යෝබ් 36:1-33
-
එලිහු, දෙවියන් කොච්චර ශ්‍රේෂ්ඨ කෙනෙක්ද කියලා මතක් කරලා දෙයි (1-33)
36 එලිහු මේ විදිහටත් කිව්වා.
2 “තව ටික වෙලාවක් ඉවසීමෙන් මං කියන දේ අහගෙන ඉන්න.දෙවියන් වෙනුවෙන් කතා කරන්න මට තවත් දේවල් තියෙනවා.
3 මං දන්න හැම දේම හොඳින් පැහැදිලි කරලා දෙන්නම්.මාව නිර්මාණය කරපු තැනැත්තා ධර්මිෂ්ඨයි කියලා මං ඔප්පු කරලා පෙන්නන්නම්.+
4 මං කියන්නේ ඇත්තක් මිස බොරුවක් නෙවෙයි.මං ඒ දේවල් දැනගත්තේ දැනුම අතින් කිසිම අඩුවක් නැති තැනැත්තාගෙන්.+
5 දෙවියන් බලවත්.+ ඒත් ඔහු කිසි කෙනෙක්ව ප්‍රතික්ෂේප කරන්නේ නැහැ.ඔහුට හැම දෙයක් ගැනම ගැඹුරු අවබෝධයක් තියෙනවා.
6 ඔහු දුෂ්ටයන්ගේ ජීවිත ආරක්ෂා කරන්නේ නැහැ.+ඒත් පීඩාවට පත් වුණ අයට ඔහු යුක්තිය ඉටු කරලා දෙනවා.+
7 ඔහු ධර්මිෂ්ඨයන් දිහාම බලාගෙන ඉන්නවා.+එයාලට රජවරුන් එක්ක සිංහාසනවල ඉඳගන්න අවස්ථාව දෙනවා.+එයාලව සදහටම ගෞරවයට පත් කරනවා.
8 ඒත් එයාලව විලංගුවලින් බැඳලා තියෙනවා නම්,දුක් වේදනා කියන ලණුවලින් එයාලව ගැටගහලා තියෙනවා නම්
9 එයාලා කරපු දේවල් ගැන දෙවියන් එයාලට හෙළි කරනවා.එයාලා උඩඟු වෙලා කරපු වැරදි ගැන ඔහු කියලා දෙනවා.
10 එයාලා ගිය වැරදි මාර්ගය පෙන්නලා දීලා,ඒ මාර්ගයෙන් ඉවත් වෙන්න කියලා කියනවා.+
11 දෙවියන්ට කීකරු වෙලා ඔහුට සේවය කරනවා නම්එයාලා තෘප්තිමත් ජීවිතයක් ගත කරලා,මුළු ජීවිත කාලය පුරාම සතුටින් කල් ගෙවයි.+
12 ඒත් කීකරු වුණේ නැත්නම් එයාලට කඩුවෙන්* මැරුම් කන්න වෙයි.+නිවැරදි දැනුමක් නැතුවම ජීවිතයෙන් සමුගන්න වෙයි.
13 දෙවියන් ගැන කිසි ගරුබියක් නැති* අය කේන්තිය හිතේ තියාගෙන ඉන්නවා.
දෙවියන් එයාලව දම්වැල්වලින් බැඳලා තිබ්බත් එයාලා උදව් ඉල්ලලා අඬන්නේ නැහැ.
14 තරුණ වයසේදීම එයාලා මිය යනවා.+එයාලා කල් ගෙවන්නේ දේවාලවල සමලිංගික සේවනයේ යෙදෙන පිරිමින් එක්කයි.*+
15 ඒත් දෙවියන් පීඩාවලින් හෙම්බත් වෙලා ඉන්න අයව බේරගන්නවා.ඔහු ඒ අයට ඔහුගේ හඬ ඇහෙන්න සලස්වනවා.
16 ඔහු ඔයාට ප්‍රශ්නවලින් යටපත් වෙලා යන්න ඉඩ දෙන්නේ නැහැ.+ඉඩකඩ තියෙන නිදහස් තැනකට ඔයාව අරන් යනවා.+තෙලින් පිරුණු රසවත් කෑමවලින් ඔයාව තෘප්තිමත් කරලා සනසනවා.+
17 දුෂ්ටයාට දඬුවම් ලැබෙද්දීයුක්තිය සාධාරණය ඉටු වෙද්දී ඔයා සතුටු වෙයි.+
18 ඒත් පරෙස්සම් වුණේ නැත්නම්හිතේ තියෙන කේන්තිය වෛරයකට පෙරළිලා ඔයා කුරිරු වැඩ කරන්න* ඉඩ තියෙනවා.+ලොකු අල්ලසක් නිසා ඔයා රැවටෙන්නත් ඉඩ තියෙනවා.
