විනිශ්චයකරුවෝ 9:1-57
9 කාලයක් ගියාට පස්සේ යෙරුබ්බාල්ගේ පුතා වුණ අබිමෙලෙක්+ එයාගේ අම්මාගේ සහෝදරයන් හිටපු ෂීකෙම්වලට ගියා. එයාලටයි, එයාගේ සීයාගේ* පවුලේ අයටයි එයා මෙහෙම කිව්වා.
2 “ෂීකෙම්වල ප්‍රධානීන්* හැමෝගෙන්ම මෙහෙම අහන්නකෝ. ‘ඔයාලා කැමති යෙරුබ්බාල්ගේ පුතාලා 70දෙනාම+ ඔයාලව පාලනය කරනවාටද නැත්නම් එක මනුස්සයෙක් පාලනය කරනවාටද? මං ඔයාලාගේ ලේ නෑයෙක් කියලා මතක තියාගන්න.’”
3 ඉතින් අබිමෙලෙක්ගේ අම්මාගේ සහෝදරයන් එයා වෙනුවෙන් ෂීකෙම්වල ප්‍රධානීන් ළඟට ගිහිල්ලා ඒ හැම දෙයක්ම එයාලට කිව්වා. “එයා අපේම කෙනෙක්නේ” කියලා අබිමෙලෙක්ගේ පැත්ත ගන්න එයාලා කැමති වුණා.*
4 ඊටපස්සේ එයාලා බාල්බේරිත්ගේ+ දේවාලයෙන් රිදී ෂෙකෙල් 70ක් අරගෙන අබිමෙලෙක්ට දුන්නා. අබිමෙලෙක් ඒ සල්ලිවලින් කිසිම වැඩක්පළක් කළේ නැති දාමරිකයන් කීපදෙනෙක්ව එයාත් එක්ක එහේ මෙහේ යන්න කුලියට ගත්තා.
5 ඊටපස්සේ එයා ඔෆ්රාවල+ තිබුණ එයාගේ තාත්තාගේ ගෙදරට ගිහින් යෙරුබ්බාල්ගේ පුතාලා 70දෙනාව ඒ කියන්නේ එයාගේ සහෝදරයන්ව එකම ගලක් උඩ මරලා දැම්මා.+ ඒත් යෙරුබ්බාල්ගේ බාලම පුතා වුණ යෝතම් විතරක් බේරුණා. මොකද ඒ වෙද්දී එයා හැංගිලයි හිටියේ.
6 ඊටපස්සේ ෂීකෙම්වල ප්‍රධානීන් සහ බෙත්මිල්ලෝවල හිටපු හැමෝම එකතු වෙලා අබිමෙලෙක්ව රජ විදිහට පත් කළා.+ එයාලා ඒක කළේ ෂීකෙම්වල කණුව කිට්ටුව තිබුණ ලොකු ගහ ළඟයි.
7 යෝතම්ට ඒ ගැන ආරංචි වුණාම එයා ගෙරිසීම් කන්ද+ මුදුනට ගිහිල්ලා හයියෙන් කෑගහලා එයාලට මෙහෙම කිව්වා. “මං මේ කතා කරන්නේ ෂීකෙම්වල ප්‍රධානීන්ටයි. මං කියන දේ දැන් හොඳට අහගන්න. එතකොට දෙවියනුත් ඔයාලට ඇහුම්කන් දෙයි.
8 “එකමත් එක කාලෙක ගස් එකතු වෙලා රජෙක්ව පත් කරගන්න තීරණය කළා. ඉතින් එයාලා ඔලීව ගහට කිව්වා ‘ඔයා අපේ රජ වෙන්න’ කියලා.+
9 ඒත් ඔලීව ගහ මෙහෙම කිව්වා. ‘දෙවියන්ටයි, මිනිස්සුන්ටයි ගෞරවයක් ලබා දෙන්න මගෙන් ගන්න තෙල් පාවිච්චි කරනවා. ඉතින් ඒක අත්හැරලා අනිත් ගස්වලට වඩා ඉහළින් වැජඹෙන්න* මට ඕනෙ නැහැ.’
10 ඊටපස්සේ ඒ ගස් අත්තික්කා ගහට මෙහෙම කිව්වා. ‘එන්න, ඇවිත් අපේ රජ වෙන්න.’
11 ඒත් අත්තික්කා ගහ එයාලට මෙහෙම කිව්වා. ‘රස ගෙඩි ලබා දෙන එක අත්හැරලා අනිත් ගස්වලට වඩා ඉහළින් වැජඹෙන්න* මට ඕනෙ නැහැ.’
