ලූක් 9:1-62
-
සේවේ යන්න කලින් දොළොස්දෙනාට දුන්න මඟ පෙන්වීම් (1-6)
-
යේසුස් ගැන අහලා හෙරොද් පුදුම වෙයි (7-9)
-
යේසුස් 5,000කට කන්න දෙයි (10-17)
-
පේතෘස් යේසුස්ව ක්‍රිස්තුස් විදිහට පිළිගනියි (18-20)
-
යේසුස් ඔහුගේ මරණය ගැන කලින් කියයි (21, 22)
-
යේසුස්ගේ සැබෑ අනුගාමිකයන් (23-27)
-
යේසුස්ගේ පෙනුම වෙනස් වෙයි (28-36)
-
භූතයෙක් වැහුණ පුතෙක්ව සුව කරයි (37-43අ)
-
යේසුස් ඔහුගේ මරණය ගැන ආයෙත් කියයි (43ආ-45)
-
උතුම්ම කෙනා කවුද කියලා ගෝලයන් වාද කරයි (46-48)
-
අපිට විරුද්ධව වැඩ කරන්නේ නැති අය ඉන්නේ අපේ පැත්තේ (49, 50)
-
සමරිතානු ගමක ඉන්න අය යේසුස්ව පිළිගත්තේ නැහැ (51-56)
-
යේසුස්ගේ අනුගාමිකයෙක්ගෙන් බලාපොරොත්තු වෙන දේ (57-62)
9 යේසුස් නියෝජිතයන් දොළොස්දෙනාට එන්න කියලා භූතයන් හැමෝවම එළවන්නත්+ ලෙඩ රෝග සුව කරන්නත්+ එයාලට බලය දුන්නා.
2 දෙවියන්ගේ රාජ්‍යය ගැන දේශනා කරන්නත් ලෙඩ සුව කරන්නත් එයාලව යවද්දී ඔහු
3 එයාලට මෙහෙම කිව්වා. “ගමනට කිසිම දෙයක් ගෙනියන්න එපා. සැරයටියක්වත් කෑම මල්ලක්වත් රොටිවත් සල්ලිවත්* වැඩිපුර ඇඳුමක්වත්* අරන් යන්න එපා.+
4 කොහෙදී හරි කවුරු හරි කෙනෙක් ඔයාලව පිළිගත්තොත් එයාගේ ගෙදර නතර වෙන්න. ඒ ප්‍රදේශයෙන් යන කල්ම ඒ ගෙදර නතර වෙලා ඉන්න.+
5 කොහේ හරි ප්‍රදේශයක ඉන්න මිනිස්සු ඔයාලව පිළිගන්නේ නැත්නම් ඔයාලා ඒ නගරයෙන් පිට වෙද්දී ඔයාලාගේ කකුල්වල තියෙන දූවිලි ගසලා දාන්න.* ඒක එයාලට අනතුරු ඇඟවීමක් වෙයි.”+
6 ඊටපස්සේ එයාලා ඒ ප්‍රදේශය පුරාම තියෙන ගම්වලට ගිහින් ශුභාරංචිය දේශනා කළා. එයාලා ඒ ගම්වල ඉන්න රෝගීන්වත් සුව කළා.+
7 සිද්ධ වුණ ඒ හැම දෙයක් ගැනම දිසාපති වුණ හෙරොද්ට* ආරංචි වුණා. ඒත් මොකක් විශ්වාස කරන්නද කියලා එයාට හිතාගන්නවත් බැරි වුණා. මොකද සමහර අය කිව්වා යොහන්ව මරණයෙන් නැඟිට්ටවලා කියලා.+
8 තවත් අය කිව්වේ එලියා ආයෙත් ඇවිත් කියලා. තවත් සමහරු කිව්වා අතීතයේ හිටපු අනාගතවක්තෘවරයෙක් මරණයෙන් නැඟිටලා ඇවිල්ලා කියලා.+
9 ඒ නිසා හෙරොද් මෙහෙම කිව්වා. “යොහන්ගේ හිස ගසා දැම්මේ මමයි.+ එහෙනම් මේ හැම දෙයක්ම කරන කෙනා කවුද?” ඉතින් යේසුස්ව දකින්න එයාට ලොකු වුවමනාවක් තිබුණා.+
10 යේසුස්ගේ නියෝජිතයන් ආපහු යේසුස් ළඟට ඇවිත් එයාලා කරපු හැම දෙයක් ගැනම ඔහුට කිව්වා.+ ඊටපස්සේ ඔහු එයාලවත් එක්කගෙන බෙත්සයිදා කියන නගරයට ගියා.+ ඔහුට ඕනෙ වුණේ එයාලත් එක්ක තනියම කාලය ගත කරන්න.