19 එහෙම කළොත් ඔයාව විපත්තියෙන් බේරගන්න කියලා උදව් ඉල්ලලා අඬන එකෙන් පලක් තියෙනවාද?දුක් පීඩාවලින් ගොඩ එන්න ඔයා කොච්චර මහන්සි වුණත් ඒකෙන් වැඩක් තියෙනවාද?+
20 රාත්‍රිය එන කල් නොඉවසිල්ලෙන් බලාගෙන ඉන්න එපා.මිනිසුන් අතුරුදහන් වෙලා යන රාත්‍රිය එන කල් බලන් ඉන්න එපා.
21 පරෙස්සම් වෙන්න. එහෙම නොකළොත් ඔයා වැරදි දේවල් කරන්න පෙලඹෙයි.දුක් පීඩා විඳදරාගන්නවාට වඩා වැරදි දේවල් කරන එක හොඳයි කියලා ඔයාට හිතෙයි.+
22 බලයෙන් උසස්ම කෙනා දෙවියන්.ඔහු තරම් ශ්‍රේෂ්ඨ ගුරුවරයෙක් තවත් ඉන්නවාද?
23 යන්න ඕන මඟ ඔහුට කියා දුන්නේ* කවුද?+‘ඔබ කළේ වැරැද්දක්’ කියලා ඔහුට චෝදනා කරන්න පුළුවන් කාටද?+
24 ඔහුගේ පුදුම ක්‍රියාවලට ප්‍රශංසා කරන්න අමතක කරන්න එපා.+ඒ දේවල් ගැන මිනිසුන් ගීයෙන් ඔහුට ප්‍රශංසා කරනවා.+
25 මිනිසුන් හැමෝම ඒ දේවල් දකිනවා.එයාලා ඒවා දිහා බලන් ඉන්නේ දුර ඈත ඉඳන්.
26 දෙවියන් අපිට හිතාගන්නවත් බැරි තරම් ශ්‍රේෂ්ඨයි.+ඔහු කොච්චර කාලයක් ජීවත් වෙලා තියෙනවාද කියලා කාටවත් කියන්න බැහැ.*+
27 ඔහු දිය බිඳු පොළොවෙන් ඉහළට ඇදගන්නවා.+වලා පටලයක් මැද ඒවා වැහි බිඳුවලට හරවනවා.
28 වලාකුළු අතරින් වැහි බිඳු වැටෙනවා.+ඒවා මිනිසුන් වෙනුවෙන් නොඅඩුව පොළොවට ඇද හැලෙනවා.
29 වලාකුළු අහසේ අතුරලා තියෙන විදිහත්දෙවියන්ගේ වාසස්ථානයෙන්* ගිගුරුම් හඬ නැඟෙන විදිහත් තේරුම්ගන්න පුළුවන් කාටද?+
30 වලාකුළුවලට ඉහළින් ඔහු අකුණු සැර* විසුරුවාහරියි.+ඔහු මුහුදු පතුල ජලයෙන් වසා තබයි.
31 ඔහු ඒ හැම දේකින්ම මිනිසුන්ව පෝෂණය කරනවා.*එයාලට ඇති තරම් කෑම ලබා දෙනවා.+
32 දෙවියන් අකුණු තමන්ගේ දෑතට අරගෙනඉලක්කයකට යන්න කියලා ඒවාට අණ කරයි.+
33 මහ ගිගුරුම් හඬ ඔහු පැමිණෙනවා කියලා කියයි.ඔහු එනවා කියලා* ගව රැළත් දැනුම් දෙයි.
පාදසටහන්
^ හෝ, “ඊ පහරකින්.”
^ හෝ, “දෙවියන්ට ද්‍රෝහි වෙන.”
^ හෝ සමහරවිට, “දේවාලවල සමලිංගිකව හැසිරෙන පිරිමින් එක්කම එයාලා මිය යනවා.”
^ හෝ, “සමච්චලේට අත්පුඩි ගහන්න.”
^ හෝ සමහරවිට, “ඔහුට දොස් කියන්නේ; ඔහු යන මඟ වැරදියි කියලා කියන්නේ.”
^ හෝ, “හොයාගන්න බැහැ.”
^ හෝ, “කූඩාරමෙන්.”
^ මූ.අ., “ආලෝකය.”
^ හෝ සමහරවිට, “මිනිසුන්ට යුක්තිය ඉටු කරලා දෙනවා.”
^ හෝ සමහරවිට, “වෙන්න යන දේ ගැන.”
