පළවෙනි කොරින්ති 1:1-31
1 මේ ලිපිය ඔයාලට ලියන්නේ පාවුල් වන මමයි. ක්‍රිස්තුස් යේසුස්ගේ නියෝජිතයෙක්*+ විදිහට සේවය කරන්න මාව කැඳෙව්වේ දෙවියන්ගේ කැමැත්තට එකඟවයි. මාත් එක්ක අපේ සහෝදර සොස්තනේස් ඉන්නවා.
2 මම මේ ලිපිය ලියන්නේ කොරින්තියේ+ තියෙන දෙවියන්ගේ සභාවට. ඔයාලව ක්‍රිස්තුස් යේසුස් එක්ක එකට බැඳිලා ඉන්න අය*+ විදිහට විශේෂයෙන් තෝරගෙනයි තියෙන්නේ.* අපේ ස්වාමීන් වන යේසුස් ක්‍රිස්තුස්ගේ නම ගැන විශ්වාසය තියන,+ විවිධ ප්‍රදේශවල ඉන්න හැම කෙනෙක්වම වගේ ඔයාලවත් ශුද්ධ අය විදිහට කැඳවලා තියෙනවා. යේසුස් එයාලාගේ වගේම අපෙත් ස්වාමීන්.
3 අපේ තාත්තා වන දෙවියන්ගෙන් වගේම ස්වාමීන් වන යේසුස් ක්‍රිස්තුස්ගෙන් මහත් කරුණාවත්* සමාදානයත් ඔයාලට ලැබේවා!
4 ක්‍රිස්තුස් යේසුස්ගේ අනුගාමිකයන් වන ඔයාලට දෙවියන් මහත් කරුණාවක් පෙන්නලා තියෙනවා. ඒ ගැන මම මගේ දෙවියන්ට හැම වෙලේම ස්තුති කරනවා.
5 ඔයාලා යේසුස් එක්ක එකට බැඳිලා ඉන්න නිසා ඔයාලට ගොඩක් ආශීර්වාද ලැබිලා තියෙනවා. දෙවියන්ගේ වචනය හොඳින් දැනුම් දෙන්නත් ඒ ගැන හොඳ දැනුමක් ලබාගන්නත්+ ඔහු ඔයාලට උදව් කරලා තියෙනවා.
6 ඒ නිසයි ක්‍රිස්තුස් ගැන දුන්න සාක්ෂිය+ ඔයාලා කිසිම සැකයක් නැතුව විශ්වාස කරන්නේ.
7 අපේ ස්වාමීන් වන යේසුස් ක්‍රිස්තුස් එළිදරව් වෙන කල් ඔයාලා බලාගෙන ඉන්නේ හරිම ආසාවෙන්.+ ඒ කාලේ අතරතුරේ දෙවියන් ලබා දෙන දේවල්වලින් ඔයාලට කිසිම අඩුවක් වෙන්නේ නැහැ.
8 අවසානය වෙන කල්ම ඔයාලට ස්ථිරව ඉන්න දෙවියන් උදව් කරයි. එතකොට අපේ ස්වාමීන් වන යේසුස් ක්‍රිස්තුස් එන දවසේදී වැරදිකරුවන් කියලා ඔයාලට චෝදනා කරන්න කාටවත් බැරි වෙයි.+
9 දෙවියන් විශ්වාසවන්තයි.+ ඔහු තමයි ඔහුගේ පුතා එක්ක ඒ කියන්නේ අපේ ස්වාමීන් වන යේසුස් ක්‍රිස්තුස් එක්ක එක්සත්ව බැඳිලා ඉන්න* ඔයාලව කැඳෙව්වේ.
10 සහෝදරයෙනි, අපේ ස්වාමීන් වන යේසුස් ක්‍රිස්තුස්ගේ නමින් මම ඔයාලාගෙන් දෙයක් ඉල්ලනවා. ඔයාලා කතා කරන දේවල්වල එකඟතාවක් තියෙන්න ඕනේ. ඔයාලා අතරේ කිසිම බෙදීමක් තියෙන්න බැහැ.+ ඔයාලා හිතන විදිහේ, ඔයාලාගේ අදහස්වල කිසිම ගැටීමක් තියෙන්න බැහැ. ඔයාලා එක්සත්ව ඉන්න ඕනේ.+
11 මගේ සහෝදරයෙනි, ඔයාලා අතරේ ආරවුල් තියෙනවා කියලා ක්ලොයිගේ පවුලේ අයගෙන් මට දැනගන්න ලැබුණා.