11 ඒත් සෙනඟ ඒක දැනගත්තාම යේසුස්ගේ පස්සෙන්ම ගියා. ඔහු එයාලව ආදරෙන් පිළි අරන් දෙවියන්ගේ රාජ්‍යය ගැන එයාලට කියලා දුන්නා. ඒ වගේම ඔහු අසනීපයෙන් හිටපු අයවත් සුව කළා.+
12 හවස් වේගන එද්දී දොළොස්දෙනා ඔහු ළඟට ඇවිත් මෙහෙම කිව්වා. “අපි ඉන්නේ පාළු තැනක. ඒ නිසා දැන් සෙනඟව යවමු. එතකොට එයාලට පුළුවන් ළඟපාත ගම්වලට ගිහින් කන්න මොනවා හරි අරගෙන නවාතැනක් හොයාගන්න.”+
13 ඒත් ඔහු එයාලාගෙන් ඇහුවා “ඔයාලට බැරිද එයාලට මොනවා හරි කන්න දෙන්න” කියලා.+ එතකොට එයාලා මෙහෙම කිව්වා. “අපි ගාව තියෙන්නේ රොටි පහකුයි, මාළු කූරි දෙකකුයි විතරයි. මෙච්චර ලොකු සෙනඟකට කන්න දෙන්න නම් අපිට ගිහින් කෑම සල්ලිවලට ගන්න වෙනවා.”
14 සෙනඟ අතරේ පුරුෂයන් 5,000ක් විතර හිටියා. යේසුස් ඔහුගේ ගෝලයන්ට මෙහෙම කිව්වා. “සෙනඟට කියන්න 50දෙනා ගාණේ කණ්ඩායම්වලට බෙදිලා කෑමට ඉඳගන්න කියලා.”
15 ඉතින් ගෝලයෝ යේසුස් කියපු විදිහට සෙනඟට ඉඳගන්න කිව්වා.
16 ඊටපස්සේ ඔහු රොටි පහයි, මාළු කූරි දෙකයි අරගෙන ස්වර්ගය දිහා බලලා කෑමට ස්තුති කරලා යාච්ඤාවක් කළා. ඔහු රොටි කෑලිවලට කඩලා ඒවා සෙනඟට බෙදන්න කියලා ගෝලයන්ට දුන්නා.
17 එයාලා හැමෝම ඇති වෙන කල් කෑවා. ඉතුරු වුණ රොටි කෑලි එකතු කරලා එයාලා කූඩ 12ක් පුරවගත්තා.+
18 පස්සේ ඔහු තනියම යාච්ඤා කරකර ඉද්දී ගෝලයෝ ඔහු ඉන්න තැනට ආවා. එතකොට ඔහු එයාලාගෙන් මෙහෙම ඇහුවා. “මිනිස්සු කියන්නේ මම කවුරු කියලද?”+
19 ගෝලයෝ මෙහෙම උත්තර දුන්නා. “මිනිස්සු කියනවා ඔයා යොහන් බව්තීස්ත කියලා. තවත් අය කියනවා ඔයා එලියා කියලා. අතීතයේ හිටපු අනාගතවක්තෘ කෙනෙක් ආයෙත් නැඟිටලා ඇවිත් කියලත් සමහරු කියනවා.”+
20 යේසුස් එයාලාගෙන් මෙහෙම ඇහුවා. “එතකොට ඔයාලා හිතන්නේ මං කවුරු කියලද?” “ඔයා දෙවියන් එවපු ක්‍රිස්තුස්”+ කියලා පේතෘස් උත්තර දුන්නා.
