විනිශ්චයකරුවෝ 11:1-40
11 ගිලියද්වල යුද්දෙට දක්ෂ, එඩිතර මනුස්සයෙක් හිටියා. එයාගේ නම යෙප්තා.+ එයාගේ අම්මා ගණිකාවක්. එයාගේ තාත්තාගේ නම ගිලියද්.
2 ගිලියද්ගේ බිරිඳටත්* පුතාලා හම්බ වුණා. ඒ පුතාලා ලොකු මහත් වුණාට පස්සේ එයාලා යෙප්තාට මෙහෙම කිව්වා. “ඔයා වෙන ගෑනු කෙනෙක්ගේ පුතෙක්. ඒ නිසා අපේ තාත්තාගේ දේපළවලින් ඔයාට කිසි දෙයක් අයිති වෙන්නේ නැහැ.” එහෙම කියලා එයාලා යෙප්තාව ගෙදරින් පන්නලා දැම්මා.
3 ඉතින් යෙප්තා එයාගේ සහෝදරයන්ගෙන් පලා ගිහිල්ලා ටෝබ් දේශයේ පදිංචි වුණා. රස්සාවල් නැති කීපදෙනෙක් යෙප්තාට එකතු වුණා. එයාලා යෙප්තාව සැලකුවේ එයාලාගේ නායකයා විදිහට.
4 කාලයක් ගියාට පස්සේ අම්මොන්වරු ඊශ්‍රායෙල්වරුන්ට විරුද්ධව සටන් කළා.+
5 අම්මොන්වරු සටන් කරන්න ආවාම ගිලියද්වල හිටපු වැඩිමහල්ලෝ ටෝබ් දේශයේ හිටපු යෙප්තාව එක්කගෙන එන්න ඉක්මනට එහෙට ගියා.
6 එයාලා යෙප්තාට මෙහෙම කිව්වා. “ඇවිල්ලා අපේ හමුදාපති වෙන්න. එතකොට අපිට පුළුවන් අම්මොන්වරු එක්ක සටන් කරන්න.”
7 ඒත් යෙප්තා වැඩිමහල්ලන්ට මෙහෙම කිව්වා. “ඔයාලම නේද මගේ තාත්තාගේ ගෙදරින් මාව පන්නලා දැම්මේ?+ ඔයාලා මාත් එක්ක කොච්චර තරහෙන්ද හිටියේ! දැන් ඔයාලා කරදරේ වැටිලා ඉන්න හින්දා මං ළඟට ඇවිල්ලා උදව් ඉල්ලනවා.”
8 එතකොට ගිලියද්වල වැඩිමහල්ලෝ යෙප්තාට මෙහෙම කිව්වා. “හරි, හරි ඒක අපි පිළිගන්නවා. ඒකනේ ඉතින් අපි ඔයා ළඟට ආවේ. ඔයා අපිත් එක්ක ඇවිල්ලා අම්මොන්වරුන්ට විරුද්ධව සටන් කරනවා නම් ගිලියද්වල ඉන්න අපි හැමෝගෙම නායකයා වෙන්න ඔයාට පුළුවන්.”+
9 එතකොට යෙප්තා එයාලට මෙහෙම කිව්වා. “මං ඔයාලත් එක්ක ඇවිල්ලා අම්මොන්වරු එක්ක සටන් කරද්දී යෙහෝවා මට එයාලව පරාජය කරන්න උදව් කළොත් මම ඔයාලාගේ නායකයා වෙන්නම්.”
10 ගිලියද්වල වැඩිමහල්ලෝ යෙප්තාට මෙහෙම කිව්වා. “යෙහෝවා දෙවියන් අපි අතරේ සාක්ෂිකරුවෙක් විදිහට ඉඳියි. ඉතින් ඔයා කියපු විදිහට අපි කළේ නැත්නම් දෙවියන් ඒ ගැන බලාගනියි.”
11 ඉතින් යෙප්තා ගිලියද්වල වැඩිමහල්ලන් එක්ක ගියා. එහේ හිටපු මිනිස්සු එයාව එයාලාගේ නායකයා සහ හමුදාපති විදිහට පත් කරගත්තා. ඊටපස්සේ යෙප්තා එයාලා එකඟ වුණ හැම දෙයක්ම මිෂ්පාවලදී+ යෙහෝවා ඉස්සරහා ආපහු කිව්වා.
