පළවෙනි රාජාවලිය 13:1-34
13 යෙරොබොවම් බෙතෙල්වල තිබුණ පූජාසනයේ+ පූජා* ඔප්පු කරන්න ලෑස්ති වෙලා ඉද්දී යූදාවල ඉඳන් දෙවියන්ගේ පණිවිඩකරුවෙක්+ එතනට ආවා. එයා ආවේ යෙහෝවා දෙවියන් අණ කරපු නිසයි.
2 එයා ඇවිත් යෙහෝවා අණ කරපු විදිහට පූජාසනයට විරුද්ධව මේ දේ කෑගහලා කිව්වා. “මේ පූජාසනයට විරුද්ධව යෙහෝවා තීරණය කරලා තියන්නේ මේකයි. ‘දාවිත්ගේ පෙළපතින් පුතෙක් ඉපදෙනවා. එයාගේ නම යොෂියා.+ එයා උස් තැන්වල සේවය කරන, මේ පූජාසනයේ පූජා* ඔප්පු කරන පූජකයන්ව මරලා එයාලව මේ පූජාසනය උඩම ඔප්පු කරනවා. මැරුණ අයගේ ඇටකටුත් මේ පූජාසනය උඩම පුච්චලා දානවා.’”+
3 ඒ දේවල් වෙනවා කියලා ස්ථිර කරන්න එයා මෙහෙම කිව්වා. “යෙහෝවා දෙවියන් දෙන ලකුණ මේකයි. බලන්න! මේ පූජාසනය දෙකට පැළිලා යනවා. ඒකේ තියෙන අළු* හැම තැනටම විසිරිලා යනවා.”
4 සැබෑ දෙවියන් එවපු පණිවිඩකරු බෙතෙල්වල තිබුණ පූජාසනයට විරුද්ධව කියපු දේ ඇහුණ ගමන්ම පූජාසනය ළඟම හිටපු යෙරොබොවම් රජ එයාගේ අත දික් කරලා මෙහෙම කිව්වා. “අර මිනිහාව අල්ලගන්න!”+ ඒ වෙලාවෙම එයා දික් කරපු අත හොලවන්න බැරි විදිහට ගල්ගැහුණා.*+
5 ඒත් එක්කම සැබෑ දෙවියන්ගේ පණිවිඩකරු මාර්ගයෙන් යෙහෝවා දීපු ලකුණ ඉටු වුණා. පූජාසනය දෙකට පැළිලා ඒකේ තිබුණ අළු හැම තැනටම විසිරිලා ගියා.
6 රජ සැබෑ දෙවියන්ගේ පණිවිඩකරුට මෙහෙම කිව්වා. “අනේ, මං වෙනුවෙන් ඔයාගේ දෙවි යෙහෝවාට කන්නලව් කරන්න. එතකොට ඔහු මගේ අත සුව කරයි.”+ ඉතින් සැබෑ දෙවියන්ගේ පණිවිඩකරු යෙහෝවා දෙවියන්ට කන්නලව් කළා. ඊටපස්සේ රජගේ අත සුව වුණා.
7 රජ සැබෑ දෙවියන්ගේ පණිවිඩකරුට “එන්න, මගේ මාලිගාවට ඇවිත් මං එක්ක කෑම ටිකක් කන්න. මම ඔයාට තෑග්ගකුත් දෙන්නම්” කියලා කිව්වා.
8 ඒත් සැබෑ දෙවියන්ගේ පණිවිඩකරු රජට මෙහෙම කිව්වා. “ඔබේ මාලිගාවෙන් භාගයක් දුන්නත් මම ඔබ එක්ක එන්නේ නැහැ. මම මෙහෙදී කෑම කන්නෙවත් වතුර බොන්නෙවත් නැහැ.
9 මොකද යෙහෝවා මට මෙහෙම අණ කළා. ‘එහෙදී ඔයා කෑම කන්නවත් වතුර බොන්නවත් එපා. ඔයා යන පාරෙන්ම ආපහු එන්නත් එපා.’”
10 ඊටපස්සේ එයා බෙතෙල්වලට ආපු පාරෙන් යන්නේ නැතුව වෙනත් පාරකින් ගියා.
11 ඒ කාලේ මහලු අනාගතවක්තෘවරයෙක් බෙතෙල්වල පදිංචි වෙලා හිටියා. එදා බෙතෙල්වලදී සැබෑ දෙවියන්ගේ පණිවිඩකරු කරපු දේවල් ගැනයි, රජට කියපු දේවල් ගැනයි ඒ මහලු අනාගතවක්තෘවරයාගේ පුතාලා ඇවිත් එයාට කිව්වා.
