විනිශ්චයකරුවෝ 7:1-25
7 යෙරුබ්බාල් ඒ කියන්නේ ගිඩියොන්+ එයාට එකතු වුණ හැමෝමත් එක්ක උදේ පාන්දරින්ම නැඟිටලා හාරොද් උල්පත ළඟට ගිහින් එතන කඳවුරු බැඳගත්තා. මිදියන්වරු කඳවුරු බැඳගෙන හිටියේ ගිඩියොන් හිටපු තැනට උතුරෙන්. ඒ කියන්නේ තැනිතලාවේ තිබුණ මොරේ කන්ද ළඟයි.
2 යෙහෝවා දෙවියන් ගිඩියොන්ට මෙහෙම කිව්වා. “ඔයාත් එක්ක ඉන්න අයගේ ගාණ වැඩියි.+ ගොඩක් අය හිටියොත් මං මිදියන්වරුන්ව ඔයාලාගේ අතට අල්ලලා දුන්නාම ඊශ්‍රායෙල්වරු හරිම ආඩම්බරෙන් ‘අපි දිනුවේ අපේ දක්ෂකමෙන්’ කියලා කියයි.+
3 ඉතින් දැන් හැමෝටම ඇහෙන්න කියන්න ‘කවුරු හරි කෙනෙක් බයේ වෙවුලනවා නම් එයාට පුළුවන් ආපහු ගෙදර යන්න’+ කියලා.” ඉතින් ඒ විදිහට ගිඩියොන් එයාලව පරීක්ෂා කළා. එතකොට මිනිස්සු 22,000ක් ආපහු එයාලාගේ ගෙවල්වලට ගියා. ඉතුරු වුණේ 10,000ක් විතරයි.
4 යෙහෝවා ආයෙත් ගිඩියොන්ට කතා කරලා මෙහෙම කිව්වා. “ඔයා එක්ක ඉන්න අයගේ ගාණ තාමත් වැඩියි. එයාලව දිය පාර ළඟට එක්කගෙන යන්න. එතනදී සටනට යන්න සුදුසු අයව මම තෝරලා දෙන්නම්.* ‘මෙයා හොඳයි’ කියලා මං කිව්වොත් එයාව ඔයාත් එක්ක සටනට එක්කගෙන යන්න. ‘මෙයා හරියන්නේ නෑ’ කියලා මං කිව්වොත් එයාව සටනට එක්කගෙන යන්න එපා.”
5 ඉතින් ගිඩියොන් සෙනඟව දිය පාර ළඟට එක්කගෙන ගියා.
යෙහෝවා එතනදී ගිඩියොන්ට මෙහෙම කිව්වා. “වතුර අතට අරගෙන බල්ලෙක් වතුර බොනවා වගේ දිවෙන් ලෙව කාලා වතුර බොන අයව එක පැත්තකට වෙන් කරන්න. දණගහලා ඔළුව පාත් කරගෙන වතුර බොන අයව අනිත් පැත්තට වෙන් කරන්න.”
6 300දෙනෙක් විතරයි වතුර අතට අරගෙන බල්ලෙක් වගේ ලෙව කාලා වතුර බිව්වේ. අනිත් හැමෝම වතුර බිව්වේ දණගහලා ඔළුව පහත් කරගෙන.
7 යෙහෝවා ගිඩියොන්ට මෙහෙම කිව්වා. “වතුර අතට අරගෙන බීපු 300දෙනාව පාවිච්චි කරලා මම ඔයාලව බේරගන්නවා. මම අනිවාර්යයෙන්ම මිදියන්වරුන්ව ඔයාලාගේ අතට අල්ලලා දෙනවා.+ අනිත් අයට ආපහු ගෙවල්වලට යන්න පුළුවන්.”
8 ගෙවල්වලට යන අය ළඟ තිබුණ කෑම බීමයි, හොරණෑයි එයාලා එකතු කරගත්තාට පස්සේ ගිඩියොන් ඒ මිනිස්සුන්ව ගෙවල්වලට යැව්වා. එයා තියාගත්තේ 300දෙනාව විතරයි. මිදියන්වරුන්ගේ කඳවුර තිබුණේ ගිඩියොන් හිටපු තැනට පහළින් තිබුණ තැනිතලාවේ.+
9 එදා රෑ යෙහෝවා ගිඩියොන්ට මෙහෙම කිව්වා. “මිදියන්වරුන්ගේ කඳවුරට පහර දෙන්න දැන් ලෑස්ති වෙන්න. මම එයාලව ඔයාගේ අතට භාර දීලයි තියෙන්නේ.+
10 ඒත් එයාලට පහර දෙන්න ඔයාට බයයි නම් ඔයාගේ සේවකයා වන පූරා එක්ක කඳවුර තියෙන තැනට යන්න.