12 මං එහෙම කියන්නේ ඔයාලාගෙන් කෙනෙක් “මං පාවුල්ගේ පැත්තේ” කියලත් තවත් කෙනෙක් “මං අපොලොස්ගේ පැත්තේ”+ කියලත් තව කෙනෙක් “මං සීෆස්ගේ* පැත්තේ” කියලත් තවත් අය “මං ක්‍රිස්තුස්ගේ පැත්තේ” කියලත් කියන නිසයි.
13 ඒ කියන්නේ ඔයාලා ක්‍රිස්තුස්ව* කණ්ඩායම්වලට බෙදාගෙනද? ඔයාලා වෙනුවෙන් වධකණුවේ මැරුණේ පාවුල්ද? ඔයාලා බව්තීස්ම වුණේ පාවුල්ගේ නමින්ද?
14 ක්‍රිස්පස්වයි,+ ගායස්වයි+ ඇරෙන්න ඔයාලා අතරේ ඉන්න වෙන කාවවත් මම බව්තීස්ම කළේ නැහැ. ඒ ගැන මම දෙවියන්ට ස්තුති කරනවා.
15 ඉතින් මං බව්තීස්ම වුණේ පාවුල්ගේ නමින් කියලා ඔයාලාගෙන් කාටවත් කියන්න බැහැ.
16 ඒ දෙන්නාට අමතරව ස්තෙෆනස්ගේ ගෙදර අයවත්+ මම බව්තීස්ම කළා. ඒත් වෙන අයව නම් බව්තීස්ම කළා කියලා මට මතක නැහැ.
17 ඇත්තටම ක්‍රිස්තුස් මාව යැව්වේ බව්තීස්ම කරන්න නෙමෙයි ශුභාරංචිය ගැන කියන්න.+ ශුභාරංචිය ගැන කියද්දී මිනිස්සුන්ගේ ප්‍රඥාව* පාවිච්චි කරලා ඒක කළා නම් ක්‍රිස්තුස් වධකණුවක* මැරුණ එක කිසිම වැඩක් නැති වෙනවා.
18 ක්‍රිස්තුස් වධකණුවක* මැරුණා කියන ඉගැන්වීම විනාශයට යන පාරේ ගමන් කරන අය+ සලකන්නේ මෝඩ දෙයක් විදිහට. ඒත් ගැලවීම ලබන අපි, ඒ ඉගැන්වීමෙන් දෙවියන් කොයි තරම් බලවත්ද කියලා දකිනවා.+
19 ශුද්ධ ලියවිලිවල මෙහෙම ලියලා තියෙනවා. “ප්‍රඥාවන්තයන්ගේ ප්‍රඥාව මං නැති කරලා දානවා. බුද්ධිමත් අයගේ බුද්ධියෙන් මට වැඩක් නැහැ.”+
20 ප්‍රඥාවන්ත අය ගැන, නීතිය පිටපත් කරන අය* ගැන, මේ ලෝකේ* ඉන්න වාද කරන්න දක්ෂ මිනිස්සු ගැන අපිට කියන්න තියෙන්නේ මොනවාද? මේ ලෝකේ ප්‍රඥාව මෝඩකමක් කියලා දෙවියන් පෙන්නලා නැද්ද?
21 මේ ලෝකේ මිනිස්සු තමන්ගේ ප්‍රඥාව ගැන විශ්වාසය තියලා+ වැඩ කරන නිසා දෙවියන්ව දැන හඳුන ගන්න එයාලට බැරි වුණා.+ ඒ අය අපි දේශනා කරන පණිවිඩය මෝඩ දෙයක් විදිහට+ දැක්කත් ඒ පණිවිඩය ගැන විශ්වාසය තියන අයව දෙවියන් ගලවගන්න තීරණය කරලා තියෙනවා. ඒකෙන් ඔහු කොච්චර ප්‍රඥාවන්තද කියලා පැහැදිලි වෙනවා.
22 යුදෙව්වරු කියනවා ආශ්චර්යයන් කරලා ලකුණු පෙන්නන්න කියලා.+ ග්‍රීකවරු ප්‍රඥාව පස්සේ යනවා.