12 එතකොට එයා පුතාලාගෙන් මෙහෙම ඇහුවා. “එයා මොන පාරෙන්ද ගියේ?” ඉතින් එයාගේ පුතාලා යූදාවල ඉඳන් ආපු සැබෑ දෙවියන්ගේ පණිවිඩකරු ගිය පාර එයාට පෙන්නුවා.
13 එතකොට එයා “මට බූරුවෙක්ව ගමනට ලෑස්ති කරලා දෙන්න” කියලා පුතාලට කිව්වා. එයාලා බූරුවෙක්ව ලෑස්ති කරලා දුන්නාම එයා උගේ පිටේ නැඟලා පිටත් වෙලා ගියා.
14 සැබෑ දෙවියන්ගේ පණිවිඩකරු ගිය පාරෙන් එයා යද්දී ඒ පණිවිඩකරු ලොකු ගහක් යට ඉඳගෙන ඉන්නවා එයා දැක්කා. එතකොට මහලු අනාගතවක්තෘවරයා “යූදාවල ඉඳන් ආපු සැබෑ දෙවියන්ගේ පණිවිඩකරු ඔයාද”+ කියලා ඒ කෙනාගෙන් ඇහුවා. එතකොට එයා “ඔව්” කියලා උත්තර දුන්නා.
15 මහලු අනාගතවක්තෘවරයා “යං අපේ ගෙදර. ගිහින් කෑම ටිකක් කමු” කියලා එයාට කිව්වා
16 ඒත් එයා මෙහෙම කිව්වා. “ඔයා එක්ක යන්නවත් ඔයාගේ ආරාධනය පිළිගන්නවත් මට බැහැ. මෙහෙදී මට ඔයාත් එක්ක කෑම බීම ගන්නත් බැහැ.
17 මොකද යෙහෝවා මට මෙහෙම අණ කළා. ‘එහෙදී ඔයා කෑම කන්නවත් වතුර බොන්නවත් එපා. ඔයා යන පාරෙන්ම ආපහු එන්නත් එපා.’”
18 එතකොට මහලු අනාගතවක්තෘවරයා මෙහෙම කිව්වා. “මමත් ඔයා වගේ අනාගතවක්තෘවරයෙක්. දේවදූතයෙක් ඇවිත් යෙහෝවා කියපු මේ දේ මට දැනුම් දුන්නා. ‘එයාව ඔයාගේ ගෙදරට එක්කන් ගිහින් කෑමයි, වතුරයි දෙන්න.’” (ඒත් එයා කිව්වේ බොරුවක්.)
19 ඉතින් සැබෑ දෙවියන්ගේ පණිවිඩකරු කෑම කාලා වතුර බොන්න ඒ මහලු අනාගතවක්තෘවරයා එක්ක එයාගේ ගෙදරට ගියා.
20 එයාලා කෑම මේසේ ඉඳගෙන ඉද්දී මහලු අනාගතවක්තෘවරයාට යෙහෝවාගෙන් පණිවිඩයක් ලැබුණා.
21 එයා යූදාවල ඉඳන් ආපු සැබෑ දෙවියන්ගේ පණිවිඩකරුට මෙහෙම කිව්වා. “යෙහෝවා කියන්නේ මේකයි. ‘ඔයා යෙහෝවා දුන්න නියෝගයට විරුද්ධව වැඩ කළා. ඔයාගේ දෙවි වන යෙහෝවාගේ අණට අකීකරු වුණා.
22 “කෑම කන්නවත් වතුර බොන්නවත් එපා” කියලා තියෙද්දීත් ඔයා ආපහු ඇවිත් කෑම කාලා වතුර බිව්වා. ඒ නිසා ඔයා මැරුණාම ඔයාගේ මුතුන්මිත්තන් එක්ක තැන්පත් කරන්නේ නැහැ.’”+
23 සැබෑ දෙවියන්ගේ පණිවිඩකරු කාලා බීලා ඉවර වුණාට පස්සේ මහලු අනාගතවක්තෘවරයා එයාට ආපහු යන්න බූරුවෙක්ව ලෑස්ති කරලා දුන්නා.
24 ඊටපස්සේ එයා යන්න පිටත් වුණා. මඟදී සිංහයෙක් කඩා පැනලා එයාව මැරුවා.+ එයාගේ මළ සිරුර පාරේ තිබුණා. ඒක ළඟ බූරුවායි, සිංහයායි දෙන්නාම හිටියා.