21 ඊටපස්සේ ඔහු තදින්ම කිව්වා ඒ ගැන කාටවත් කියන්න එපා කියලා.+
22 ඔහු එයාලට මෙහෙමත් කිව්වා. “මනුෂ්‍ය පුත්‍රයාට ගොඩක් දුක් විඳින්න වෙනවා. වැඩිමහල්ලන්, නායක පූජකයන් සහ නීතිය පිටපත් කරන අය ඔහුව ප්‍රතික්ෂේප කරයි. මිනිස්සු එයාව මරලා දායි.+ ඒත් තුන්වෙනි දවසේදී එයාව ආයෙත් නැඟිට්ටවනවා.”+
23 ඊටපස්සේ ඔහු හැමෝටම මෙහෙම කිව්වා. “මගේ අනුගාමිකයෙක් වෙන්න කෙනෙක් කැමති නම් එයා තමන්ගේ ජීවිතේ දෙවියන්ට සම්පූර්ණයෙන්ම භාර දීලා,*+ හැම දවසකම එයාගේ වධකණුව* උස්සගෙන දිගටම මගේ පිටිපස්සෙන් එන්න ඕනේ.+
24 කවුරු හරි තමන්ගේ ජීවිතේ ගලවගන්න හදනවා නම් ඒක එයාට නැති වෙයි. ඒත් මං නිසා කෙනෙක්ට තමන්ගේ ජීවිතේ නැති වුණොත් ඒක එයාට ආපහු ලැබෙයි.+
25 ඇත්තටම මිනිසෙක් මුළු ලෝකෙම ලබාගත්තත් එයාගේ ජීවිතේ නැති වුණොත් එහෙම නැත්නම් ජීවිතේට ලොකු අනතුරක් වුණොත් ඒකෙන් ඇති වැඩක් තියෙනවාද?+
26 කෙනෙක් මගේ ගෝලයෙක් කියලත් මගේ වචන විශ්වාස කරනවා කියලත් පිළිගන්න ලැජ්ජා වෙනවා නම් එයාට මොකද වෙන්නේ? මනුෂ්‍ය පුත්‍රයා තමන්ගේ තේජසින් සහ පියාගෙත් ශුද්ධ දේවදූතයන්ගෙත් තේජසින් එද්දී ඒ කෙනාව ගෝලයෙක් විදිහට පිළිගන්න එයාත් ලැජ්ජා වෙනවා.+
27 ඇත්තටම මං කියන්නේ, මෙතන ඉන්න සමහරදෙනෙක්ට එයාලා මැරෙන්න කලින් දෙවියන්ගේ රාජ්‍යය දකින්න ලැබෙනවා කියලයි.”+
28 එහෙම කියලා දවස් අටකට විතර පස්සේ යේසුස් යාච්ඤා කරන්න කන්දකට ගියා. ඔහු ගියේ පේතෘස්, යොහන් සහ යාකොබ්වත් එක්කගෙනයි.+
29 ඔහු යාච්ඤා කරකර ඉද්දී ඔහුගේ මුහුණේ පෙනුම සම්පූර්ණයෙන්ම වෙනස් වුණා. ඔහුගේ ඇඳුමෙන් දීප්තිමත් සුදු එළියක් විහිදිලා ඒක දිලිසෙන්න පටන්ගත්තා.
30 ඒත් එක්කම එයාලා දැක්කා මිනිස්සු දෙන්නෙක් ඔහුත් එක්ක කතා කරකර ඉන්නවා. එක් කෙනෙක් මෝසෙස්, අනිත් කෙනා එලියා.
31 ඒ දෙන්නාගෙනුත් ලොකු එළියක් විහිදුණා. අනාවැකිවල කියලා තියෙන විදිහට යේසුස් යෙරුසලමේදී මේ ලෝකයෙන් සමුගන්න විදිහ ගැන එයාලා කතා කරන්න පටන්ගත්තා.+
32 ඔය අතරේ පේතෘස් සහ ඔහුත් එක්ක හිටපු අනිත් දෙන්නා හිටියේ නිදිකිරා වැටෙමින්. එයාලා ඇහැරුණාම යේසුස්ගේ තේජසත්+ ඔහු එක්ක හිටිය මිනිස්සු දෙන්නාවත් එයාලා දැක්කා.
33 ඒ මිනිස්සු දෙන්නා යේසුස්ගෙන් වෙන් වෙලා යද්දීම පේතෘස් යේසුස්ට මෙහෙම කිව්වා. “ගුරුතුමනි, අපිට මෙතන ඉන්න ලැබුණ එක ලොකු සතුටක්. අපි කූඩාරම් තුනක් ගහන්නද? එකක් ඔයාට. එකක් මෝසෙස්ට. අනික එලියාට.” ඒ වෙලාවේ පේතෘස් කියපු දේවල් එයාටවත් තේරුණේ නැහැ.
34 පේතෘස් කතා කරකර ඉද්දී එයාලට අහසේ වලාකුළක් පෙනුණා. ඒක ටිකෙන් ටික එයාලා ඉන්න තැනට ඇවිත් එයාලව වහගත්තා. ඒ වෙලාවේ එයාලට දැනුණේ ලොකු බයක්.
