ලූක් 7:1-50
7 ඒ දේවල් සෙනඟට ඉගැන්නුවාට පස්සේ යේසුස් කපර්ණවුමට ගියා.
2 එහේ හිටපු හමුදා නිලධාරියෙක්ගේ දාසයෙක් හොඳටම අසනීප වෙලා මරණාසන්නව හිටියා.+ ඒ කෙනා එයා හුඟක් ආදරේ කරපු දාසයෙක්.
3 ඉතින් ඒ හමුදා නිලධාරියාට යේසුස් ගැන ආරංචි වුණාම එයා යුදෙව් වැඩිමහල්ලන් කීපදෙනෙක්ව යේසුස් ළඟට යවලා කිව්වා පුළුවන් නම් ඇවිත් දාසයාව සුව කරන්න කියලා.
4 එයාලා යේසුස් ළඟට ඇවිත් හුඟක් බැගෑපත් වෙලා මෙහෙම කිව්වා. “ඔබේ උදව් ලබන්න එයා ඇත්තටම වටිනවා.
5 එයා අපේ ජාතියට හුඟක් ආදරෙයි. එයා තමයි අපේ සිනගෝගයත් හදලා දුන්නේ.”
6 ඉතින් යේසුස් එයාලත් එක්ක ගියා. ඒත් එයාලා හමුදා නිලධාරියාගේ ගෙදරට කිට්ටු වෙද්දී හමුදා නිලධාරියා එයාගේ යාළුවන් අතේ මෙහෙම පණිවිඩයක් එවලා තිබුණා. “ස්වාමීනි, මගේ ගෙදරට එන්න කරදර වෙන්න එපා. ඔබ මගේ වහල යටට එන්න තරම් මම වටින්නේ නැහැ.+
7 මං ඔබව හම්බ වෙන්න ආවේ නැත්තෙත් ඒ නිසයි. ඔබ ඔතන ඉඳන් එයාට සනීප වෙන්න කියලා කිව්වත් ඇති. මගේ සේවකයා සනීප වෙයි.
8 මොකද මාත් බලධාරීන් යටතේ සේවය කරන කෙනෙක්. මං යටතෙත් හේවායෝ ඉන්නවා. මං ඒ අයගෙන් කෙනෙක්ට ‘යන්න’ කියලා කිව්වොත් එයා යනවා. වෙන කෙනෙක්ට ‘එන්න’ කියලා කිව්වොත් එයා එනවා. මගේ දාසයාට ‘මේක කරන්න’ කියලා කිව්වොත් එයා ඒක කරනවා.”
9 ඒක ඇහුවාම යේසුස් එයා ගැන පුදුම වෙලා තමන් පිටිපස්සෙන් ආපු සෙනඟට මෙහෙම කිව්වා. “මං ඔයාලට කියන්නේ, ඊශ්‍රායෙල් දේශයේ ඉන්න කිසිම කෙනෙක් ළඟවත් මේ තරම් විශ්වාසයක් තියෙනවා මං දැකලා නැහැ.”+
10 ඒ පණිවිඩකරුවන් ආයෙත් හමුදා නිලධාරියාගේ ගෙදරට ආවාම එයාලා දැක්කා දාසයා සුව වෙලා කියලා.+
11 ඒත් එක්කම ඔහු නායින් කියන නගරයට ගියා. ඔහු එක්ක ඔහුගේ ගෝලයෝයි, විශාල සෙනඟකුයි ගියා.
12 යේසුස් ඒ නගරයේ දොරටුව ළඟට ආවාම මැරුණ කෙනෙක්ගේ දේහය උස්සගෙන යන කට්ටියක්ව ඔහු දැක්කා. මැරිලා හිටියේ වැන්දඹුවකගේ පුතෙක්. ඒ අම්මාට හිටපු එකම පුතා එයායි.+ නගරේ ඉඳන් ආපු විශාල පිරිසකුත් ඒ අම්මා එක්ක ඇවිදගෙන ආවා.