25 ඒ පාරෙන් ගිය අය මළ සිරුරයි, ඒ ළඟ හිටපු සිංහයාවයි දැක්කා. එයාලා මහලු අනාගතවක්තෘවරයා හිටපු නගරයට ඇවිත් ඒ ගැන කිව්වා.
26 දෙවියන්ගේ පණිවිඩකරුව ගෙදරට එක්කගෙන ආපු මහලු අනාගතවක්තෘවරයාට මේ ගැන අහන්න ලැබුණ ගමන්ම එයා මෙහෙම කිව්වා. “ඔය කියන්නේ යෙහෝවාගේ නියෝගයට විරුද්ධව වැඩ කරපු සැබෑ දෙවියන්ගේ පණිවිඩකරු ගැන වෙන්න ඕනේ.+ යෙහෝවා එයාව සිංහයෙක්ට ගොදුරු වෙන්න ඉඩහැරියා. ඌ එයාට හොඳටම තුවාල කරලා එයාව මරලා දාන්න ඇති. යෙහෝවා එයාට කියපු දේ ඒ විදිහටම වුණා.”+
27 ඊටපස්සේ මහලු අනාගතවක්තෘවරයා “මට ගමනට බූරුවෙක්ව ලෑස්ති කරලා දෙන්න” කියලා එයාගේ පුතාලට කිව්වා. ඉතින් එයාලා බූරුවෙක්ව ලෑස්ති කරලා දුන්නා.
28 එයා පාර දිගේ යද්දී මළ සිරුර පාරේ තියෙනවා දැක්කා. එතන බූරුවායි, සිංහයායි ඉන්නවත් එයා දැක්කා. සිංහයා මළ සිරුර කාලා තිබුණෙවත් බූරුවාට කිසිම තුවාලයක් කරලා තිබුණෙවත් නැහැ.
29 මහලු අනාගතවක්තෘවරයා සැබෑ දෙවියන්ගේ පණිවිඩකරුගේ මළ සිරුර බූරුවා පිටේ තියාගෙන තමන් හිටපු නගරයට අරගෙන ආවා. එහෙම කළේ එයා ගැන අඬා වැලපිලා එයාගේ මළ සිරුර තැන්පත් කරන අදහසින්.
30 ඊටපස්සේ එයා තමන්ට අයිති සොහොන් ගෙයි ඒ මළ සිරුර තැන්පත් කළා. එයාලා හැමෝම “අනේ, මගේ සහෝදරයා ඔයාට වෙච්ච දේ” කියකිය එයා ගැන අඬා වැලපුණා.
31 එයාව තැන්පත් කළාට පස්සේ මහලු අනාගතවක්තෘවරයා එයාගේ පුතාලට මෙහෙම කිව්වා. “මං මැරුණාම මාවත් සැබෑ දෙවියන්ගේ පණිවිඩකරුව තැන්පත් කරපු තැනම තැන්පත් කරන්න. මගේ ඇටකටු එයාගේ ඇටකටු ළඟම තැන්පත් කරන්න.+
32 යෙහෝවා එයා මාර්ගයෙන් බෙතෙල්වල තියෙන පූජාසනයට විරුද්ධව කියපු දේත් සමාරියේ නගරවල උස් තැන්වල තියෙන දේවාලවලට+ විරුද්ධව කියපු දේත් අනිවාර්යයෙන්ම ඉටු වෙනවා.”+
33 ඒ දේවලින් පස්සෙවත් යෙරොබොවම් රජ දුෂ්ට විදිහට වැඩ කරන එක නැවැත්තුවේ නැහැ. එයා උස් තැන්වල සේවය කරන්න දිගටම සාමාන්‍ය මිනිස්සු අතරින් පූජකයන්ව පත් කළා.+ එයා පූජකයන් විදිහට සේවය කරන්න කැමති ඕනෙම කෙනෙක්ව “මෙයාටත් පූජකයෙක් වෙන්න පුළුවන්”+ කියලා එයාලව පූජකයන් විදිහට පත් කළා.
34 යෙරොබොවම්ගේ පෙළපතේ අය කරපු මේ බරපතළ වරද+ එයාලාගෙම විනාශයටත් පොළොවෙන් එයාලව අතුගාලා දාන්නත් හේතු වුණා.+
පාදසටහන්
^ හෝ, “දුම ඉහළට නඟින විදිහට පූජා.”
^ හෝ, “දුම ඉහළට නඟින විදිහට පූජා.”
^ හෝ, “තෙල් මිශ්‍ර අළු.” ඒ කියන්නේ සත්ව පූජාවල තෙල් මිශ්‍ර වුණ අළු.
^ හෝ, “අත පණ නැතුව ගියා.”
