පළවෙනි තෙසලෝනික 4:1-18
4 සහෝදරයෙනි, දෙවියන් සතුටු වෙන විදිහට ජීවත් වෙන්නේ කොහොමද කියලා අපි ඔයාලට කියලා දුන්නා.+ ඇත්තටම ඔයාලා දැනටමත් ඒ විදිහට ජීවත් වෙනවා. අන්තිමට, අපි ස්වාමීන් වන යේසුස්ගේ නමින් ඔයාලාගෙන් ඉල්ලන්නේ දෙවියන් සතුටු වෙන විදිහට ජීවත් වෙන්න තවත් වැඩියෙන් උත්සාහ කරන්න කියලයි.
2 මොකද ස්වාමීන් වන යේසුස්ගේ නමින් අපි ඔයාලට දුන්න මඟ පෙන්වීම්* ගැන ඔයාලා දන්නවා.
3 දෙවියන් කැමති ඔයාලා ශුද්ධව ඉඳලා+ ලිංගික දුරාචාරයෙන්* වැළකිලා ඉන්නවාට.+
4 හැම කෙනෙක්ම තමන්ගේ ශරීරය* පාලනය කරගෙන+ ශුද්ධව+ සහ ගෞරවනීයව හැසිරෙන්නේ කොහොමද කියලා දැනගෙන ඉන්න ඕනේ.
5 දෙවියන්ව අඳුරන්නේ නැති මිනිස්සු+ වගේ කෑදර විදිහට කාමාශාවෙන් දැවිදැවී+ ඉන්න එපා.
6 ඒ ආශාවන් නිසා කිසිම කෙනෙක් එයාගේ සහෝදරයාව රවට්ටලා ලිංගික කාරණා ගැන දෙවියන් දීලා තියෙන සීමාවෙන් පිට පනින එක කොහොමටවත් සුදුසු නැහැ. මොකද යෙහෝවා* දෙවියන් ඒ හැම වරදකටම අනිවාර්යයෙන්ම දඬුවම් කරනවා. අපි කලින්ම ඔයාලට ඒ හැම දෙයක් ගැනම පැහැදිලි කරලා අනතුරු අඟවලයි තියෙන්නේ.
7 දෙවියන් අපිව තෝරගත්තේ අපවිත්‍ර අය වෙන්න නෙමෙයි ශුද්ධ අය වෙන්න.+
8 ඒ නිසා ඔයාලාගෙන් කෙනෙක් ඒ උපදෙස ප්‍රතික්ෂේප කරනවා නම් එයා ප්‍රතික්ෂේප කරන්නේ මිනිස්සුන්ව නෙමෙයි ඔයාලට බලය දෙන+ දෙවියන්වයි.+
9 පවුලේ අයට පෙන්නනවා වගේ ආදරයක්+ එකිනෙකාට පෙන්නන්න කියලා අපි ඔයාලට අමුතුවෙන්ම කියන්න ඕනෙ නැහැ. මොකද එකිනෙකාට ආදරේ කරන විදිහ ගැන දෙවියන් ඔයාලට උගන්වලා තියෙනවා.+
10 ඔයාලා මැසිඩෝනියාව පුරාම ඉන්න සහෝදරයන්ට ආදරේ කරනවා කියලා අපි දන්නවා. ඒත් සහෝදරයෙනි, ඒ දේ වැඩි වැඩියෙන් කරන්න කියලා අපි ඔයාලට උනන්දු කරන්න කැමතියි.
11 ඒ වගේම අපි ඔයාලට කියලා දුන්න විදිහට අනිත් අයට කරදරයක් වෙන්නේ නැතුව සාමකාමී ජීවිතයක් ගත කරන්න.+ අනිත් අයගේ වැඩවලට ඇඟිලි ගහන්න එපා.+ ඔයාලාගෙම අත් දෙකෙන් මහන්සි වෙලා වැඩ කරන්න.+ ඒ දේවල් කරන්න ඔයාලා ලොකු උත්සාහයක් ගන්න ඕනේ.
12 මොකද එහෙම කරද්දී සභාවට අයිති නැති අය ඉස්සරහා ගෞරවනීය ජීවිතයක් ගත කරන්නත්+ කිසි දේකින් අඩුපාඩුවක් නැතුව ඉන්නත් ඔයාලට පුළුවන් වෙයි.
13 සහෝදරයෙනි, මරණ නින්දේ ඉන්න අයට ඉස්සරහට වෙන්න යන දේ ගැන ඔයාලා තේරුම්ගන්නවාට අපි කැමතියි.+ එතකොට ඔයාලා කිසි බලාපොරොත්තුවක් නැති අය වගේ දුක් වෙන්න ඕනෙ නැහැ.+
14 යේසුස් මිය ගිහින් නැවත නැඟිට්ටා කියලා අපි විශ්වාස කරනවා.+ එහෙමනම් මරණ නින්දට වැටුණ, යේසුස් එක්ක එකට බැඳිලා හිටපු අයවත් දෙවියන් ඔහුත්* එක්ක එකට ඉන්න නැඟිට්ටවයි කියලා අපිට කිසිම සැකයක් නැහැ.+
15 අපෙන් සමහරු ස්වාමීන් පැමිණෙන කාලය* අතරතුරේදීත් ජීවත් වෙයි. ඒත් එයාලාගෙන් කිසිම කෙනෙක් මරණ නින්දේ සැතපිලා ඉන්න අයට කලින් නැඟිටින්නේ නැහැ. අපි ඒ දේ ඔයාලට කියන්නේ යෙහෝවා* කියන දේවල් පදනම් කරගෙනයි.
16 මොකද ස්වාමීන්ම, දෙවියන්ගේ හොරණෑව අතේ තියාගෙන ස්වර්ගයෙන් බැහැලා ඇවිත් අග්‍රදේවදූතයෙක්ගේ+ හඬින් අණ දෙයි. එතකොට මුලින්ම නැඟිටින්නේ ක්‍රිස්තුස් එක්ක එකට බැඳිලා ඉන්න, ඒ වෙනකොටත් මිය ගිහින් ඉන්න අයයි.+
17 ඊටපස්සේ ජීවත් වෙලා ඉන්න අපිව, ඒ අය එක්ක එකට ඉන්නත් අහසේදී ස්වාමීන්ව හම්බ වෙන්නත්+ වලාකුළු අතරට ඔසවගන්නවා.+ ඊටපස්සේ අපි හැමදාමත් ඉන්නේ ස්වාමීන් එක්කයි.+
18 ඉතින් මේ දේවල් ගැන කියලා දිගටම එකිනෙකාව සනසන්න.
පාදසටහන්
^ හෝ, “අණ.”
^ ග්‍රීක භාෂාවෙන් පෝර්නියා. “පැහැදිලි කිරීමක්” බලන්න.
^ මූ.අ., “භාජනය.”
^ ඒ කියන්නේ යේසුස්.
^ හෝ, “පැමිණ සිටින කාලය.” “පැහැදිලි කිරීමක්” බලන්න.