13 එයාව දැක්ක ගමන්ම ස්වාමීන්ට ලොකු අනුකම්පාවක් ඇති වෙලා+ “අඬන්න එපා” කියලා එයාට කිව්වා.+
14 ඊටපස්සේ ඔහු දේහය තියලා තිබුණ යහන ළඟට ගිහින් ඒකට අත තිබ්බා. එතකොට ඒක උස්සගෙන ගිය අය නතර වුණා. ඒ වෙලාවේ ඔහු “පුතේ,* නැඟිටින්න” කියලා කිව්වා.+
15 ඒත් එක්කම මැරිලා හිටපු කෙනා නැඟිටලා කතා කරන්න පටන්ගත්තා. යේසුස් එයාව එයාගේ අම්මාට භාර දුන්නා.+
16 ඒක දැක්කාම එතන හිටපු හැමෝම බය වෙලා “අපි අතරට උතුම් අනාගතවක්තෘවරයෙක් ඇවිල්ලා,”+ “දෙවියන් ඔහුගේ සෙනඟට අනුකම්පාව පෙන්වලා”+ කියකිය දෙවියන්ට ප්‍රශංසා කරන්න පටන්ගත්තා.
17 ඔහු කරපු දේ ගැන ආරංචිය මුළු යුදය සහ ඒ අවට ප්‍රදේශය පුරාම පැතිරිලා ගියා.
18 ඔය අතරේ යොහන්ගේ ගෝලයෝ යොහන්ව හම්බ වෙලා වුණ හැම දෙයක් ගැනම එයාට කිව්වා.+
19 ඉතින් යොහන් එයාගේ ගෝලයන් දෙන්නෙක්ට එන්න කියලා එයාලට කිව්වා ස්වාමීන්ගෙන් මෙහෙම අහන්න කියලා. “එන්න නියමිත කෙනා ඔයාද?+ නැත්නම් අපි වෙන කෙනෙක් එන කල් බලන් ඉන්න ඕනෙද?”
20 එයාලා යේසුස් ළඟට ගිහින් මෙහෙම කිව්වා. “‘එන්න නියමිත කෙනා ඔයාද? නැත්නම් අපි වෙන කෙනෙක් එන කල් බලන් ඉන්න ඕනෙද’ කියලා ඔබෙන් අහගෙන එන්න කියලා යොහන් බව්තීස්ත අපිට කිව්වා.”
21 ඒ වෙලාවේ යේසුස් සාමාන්‍ය අසනීප+ සහ බරපතළ රෝග හැදිලා හිටපු හුඟක් අයවත් භූතයන් වැහිලා හිටපු අයවත් සුව කළා. අන්ධ අය හුඟදෙනෙක්ටත් පෙනීම ලබා දුන්නා.
22 ඊටපස්සේ ඔහු ඒ දෙන්නාට මෙහෙම කිව්වා. “ඔයාලා අහපු දැකපු දේවල් ගැන ගිහින් යොහන්ට කියන්න. අන්ධ අයට පෙනීම ලැබෙනවා.+ කොර අය ඇවිදිනවා. ලාදුරු රෝගීන්ව පවිත්‍ර කරනවා. බිහිරි අයට ඇහෙනවා.+ මැරුණ අයට ආයෙත් ජීවිතය දෙනවා. දුප්පත් අයට ශුභාරංචිය ප්‍රකාශ කරනවා.+
23 මං නිසා පය පැටලිලා වැටෙන්නේ නැති කෙනා* සන්තෝෂවත්.”+
24 යොහන් එවපු අය එතනින් ගියාට පස්සේ යේසුස් එතන හිටිය සෙනඟට යොහන් ගැන මෙහෙම කිව්වා. “ඔයාලා පාළුකරයට ගියේ මොනවා බලන්නද? හුළඟට එහා මෙහා වැනෙන බට ගහක් බලන්නද?+
25 ඔයාලා ගියේ කාව බලන්නද? වටිනා ඇඳුම් ඇඳගෙන ඉන්න කෙනෙක්ව බලන්නද?+ වටිනා ඇඳුම් ඇඳගෙන, සැපපහසු ජීවිතයක් ගත කරන අය ඉන්නේ රජමාලිගාවල නේද?
