විනිශ්චයකරුවෝ 2:1-23
2 ඊටපස්සේ දේවදූතයා+ ගිල්ගාල්+ ඉඳන් බෝකිම්වලට ගිහිල්ලා යෙහෝවා දෙවියන් කියපු මේ පණිවිඩය දැන්නුවා. “මම ඔයාලව ඊජිප්තුවෙන් නිදහස් කරගෙන ඔයාලාගේ මුතුන්මිත්තන්ට දෙනවා කියලා දිවුරලා පොරොන්දු වුණ දේශයට ඔයාලව ගෙනාවා.+ එදා මම ඔයාලට මෙහෙම කිව්වා. ‘මම ඔයාලා එක්ක ඇති කරගත්ත ගිවිසුම කවදාවත් කඩ කරන්නේ නැහැ.+
2 ඉතින් මම මේ දේ ඔයාලාගෙනුත් බලාපොරොත්තු වෙනවා. මේ දේශයේ මිනිස්සු එක්ක කිසිම ගිවිසුමක් ඇති කරගන්න එපා.+ එයාලා හදලා තියෙන පූජාසන කඩලා දාන්න.’+ මම එහෙම කිව්වත් ඔයාලා මගේ හඬට ඇහුම්කන් දුන්නේ නැහැ.+ ඇයි ඔයාලා මට අකීකරු වුණේ?
3 ඒ නිසයි මම මෙහෙම කිව්වේ. ‘මම ඒ ජාතීන්ව ඔයාලා ඉස්සරහින් පන්නලා දාන්නේ නැහැ.+ ඒ ජාතීන් ඔයාලට උගුලක් වෙයි.+ එයාලාගේ දෙවිවරුන්ට නමස්කාර කරන උගුලට ඔයාලා අහු වෙයි.’”+
4 දේවදූතයා යෙහෝවා දෙවියන් කියපු ඒ දේවල් ගැන කිව්වාම ඊශ්‍රායෙල්වරු හැමෝම කෑගහලා අඬන්න පටන්ගත්තා.
5 එයාලා එතනට බෝකිම්* කියන නම තිබ්බේ ඒ නිසයි. එතනදී එයාලා යෙහෝවාට පූජා ඔප්පු කළා.
6 යොෂුවා ඊශ්‍රායෙල් සෙනඟව පිටත් කළාට පස්සේ එයාලා තමන්ට උරුම වුණ ප්‍රදේශ යටත් කරගන්න පිටත් වෙලා ගියා.+
7 යොෂුවා ජීවත් වෙලා හිටපු කාලේ පුරාම ඊශ්‍රායෙල් සෙනඟ යෙහෝවාට සේවය කළා. යොෂුවා මැරුණාට පස්සේ ජීවත් වුණ වැඩිමහල්ලන් හිටපු කාලේ පුරාමත් සෙනඟ එහෙම කළා. ඒ වැඩිමහල්ලන් ඊශ්‍රායෙල් සෙනඟ වෙනුවෙන් යෙහෝවා කරපු පුදුම දේවල් දැකලා තිබුණා.+
8 නූන්ගේ පුතා වුණ යොෂුවා මැරුණා. යෙහෝවාගේ සේවකයෙක් වුණ යොෂුවා මැරෙද්දී එයාට වයස අවුරුදු 110යි.+
9 ඊශ්‍රායෙල්වරු එයාව තැන්පත් කළේ එයාට උරුමයක් විදිහට ලැබුණු තිම්නත්හේරෙස්+ නගරයේ. ඒ නගරය තියෙන්නේ එෆ්‍රායිම් ගෝත්‍රයට අයිති කඳුකර ප්‍රදේශයේ තියෙන ගයෂ්+ කන්දට උතුරු පැත්තෙන්.
10 කාලයක් යද්දී යොෂුවාගේ කාලේ හිටපු පරම්පරාව මැරිලා ගියා. ඊටපස්සේ යෙහෝවාව දැන හඳුන ගෙන හිටියේ නැති, ඊශ්‍රායෙල්වරු වෙනුවෙන් ඔහු කරපු දේවල් ගැන දන්නේ නැති පරම්පරාවක් බිහි වුණා.