12 ඊටපස්සේ යෙප්තා පණිවිඩකරුවන්ව යවලා අම්මොන්වරුන්ගේ+ රජට මෙහෙම දැන්නුවා. “ඔයා මගේ දේශයට ඇවිල්ලා සටන් කරන්න ලෑස්ති වෙලා ඉන්නේ මොන හේතුවක් නිසාද?”
13 යෙප්තා යවපු පණිවිඩකරුවන්ට අම්මොන්වරුන්ගේ රජ මෙහෙම කිව්වා. “අපි සටන් කරන්න ආවේ ඊශ්‍රායෙල්වරු ඊජිප්තුවෙන් නිදහස් වෙලා ආවාම එයාලා මගේ දේශයෙන් කොටසක් ගත්ත නිසයි.+ ආනොන් ඔයේ+ ඉඳලා යබ්බොක් ඔය වෙන කල් යොර්දාන් ගඟට මායිම් වෙලා තියෙන මුළු ප්‍රදේශයම+ එයාලා ගත්තා. දැන් ඒක ආපහු අපිට දෙන්න. එතකොට ප්‍රශ්නේ ඉවරයි.”
14 ඒත් යෙප්තා ඒ පණිවිඩකරුවන්ව ආපහු අම්මොන්වරුන්ගේ රජ ළඟට යවලා
15 එයාට මෙහෙම දැන්නුවා.
“යෙප්තා මෙහෙම කියනවා. ‘ඊශ්‍රායෙල්වරු මෝවබ්වරුන්ගෙයි,+ අම්මොන්වරුන්ගෙයි+ දේශය ගත්තා කියන කතාව නම් වැරදියි.
16 එයාලා ඊජිප්තුවෙන් නිදහස් වෙලා ආවාම රතු මුහුද වෙන කල් තියෙන පාළුකරය පුරාම+ ගිහිල්ලා කාදෙෂ්වලට+ ආවා.
17 ඊටපස්සේ ඊශ්‍රායෙල්වරු ඒදොම්වල රජ+ ළඟට පණිවිඩකරුවන්ව යවලා මෙහෙම කිව්වා. “ඔයාගේ දේශය මැදින් යන්න අපිට අවසර දෙන්න පුළුවන්ද?” ඒත් ඒදොම්වල රජ ඒකට අවසර දුන්නේ නැහැ. එයාලා මෝවබ්වල රජගෙනුත්+ අවසර ඉල්ලුවා. එයාත් ඒකට කැමති වුණේ නැහැ. ඒ නිසා ඊශ්‍රායෙල්වරු දිගටම කාදෙෂ්වල+ හිටියා.
18 එයාලා පාළුකරය මැදින් යද්දී ඒදොම්+ දේශය සහ මෝවබ් දේශය මඟහැරලා ගියා. ඊශ්‍රායෙල්වරු මෝවබ් දේශයේ නැඟෙනහිර පැත්තට+ ගිහිල්ලා ආනොන්වලට එහායින් කඳවුරු බැඳගත්තා. එයාලා මෝවබ් දේශයේ මායිම+ වුණ ආනොන් ඔය පහු කරලා ඇවිත් මෝවබ් දේශයට ඇතුල් වුණේ නැහැ.