26 ඇත්තටම ඔයාලා ගියේ කාව බලන්නද? අනාගතවක්තෘවරයෙක්ව බලන්නද? ඔව්. ඒත් මං ඔයාලට කියන්නේ, එයා අනාගතවක්තෘවරයෙක්ටත් වඩා උතුම් කෙනෙක් කියලයි.+
27 මෙහෙම ලියලා තියෙන්නේ එයා ගැනයි. ‘බලන්න! මම මගේ පණිවිඩකරුව ඔබට ඉදිරියෙන් යවනවා. ඔහු ඔබට කලින් ගිහින් ඔබේ මඟ සූදානම් කරයි.’+
28 මං ඔයාලට කියන්නේ, ස්ත්‍රීන්ගෙන් ඉපදුණ අය අතරින් යොහන් බව්තීස්ත තරම් උතුම් කෙනෙක් නැහැ. ඒත් දෙවියන්ගේ රාජ්‍යයේ ඉන්න සුළු කෙනෙක් වුණත් එයාට වඩා උතුම්.”+
29 (යේසුස් කියපු දේ ඇහුවාම බදු එකතු කරන අය සහ මුළු සෙනඟම දෙවියන් ධර්මිෂ්ඨ කෙනෙක් කියලා කියන්න පටන්ගත්තා. මොකද ඒ අයව බව්තීස්ම කරලා තිබුණේ යොහන්.+
30 ඒත් පරිසිවරු සහ නීතිය ගැන හොඳ දැනුමක් තිබුණ අය යොහන් ළඟට ගිහින් බව්තීස්ම වෙලා තිබුණේ නැහැ. ඒ නිසා යොහන් මාර්ගයෙන් දෙවියන් දුන්න උපදෙස්* එයාලා ගණන් ගත්තේ නැහැ.)+
31 “මේ පරම්පරාවට අයිති මිනිස්සුන්ව සමාන කරන්න පුළුවන් කාටද? එයාලා කවුරු වගේද?+
32 එයාලා වෙළඳපොළක ඉඳගෙන ඉන්න පොඩි ළමයි වගේ. එයාලා එක්ක ඉන්න අනිත් ළමයින්ට එයාලා කෑගහලා මෙහෙම කියනවා. ‘අපි ඔයාලට ඇහෙන්න බටනළාව පිම්බා. හැබැයි ඔයාලා නැටුවේ නැහැ. අපි කෑගහලා ඇඬුවා. හැබැයි ඔයාලා ඇඬුවේ නැහැ.’
33 මේ පරම්පරාවත් ඒ වගේ. යොහන් බව්තීස්ත අනිත් අය වගේ රොටි කෑවේ නැහැ. වයින් බිව්වේ නැහැ.+ ඒත් ඔයාලා කියනවා ‘එයාට භූතයෙක් වැහිලා’ කියලා.
34 මනුෂ්‍ය පුත්‍රයා අනිත් අය වගේ සාමාන්‍ය විදිහට කනවා බොනවා. ඒත් ඔයාලා එයා ගැන මෙහෙම කියනවා. ‘බලන්න අර මනුස්සයා දිහා. එයා කෑදරයෙක්. හැම වෙලේම වයින් බොනවා. එයාගේ යාළුවෝ බදු එකතු කරන අය! පව්කාරයෝ!’+
35 ඒත් ප්‍රඥාවන්ත කෙනෙක් කරන දේවල්වල ප්‍රතිඵලවලින් එයා ධර්මිෂ්ඨයි* කියලා ඔප්පු වෙනවා.”*+
36 එක පරිසිවරයෙක් එයාගේ ගෙදර කෑමට එන්න කියලා යේසුස්ට කීප සැරයක්ම ආරාධනා කළා. ඉතින් යේසුස් එයාගේ ගෙදරට ගිහින් කෑමට ඉඳගත්තා.
37 යේසුස් ඒ ගෙදර කෑමට ඇවිත් ඉන්නවා කියලා එක කාන්තාවකට ආරංචි වුණා. එයා ඒ නගරයේ ප්‍රසිද්ධ වෙලා හිටියේ පව්කාර කෙනෙක් විදිහට. එයා සුවඳ තෙල් තියෙන ඇලබැස්ටර් බඳුනක් අරගෙන එතනට ඇවිත්+
38 යේසුස්ගේ කකුල් දෙක ළඟ ඉඳගෙන අඬන්න පටන්ගත්තා. එයාගේ කඳුළුවලින් ඔහුගේ කකුල් තෙමලා එයාගේ කොණ්ඩෙන් ඒ කඳුළු පිහ දැම්මා. ඊටපස්සේ එයා ඔහුගේ කකුල් ආදරෙන් ඉඹලා එයා ගෙනාපු සුවඳ තෙල් ඔහුගේ කකුල් දෙකට වක් කරන්න පටන්ගත්තා.
39 ඒක දැක්කාම යේසුස්ව කෑමට ආරාධනා කරපු පරිසිවරයා මෙහෙම හිතුවා. “මේ මනුස්සයා අනාගතවක්තෘවරයෙක් නම් එයාව අල්ලන කෙනා කවුද, එයා මොන වගේ කාන්තාවක්ද කියලා දැනගෙන ඉන්න ඕනෙනේ! එයා පව්කාරියක්නේ!”+
40 ඒත් යේසුස් එයාට මෙහෙම කිව්වා. “සීමොන්, මට ඔයාට කියන්න දෙයක් තියෙනවා.” “ගුරුතුමනි, කියන්න” කියලා එයා කිව්වා.
