යොහන් 20:1-31
20 සතියේ පළවෙනි දවසේදී එළිය වැටෙන්නත් කලින් මරියා මග්දලේනා සොහොන් ගේ* ළඟට ආවා.+ සොහොන් ගෙට* ඇතුල් වෙන තැන තිබුණ ගල අහකට පෙරළලා තියෙනවා එයා දැක්කා.+
2 ඉතින් එයා දුවගෙන ගිහින් සීමොන් පේතෘස්වයි, යේසුස් ආදරේ කරපු අනිත් ගෝලයාවයි+ හම්බ වෙලා මෙහෙම කිව්වා. “එයාලා ස්වාමීන්ව සොහොන් ගෙයින් අයින් කරලා. ඔහුව කොහෙට අරන් ගියාද කියලා අපි දන්නෑ.”+
3 එතකොට පේතෘස් සහ ඒ අනිත් ගෝලයා සොහොන් ගේ පැත්තට යන්න පිටත් වුණා.
4 එයාලා දෙන්නාම එකට දුවන්න පටන්ගත්තත් අනිත් ගෝලයා පේතෘස්ට වඩා වේගයෙන් දුවපු නිසා මුලින්ම සොහොන් ගේ ළඟට ගියේ එයායි.
5 එයා එබිලා බැලුවාම ලිනන් රෙදි එතන තියෙනවා දැක්කා.+ ඒත් එයා ඇතුළට ගියේ නැහැ.
6 එයාට පිටිපස්සෙන් ආපු සීමොන් පේතෘසුත් සොහොන් ගේ ළඟට ආවා. එයා නම් සොහොන් ගේ ඇතුළටම ගියා. ලිනන් රෙදි එතන තියෙනවා එයාත් දැක්කා.
7 යේසුස්ගේ ඔළුව ඔතලා තිබුණ රෙදි කෑල්ල තිබුණේ අනිත් රෙදි පටි එක්ක නෙමෙයි. ඒක ඔතලා වෙනම තැනක තියලා තිබුණා.
8 ඊටපස්සේ සොහොන් ගේ ළඟට මුලින්ම ආපු ගෝලයාත් ඒක ඇතුළට ගියා. ඇතුළට ගියාම දැක්ක දේවල් නිසා එයාලට අහන්න ලැබුණ දේ එයා විශ්වාස කළා.
9 මොකද යේසුස් මරණයෙන් නැඟිටිනවා කියලා ශුද්ධ ලියවිල්ලේ කියලා තිබුණ දේ ඒ වෙද්දී එයාලා තේරුම් අරන් තිබුණේ නැහැ.+
10 ඉතින් ඒ දෙන්නා ආපහු එයාලාගේ ගෙවල්වලට ගියා.
11 ඒත් සොහොන් ගේ ළඟට වෙලා දිගටම අඬඅඬ හිටපු මරියා සොහොන් ගේ ඇතුළට එබිලා බැලුවා.
12 එතකොට එයා දැක්කා යේසුස්ගේ දේහය තැන්පත් කරලා තිබුණ තැන සුදු ඇඳුම් ඇඳගෙන හිටපු දේවදූතයන් දෙන්නෙක්+ ඉඳගෙන ඉන්නවා. එක් කෙනෙක් දේහයේ ඔළුව තිබුණ තැනත් අනිත් කෙනා කකුල් තිබුණ තැනත් හිටියා.
13 ඒ දේවදූතයෝ එයාගෙන් මෙහෙම ඇහුවා. “ඔයා අඬන්නේ ඇයි?” එතකොට එයා “එයාලා මගේ ස්වාමීන්ව අරගෙන ගිහිල්ලා. ඔහුව කොහෙට අරන් ගියාද කියලා මං දන්නෑ” කියලා උත්තර දුන්නා.
14 එහෙම කියලා එයා හැරිලා බලද්දී කවුරු හරි හිටගෙන ඉන්නවා එයා දැක්කා. ඒ යේසුස්. ඒත් ඒ යේසුස් කියලා මරියාට තේරුණේ නැහැ.+
15 යේසුස් එයාගෙන් “ඔයා අඬන්නේ ඇයි? ඔයා හොයන්නේ කාවද” කියලා ඇහුවා. ඔහු උයනේ සේවකයෙක් කියලා හිතපු මරියා ඔහුට මෙහෙම කිව්වා. “මහත්මයා, ඔයා ඔහුව අරන් ගියා නම් ඔහුව තැන්පත් කළේ කොහෙද කියලා මට කියන්න. එතකොට මට ඔහුව අරන් යන්න පුළුවන්.”
16 යේසුස් එයාට “මරියා” කියලා කතා කළා. එයා හැරිලා හෙබ්‍රෙව් භාෂාවෙන් “රබ්බෝනි” කියලා කිව්වා. (ඒකේ තේරුම “ගුරුතුමනි” කියන එකයි.)
17 යේසුස් එයාට මෙහෙම කිව්වා. “දැන් මාව අතාරින්න. මං දැන්ම තාත්තා ළඟට යන්නේ නැහැ. ඉතින් දැන් මගේ සහෝදරයන්+ ළඟට ගිහින් කියන්න ‘මං මගේ තාත්තා+ ඒ කියන්නේ ඔයාලාගේ තාත්තා ගාවටත් මගේ දෙවියන්+ ඒ කියන්නේ ඔයාලාගේ දෙවියන් ගාවටත් යනවා’ කියලා.”