11 ඉතින් ඊශ්‍රායෙල්වරු යෙහෝවා වැරදියි කියලා සලකන දේවල් කරන්න පටන් අරන් බාල්ගේ රූපවලට නමස්කාර කළා.+
12 ඒ විදිහට ඊශ්‍රායෙල්වරු එයාලව ඊජිප්තු දේශයෙන් නිදහස් කරගෙන ආපු එයාලාගේ පියවරුන්ගේ දෙවි වුණ යෙහෝවාව අත්හැරියා.+ එයාලා වෙනත් දෙවිවරුන්ට නමස්කාර කරන්න පටන්ගත්තා. එයාලා අවට හිටපු ජාතීන් නමස්කාර කරපු දෙවිවරුන්+ ඉස්සරහා වැඳ වැටුණ නිසා යෙහෝවාට ගොඩක් කේන්ති ගියා.+
13 එයාලා යෙහෝවාව අත්හැරලා බාල්ගේ සහ අෂ්ටොරෙත්ගේ රූපවලට නමස්කාර කළා.+
14 ඊශ්‍රායෙල් සෙනඟ එක්ක යෙහෝවාට ගොඩක් කේන්ති ගිය නිසා ඔහු එයාලව සතුරන් අතට භාර දුන්නා.+ එයාලට අයිති හැම දෙයක්ම කොල්ල කන්නත් ඉඩහැරියා.+ දෙවියන් එහෙම වෙන්න ඉඩහැරිය නිසා සතුරන්ට විරුද්ධව කිසිම දෙයක් කරගන්න ඊශ්‍රායෙල් සෙනඟට බැරි වුණා.+
15 යෙහෝවා එයාලට විරුද්ධව හිටපු නිසා එයාලා කොහේ ගියත් මොනවා කළත් යෙහෝවා කියපු විදිහටම එයාලට ගොඩක් විපත්වලට මුහුණ දෙන්න වුණා.+ යෙහෝවා දිවුරලා කියපු විදිහටම+ එයාලා පිටට ගොඩක් කරදර ආවා.+
16 ඉතින් යෙහෝවා එයාලාගේ සතුරන් අතින් එයාලව බේරගන්න විනිශ්චයකරුවන්ව පත් කළා.+
17 ඒත් එයාලා ඒ විනිශ්චයකරුවන්ට ඇහුම්කන් දුන්නෙත් නැහැ. එයාලා දෙවියන්ට ද්‍රෝහි වෙලා* වෙනත් දෙවිවරුන් ඉස්සරහා වැඳ වැටුණා. යෙහෝවාගේ ආඥාවලට කීකරු වුණ එයාලාගේ මුතුන්මිත්තන්+ ගිය පාරේ යනවා වෙනුවට එයාලා ඉක්මනින්ම ඒ පාරෙන් පිට පැන්නා. දෙවියන්ට කීකරු වෙන්න එයාලට බැරි වුණා.
18 යෙහෝවා සෙනඟ වෙනුවෙන් විනිශ්චයකරුවෙක්ව පත් කළාම+ ඒ විනිශ්චයකරුගේ ජීවිත කාලේ පුරාම යෙහෝවා එයා එක්ක ඉඳලා සතුරන්ගේ අතින් සෙනඟව බේරගන්න එයාට උදව් කළා. මොකද සතුරන් සෙනඟට ගොඩක් හිංසා පීඩා කළා. සෙනඟ විඳපු දුක නිසා එයාලා අඬා වැලපෙද්දී+ යෙහෝවාට එයාලා ගැන ලොකු අනුකම්පාවක් දැනුණා.+
19 ඒත් ඒ විනිශ්චයකරු මැරුණාම එයාලා ආයෙත් වෙනත් දෙවිවරු ඉස්සරහා වැඳ වැටිලා ඒ දෙවිවරුන්ට නමස්කාර කරන්න පටන්ගත්තා. එයාලාගේ පියවරුන් කළාටත් වඩා පිළිකුල් දේවල් කළා.+ එයාලා ඒ වැරදි දේවලින් අයින් වුණේවත් මුරණ්ඩු විදිහට වැඩ කරන එක වෙනස් කරගත්තෙවත් නැහැ.
20 අන්තිමේදී ඊශ්‍රායෙල් සෙනඟ එක්ක යෙහෝවාට ගොඩක් කේන්ති ගිහින්+ මෙහෙම කිව්වා. “මේ ජාතිය මට අකීකරු වුණා.+ එයාලාගේ මුතුන්මිත්තන් එක්ක මම ඇති කරගත්ත ගිවිසුම එයාලා කඩ කරපු නිසා+
21 යොෂුවා මැරෙන්න කලින් යටත් කරගත්තේ නැති එක ජාතියක්වත් මම දේශයෙන් පන්නලා දාන්නේ නැහැ.+
22 එහෙම කරන්නේ එයාලාගේ තාත්තලා ගියා වගේ යෙහෝවා වන මම පෙන්නන පාරේ ඊශ්‍රායෙල් සෙනඟත් යනවාද කියලා සෝදිසි කරලා බලන්නයි.”+
23 ඒ නිසයි යෙහෝවා ඒ ජාතීන්ව ඉක්මනින් එළවලා දාන්නේ නැතුව එයාලට දේශයේ ඉන්න ඉඩහැරියේ. ඔහු එයාලව යොෂුවාගේ අතට භාර දුන්නේ නැහැ.