12 ඊළඟට ඔක්කොම ගස් මිදිවැලට මෙහෙම කිව්වා. ‘එන්න, ඇවිත් අපේ රජ වෙන්න.’
13 එතකොට මිදිවැල මෙහෙම කිව්වා. ‘මගෙන් හදන අලුත් වයින්වලින් දෙවියන්ටයි, මිනිස්සුන්ටයි සතුටක් ගේනවා. ඉතින් ඒක අත්හැරලා අනිත් ගස්වලට වඩා ඉහළින් වැජඹෙන්න* මට ඕනෙ නැහැ.’
14 අන්තිමේදී ඔක්කොම ගස් එකතු වෙලා කටු පඳුරකට මෙහෙම කිව්වා. ‘එන්න, ඇවිත් අපේ රජ වෙන්න.’+
15 එතකොට කටු පඳුර ඒ ගස්වලට මෙහෙම කිව්වා. ‘ඔයාලා ඇත්තටම මාව රජකමට පත් කරනවා නම් ඇවිත් මගේ සෙවණේ රැකවරණය ලබාගන්න. හැබැයි ඔයාලා බොරුවක් කරනවා නම් මගෙන් ගින්නක් පිට වෙලා ඇවිත් ලෙබනොන්වල තියෙන දේවදාර ගස් පුච්චලා දායි.’
16 “ඉතින් දැන් හොඳට හිතන්න, ඔයාලා එකතු වෙලා අබිමෙලෙක්ව රජ විදිහට පත් කළේ අවංක චේතනාවෙන්ද කියලා.+ ඔයාලා කරපු දේ හරිද? යෙරුබ්බාල් කරපු දේවල් වෙනුවෙන් එයාටයි, එයාගේ ගෙදර අයටයි ඔයාලා කළගුණ සැලකුවාද කියලත් හිතලා බලන්න. ඔයාලා කරපු දේ සාධාරණයි කියලා හිතනවාද?
17 මිදියන්වරුන්ගේ අතින් ඔයාලව බේරගන්න+ මගේ තාත්තා එයාගේ ජීවිතේ ගැනවත් හිතන්නේ නැතුව සටන් කළා.+
18 ඒත් ඔයාලා මොනවාද කළේ? ඔයාලා හැමෝම එකතු වෙලා මගේ තාත්තාගේ පුතාලා 70දෙනාව එකම ගලක් උඩ මරලා දැම්මා.+ ඊටපස්සේ තාත්තාගේ දාසියගේ පුතාව+ ෂීකෙම්වල ප්‍රධානීන්ගේ රජ විදිහට පත් කළා. ඔයාලා එහෙම කළේ අබිමෙලෙක් ඔයාලාගේ සහෝදරයෙක් නිසයි.
19 ඔයාලා යෙරුබ්බාල්ටයි, එයාගේ ගෙදර අයටයි කරපු දේ සාධාරණයි, ඒක හරියි කියලා හිතනවා නම් අබිමෙලෙක් ගැන සතුටු වෙන්න. එයාටත් පුළුවන් ඔයාලා ගැන සතුටු වෙන්න.
20 හැබැයි මෙතනදී අසාධාරණයක් වෙලා තියෙනවා නම් අබිමෙලෙක්ගෙන් ගින්නක් ඇවිත් ෂීකෙම්වල ප්‍රධානීන්වයි, බෙත්මිල්ලෝවල+ ඉන්න මිනිස්සුන්වයි පුච්චලා දායි. ඒ වගේම ෂීකෙම්වල ප්‍රධානීන්ගෙනුයි, බෙත්මිල්ලෝවල ඉන්න මිනිස්සුන්ගෙනුයි ගින්නක් ඇවිත් අබිමෙලෙක්වත්+ පුච්චලා දායි.”
21 ඊටපස්සේ යෝතම්+ එතනින් පැනලා ගිහින් බෙයර්වල ජීවත් වුණා. මොකද එයා එයාගේ සහෝදරයා වුණ අබිමෙලෙක්ට බයෙන් හිටියා.
22 අබිමෙලෙක් අවුරුදු තුනක් පුරා ඊශ්‍රායෙල්වරුන්ව පාලනය කළා.*
23 අබිමෙලෙක් සහ ෂීකෙම්වල ප්‍රධානීන් අතරේ වෛරයක් ඇති වෙන්න දෙවියන් ඉඩහැරියා. ඉතින් ෂීකෙම්වල ප්‍රධානීන් අබිමෙලෙක්ට ද්‍රෝහි වුණා.