19 “‘ඊටපස්සේ ඊශ්‍රායෙල්වරු හෙෂ්බොන්වල හිටපු අමෝරිවරුන්ගේ රජ වුණ සීහොන්ට පණිවිඩකරුවන්ව යවලා මෙහෙම කිව්වා. “ඔයාගේ දේශය මැදින් යන්න අපිට අවසර දෙන්න පුළුවන්ද? අපිට ඕනෙ අපේ දේශයට යන්න.”+
20 ඒත් සීහොන් ඊශ්‍රායෙල්වරුන්ව විශ්වාස කළේ නැති නිසා එයාගේ දේශය මැදින් යන්න එයාලට ඉඩ දුන්නේ නැහැ. සීහොන් එයාගේ සෙබළුන්ව එකතු කරගෙන යහෂ්වලට ගිහින් කඳවුරු බැඳගෙන ඊශ්‍රායෙල්වරුන්ට විරුද්ධව සටන් කළා.+
21 ඒ වෙලාවේ ඊශ්‍රායෙල්වරුන්ගේ දෙවි වන යෙහෝවා සීහොන්වයි, එයාගේ මුළු හමුදාවයි ඊශ්‍රායෙල්වරුන්ගේ අතට අල්ලලා දුන්නා. ඒ නිසා ඊශ්‍රායෙල්වරු එයාලව පරාජය කළා. ඊටපස්සේ ඒ ප්‍රදේශයේ අමෝරිවරුන් ජීවත් වුණ මුළු දේශයම එයාලා අල්ලගත්තා.+
22 ආනොන් ඔයේ ඉඳලා යබ්බොක් ඔය දක්වාත් පාළුකරයේ ඉඳන් යොර්දාන් ගඟ දක්වාත් තියෙන අමෝරිවරුන්ගේ මුළු දේශයම ඊශ්‍රායෙල්වරු ඒ විදිහට අයිති කරගත්තා.+
23 “‘ඊශ්‍රායෙල්වරුන්ගේ දෙවි වන යෙහෝවා තමයි ඔහුගේ සෙනඟට මේ දේශය දෙන්න අමෝරිවරුන්ව දේශයෙන් පන්නලා දැම්මේ.+ දැන් ඔයාලා හදන්නේ ඊශ්‍රායෙල්වරුන්ව පන්නලා දාන්නද?
24 ඔයාලාගේ දෙවි වන කෙමොෂ්+ ඔයාලට දෙන දේවල් ඔයාලා අයිති කරගන්නේ නැද්ද? ඉතින් අපිත් අපේ දෙවි වන යෙහෝවා අපිට දෙන ඕනම දේශයක් අයිති කරගන්නවා.+
25 මෝවබ්වල රජකම් කරපු ෂිප්පෝර්ගේ පුතා වුණ බාලාක්+ එයාගේ දේශය අයිති කරගත්තා කියලා ඊශ්‍රායෙල්වරුන්ට විරුද්ධව කවදාවත් සටන් කළේ නැහැ. දැන් ඔයාලා හිතන්නේ බාලාක්ට වඩා අයිතියක් ඔයාලට තියෙනවා කියලද?
26 ඊශ්‍රායෙල් සෙනඟ අවුරුදු 300ක් තිස්සේ හෙෂ්බොන් සහ ඒ අවට තිබුණ කුඩා නගරවලයි,+ අරෝයේර් සහ ඒ අවට තිබුණ කුඩා නගරවලයි, ආනොන් ඔයේ ඉවුර දිගේ තියෙන නගරවලයි ජීවත් වුණා. ඇයි ඔයා ඒ කාලේ ඒවා ආපහු ගන්න හැදුවේ නැත්තේ?+
27 මං ඔයාට වරදක් කළේ නැහැ. අපිට පහර දීලා ඔයා තමයි වරදක් කළේ. ඊශ්‍රායෙල්වරු සහ අම්මොන්වරු අතර තියෙන මේ ප්‍රශ්නේ ශ්‍රේෂ්ඨ විනිශ්චයකරු වන යෙහෝවා දෙවියන්ම+ විසඳයි.’”
28 ඒත් යෙප්තා යවපු පණිවිඩයට අම්මොන්වරුන්ගේ රජ ඇහුම්කන් දුන්නේ නැහැ.
29 යෙහෝවා දෙවියන්ගේ බලය යෙප්තාට ලැබුණා.+ එයා ගිලියද් දේශයේ සහ මනස්සේ ගෝත්‍රයට අයිති ප්‍රදේශයේ ගමන් කරලා ගිලියද් දේශයේ මිෂ්පේවලට ආවා.+ ඊටපස්සේ එයා එතන ඉඳන් අම්මොන්වරුන්ට විරුද්ධව සටන් කරන්න ගියා.
30 ඒ වෙලාවේදී යෙප්තා යෙහෝවාට මෙහෙම පොරොන්දු වුණා.+ “දෙවියනි, අම්මොන්වරුන්ව පරද්දන්න ඔයා මට උදව් කළොත්
31 මං දිනලා ආපහු එද්දී මගේ ගෙදර දොරෙන් ඉස්සෙල්ලාම මාව හම්බ වෙන්න එළියට එන කෙනාව මං ඔයාට දෙනවා.+ මං එයාව දවන පූජාවක් විදිහට*+ යෙහෝවා වන ඔයාට ඔප්පු කරනවා.”