18 මරියා මග්දලේනා ගිහින් ගෝලයන්ට ඒ ගැන මෙහෙම දැනුම් දුන්නා. “මං ස්වාමීන්ව දැක්කා!” ඊටපස්සේ යේසුස් එයාට කියපු දේවල් එයා ගෝලයන්ට කිව්වා.+
19 සතියේ පළවෙනි දවස වුණ එදා හවස් වෙද්දී ගෝලයෝ එක තැනක රැස් වෙලා හිටියා. යුදෙව්වන්ට තිබුණ බය නිසා එයාලා රැස් වෙලා හිටපු ගෙදර දොරවල්වලට අගුල් දාගෙනයි හිටියේ. ඒ වෙලාවේ යේසුස් එතනට ඇවිල්ලා එයාලා මැද හිටගෙන “ඔයාලට සමාදානය වේවා” කියලා කිව්වා.+
20 ඊටපස්සේ ඔහු තමන්ගේ අත් දෙකෙයි, ඉල ඇට තියෙන හරියෙයි තිබුණ තුවාල එයාලට පෙන්නුවා.+ ස්වාමීන්ව දකින්න ලැබුණ එක ගැන ගෝලයන් ගොඩක් සතුටු වුණා.+
21 යේසුස් ආයෙත් එයාලට මෙහෙම කිව්වා. “ඔයාලට සමාදානය වේවා!+ මගේ තාත්තා මාව ලෝකයට එවපු විදිහටම+ මමත් ඔයාලව යවනවා.”+
22 එහෙම කියලා ඔහු ගෝලයන් දිහාවට කටින් පිඹලා මෙහෙම කිව්වා. “දෙවියන්ගේ බලය ලබාගන්න.+
23 කාගේ හරි වැරදිවලට ඔයාලා සමාව දුන්නොත් එයාගේ වැරදිවලට දැනටමත් සමාව ලැබිලා. ඒත් ඔයාලා සමාව දුන්නේ නැත්නම් ඒ කියන්නේ ඒ වැරදිවලට සමාව ලැබිලා නැහැ.”
24 ඒත් යේසුස් ආපු ඒ වෙලාවේ දොළොස්දෙනාගෙන් කෙනෙක් වුණ නිවුන් පුතා කියලා හඳුන්වපු තෝමස්+ එයාලා එක්ක හිටියේ නැහැ.
25 අනිත් ගෝලයන් එයාට මෙහෙම කිව්වා. “අපි ස්වාමීන්ව දැක්කා!” ඒත් තෝමස් එයාලට මෙහෙම කිව්වා. “ඔහුගේ අත්වල ඇණ ගහපු පාරවල් දකින කල්, ඒවා ඇඟිල්ලෙන් අල්ලලා බලන කල්, ඔහුගේ ඉල ඇට හරියේ තියෙන තුවාලෙට මගේ අත තියලා බලන කල්+ මං නම් කීයටවත් ඒක විශ්වාස කරන්නෑ.”
26 දවස් අටකට පස්සේ ගෝලයෝ ආපහු සැරයක් ගෙදරක රැස් වෙලා හිටියා. තෝමසුත් එයාලා එක්ක හිටියා. ඒ ගෙදර දොරවල්වලට අගුලු දාලා තිබුණත් යේසුස් ඇවිත් එයාලා මැද හිටගෙන මෙහෙම කිව්වා. “ඔයාලට සමාදානය වේවා!”+
27 ඊටපස්සේ ඔහු තෝමස්ට මෙහෙම කිව්වා. “මගේ අත් දෙක අල්ලලා බලන්න. ඔයාගේ අතින් මගේ ඉල ඇට හරියේ තුවාලෙත් අල්ලලා බලන්න. සැක කරන එක නතර කරන්න. දැන් විශ්වාස කරන්න.”
28 තෝමස් ඔහුට මෙහෙම කිව්වා. “මගේ ස්වාමීනි, මගේ දෙවියනි!”
29 යේසුස් එයාට මෙහෙම කිව්වා. “ඔයා විශ්වාස කරන්නේ ඔයා මාව දැක්ක නිසාද? ඒත් දකින්නේ නැතුව විශ්වාස කරන අය සන්තෝෂවත්!”
30 ඇත්තටම මේ ලියවිල්ලට ඇතුළත් කරලා නැති තව ගොඩක් ආශ්චර්යයන් යේසුස් ඔහුගේ ගෝලයන් ඉස්සරහා කළා.+
31 ඒත් මේ ලියවිල්ලේ තියෙන දේවල් ලිව්වේ යේසුස් කියන්නේ ක්‍රිස්තුස් කියලත් දෙවියන්ගේ පුතා කියලත් ඔයාලට විශ්වාස කරන්න පුළුවන් වෙන්නයි. ඒ විශ්වාසය නිසා ඔයාලට ඔහුගේ නම මාර්ගයෙන් ජීවනය ලබාගන්න පුළුවන්.+