24 එහෙම වෙන්න දෙවියන් ඉඩහැරියේ යෙරුබ්බාල්ගේ පුතාලා 70දෙනාට කරපු දරුණු අපරාධය නිසයි. අබිමෙලෙක්ගේ සහෝදරයන්ගේ ලේ හලපු එකට+ අබිමෙලෙක් වගේම එයාට උදව් කරපු ෂීකෙම්වල ප්‍රධානීනුත් වග කියන්න ඕනෙ නිසයි.
25 ඉතින් ෂීකෙම්වල ප්‍රධානීන් පාරේ යන එන අයගේ දේවල් කොල්ල කන්න කඳු මුදුන්වල මිනිස්සුන්ව රැඳෙව්වා. එයාලා එහෙම කළේ අබිමෙලෙක්ට ප්‍රශ්න ඇති කරන්නයි. පස්සේ ඒ ගැන අබිමෙලෙක්ට ආරංචි වුණා.
26 ඊටපස්සේ ඒබෙද්ගේ පුතා වුණ ගාල් එයාගේ සහෝදරයන් එක්ක ෂීකෙම්වලට+ ආවා. ෂීකෙම්වල ප්‍රධානීන් එයාගේ පැත්තට ගියා.
27 දවසක් ෂීකෙම්වල මිනිස්සු එයාලාගේ වතුපිටිවලට ගිහින් මිදිපල නෙළාගෙන ඒවා පාගලා වයින් හදාගෙන උත්සවයක් පැවැත්තුවා. ඊටපස්සේ එයාලාගේ දෙවියන්ගේ දේවාලයට ගිහින්+ කාලා බීලා අබිමෙලෙක්ට ශාප කළා.
28 ඒ වෙලාවේ ඒබෙද්ගේ පුතා වුණ ගාල් මෙහෙම කිව්වා. “කවුද මේ අබිමෙලෙක්? කවුද මේ ෂීකෙම්* කියන්නේ? අපි මොකටද එයාලට සේවය කරන්නේ? අබිමෙලෙක් කියන්නේ අර යෙරුබ්බාල්ගේ පුතානේ.+ ෂෙබුල් කියන්නේ මේ අබිමෙලෙක් පත් කරගත්ත නිලධාරියෙක්. එයාලට නෙමෙයි ෂීකෙම්ගේ තාත්තා වුණ හාමොර්ගෙන් පැවතෙන අයට සේවය කරන්න. අපි මොකටද අබිමෙලෙක්ට යටත් වෙලා ඉන්නේ?
29 මේ මිනිස්සු මගේ පැත්ත ගන්නවා නම් මං අබිමෙලෙක්ව පන්නලා දානවා.” ඊටපස්සේ ගාල් මෙහෙම කියලා අබිමෙලෙක්ට අපහාස කළා. “පුළුවන් නම් ලොකු හමුදාවක් එකතු කරගෙන මාත් එක්ක සටනට එන්න.”
30 ඒබෙද්ගේ පුතා වුණ ගාල් කිව්ව දේ ගැන නගරය පාලනය කරපු ෂෙබුල්ට ආරංචි වුණාම එයා කේන්තියෙන් පුපුරන්න පටන්ගත්තා.
31 ඉතින් එයා රහසින්* පණිවිඩකරුවන්ව යවලා අබිමෙලෙක්ට මෙහෙම දැන්නුවා. “ඒබෙද්ගේ පුතා ගාල්, එයාගේ සහෝදරයනුත් එක්ක දැන් ෂීකෙම්වලට ඇවිත් ඉන්නවා. එයාලා මෙහේ ඉන්න මිනිස්සුන්ව ඔයාට විරුද්ධව උසිගන්වනවා.
32 ඔයා ඔයාගේ කට්ටියත් එක්ක රෑට ඇවිත් නගරයෙන් පිට හැංගිලා ඉන්න.
33 ඊළඟ දවසේ එළිය වැටෙද්දීම නගරයට කඩා පැනලා පහර දෙන්න. ගාල් එයාගේ මිනිස්සු එක්ක ඔයාට විරුද්ධව සටන් කරන්න එද්දී පුළුවන් හැම දේම කරලා එයාව පරද්දන්න.”
34 ඉතින් අබිමෙලෙක් එදා රෑම කට්ටියක් එක්ක ෂීකෙම් නගරය ළඟට ගිහින් කණ්ඩායම් හතරකට බෙදිලා නගරයෙන් එළියේ හැංගිලා හිටියා.