11 ගිහින් කඳවුරේ ඉන්න අය කතා වෙන දේවල් අහගෙන ඉන්න. ඒකෙන් කඳවුරට පහර දෙන්න ඔයාට ධෛර්යයක් ලැබෙයි.” ඉතින් ගිඩියොන් එයාගේ සේවකයා වුණ පූරා එක්ක කඳවුර තියෙන තැනට බැහැගෙන ගියා. එයාලා කඳවුර කිට්ටුවටම ආවා.
12 මිදියන්වරු, අමලෙක්වරු සහ නැඟෙනහිර ප්‍රදේශවල හිටපු මිනිස්සු+ පළඟැටි රංචුවක් වගේ මුළු තැනිතලාවම වහගෙන හිටියා. එයාලට මුහුදු වෙරළේ වැලි වගේ ගණන් කරන්න බැරි තරම් ඔටුවන් ප්‍රමාණයකුත් හිටියා.+
13 ගිඩියොන් එයාලාගේ කඳවුර ළඟට ගියාම ඒකේ හිටපු සෙබළෙක් එයාගේ යාළුවාට එයා දැක්ක හීනයක් ගැන කියනවා ඇහුණා. ඒ සෙබළා මෙහෙම කිව්වා. “මං පුදුම හීනයක්නේ දැක්කේ. මං දැක්කා බාර්ලිවලින් හදපු රොටියක් මිදියන්වරුන්ගේ කඳවුරට පෙරළීගෙන එනවා. ඒක කූඩාරමක හයියෙන් වැදුණා. කොච්චර හයියෙන් වැදුණාද කියනවා නම් ඒ කූඩාරම කුඩුපට්ටම් වෙලා බිමටම සමතලා වුණා.”+
14 එතකොට එයාගේ යාළුවා මෙහෙම කිව්වා. “ආ, ඒකෙන් කියවෙන්නේ අර ඊශ්‍රායෙල් මනුස්සයා, යෝවාෂ්ගේ පුතා ගිඩියොන්ගේ කඩුව ගැනයි.+ මිදියන්වරුන්වයි, මේ මුළු කඳවුරයි දෙවියන් එයාගේ අතට අහු කරලා දීලයි තියෙන්නේ.”+
15 ඒ සෙබළා දැක්ක හීනයයි, ඒකේ තේරුමයි ඇහුව ගමන්ම+ ගිඩියොන් බිමට නැමිලා දෙවියන්ට නමස්කාර කළා. ඊටපස්සේ එයා ඊශ්‍රායෙල් කඳවුරට ගිහිල්ලා මෙහෙම කිව්වා. “දැන් හැමෝම ලෑස්ති වෙන්න. යෙහෝවා මිදියන්වරුන්ගේ කඳවුර අපේ අතට අල්ලලා දීලයි තියෙන්නේ.”
16 ඊටපස්සේ එයා ඒ 300දෙනාව කණ්ඩායම් තුනකට බෙදුවා. ඒ හැමෝටම හොරණෑවකුයි,+ ලොකු මැටි භාජනයකුයි දුන්නා. හැම මැටි භාජනයක් ඇතුළෙම පන්දමක් දාලා තිබුණා.
17 එයා ඒගොල්ලන්ට මෙහෙම කිව්වා. “මං කරන දේ දිහා බලලා ඒ විදිහටම කරන්න. මං කඳවුර ළඟට ගිහින් කරන දේම ඔයාලත් කරන්න.
18 මමයි, මාත් එක්ක ඉන්න අයයි හොරණෑ පිඹිනකොට කඳවුර වටේ ඉන්න ඔයාලා හැමෝමත් ඔයාලාගේ හොරණෑ පිඹින්න. ඊටපස්සේ මෙහෙම කෑගහන්න. ‘යෙහෝවා දෙවියන්ටයි, ගිඩියොන්ටයි ජය වේවා!’”
