ලූක් 19:1-48
19 යේසුස් යෙරිකෝවට ඇතුල් වෙලා ඒ හරහා ඇවිදගෙන ගියා.
2 ඒ නගරයේ සකෙවුස් කියලා පොහොසත් මිනිසෙක් හිටියා. එයා බදු එකතු කරන අයගේ ප්‍රධානියෙක්.
3 යේසුස් කියන්නේ කවුද කියලා බලන්න එයා හුඟක් ආසාවෙන් හිටියේ. ඒත් ලොකු සෙනඟක් හිටපු නිසා එයාට යේසුස්ව බලාගන්න බැරි වුණා. මොකද සකෙවුස් හුඟක් මිටි කෙනෙක්.
4 යේසුස් ඒ ළඟින් යනවා කියලා දැනගත්තාම එයා ඉක්මනට දුවගෙන ගිහින් පාර අයිනේ තිබුණ සිකමෝර්* ගහකට නැග්ගා. එයාට ඕන වුණේ ඒ ගහ උඩ ඉඳන් යේසුස්ව බලන්න.
5 යේසුස් ඒ ළඟින් යද්දී සකෙවුස් දිහා බලලා “සකෙවුස් ඉක්මනට බිමට බහින්න. මං කැමතියි අද ඔයාගේ ගෙදර නවතින්න” කියලා කිව්වා.
6 සකෙවුස් ඉක්මනින්ම ගහෙන් බැහැලා හරිම සතුටින් යේසුස්ව එයාගේ ගෙදරට පිළිගත්තා.
7 ඒක දැක්කාම එතන හිටපු අය මෙහෙම කතා වුණා. “එයා ගියේ පව්කාරයෙක්ගේ ගේකටනේ!”+
8 ඒත් සකෙවුස් හැමෝම ඉස්සරහා නැඟිටලා ස්වාමීන්ට මෙහෙම කිව්වා. “ස්වාමීනි, බලන්න! මං ළඟ තියෙන දේවලින් භාගයක්ම මං දුප්පත් අයට දෙනවා. මං කාට හරි වංචා කරලා* එයාගෙන් බලෙන් සල්ලි අරන් තියෙනවා නම් මං එයාට ඒ වගේ හතර ගුණයක් ගෙවනවා.”+
9 එතකොට යේසුස් මෙහෙම කිව්වා. “අද මේ ගෙදර ඉන්න හැමෝටම ගැලවීම ලැබිලයි තියෙන්නේ. මොකද මේ කෙනාත් ආබ්‍රහම්ගේ පුතෙක්.
10 මනුෂ්‍ය පුත්‍රයා ආවේ නැති වුණ අයව හොයාගෙන එයාලව ගලවගන්නයි.”+
11 යේසුස් ඒ වෙලාවේ හිටියේ යෙරුසලමට කිට්ටුවෙන්. ගෝලයෝ හිතුවේ එයාලා යෙරුසලමට ගිය ගමන්ම දෙවියන්ගේ රාජ්‍යය දකින්න ලැබෙයි කියලා.+ ඉතින් යේසුස් එයාලට මේ උදාහරණය කිව්වා.
12 “වංශවත් මිනිසෙක් හිටියා. එයා ආපහු එන්න හිතාගෙන දුර රටකට ගියා.+ එයා ගියේ රජකම ලබාගන්නයි.
13 යන්න කලින් එයා එයාගේ දාසයන් දහදෙනෙක්ට එන්න කියලා එයාලට මීනා* දහයක් දීලා ‘මං එන කල් මේ සල්ලිවලින් වෙළඳාම් කරන්න’ කියලා කිව්වා.+
14 ඒත් එයාගේ රටේ ඉන්න අය එයාට වෛර කළා. ඒ නිසා එයාලා තානාපතීන් පිරිසක් අතේ මෙහෙම දන්වලා යැව්වා. ‘මේ මනුස්සයා අපේ රජ වෙනවාට අපි කැමති නැහැ.’
15 “එයා රාජ්‍ය බලය* භාර අරගෙන ආයෙත් ආවා. ඊටපස්සේ එයා සල්ලි දීලා ගිය දාසයන්ට එන්න කිව්වා. එයාට ඕනෙ වුණේ එයාලා ඒ සල්ලිවලින්* වෙළඳාම් කරලා කොච්චර ලාභයක් ලැබුවාද කියලා දැනගන්න.+
16 පළවෙනි දාසයා ඉස්සරහට ඇවිත් ‘ස්වාමීනි, ඔබ මට දුන්න මීනා එකෙන් මම තව මීනා දහයක් හම්බ කරගත්තා’ කියලා කිව්වා.+
17 එතකොට ස්වාමියා මෙහෙම කිව්වා. ‘ඔයා හුඟක් හොඳ දාසයෙක්. මට ඔයා ගැන ගොඩක් සතුටුයි! ඔයාට භාර දුන්න ටික ඔයා විශ්වාසවන්තව පාවිච්චි කළා. ඒ නිසා නගර දහයක් පාලනය කරන්න මම ඔයාව පත් කරනවා.’+
18 ඊළඟට දෙවෙනි දාසයා ඇවිත් ‘ස්වාමීනි, ඔබ මට දුන්න මීනා එකෙන් මම මීනා පහක් හම්බ කරගත්තා’ කියලා කිව්වා.+
19 එතකොට ස්වාමියා කිව්වා ‘මම ඔයාට නගර පහක් භාර දෙනවා’ කියලා.
