙන හවස් වෙන කල්ම හිටියා. ඊශ්‍රායෙල් වැඩිමහල්ලොත් එහෙම කළා.
7 යොෂුවා මෙහෙම කිව්වා. “ශ්‍රේෂ්ඨතම පාලකයාණන් වන යෙහෝවා, ඔබ මේ සෙනඟව යොර්දාන් ගඟ හරහා මෙච්චර දුරක් අරන් ආවා. ඔබ එහෙම කරලත් අපිට අමෝරිවරුන් අතින් මැරුම් කන්න ඉඩ දුන්නේ ඇයි? මීට වඩා හොඳයි අපි යොර්දාන් ගඟෙන් එහා පැත්තටම වෙලා හිටියා නම්!
8 අනේ යෙහෝවා දෙවියනි, මට සමාවෙන්න. අපිට සතුරන්ගෙන් පලා යන්න වුණ නිසයි මං මෙහෙම කතා කරන්නේ.
9 කානානිවරුන්ටයි, මේ දේශයේ ඉන්න අනිත් අයටයි මේ ගැන ආරංචි වුණාම එයාලා හැමෝම අපිට විරුද්ධව ඇවිත් අපිව නැත්තටම නැති කරලා දායි. එතකොට ඊශ්‍රායෙල් කියන නමවත් කිසිම කෙනෙක්ට මතක් වෙන එකක් නැහැ. ඔබේ ශ්‍රේෂ්ඨ නමට වෙලා තියෙන මේ නින්දාව අයින් කරන්න දෙවියනි.”+
10 එතකොට යෙහෝවා යොෂුවාට මෙහෙම කිව්වා. “ඔයා මේ විදිහට බිම වැටිලා ඉන්නේ ඇයි? දැන් නැඟිටින්න!
11 ඊශ්‍රායෙල්වරු මට විරුද්ධව ලොකු වරදක් කරලයි තියෙන්නේ. එයාලා මං කියපු දේට අකීකරු වෙලා මගේ ගිවිසුම කඩ කළා.+ මං විනාශ කරන්න කියපු දේවල්+ කීපයක් හොරකම් කරලා+ ඒවා එයාලාගේ බඩු අතරේ හංගගෙන ඉන්නවා.+
12 ඒ නිසා ඊශ්‍රායෙල්වරුන්ට එයාලාගේ සතුරන්ව පරාජය කරන්න පුළුවන් වෙන්නේ නැහැ. එයාලට වෙන්නේ සතුරන්ට බයේ පැනලා දුවන්න. එයාලා කරපු දේ නිසා එයාලව විනාශ කරලා දාන්න ඕනේ.* මං විනාශ කරන්න කියන හැම දේම ඔයාලා විනාශ කරන්න ඕනේ. එහෙම කළේ නැත්නම් මං ආයෙත් ඔයාලට උදව් කරන්නේ නැහැ.+
13 දැන් නැඟිටලා, සෙනඟ ගාවට ගිහින් කියන්න පවිත්‍ර වෙන්න+ කියලා. ඔයා එයාලට මෙහෙම කියන්න. ‘හෙට වෙද්දී ඔයාලා පවිත්‍ර වෙලා ඉන්න ඕනේ. මොකද ඊශ්‍රායෙල්වරුන්ගේ දෙවි වන යෙහෝවා මෙහෙම කිව්වා. “ඊශ්‍රායෙල්වරුනි, මං විනාශ කරන්න තීරණය කරපු කෙනෙක් ඔයාලා අතරේ ඉන්නවා.* එයාව විනාශ කළේ නැත්නම් සතුරන්ව පරද්දන්න ඔයාලට බැරි වෙනවා.
14 හෙට උදේට ඊශ්‍රායෙල්වරු හැමෝම තම තමන්ගේ ගෝත්‍රවලට අනුව රැස් වෙන්න ඕනේ. එතකොට යෙහෝවා වන මම ඒ ගෝත්‍ර අතරින් එක ගෝත්‍රයක් තෝරගන්නවා.+ ඒ ගෝත්‍රයේ අය එයාලාගේ පෙළපත්වලට අනුව බෙදිලා ඉස්සරහට එන්න ඕනේ. යෙහෝවා වන මම ඒ අතරින් එක පෙළපතක් තෝරගන්නවා. ඒ පෙළපතට අයිති අය පවුල් අනුව බෙදිලා ඉස්සරහට එන්න ඕනේ. යෙහෝවා වන මම ඒ අතරින් එක පවුලක් තෝරගන්නවා. එතකොට ඒ පවුලේ එක් එක් කෙනා මං ඉස්සරහට එන්න ඕනේ.
15 මං විනාශ කරන්න කියපු දේවල් හොරකම් කරපු කෙනාව හොයාගත්තාම එයාව මරලා දාන්න. එයාවත් එයාගේ පවුලේ අයවත් මරලා ගින්නෙන් පුච්චන්න.+ එයාට අයිති හැම දේමත් පුච්චලා දාන්න. මොකද ඒ කෙනා යෙහෝවා වන මගේ ගිවිසුම කඩ කළා.+ එයා ඊශ්‍රායෙල් සෙනඟ අතරේ වැඩ කරලා තියෙන්නේ හරිම පහත් විදිහටයි.”’”