19 ගිඩියොන් එයාගේ කණ්ඩායමට අයිති 100දෙනාත් එක්ක කඳවුර ළඟට ආවා. එයාලා එතනට ආවේ රෑ දෙවෙනි වැඩමුරයට* මුරකරුවන් මාරු වුණාට පස්සෙයි. ඊටපස්සේ එයාලා හොරණෑ පිඹලා,+ එයාලා අතේ තිබුණ ලොකු මැටි භාජන බිඳලා දැම්මා.+
20 කණ්ඩායම් තුනම එයාලාගේ හොරණෑ පිඹලා එයාලාගේ අත්වල තිබුණ ලොකු මැටි භාජන බිඳලා දැම්මා. එයාලා පන්දම් ටික වම් අතේ තියාගෙන දකුණු අතේ තිබුණ හොරණෑ පිඹින ගමන් මෙහෙම කෑගැහුවා. “මේ සටන අයිති යෙහෝවාටයි, ගිඩියොන්ටයි.”
21 ඒ හැම දෙයක්ම එයාලා කළේ කඳවුර වටේ එයාලට නියම වුණ තැන්වල ඉඳලයි. එතකොට මිදියන්වරුන්ගේ කඳවුරේ හිටපු මුළු හමුදාවම කෑගහගෙන පැනලා දිව්වා.+
22 300දෙනා දිගටම එයාලාගේ හොරණෑ පිම්බා. කඳවුරේ හිටපු හැමෝම එකිනෙකාට කඩුවෙන් පහර දෙන්න පටන්ගත්තා.+ එහෙම වෙන්න සැලැස්සුවේ යෙහෝවායි. ඒ හමුදාව බෙත්ෂිට්ටා දක්වාත්, එතන ඉඳලා ෂෙරේරා දක්වාත් ටබ්බාත් ළඟ තියෙන ආබෙල්මෙහෝලාවල+ මායිම දක්වාත් පලා ගියා.
23 ඊටපස්සේ ගිඩියොන් නෆ්තලී, ආෂෙර් සහ මනස්සේ+ ගෝත්‍රවල හිටපු ඊශ්‍රායෙල් සෙබළුන්වත් රැස් කළා. එයාලා මිදියන්වරු පස්සේ එළවගෙන ගියා.
24 ගිඩියොන් පණිවිඩකරුවන්ව යවලා එෆ්‍රායිම් කඳුකරයේ හිටපු අයට මෙහෙම දැන්නුවා. “යන්න ගිහින් මිදියන්වරුන්ට පහර දෙන්න. යොර්දාන් ගඟෙන් සහ බෙත්බාරා වෙන කල් තියෙන අතු ගංගාවලින් එගොඩ වෙන්න පුළුවන් හැම තැනකම සෙබළු රඳවලා තියන්න. මිදියන්වරුන්ට ඒ තැන්වලින් එගොඩ වෙන්න දෙන්න එපා.” ඉතින් එෆ්‍රායිම් ගෝත්‍රයේ සෙබළු හැමෝම එකට එකතු වෙලා යොර්දාන් ගඟේ සහ බෙත්බාරා වෙන කල් තියෙන අතු ගංගාවලින් එගොඩ වෙන්න පුළුවන් හැම තැනක්ම අල්ලගත්තා.
25 එයාලා මිදියන්වරුන්ගේ අධිපතීන් දෙන්නෙක් වුණ ඔරෙබ් සහ ෂීබ්ව අල්ලගෙන එයාලව මරලා දැම්මා. ඔරෙබ්ව මැරුවේ ලොකු ගලක් ළඟ. පස්සේ ඒකට ඔරෙබ්+ ගල කියලා කියන්න පටන්ගත්තා. ෂීබ්ව මැරුවේ මිදි පාගන තැනක් ළඟ. පස්සේ ඒක එයාගේ නමින් හැඳින්නුවා. එයාලා දිගටම මිදියන්වරු පස්සේ එළවගෙන ගියා.+ ඊටපස්සේ එයාලා ඔරෙබ්ගේ සහ ෂීබ්ගේ ඔළු දෙක යොර්දාන් ප්‍රදේශයේ හිටපු ගිඩියොන්ට ගෙනත් දුන්නා.
පාදසටහන්
^ මූ.අ., “මම එයාලව පරීක්ෂා කරලා බලන්නම්.”
^ ඒ කියන්නේ රෑ දහයේ විතර ඉඳන් පාන්දර දෙක විතර වෙන කල්.