32 යෙප්තා අම්මොන්වරුන්ට විරුද්ධව සටන් කරන්න ගියාම එයාලව පරද්දන්න යෙහෝවා යෙප්තාට උදව් කළා.
33 එයා අරෝයේර් ඉඳන් මින්නිත් වෙන කල් නගර 20ක් යටත් කරගෙන ගොඩක් අයව මරලා දැම්මා. පස්සේ එයා ආබෙල්කෙරාමීම් වෙන කල් ගිහිල්ලා සෑහෙන දෙනෙක්ව මරලා දැම්මා. ඒ විදිහට ඊශ්‍රායෙල්වරු අම්මොන්වරුන්ව පරාජය කළා.
34 ඊටපස්සේ යෙප්තා මිෂ්පාවල තිබුණ එයාගේ ගෙදර ගියා.+ එයා ගෙදර ළඟට යද්දී එයාගේ දුව රබානක් ගගහා නටනට එයාව හම්බ වෙන්න ඉස්සරහට ආවා. ඒ දුව තමයි යෙප්තාට හිටපු එකම දරුවා. එයා ඇරෙන්න තව පුතෙක්වත් දුවෙක්වත් යෙප්තාට හිටියේ නැහැ.
35 එයාව දැක්කාම යෙප්තා එයාගේ ඇඳුම් ඉරාගෙන මෙහෙම කිව්වා. “අනේ මගේ දුවේ! මට දැනෙන දුක විස්තර කරන්න වචන නෑ. මට ඔයාව මෙහෙන් යවන්න වෙනවා. මං යෙහෝවාට පොරොන්දුවක් වුණා. මගේ දුවේ, ඒ පොරොන්දුව කඩන්න නම් මට බැහැ.”+
36 ඒත් යෙප්තාගේ දුව එයාට මෙහෙම කිව්වා. “තාත්තේ, ඔයාගේ සතුරන් වුණ අම්මොන්වරුන්ගෙන් පළිගන්න යෙහෝවා ඔයාට උදව් කළා. ඉතින් ඔයා යෙහෝවාට පොරොන්දුවක් වෙලා තියෙනවා නම් පොරොන්දු වුණ විදිහටම මට කරන්න.”+
37 ඊටපස්සේ එයා යෙප්තාට මෙහෙම කිව්වා. “මං ඔයාගෙන් එක දෙයක් ඉල්ලනවා. තාත්තේ, මට මාස දෙකක කාලයක් දෙන්න. මං දන්නවා මට කවදාවත් බඳින්න හම්බ වෙන්නේ නැහැ කියලා. ඒ නිසා මගේ යාළුවොත් එක්ක කඳුකරයට ගිහිල්ලා ඒ ගැන දුක් වෙන්න මට කාලයක් දෙන්න.”
38 යෙප්තා දුවට මෙහෙම කිව්වා. “කමක් නෑ යන්න.” යෙප්තා මාස දෙකකට එයාව යැව්වා. ඒ කාලේදී එයා එයාගේ යාළුවන් එක්ක කඳුකරයට ගිහිල්ලා එයාට විවාහ වෙන්න ලැබෙන්නේ නැති එක ගැන දුක් වුණා.
39 ඒ මාස දෙක ඉවර වුණාට පස්සේ එයා ආපහු තාත්තා ළඟට ආවා. ඊටපස්සේ දුව ගැන වුණ පොරොන්දුව යෙප්තා ඉටු කළා.+ යෙප්තාගේ දුව කවදාවත් විවාහ වුණේ නැහැ. ඒකෙන් පස්සේ ඊශ්‍රායෙල් දේශයේ අය මේ දේ චාරිත්‍රයක් විදිහට කළා.
40 ඊශ්‍රායෙල් දේශයේ හිටපු තරුණියන් හැම අවුරුද්දකම දවස් හතරක් ගිලියද් දේශයේ කෙනෙක් වුණ යෙප්තාගේ දුවව හම්බ වෙලා එයාව අගය කළා.*
පාදසටහන්
^ පේන විදිහට එයා ගිලියද්ගේ තවත් බිරිඳක් වෙන්න ඇති.
^ පේන විදිහට ඒකෙන් අදහස් කරන්නේ දෙවියන්ගේ සේවය වෙනුවෙන්ම කෙනෙක්ව කැප කරනවා කියන එක.
^ හෝ, “දිරිගැන්නුවා.”