16 ඉතින් යොෂුවා පහුවෙනිදා උදෙන්ම අවදි වෙලා මුළු ඊශ්‍රායෙල් සෙනඟව ගෝත්‍රවලට අනුව රැස් කළා. ඒ අයගෙන් තෝරගත්තේ යූදා ගෝත්‍රයයි.
17 යොෂුවා යූදා ගෝත්‍රයේ අයට කිව්වා එයාලාගේ පෙළපත්වලට අනුව බෙදිලා ඉස්සරහට එන්න කියලා. ඒ අතරින් තෝරගත්තේ සේරාගේ පෙළපතේ+ අයවයි. ඊටපස්සේ ඒ පෙළපතට අයිති පවුල්වල මූලිකයන් හැමෝටම ඉස්සරහට එන්න කිව්වා. ඒ අය අතරින් තෝරගත්තේ සබ්දීව.
18 යොෂුවා සබ්දීගේ පවුලේ එක් එක් කෙනාට ඉස්සරහට එන්න කිව්වා. ඒ අය අතරින් කාමීගේ පුතා වන ආකාන්ව තෝරගත්තා.+ (කාමී යූදා ගෝත්‍රයේ කෙනෙක්. එයාගේ තාත්තා සබ්දී. සබ්දීගේ තාත්තා සේරා.)
19 ඊටපස්සේ යොෂුවා ආකාන්ට මෙහෙම කිව්වා. “මගේ පුතේ, ඔයාගේ වරද පිළි අරන් ඊශ්‍රායෙල්වරුන්ගේ දෙවි වන යෙහෝවාට ගෞරවය දෙන්න. ඔයා කරපු වරද ගැන මට කියන්න. කිසිම දෙයක් මගෙන් හංගන්න එපා.”
20 ඒ වෙලාවේ ආකාන් යොෂුවාට මෙහෙම කිව්වා. “මම තමයි ඊශ්‍රායෙල්වරුන්ගේ දෙවි යෙහෝවාට විරුද්ධව පව් කළේ. මං කරපු හැම දෙයක්ම මං කියන්නම්.
21 අපි දේශයේ තිබුණ වටිනා දේවල් එකතු කරද්දී ෂීනාර්+ දේශයේ හදපු හුඟක් වටින, ලස්සන ඇඳුමකුත් රිදී ෂෙකෙල්* 200කුත් ෂෙකෙල් 50ක් බර රත්තරන් පොල්ලකුත් ඒ අතරේ තිබුණා. ඒවා දැක්කාම මට ගොඩක් ආස හිතුණා. ඒ නිසා මම ඒවා අරගෙන මගේ කූඩාරමේ වළක් හාරලා ඒවා හැංගුවා. මං රත්තරන් ටිකයි, රිදී ටිකයි යටින්ම හැංගුවා.”
22 යොෂුවා ඒ වෙලාවෙම ආකාන්ගේ කූඩාරමට කීපදෙනෙක්ව යැව්වා. එයාලා කූඩාරමට ගිහින් බැලුවාම ඇඳුමත් ඒකට යටින් හංගලා තිබුණ රත්තරන් සහ රිදී ටිකත් හම්බ වුණා.
23 එයාලා ඒ දේවල් අරගෙන යොෂුවාට සහ මුළු සෙනඟට පේන්න යෙහෝවා ඉස්සරහා තිබ්බා.
24 ඊටපස්සේ යොෂුවායි, මුළු ඊශ්‍රායෙල් සෙනඟයි සේරාගේ පුතා වන ආකාන්ව+ සහ එයා හංගපු රත්තරන් පොල්ල, රිදී ෂෙකෙල්+ සහ ඇඳුම ආකොර් නිම්නයට*+ අරන් ගියා. ඒ වගේම එයාගේ දරුවන්ව, ගොනුන්ව, බූරුවන්ව, බැටළුවන්ව, කූඩාරම සහ එයාට අයිති හැම දේම එතනට අරන් ගියා.
25 යොෂුවා ආකාන්ට මෙහෙම කිව්වා. “ඔයා නිසා අපේ මුළු ජාතියම විනාශ වෙන්නයි යන්නේ.+ යෙහෝවා අද ඔයාට දඬුවම් කරනවා.” ඊටපස්සේ මුළු සෙනඟම ගල් ගහලා+ එයාලව මරලා, ගින්නෙන් පුච්චලා දැම්මා.+
26 එයාලා ආකාන්ගේ මළ සිරුරට උඩින් ගල් විශාල ප්‍රමාණයක් ගොඩගැහුවා. ඒ ගල් ගොඩ අද වෙන කල්ම තියෙනවා. ඒ සිද්ධියෙන් පස්සේ යෙහෝවා දෙවියන්ගේ කේන්තිය නිවිලා ගියා.+ ඒ තැන ආකොර්* නිම්නය විදිහට හැඳින්නුවේ ඒ සිද්ධිය නිසයි. අදටත් ඒ තැන හඳුන්වන්නේ ඒ නමින්.
පාදසටහන්
^ මූ.අ., “විනාශයට නියම කරපු.”
^ තේරුම, “පතල්.”
^ මූ.අ., “විනාශයට නියම කරලයි තියෙන්නේ.”
^ මූ.අ., “විනාශයට නියම කරපු දෙයක් ඔයාලා අතරේ තියෙනවා.”
^ හෝ, “තැනිතලාවට.”
^ තේරුම, “ශාපය නැත්නම් විපත.”
