හිතෝපදේශ 14:1-35
14 ප්රඥාවන්ත ස්ත්රියක් එයාගේ පවුල ගොඩනඟයි.+ඒත් අඥාන ස්ත්රියක් එයාගේ අත් දෙකෙන්ම ඒක බිඳලා දායි.
2 ප්රතිපත්තිගරුක ජීවිතයක් ගත කරන අයට යෙහෝවා ගැන ගරුබියක් තියෙනවා.ඒත් වංක කෙනා ඔහුව හෙළා දකිනවා.
3 අඥානයාගේ උද්ධච්ච කතා වේවැල් පහරක් වගේ.ඒත් නැණවත් කෙනාගේ වචන එයාට ආරක්ෂාවක් වෙයි.
4 ගවයන් නැති වුණාම ගවමඩුව* පිරිසිදුයි.ඒත් සරු අස්වැන්නක් ලැබෙන්නේ ගවයෙක්ගේ ශක්තියෙන්.
5 විශ්වාසවන්ත සාක්ෂිකරුවෙක් බොරු කියන්නේ නැහැ.ඒත් බොරු සාක්ෂිකරුවෙක්ගේ කටින් පිට වෙන්නේ බොරුමයි.+
6 සමච්චල් කරන කෙනා ප්රඥාව හෙව්වත් එයාට ඒක හම්බ වෙන්නේ නැහැ.ඒත් කාරණා හොඳින් තේරුම්ගන්න කෙනා ඉක්මනින්ම ඉගෙනගන්නවා.+
7 අඥානයාගෙන් ඈත් වෙලා ඉන්න.මොකද එයා කියන දේවලින් දැනුම ලබාගන්න බැහැ.+
8 බුද්ධිමත් කෙනෙක් ප්රඥාව යොදාගෙන එයා යන මඟ හොඳින් අවබෝධ කරගන්නවා.ඒත් අඥානයා තමන්ගෙම මෝඩකම නිසා නොමඟ යනවා.*+
9 මෝඩ අය තමන් කරන වැරදි* සැහැල්ලුවට ගනියි.+ඒත් ප්රතිපත්තිගරුක අය ප්රශ්න විසඳගන්න මහන්සි වෙයි.*
10 කෙනෙක්ගේ හිතේ තියෙන වේදනාව දන්නේ එයා විතරයි.එයාට දැනෙන සතුට වුණත් තේරුම්ගන්න කාටවත් බැහැ.
11 දුෂ්ටයාගේ නිවස විනාශ කරයි.+ඒත් අවංක කෙනාගේ නිවස තව තවත් දියුණු වෙයි.
12 මිනිසෙක්ට හරියි කියලා හිතෙන මඟක් තියෙනවා.+ඒත් ඒ මඟ අවසන් වෙන්නේ මරණයෙන්.+
13 කෙනෙක් හිනා වුණත් එයාගේ හිතේ වේදනාවක් තියෙන්න පුළුවන්.විනෝදය දුකෙන් කෙළවර වෙන්නත් පුළුවන්.
14 කෙනෙක් තමන්ගේ හිත නොමඟ යන්න දුන්නොත් එයාට නරක ප්රතිඵල විඳින්න වෙනවා.+ඒත් යහපත් කෙනා එයා කරන දේවලින් හොඳ ප්රතිඵල නෙළාගන්නවා.+
15 අද්දැකීම් අඩු කෙනා අනිත් අය කියන හැම දේම විශ්වාස කරයි.ඒත් සිහිබුද්ධිය තියෙන කෙනා දෙයක් කරන්න කලින් හොඳට හිතලා බලයි.+
16 ප්රඥාවන්තයා විමසිල්ලෙන් ඉඳලා නපුරෙන් ඈත් වෙනවා.ඒත් අඥානයා තමන් ගැන ඕනෑවට වඩා විශ්වාසය තියලා හිතුමතේට* වැඩ කරනවා.
17 ඉක්මනින් කේන්ති ගන්න කෙනා මෝඩයෙක් වගේ හැසිරෙයි.+හොඳට කල්පනා කරලා වැඩ කරන කෙනා* වෛරයට ලක් වෙයි.
18 අද්දැකීම් අඩු අය මෝඩ විදිහට වැඩ කරයි.ඒත් සිහිබුද්ධිය තියෙන අය දැනුම ඔටුන්නක් වගේ පලඳියි.+
19 දුෂ්ටයන් යහපත් අය ඉස්සරහා දණ නමයි.නපුරු අයට ධර්මිෂ්ඨයන්ගේ දොරටු ඉස්සරහා දණ නමන්න සිද්ධ වෙයි.