35 එතකොට ඒ වලාකුළෙන් මෙහෙම කියන හඬක්+ ඇහුණා. “මේ මගේ පුතා. මං තෝරගෙන තියෙන්නේ එයාවයි.+ එයාට ඇහුම්කන් දෙන්න.”+
36 ඒ හඬ ඇහෙද්දී එතන හිටියේ යේසුස් විතරයි. එයාලා දැකපු දේවල් ගැන ඒ දවස්වල එයාලා කාත් එක්කවත් කතා කළේ නැහැ.+
37 ඊළඟ දවසේ එයාලා කන්දෙන් බැහැගෙන එද්දී යේසුස්ව හම්බ වෙන්න ලොකු සෙනඟක් එතනට ඇවිත් හිටියා.+
38 ඒ සෙනඟ අතරේ හිටපු කෙනෙක් කෑගහලා මෙහෙම කිව්වා. “ගුරුතුමනි, අනේ ඇවිත් මගේ පුතාට උදව් කරන්න. මට ඉන්න එකම පුතා එයායි.+
39 එයාට එකපාරටම භූතයෙක් වැහෙනවා. එහෙම වෙද්දී එයා කෑගහලා පෙණ දදා බිම පෙරළෙනවා. භූතයා ලේසියෙන් දරුවාගෙන් පිට වෙන්නෙත් නැහැ. පිට වෙලා ගියත් යන්නේ දරුවාට තුවාල කරලයි.
40 භූතයාව එළවන්න කියලා ඔබේ ගෝලයන්ගෙන් මං කීප සැරයක්ම ඉල්ලුවා. ඒත් එයාලට ඒක කරන්න බැරි වුණා.”
41 එතකොට යේසුස් මෙහෙම කිව්වා. “අනේ, විශ්වාසයක් නැති පව්කාර පරම්පරාව,+ මං තව කොච්චර කාලයක් ඔයාලා එක්ක ඉන්න ඕනෙද? තව කොච්චර කාලයක් ඔයාලා කරන දේවල් ඉවසන් ඉන්නද? දැන් ඔයාගේ පුතාව මං ළඟට අරන් එන්න.”+
42 ඒත් දරුවාව එතනට අරන් එද්දීත් භූතයා එයාව බිම වට්ටලා හරිම දරුණු විදිහට එයාගේ මුළු ඇඟම ගැහෙන්න සැලැස්සුවා. ඒ වෙලාවේ යේසුස් භූතයාට සැරෙන් කතා කරලා දරුවාව භූතයාගෙන් නිදහස් කළා. ඊටපස්සේ ඔහු දරුවාව එයාගේ තාත්තාට භාර දුන්නා.
43 දෙවියන්ගේ මහත් බලය දැකලා හැමෝම පුදුම වුණා.
යේසුස් කරපු දේවල් දැකලා හැමෝම පුදුමෙන් බලාගෙන ඉද්දී ඔහු ගෝලයන්ට මෙහෙම කිව්වා.
44 “මං දැන් කියන මේ දේ හොඳට හිතට අරන් ඒක මතක තියාගන්න. මනුෂ්‍ය පුත්‍රයාව ඔහුගේ සතුරන් අතට පාවලා දෙනවා.”+
45 ඔහු කියපු ඒ දේ එයාලට තේරුණේ නැහැ. මොකද ඒක තේරුම්ගන්න ඕනෙ කරන අවබෝධය ඒ වෙලාවේ එයාලට ලැබිලා තිබුණේ නැහැ. ඒත් ඔහුගෙන් ඒ ගැන ප්‍රශ්න අහන්න එයාලා බය වුණා.
46 පස්සේ එයාලා අතරේ උතුම්ම කෙනා+ කවුද කියලා ගෝලයන් වාද කරන්න පටන්ගත්තා.
47 එයාලාගේ හිතේ තියෙන දේවල් දැනගෙන හිටිය නිසා යේසුස් පොඩි දරුවෙක්ව ළඟට අරගෙන
48 මෙහෙම කිව්වා. “මට තියෙන ගෞරවය නිසා* කෙනෙක් මේ පොඩි දරුවාව ආදරෙන් පිළිගන්නවා නම් එයා මාවත් පිළිගන්නවා. මාව ආදරෙන් පිළිගන්න කෙනා මාව එවපු තැනැත්තාවත් පිළිගන්නවා.+ ඇත්තටම උතුම් කියලා කියන්න පුළුවන් ඔයාලා අතරේ නිහතමානීව වැඩ කරන කෙනාටයි.”+
49 එතකොට යොහන් ඔහුට මෙහෙම කිව්වා. “ගුරුතුමනි, ඔයාගේ නම පාවිච්චි කරලා මනුස්සයෙක් භූතයන් එළවනවා අපි දැක්කා. එයා අපේ කෙනෙක් නෙමෙයි. ඉතින් එයා කරන දේ අපි නතර කරන්න හැදුවා.”+
50 ඒත් යේසුස් මෙහෙම කිව්වා. “එයාව නතර කරන්න හදන්න එපා. මොකද කෙනෙක් ඔයාට විරුද්ධව වැඩ කරන්නේ නැත්නම් ඇත්තටම එයා ඉන්නේ ඔයාගේ පැත්තේ.”