23 ඒත් අපි දේශනා කරනවා ක්‍රිස්තුස් වධකණුවක මැරුණා කියලා. යුදෙව්වන්ට ඒ පණිවිඩය අප්පිරියයි. වෙනත් ජාතීන්ට ඒක මෝඩ පණිවිඩයක්.+
24 ඒත් දෙවියන් කැඳවපු ඕනෙම කෙනෙක්, ඒ කෙනා යුදෙව්වෙක් වුණත් ග්‍රීකයෙක්* වුණත් එයා ක්‍රිස්තුස් මාර්ගයෙන් දකින්නේ දෙවියන්ගේ බලය සහ ප්‍රඥාව.+
25 දෙවියන්ට අයිති දෙයක් මෝඩ දෙයක් කියලා මිනිස්සුන්ට හිතෙයි. ඒත් ඒක මිනිස්සුන්ගේ ප්‍රඥාවට වඩා ගොඩක් උසස්. දෙවියන්ට අයිති දෙයක් දුර්වලයි කියලා මිනිස්සු හිතයි. ඒත් ඒක මිනිස්සුන්ගේ ශක්තියට වඩා ගොඩක් ශක්තිමත්.+
26 සහෝදරයෙනි, දෙවියන් කැඳවලා තියෙන්නේ කොයි වගේ අයවද කියලා ඔයාලට පැහැදිලියි. මිනිස්සු බලන විදිහට නම් එයාලාගෙන් වැඩිදෙනෙක් ප්‍රඥාවන්ත අයවත්+ උසස් තනතුරු තියෙන අයවත් ප්‍රසිද්ධ පවුල්වලින් එන අයවත් නෙමෙයි.+
27 දෙවියන් මේ ලෝකේ මිනිස්සු මෝඩයි කියලා සලකන දේවල් තෝරගත්තේ ප්‍රඥාවන්ත අයව ලැජ්ජාවට පත් කරන්න. මේ ලෝකේ මිනිස්සු දුර්වලයි කියලා සලකන දේවල් ඔහු තෝරගත්තේ ශක්තිමත් දේවල් කොච්චර දුර්වලද කියලා පෙන්නන්න.+
28 ඒ වගේම මේ ලෝකේ මිනිස්සු එච්චර ගණන් ගන්නේ නැති, පහත් කරලා සලකන, වටිනාකමක් නැහැ කියලා හිතන දේවල් ඔහු තෝරගත්තා. ඔහු එහෙම කළේ මිනිස්සු වැදගත් කියලා සලකන දේවල්වල කිසිම වටිනාකමක් නැහැ කියලා පෙන්නන්න.+
29 දෙවියන් එහෙම කරපු නිසා කිසිම මනුස්සයෙක්ට දෙවියන් ඉස්සරහා මහ ඉහළින් කතා කරන්න හේතුවක් නැහැ.
30 දෙවියන් නිසයි ඔයාලා ක්‍රිස්තුස් යේසුස් එක්ක එකට බැඳිලා ඉන්නේ. දෙවියන්ගේ ප්‍රඥාව අපිට හෙළි කළේ ක්‍රිස්තුස් යේසුස්. ඔහු නිසයි දෙවියන් ඉස්සරහා ධර්මිෂ්ඨ,+ ශුද්ධ අය+ වෙන්න අපිට පුළුවන් වෙලා තියෙන්නේ. ඔහු ගෙවපු වන්දිය නිසයි අපිට නිදහස ලැබුණේ.+
31 ඒකෙන් පේනවා ශුද්ධ ලියවිලිවල ලියලා තියෙන මේ දේ ඇත්ත කියලා. “ආඩම්බරෙන් කතා කරන කෙනා කතා කරන්න ඕනෙ යෙහෝවා* ගැනයි.”+
පාදසටහන්
^ හෝ, “යවනු ලැබූ කෙනෙක්.”
^ හෝ, “ක්‍රිස්තුස් යේසුස්ගේ අනුගාමිකයන්.”
^ හෝ, “දෙවියන් වෙනුවෙන් වෙන් කරලයි තියෙන්නේ.”
^ හෝ, “ලබන්න නොවටිනා කරුණාවත්.” “පැහැදිලි කිරීමක්” බලන්න.
^ හෝ, “හවුල්කරුවන් වෙන්න.”
^ පේතෘස් කියලත් හඳුන්වනවා.
^ ඒ කියන්නේ ක්‍රිස්තුස්ගේ සභාව.
^ “පැහැදිලි කිරීමක්” බලන්න.
^ හෝ, “උගත් අයගේ අදහස්.”
^ “පැහැදිලි කිරීමක්” බලන්න.
^ ඒ කියන්නේ නීතිය ගැන හොඳ දැනුමක් තියෙන අය.
^ මූ.අ., “මේ සමාජයේ.” “පැහැදිලි කිරීමක්” බලන්න.
^ පේන විදිහට මෙතන කතා කරන්නේ ග්‍රීක භාෂාව කතා කරපු, යුදෙව් නොවන අය ගැනයි.