20 දුප්පතාගේ අසල්වැසියොත් එයාව හෙළා දකිනවා.+ඒත් පොහොසතා ළඟ යාළුවන් වට වෙලා ඉන්නවා.+
21 අසල්වැසියාව පහත් කරලා සලකන කෙනා කරන්නේ වරදක්.ඒත් අගහිඟකම් තියෙන කෙනෙක්ට දයානුකම්පාවෙන් සලකන කෙනා සන්තෝෂවත්.+
22 නපුරක් කරන්න කුමන්ත්රණය කරන අය මංමුළා වෙයි.
ඒත් හරි දේ කරන්න අදිටන් කරගෙන ඉන්න අය අනිත් අයගේ ආදරයත් විශ්වාසයත් දිනාගනියි.+
23 මහන්සි වෙලා කරන හැම වැඩකින්ම ප්රයෝජන ලැබෙයි.ඒත් කතාවටම වැටුණොත් අගහිඟකම් ඇති වෙයි.+
24 ප්රඥාවන්තයාගේ වස්තුව එයාට ඔටුන්නක්.ඒත් මෝඩයන්ට ඉතුරු වෙන්නේ මෝඩකම් විතරයි.+
25 සැබෑ සාක්ෂිකරුවෙක් ජීවිත බේරගනියි.ඒත් බොරු සාක්ෂිකරුවෙක් කියන්නෙම බොරු.
26 යෙහෝවා ගැන ගරුබියක් තියෙන කෙනෙක් හැම දේකදීම ඔහුව විශ්වාස කරයි.+ඒක එයාගේ දරුවන්ටත් ආරක්ෂාවක් වෙයි.+
27 යෙහෝවාට ගරුබිය දැක්වීමෙන් ජීවනය ලැබෙයි.*මරණයේ උගුල්වලින් ආරක්ෂා වෙන්න ඒක උදව් වෙයි.
28 රජෙක් යටතේ හුඟක් පුරවැසියන් ඉද්දී ඒක ඔහුට ගෞරවයක්.+ඒත් යටත්වැසියන් අඩු වෙද්දී පාලකයෙක්ගේ බලය බිඳ වැටෙයි.
29 ඉක්මනින් කේන්ති ගන්නේ නැති කෙනාට හොඳ වටහාගැනීමේ හැකියාවක් තියෙනවා.+ඒත් ඉවසීම නැති කෙනා එයාගේ මෝඩකම ප්රදර්ශනය කරනවා.+
30 සන්සුන් මනසක් ජීවිතය රැක දෙයි.*ඒත් ඊර්ෂ්යාව නිසා ඇටකටු දිරලා යයි.+
31 අසරණයාට වංචා කරන කෙනා තමන්ගේ සැදුම්කරුට නින්දා කරයි.+ඒත් දුප්පතාට දයානුකම්පාවෙන් සලකන කෙනා ඔහුව ප්රශංසාවට පත් කරයි.+
32 දුෂ්ටයා පහත් තත්වයට පත් වෙන්නේ එයා කරන නපුරු දේවල් නිසාමයි.ඒත් ධර්මිෂ්ඨයාගේ විශ්වාසවන්තකම එයාට ආරක්ෂාවක්.+
33 තේරුම්ගැනීමේ හැකියාව තියෙන කෙනාගේ ප්රඥාව තියෙන්නේ එයාගේ හිතේ.+ඒත් අඥානයා එයා ප්රඥාවන්තයෙක් කියලා හැම තැනම කියකිය යනවා.
34 ධර්මිෂ්ඨකම නිසා මුළු ජාතියක්ම ගෞරවයට පත් වෙයි.+ඒත් වැරදි වැඩ කරන නිසා සෙනඟ නින්දාවට ලක් වෙයි.
35 අවබෝධයෙන් වැඩ කරන සේවකයෙක් ගැන රජ සතුටු වෙනවා.+ඒත් කිසි ලැජ්ජාවක් නැතුව හැසිරෙන කෙනා ගැන ඔහුට දැනෙන්නේ ලොකු කේන්තියක්.+
පාදසටහන්
^ මූ.අ., “ගවඔරුව.”
^ හෝ සමහරවිට, “අනිත් අයව නොමඟ යවයි.”
^ හෝ, “වැරදි හදාගන්න එක.”
^ හෝ, “සාමකාමීව ඉන්න වෑයම් කරනවා.”
^ හෝ, “කේන්තියෙන්.”
^ හෝ, “සිතීමේ හැකියාව තියෙන කෙනා.”
^ මූ.අ., “දැක්වීම ජීවනයේ උල්පතක්.”
^ හෝ, “ගතට සුවයක්.”