යෝනා 3:1-10
3 යෙහෝවා දෙවියන් දෙවෙනි පාරටත් යෝනාට කතා කරලා මෙහෙම කිව්වා.+
2 “නිනිවය කියන විශාල නගරෙට ගිහිල්ලා+ මම ඔයාට කියන මේ පණිවිඩය එහේ වැසියන්ට කියන්න.”
3 යෝනා යෙහෝවාට කීකරු වෙලා+ නිනිවයට ගියා.+ නිනිවය කියන්නේ හරිම ලොකු නගරයක්.* ඒක වටේ පයින් යන්න* දවස් තුනක් ගත වෙනවා.
4 යෝනා නගරයට ඇතුල් වුණා. “තව දවස් 40කින් නිනිවය විනාශ වෙනවා” කියලා කියකිය එයා මුළු දවසම පයින් ගමන් කළා.*
5 දෙවියන්ගෙන් ලැබුණු ඒ පණිවිඩය නිනිවයේ වැසියන් පිළිගත්තා.*+ උස් පහත් භේදයක් නැතුව හැමෝම ගෝණි රෙදි ඇඳගෙන, කෑම කන්නේ නැතුව ඉන්න ඕනෙ කියලත් එයාලා තීරණයකට ආවා.
6 යෝනා කියපු පණිවිඩය නිනිවයේ රජට ආරංචි වුණාම එයා සිංහාසනයෙන් බැහැලා ඇවිත් රාජකීය ඇඳුම් ගලවලා ගෝණි රෙදි ඇඳගෙන අළු ගොඩක ඉඳගත්තා.
7 ඒ වගේම මේ නියෝගය නිනිවය පුරාම දන්වන්න කියලා රජ අණ කළා.
“රජ සහ ඔහුගේ අධිපතීන්ගේ නියෝගයට අනුව කිසිම මනුස්සයෙක්වත් සතෙක්වත් කෑම නොකෑ යුතුයි. කෑමක් කටේවත් තියන්න තහනම්. වතුර බීමෙනුත් වැළකී සිටිය යුතුයි.
8 සියලුදෙනාම ගෝණි රෙදි ඇඳගෙන දිගටම දෙවියන්ට කන්නලව් කරන්න. සත්තුන්ගේ ඇඟටත් ගෝණි රෙදි දාන්න. ඔබේ දුෂ්ට ක්‍රියාත් ඔබ කරන දරුණු දේවලුත් අත්හරින්න.
9 එතකොට සැබෑ දෙවියන්ගේ කෝපය නිවී ගිහින් අපිව විනාශ කරන්න ගත්ත තීරණය දෙවියන් වෙනස් කරන්න ඉඩ තියෙනවා.”
10 ඒ මිනිස්සු දුෂ්ටකම් අත්හැරපු විදිහ+ සැබෑ දෙවියන් දැක්කා. ඒ නිසා එයාලව විනාශ කරන්න ගත්ත තීරණය දෙවියන් වෙනස් කළා. ඉතින් ඔහු නිනිවය පිටට ඒ විනාශය ගෙනාවේ නැහැ.+
පාදසටහන්
^ මූ.අ., “දෙවියන්ට වැදගත් නගරයක්.”
^ හෝ, “නගරයේ එක පැත්තක ඉඳලා අනිත් පැත්තට පයින් යන්න.”
^ හෝ සමහරවිට, “මුළු දවසම පයින් ගමන් කළාට පස්සේ ඒ පණිවිඩය කිව්වා.”
^ හෝ, “දෙවියන්ව විශ්වාස කළා.”