41 “මිනිස්සු දෙන්නෙක් කෙනෙක්ට ණය වෙලා හිටියා. එක් කෙනෙක්ට ඩිනාරි* 500ක් ගෙවන්න තිබුණා. අනිත් කෙනාට ගෙවන්න තිබුණේ ඩිනාරි 50යි.
42 ඒ දෙන්නාටම ණය ආපහු ගෙවාගන්න බැරි වුණා. ඒ නිසා ණයහිමියා අදිමදි නොකර කැමැත්තෙන්ම එයාලට සමාව දීලා එයාලව ණයෙන් නිදහස් කළා. ඔයා හිතන විදිහට එයාලා දෙන්නාගෙන් ණයහිමියාට වැඩියෙන්ම ආදරේ කරන්නේ කවුද?”
43 සීමොන් මේ විදිහට උත්තර දුන්නා. “මං හිතන්නේ වැඩියෙන් ණය වෙලා හිටපු* කෙනා වෙන්න ඕනේ.” යේසුස් “ඔයා කියපු දේ හරි” කියලා කිව්වා.
44 ඊටපස්සේ යේසුස් ඒ කාන්තාව දිහා බලලා සීමොන්ට මෙහෙම කිව්වා. “බලන්න මේ කාන්තාව දිහා. මං ඔයාගේ ගෙදරට ආවත් ඔයා මගේ කකුල් හෝදන්න වතුර ගෙනාවේ නැහැ. ඒත් මේ කාන්තාව එයාගේ කඳුළුවලින් මගේ කකුල් තෙමලා එයාගේ කොණ්ඩෙන් ඒ කඳුළු පිහ දැම්මා.
45 ඔයා මාව ඉඹලා පිළිගත්තේ නැහැ. ඒත් මං මේ ගෙදරට ආපු වෙලාවේ ඉඳන් මේ කාන්තාව මගේ කකුල් ආදරෙන් ඉඹින්න පටන්ගත්තා.
46 ඔයා මගේ ඔළුවට තෙල් වක් කළේ නැහැ. හැබැයි මේ කාන්තාව මගේ කකුල්වලට සුවඳ තෙල් වක් කළා.
47 ඉතින් මං ඔයාට කියන්නේ, මේ කාන්තාව ගොඩක් පව්* කරලා තිබුණත් එයාට සමාව ලැබෙනවා.+ ඒ නිසා එයාට මං ගැන ලොකු ආදරයක් තියෙනවා. ඒත් සමාව අඩුවෙන් ලබන* කෙනා ආදරේ පෙන්නන්නෙත් අඩුවෙන්.”
48 ඊටපස්සේ යේසුස් “ඔයාගේ පව්වලට දැන් සමාව ලැබිලා”+ කියලා ඒ කාන්තාවට කිව්වා.
49 ඒක ඇහුවාම ඔහුත් එක්ක කෑමට ඉඳගෙන හිටිය අය මෙහෙම කතා වෙන්න පටන්ගත්තා. “කවුද මේ මනුස්සයා? එයා පව්වලටත් සමාව දෙනවානේ!”+
50 ඒත් යේසුස් ආයෙත් ඒ කාන්තාවට මෙහෙම කිව්වා. “ඔයාගේ විශ්වාසය නිසා ඔයාට ගැලවීම ලැබුණා.+ ඒ නිසා ඔයා දැන් හිතේ නිදහසෙන් යන්න.”
පාදසටහන්
^ මූ.අ., “තරුණය.”
^ හෝ, “මං නිසා විශ්වාසය නැති කරගන්නේ නැති කෙනා.”
^ හෝ, “මඟ පෙන්වීම්.”
^ මූ.අ., “ප්‍රඥාව ධර්මිෂ්ඨයි කියලා ඇගේ දරුවන්ගෙන් ඔප්පු වෙයි.”
^ හෝ, “නිර්දෝෂයි.”
^ මූ.අ., “සමාව ලබපු.”
^ හෝ, “බරපතළ වැරදි.”
^ ඒ කියන්නේ පව් අඩුවෙන් කරන කෙනාට සමාව ඕනෙ කරන්නේ අඩුවෙන්.
