පළවෙනි තිමෝති 1:1-20
1 මේ ලිපිය ලියන්නේ ක්‍රිස්තුස් යේසුස්ගේ නියෝජිතයෙක්* විදිහට සේවය කරන පාවුල්. මේ සේවය කරන්න මාව පත් කළේ අපිට ගැලවීම ලබා දෙන දෙවියන් සහ අපිට බලාපොරොත්තුවක් දෙන ක්‍රිස්තුස් යේසුස්+ අණ කරපු විදිහටයි.
2 මේක ලියන්නේ සත්‍ය ඉගැන්වීම්වලට අවංක ළැදියාවක් තියෙන මගේම දරුවෙක්+ වගේ ඉන්න තිමෝතිට.*+
අපේ තාත්තා වන දෙවියන්ගේ සහ අපේ ස්වාමීන් වන ක්‍රිස්තුස් යේසුස්ගේ මහත් කරුණාවත්* දයාවත් සමාදානයත් ඔයාට ලැබෙන්න කියලා මම පතනවා.
3 මං මැසිඩෝනියාවට යන්න ලෑස්ති වෙලා ඉද්දී ඔයාට එෆීසයේ නවතින්න පුළුවන්ද කියලා මං ඔයාගෙන් ඇහුවා ඔයාට මතක ඇති. මං දැනුත් ඔයාට කියන්නේ එහේ නවතින්න කියලයි. එහේ බොරු ඉගැන්වීම් පතුරුවන අයට එහෙම කරන්න එපා කියලා අවවාද කරන්න.
4 ඒ වගේම බොරු කතාවලටවත්+ පෙළපත් ගැන හොයලා බලන එකටවත් කාලේ වැය කරන්න එපා කියලා එයාලට කියන්න. ඒ වගේ දේවල්වලින් කිසිම ප්‍රයෝජනයක් නැහැ.+ ඒවා අපේ විශ්වාසය ශක්තිමත් කරගන්න දෙවියන් දෙන දේවල් නෙමෙයි. ඒවායින් වෙන්නේ කිසි පදනමක් නැති දේවල් ගැන වාද ඇති වෙන එක විතරයි.
5 මං මේ මඟ පෙන්වීම්* දෙන්නේ අවංක හදවතකින් ආදරේ කරන්න හැමෝවම දිරිගන්වන්නයි.+ ඒ වගේම කිසි කුහකකමක් නැති විශ්වාසයක්+ සහ නිදොස් හෘද සාක්ෂියක් ඇතුව එකිනෙකාට ආදරේ කරන්නත් ඔයාලට දිරිගන්වන්නයි.
6 සමහරු ඒ දේවල් අත්හැරලා ගිහින් කිසි තේරුමක් නැති දේවල්+ ගැන කතා කරන්න පුරුදු වෙලා ඉන්නවා.
7 එයාලා නීතිය උගන්වන අය වෙන්න කැමති+ වුණත් එයාලා කියන දේවල් ගැනවත් එයාලා තරයේ ඉදිරිපත් කරන මතයන් ගැනවත් එයාලට කිසිම අවබෝධයක් නැහැ.
8 කෙනෙක් නීතිය හරියටම පිළිපදිනවා නම් ඒකෙන් යහපතක් වෙනවා කියලා අපි දන්නවා.
9 ඒත් නීතිය දුන්නේ ධර්මිෂ්ඨ අය වෙනුවෙන් නෙමෙයි කියලා අපි මතක තියාගන්න ඕනේ. ඒක දුන්නේ නීතියට විරුද්ධව වැඩ කරන,+ කැරලිකාර, දෙවියන් ගැන කිසි ගෞරවයක් නැති, පව්කාර වැඩ කරන, ද්‍රෝහිකම් කරන,* ශුද්ධ දේ සුළු කරන, තමන්ගෙම අම්මා තාත්තාව හරි වෙනත් අයව හරි මරලා දාන,
10 ලිංගික දුරාචාරයේ* යෙදෙන අයට සහ සමලිංගික පුරුෂයන්ට. ඒ වගේම මිනිස්සුන්ව පැහැරගෙන යන, බොරු කියන, බොරු දිවුරුම් දෙන සහ සත්‍ය* ඉගැන්වීම්වලට+ විරුද්ධව වෙනත් ඕනෙම දෙයක් කරන අයට.