20 ඒත් තවත් දාසයෙක් ඇවිත් මෙහෙම කිව්වා. ‘ස්වාමීනි, මෙන්න ඔබ මට දුන්න මීනා එක. මම ඒක රෙදි කෑල්ලක ඔතලා හංගලා තියාගත්තා.
21 ඔබ හරිම නපුරු කෙනෙක් කියලා මං දන්නවා. ඔබ අනිත් අය තැන්පත් කරපු සල්ලි ගන්න, අනිත් අය වපුරපු තැන්වලින් අස්වැන්න නෙළාගන්න කෙනෙක් කියලත් මං දන්නවා.+ ඒ නිසා මං හුඟක් බයෙන් හිටියේ.’
22 එතකොට ස්වාමියා එයාට මෙහෙම කිව්වා. ‘ඔයා මහා දුෂ්ට දාසයෙක්! ඔයාම කියපු දෙයින් මං පෙන්නන්නම් ඔයා කොච්චර වැරදිද කියලා. ඔයා කිව්වානේ මං හරිම නපුරු, අනිත් අය තැන්පත් කරපු සල්ලි ගන්න, අනිත් අයගේ අස්වැන්න නෙළාගන්න කෙනෙක් කියලා.+ ඒ හැම දේම ඔයා දැනගෙන හිටියා නම්,
23 මගේ සල්ලි* බැංකුකරුවන් ගාව තැන්පත් කළේ නැත්තේ ඇයි? එහෙම කළා නම් මං ආවාම පොලියත් එක්කම මට අයිති දේ ගන්න තිබුණා.’
24 “ඊටපස්සේ එයා ඒ ළඟ හිටගෙන හිටපු අයට මෙහෙම කිව්වා. ‘මේ කෙනා ගාව තියෙන මීනා එක අරන් මීනා දහයක් තියෙන කෙනාට දෙන්න.’+
25 ඒත් එයාලා කිව්වා ‘ස්වාමීනි, එයාට දැනටමත් මීනා දහයක් තියෙනවානේ’ කියලා. ස්වාමියා මෙහෙම කිව්වා.
26 ‘මං ඔයාලට කියන්නේ තියෙන කෙනාට තවත් වැඩියෙන් ලබා දෙනවා. ඒත් නැති කෙනාගෙන් එයාට තියෙන දේත් අරගන්නවා.+
27 මං රජ වෙනවාට අකමැති මගේ සතුරන්ව මෙතනට අරන් ඇවිත් මං ඉස්සරහම එයාලව මරලා දාන්න.’”
28 ඒ දේවල් කිව්වාට පස්සේ යේසුස් යෙරුසලමට නැඟගෙන යන පාර දිගේ ඇවිදගෙන ගියා.
29 යේසුස් ඔලීව කන්දේ+ තියෙන බෙත්පාගය සහ බෙතානිය කියන ගම් කිට්ටුවට ආවාම ඔහු ගෝලයන් දෙන්නෙක්ව පිටත් කරලා යැව්වා.+
30 ඔහු එයාලට මෙහෙම කිව්වා. “අර පේන ගමට යන්න. එහෙට ගියාම ඔයාලා දකියි කිසිම මනුස්සයෙක් මේ වෙන කල් ඉඳගෙන නැති බූරු නාම්බෙක් බැඳලා ඉන්නවා. ඌව ලිහලා අරගෙන එන්න.
31 කවුරු හරි ඇහුවොත් ‘ඇයි ඌව ලිහන්නේ’ කියලා ඒ කෙනාට කියන්න ‘ස්වාමීන්ට ඌව ඕනෙ’ කියලා.”
32 ඉතින් ඒ ගෝලයන් දෙන්නා ගියාම යේසුස් කිව්ව විදිහටම ඒ සතාව එයාලට හම්බ වුණා.+
33 ඒත් එයාලා බූරු නාම්බාව ලිහලිහ ඉද්දී අයිතිකාරයෝ ඇවිත් “ඇයි ඔයාලා ඔය බූරු නාම්බාව ලිහන්නේ” කියලා ඇහුවා.
34 එයාලා කිව්වා “ස්වාමීන්ට ඌව ඕනේ” කියලා.