35 ඊළඟ දවසේ ඒබෙද්ගේ පුතා වුණ ගාල් නගරයේ දොරටුව ළඟට ගිහින් බලාගෙන හිටියා. එතකොට අබිමෙලෙක් එයාගේ කට්ටියත් එක්ක එයාලා හැංගිලා හිටපු තැන්වලින් එළියට ඇවිත් නගරය දිහාවට එන්න පටන්ගත්තා.
36 එයාලව දැක්කාම ගාල් ෂෙබුල්ට මෙහෙම කිව්වා. “අර බලන්න! කඳු මුදුන්වල ඉඳන් මිනිස්සු කට්ටියක් බැහැගෙන එනවා.” ඒත් ෂෙබුල් එයාට කිව්වා “ඔය මිනිස්සු නෙමෙයි. මිනිස්සු වගේ ඔයාට ඔය පේන්නේ කඳුවල හෙවණැල්ල” කියලා.
37 ආපහු සැරයක් ගාල් මෙහෙම කිව්වා. “අර බලන්න! මිනිස්සු කට්ටියක් දේශය මැද තියෙන කන්දෙන් බැහැගෙන එනවා. තව කට්ටියක් මෙයොනෙනිම්ගේ* ලොකු ගහ පැත්තෙන් එනවා.”
38 එතකොට ෂෙබුල් එයාට මෙහෙම කිව්වා. “ඔයා මහ ලොකුවට කියෙව්වානේ ‘අබිමෙලෙක් කවුද, අපි මොකටද එයාට සේවය කරන්නේ’+ කියලා. ඔයා එදා අපහාස කරපු කට්ටිය තමයි ඔය එන්නේ. පුළුවන් නම් දැන් ගිහින් එයාලට විරුද්ධව සටන් කරන්න.”
39 ගාල් ෂීකෙම්වල ප්‍රධානීන්ට ඉදිරියෙන් ගිහිල්ලා අබිමෙලෙක්ට විරුද්ධව සටන් කළා.
40 අබිමෙලෙක් ගාල් පස්සේ එළවගෙන ආපු නිසා එයා පැනලා ගියා. ඒ සටනේදී කොච්චර මිනිස්සු මැරුණාද කියනවා නම් නගරයේ දොරටුව ළඟට යන කල්ම එයාලාගේ මළ කඳන් වැටිලා තිබුණා.
41 ඊටපස්සේ අබිමෙලෙක් ආයෙත් අරුමාවලට ගියා. ෂෙබුල්+ ගාල්වයි, එයාගේ සහෝදරයන්වයි ෂීකෙම්වලින් පන්නලා දැම්මා.
42 ඊළඟ දවසේ නගරයේ හිටපු මිනිස්සු ඒකෙන් එළියට ඇවිල්ලා කියලා අබිමෙලෙක්ට ආරංචි වුණා.
43 ඉතින් අබිමෙලෙක් එයාත් එක්ක හිටපු කට්ටියව කණ්ඩායම් තුනකට බෙදලා එයාලත් එක්ක ගිහින් නගරයෙන් එළියේ තිබුණ තැන්වල හැංගිලා හිටියා. මිනිස්සු නගරයෙන් එළියට එනවා දැක්කාම අබිමෙලෙක් එයාලට පහර දීලා එයාලව මරලා දැම්මා.
44 අබිමෙලෙක් සහ එයාත් එක්ක හිටපු කට්ටිය දුවගෙන ඉස්සරහට ගිහින් නගරයේ දොරටු අල්ලගත්තා. ඒ අතරතුරේ අනිත් කණ්ඩායම් දෙක නගරයෙන් එළියට ගිය අයට පහර දීලා එයාලව මරලා දැම්මා.
45 අබිමෙලෙක් ඒ දවස පුරාම සටන් කරලා අන්තිමට ඒ නගරය අල්ලගත්තා. නගරයේ හිටපු මිනිස්සුන්වත් මරලා දැම්මා. ඊටපස්සේ එයා නගරය සම්පූර්ණයෙන්ම විනාශ කරලා+ හැම තැනම ලුණු ඉස්සා.
46 ඒ ගැන ෂීකෙම් බලකොටුවේ ප්‍රධානීන්ට ආරංචි වුණාම එයාලා ඉක්මනින්ම එල්බේරිත් දේවාලයේ+ තිබුණ උමං කාමරේට ගිහිල්ලා හැංගුණා.
47 ෂීකෙම් බලකොටුවේ ප්‍රධානීන් හැමෝම උමං කාමරේ හැංගිලා ඉන්නවා කියලා අබිමෙලෙක්ට ආරංචි වුණ ගමන්ම
48 අබිමෙලෙක් එයාගේ මිනිස්සුත් එක්ක ෂල්මොන් කන්දට නැග්ගා. එයා පොරොවක් අරගෙන ගහකින් අත්තක් කපලා ඒක එයාගේ කරේ තියාගෙන අනිත් අයට මෙහෙම කිව්වා. “ඉක්මන් කරන්න. මං කරපු දේම ඔයාලත් කරන්න.”