51 යේසුස් ස්වර්ගයට යන්න+ නියමිත දවස් ළං වෙද්දී ඔහු යෙරුසලමට යන්න මුළු හිතින්ම අධිෂ්ඨාන කරගත්තා.
52 ඉතින් ඔහු එහෙට යන්න කලින් පණිවිඩකරුවන් කීපදෙනෙක්ව එහෙට යැව්වා. ඒ අය යේසුස්ට ඕනෙ කරන දේවල් සූදානම් කරන්න සමරිතානුවන්ගේ ගමකට ගියා.
53 ඒත් යේසුස් එහෙට ආවාම ඒ ගමේ අය ඔහුව පිළිගත්තේ නැහැ.+ මොකද ඔහු යන්නේ යෙරුසලමට කියලා එයාලා දැනගෙන හිටියා.
54 ඒක දැක්කාම යාකොබ් සහ යොහන්+ “ස්වාමීනි, එයාලව විනාශ කරලා දාන්න ස්වර්ගයෙන් ගින්නක් එවන්න කියලා අපි දෙවියන්ගෙන් ඉල්ලන්නද” කියලා ඇහුවා.+
55 ඒත් යේසුස් එයාලාගේ පැත්තට හැරිලා එයාලා කියපු දේ ගැන එයාලට තදින් අවවාද කළා.
56 ඉතින් එයාලා එතනින් පිට වෙලා වෙන ගමකට ගියා.
57 එයාලා යන අතරේ මිනිසෙක් යේසුස්ට කිව්වා “ඔබ යන ඕනෙම තැනකට මාත් ඔබත් එක්ක යන්න එන්නම්” කියලා.
58 ඒත් යේසුස් එයාට මෙහෙම කිව්වා. “නරින්ට ගුහා තියෙනවා. අහසේ කුරුල්ලන්ට ඉන්න කූඩු තියෙනවා. ඒත් මනුෂ්‍ය පුත්‍රයාට හිස තියන්නවත් තැනක් නැහැ.”+
59 පස්සේ ඔහු තවත් කෙනෙක්ට කිව්වා “මගේ අනුගාමිකයෙක් වෙන්න” කියලා. එතකොට ඒ කෙනා යේසුස්ට මෙහෙම කිව්වා. “ස්වාමීනි, මං ඉස්සෙල්ලාම ගිහින් තාත්තාව තැන්පත් කරන්නම්. ඒකට මට කාලේ දෙන්න.”+
60 එතකොට යේසුස් මෙහෙම කිව්වා. “මැරුණු අයව*+ තැන්පත් කරන්න මැරුණු අයටම ඉඩහරින්න. ඔයා ගිහින් දෙවියන්ගේ රාජ්‍යය ගැන හැම තැනකම දේශනා කරන්න.”+
61 තවත් කෙනෙක් යේසුස්ට මෙහෙම කිව්වා. “ස්වාමීනි, මං කැමතියි ඔබ පිටිපස්සෙන් එන්න. ඒත් ඉස්සෙල්ලාම මගේ පවුලේ අයගෙන් සමුගන්න මට අවසර දෙන්න.”
62 ඒත් යේසුස් එයාට මෙහෙම කිව්වා. “නගුලකට අත තියලා ආපහු හැරිලා බලන කිසිම කෙනෙක්+ දෙවියන්ගේ රාජ්‍යයට සුදුසු නැහැ.”+
පාදසටහන්
^ මූ.අ., “රිදීවත්.”
^ මූ.අ., “ඇඳුම් දෙකක්වත්.”
^ එහෙම කළේ තමන් වගකීමෙන් නිදහස් කියලා පෙන්නන්නයි.
^ ඒ කියන්නේ හෙරොද් අන්තිපස්. “පැහැදිලි කිරීමක්” බලන්න.
^ ඒ කියන්නේ තමන් ගැන හිතන්නේ නැතුව තමන්ගේ ආශාවන් සහ අවශ්‍යතා පැත්තකට දාලා.
^ “පැහැදිලි කිරීමක්” බලන්න.
^ මූ.අ., “මගේ නම නිසා.”
^ පේන විදිහට මෙතන කතා කරන්නේ දෙවියන් එක්ක කිසිම බැඳීමක් නැති අය ගැනයි.