35 එයාලා බූරු නාම්බාව යේසුස් ළඟට අරගෙන ඇවිත් උගේ පිට උඩට එයාලාගේ පිට වස්ත්‍ර දැම්මා. ඊටපස්සේ යේසුස් උගේ පිට උඩ ඉඳගත්තා.+
36 යේසුස් උගේ පිටේ යද්දී එතන හිටිය අය එයාලාගේ පිට වස්ත්‍ර පාර දිගේ දැම්මා.+
37 ඔලීව කන්දෙන් බැහැගෙන යන පාර ළඟ ඔහුගේ ගෝලයන් විශාල පිරිසක් රැස් වෙලා හිටියා. යේසුස් එතනට එනවාත් එක්කම එයාලා හුඟක් සතුටු වුණා. එයාලා දැකලා තිබුණ පුදුම දේවල් මතක් වෙලා එයාලා කෑගහලා දෙවියන්ට ප්‍රශංසා කරන්න පටන්ගත්තා.
38 එයාලා මෙහෙම කිව්වා. “යෙහෝවාගේ* නමින් එන රජට ආශීර්වාද ලැබේවා! ස්වර්ගයත් පොළොවත් අතර සාමය පවතීවා! ස්වර්ගයේ ඉන්න දෙවියන්ට ගෞරවය ලැබේවා!”+
39 සෙනඟ අතරේ හිටිය පරිසිවරු කීපදෙනෙක් “ගුරුතුමනි, ඔයාගේ ගෝලයන්ට තදින් අවවාද කරන්න”+ කියලා ඔහුට කිව්වා.
40 ඒත් ඔහු එයාලට මෙහෙම කිව්වා. “මං ඔයාලට කියන්නේ එයාලා නිහඬව හිටියොත් එයාලා වෙනුවට ගල් කෑගහලා කතා කරයි.”
41 ඊටපස්සේ යේසුස් නුවරට ළං වෙද්දී ඔහු ඒ නුවර දිහා බලලා අඬඅඬ+
42 මෙහෙම කිව්වා. “ඔබට සමාදානය ලබාගන්න පුළුවන් කොහොමද කියලා අදවත් ඔබ තේරුම්ගත්තා නම් කොච්චර හොඳද! ඒත් දැන් පරක්කු වැඩියි. ඔබට ඒ කිසිම දෙයක් තේරුම්ගන්න අවස්ථාව ලැබෙන්නේ නැහැ.+
43 මොකද ඉස්සරහට ඔබේ සතුරන් ඇවිත් උල් කරපු කණුවලින් ඔබ වටේට විශාල වැටක් හදලා හැම පැත්තෙන්ම ඔබව වටලයි.*+
44 එයාලා ඔබවත් ඔබේ දරුවන්වත් පොළොවේ ගහලා මරලා දායි.+ ගලක් උඩ තව ගලක් ඉතුරු වෙන්නේ නැති වෙන්න එයාලා ඔබේ නුවර සම්පූර්ණයෙන්ම විනාශ කරයි.+ එහෙම වෙන්නේ ඔබව සෝදිසි කරන්න ආපු කාලයේදී ඔබ ඒක තේරුම්ගත්තේ නැති නිසයි.”
45 ඊටපස්සේ යේසුස් දේවමාලිගාවට ඇතුල් වෙලා එහේ වෙළඳාම් කරන අයව එළවලා දාන්න පටන්ගත්තා.+
46 ඔහු එයාලට මෙහෙම කිව්වා. “‘මගේ ගෘහය යාච්ඤා ගෘහයක් විදිහට හඳුන්වනවා’+ කියලා ලියලා තියෙනවා. ඒත් ඔයාලා ඒක හොරුන්ගේ ගුහාවක් කරලා.”+
47 ඔහු හැම දවසකම දේවමාලිගාවේ ඉගැන්නුවා. ඒත් නායක පූජකයන්, නීතිය පිටපත් කරන අය සහ සෙනඟ අතරේ හිටිය ප්‍රධානීන් කොහොමහරි ඔහුව මරලා දාන්න අවස්ථාවක් හොයහොයයි හිටියේ.+
48 ඒත් ඒක කරන්න එයාලට අවස්ථාවක් ලැබුණේ නැහැ. මොකද සෙනඟ ඔහු කියපු දේවල් අහගෙන ඉන්න කොච්චර ආසාවෙන් හිටියාද කිව්වොත් එයාලා හැම වෙලේම ඔහුව වට කරගෙනයි හිටියේ.+
පාදසටහන්
^ හෝ, “අත්තික්කා.”
^ හෝ, “බොරු චෝදනාවක් කරලා.”
^ ග්‍රීක අය පාවිච්චි කරපු මුදල් වර්ගයක්. ඒකේ බර ග්‍රෑම් 340ක්. ඒකේ වටිනාකම ඩ්‍රැක්මා කාසි 100කට සමානයි කියලා කියනවා. උප. B14 බලන්න.
^ හෝ, “රාජ්‍යය.”
^ මූ.අ., “රිදීවලින්.”
^ මූ.අ., “රිදී.”
^ හෝ, “ඔබට හිරිහැර කරයි.”