49 එයාලා හැමෝම අත්ත ගාණේ කපාගෙන ඒක කරේ තියාගෙන අබිමෙලෙක් පස්සෙන් ගියා. එයාලා ඒ අතු ටික උමං කාමරේ ළඟ දාලා කාමරේට ගිනි තිබ්බා. ඒ විදිහට ෂීකෙම් බලකොටුවේ හිටපු හැමෝම ඒ කියන්නේ පුරුෂයන් සහ ස්ත්‍රීන් 1,000ක් විතර මැරුණා.
50 ඊටපස්සේ අබිමෙලෙක් තේබේෂ් නගරයට ගිහින් ඒක වටලලා ඒ නගරය අල්ලගත්තා.
51 තේබේෂ් නගරය මැද ආරක්ෂිත බලකොටුවක් තිබුණා. නගරයේ හිටපු ස්ත්‍රීන්, පුරුෂයන් සහ ප්‍රධානීන් ඇතුළු හැමෝම ඒකට පලා ගියා. එයාලා ඒක ඇතුළට ගිහින් දොරටුව වහගෙන බලකොටුවේ මුදුනට නැඟලා එතනට වෙලා හිටියා.
52 අබිමෙලෙක් බලකොටුව විනාශ කරන්න හිතාගෙන ඒක ළඟට ගියා. ඒකේ දොරටුව ළඟට ගිහින් එයා ඒකට ගිනි තියන්න ලෑස්ති වුණා.
53 එතකොට බලකොටුව මුදුනේ හිටපු ස්ත්‍රියක් ඇඹරුම් ගලක උඩ කෑල්ල අරගෙන ඒක අබිමෙලෙක්ගේ ඔළුවට අතහැරියා. ඒක වැදිලා අබිමෙලෙක්ගේ ඔළු කට්ට කුඩු වුණා.+
54 එයා ඉක්මනින්ම එයාගේ ආයුධ ගෙනියන සේවකයාට මෙහෙම කිව්වා. “ඔයාගේ කඩුව අරගෙන මාව මරලා දාන්න. නැත්නම් මිනිස්සු කියයි ‘එයා ගෑනියෙක් අතින් මැරුම් කෑවා’ කියලා. ඒක අහගන්න මං කැමති නැහැ.” ඉතින් සේවකයා එයාට කඩුවෙන් ඇනලා එයාව මරලා දැම්මා.
55 අබිමෙලෙක් මැරුණා කියලා ඊශ්‍රායෙල්වරු දැනගත්තාම එයාලා තම තමන්ගේ ගෙවල්වලට හැරිලා ගියා.
56 තමන්ගේ සහෝදරයන් 70දෙනාව මරලා එයාගේ තාත්තාට කරපු දුෂ්ට දේ වෙනුවෙන් අබිමෙලෙක් ඒ විදිහට වන්දි ගෙව්වා.+ එහෙම වෙන්න සැලැස්සුවේ දෙවියන්.
57 ෂීකෙම්වල මිනිස්සු කරපු දුෂ්ට දේත් දෙවියන් එයාලා පිටටම හැරෙව්වා. ඒ විදිහට යෙරුබ්බාල්ගේ පුතා+ වුණ යෝතම්+ කරපු ශාපය එයාලා පිටට ආවා.
පාදසටහන්
^ ඒ කියන්නේ අම්මාගේ තාත්තා.
^ හෝ සමහරවිට, “ඉඩම් හිමියෝ.”
^ මූ.අ., “එයාලාගේ හිත පෙලඹුණා.”
^ මූ.අ., “අනිත් ගස්වලට ඉහළින් මගේ අතු හොල්ල හොල්ල ඉන්න.”
^ මූ.අ., “අනිත් ගස්වලට ඉහළින් මගේ අතු හොල්ල හොල්ල ඉන්න.”
^ මූ.අ., “අනිත් ගස්වලට ඉහළින් මගේ අතු හොල්ල හොල්ල ඉන්න.”
^ හෝ, “හිතුමතේට අධිපතිකම් කළා.”
^ සමහරවිට මේ කතා කරන්නේ ෂීකෙම්වල නිලධාරියෙක් වුණ ෂෙබුල් ගැන වෙන්න ඇති.
^ හෝ, “කපටි විදිහට.”
^ තේරුම, “මන්තර ගුරුකම් කරන අයගේ.”