11 ඒ ඉගැන්වීම් පදනම් වෙලා තියෙන්නේ ප්‍රීතිමත් දෙවියන් මට විශ්වාසයෙන් භාර දුන්න වටිනා ශුභාරංචිය මතයි.+
12 මට බලය දුන්න අපේ ස්වාමීන් වන ක්‍රිස්තුස් යේසුස්ට මම ස්තුතිවන්ත වෙනවා. මං එහෙම කරන්නේ ඔහු මාව විශ්වාසවන්ත කෙනෙක් විදිහට සලකලා මට මේ දේවසේවය භාර දුන්න නිසයි.+
13 කලින් මං දෙවියන්ට අපහාස කරපු කෙනෙක්. මං මිනිස්සුන්ට පීඩා කරපු, කාටවත් ගරු කළේ නැති කෙනෙක්.+ ඒත් ක්‍රිස්තුස් මට දයාව පෙන්නුවා. මොකද මං ඒ හැම දේම කළේ නොදැනුවත්කමින්. මට තිබුණේ සැබෑ විශ්වාසයක් නෙමෙයි.
14 ඒත් අපේ ස්වාමීන් මදි නොකියන්න ඔහුගේ මහත් කරුණාව මට දුන්නා. ක්‍රිස්තුස් යේසුස්ගෙන් මට ආදරේ ලැබුණා වගේම ඔහු නිසා මට විශ්වාසයක් ඇති කරගන්නත් පුළුවන් වුණා.
15 ක්‍රිස්තුස් යේසුස් මේ ලෝකයට ආවේ පව්කාරයන්ව ගලවගන්න.+ ඒක විශ්වාස කරන්න පුළුවන්, පිළිගන්න ඕනෙ සත්‍යයක්. ඒ පව්කාරයන් අතරින් වැඩියෙන්ම පව් කරලා තියෙන්නේ මමයි.+
16 එහෙම වෙලත් ක්‍රිස්තුස් යේසුස් මට දයාව පෙන්නුවා. එහෙම කළේ වැඩියෙන්ම පව් කරලා තියෙන මං මාර්ගයෙන් තමන් කොයි තරම් ඉවසිලිවන්තව වැඩ කරනවාද කියලා පෙන්නන්නයි. ඔහු මං වෙනුවෙන් කරපු දේ ඉස්සරහට වෙන්න යන දේට සාක්ෂියක්. මොකද සදාකාල ජීවිතය කියන බලාපොරොත්තුව ඇතුව ක්‍රිස්තුස් යේසුස් මත විශ්වාසය ගොඩනඟන අයටත් ඒ දේම අද්දකින්න ලැබෙනවා.+
17 කවදාවත් විනාශ වෙන්නේ නැති,*+ නොපෙනෙන,+ සදාකාලික රජ්ජුරුවන්+ වන එකම දෙවියන්ට+ සදාකාලයෙන් සදාකාලයටම සියලු තේජසත් ගෞරවයත් හිමි වේවා! ආමෙන්!*
18 තිමෝති මගේ පුතේ, මේ උපදෙස් සහ මඟ පෙන්වීම්* මං ඔයාට විශ්වාසයෙන් භාර දෙනවා. මං ඒක කරන්නේ ඔයා ගැන කලින් කියලා තිබුණ අනාවැකිවලට එකඟවයි. මං කියන මේ දේවල්, යහපත් අරමුණක් වෙනුවෙන් අපි කරන යුද්දේදී සාර්ථකව සටන් කරන්න ඔයාට උදව් වෙයි.+
19 ඒ වගේම ඒවා ඔයාගේ විශ්වාසය රැකගන්නත් නිදොස් හෘද සාක්ෂියක් පවත්වගන්නත්+ ඔයාට උදව් වෙයි. ඒත් සමහරු එයාලාගේ විශ්වාසයත් නිදොස් හෘද සාක්ෂියත් අහක දාලා තියෙනවා. ඒ නිසා නැවක් මුහුදුබත් වෙනවා වගේ එයාලාගේ විශ්වාසයත් විනාශ වෙලා ගිහින්.
20 හිමනේයස්+ සහ ඇලෙක්සැන්ඩර් කියන්නේ ඒ වගේ දෙන්නෙක්. මං එයාලව සාතන්ට භාර දීලයි තියෙන්නේ.+ සමහරවිට ඒ හික්මවීමෙන් දෙවියන්ට අපහාස කරන්නේ නැතුව ඉන්න එයාලා ඉගෙනගනියි.
පාදසටහන්
^ හෝ, “යවනු ලැබූ කෙනෙක්.”
^ තේරුම, “දෙවියන්ට ගෞරව කරන කෙනා.”
^ හෝ, “ලබන්න නොවටිනා කරුණාවත්.” “පැහැදිලි කිරීමක්” බලන්න.
^ හෝ, “නියෝගය.”
^ හෝ, “නොසැලෙන ආදරයක් නැති.”
^ හෝ, “ප්‍රයෝජනවත්; සුවදායක.”
^ “පැහැදිලි කිරීමක්” බලන්න.
^ හෝ, “එසේම වේවා!”
^ මූ.අ., “කවදාවත් කුණු වෙන්නේ නැති.”
^ හෝ, “නියෝගය.”
