පළවෙනි රාජාවලිය 4:1-34
4 සලමොන් රජ මුළු ඊශ්‍රායෙල් දේශයම පාලනය කළා.+
2 එයාගේ උසස් නිලධාරීන්ගේ* නම් තමයි මේ: පූජකයා* විදිහට සේවය කළේ සාදොක්ගේ+ පුතා වුණ අෂරියා.
3 ලේකම්වරු විදිහට+ වැඩ කළේ ෂීෂාගේ පුතාලා වුණ එලිහොරෙෆ් සහ අහියා. වාර්තාකරු විදිහට වැඩ කළේ අහිලුද්ගේ පුතා වුණ යෙහෝෂපාට්.+
4 හමුදාවේ ප්‍රධානියා වුණේ යෙහෝයාදාගේ පුතා වුණ බෙනායා.+ පූජකයන් විදිහට වැඩ කළේ සාදොක් සහ අබියාතර්.+
5 ප්‍රධානීන්ගේ වැඩ බලාගන්න පත් කළේ නාතන්ගේ+ පුතා වුණ අෂරියාව. නාතන්ගේ පුතා වුණ සාබූද් පූජකයෙක් විදිහට සේවය කළා. එයා රජගේ යාළුවෙක්.+
6 රජමාලිගාවේ වැඩ බලාගත්තේ අහිෂාර්. රජගේ වැඩවලට බඳවගත්ත අයව+ අධීක්ෂණය කළේ අබ්දාගේ පුතා වුණ අදොනිරාම්.+
7 සලමොන් රජ ඊශ්‍රායෙල් දේශය බලාගන්න ප්‍රධානීන් 12දෙනෙක්ව පත් කළා. රජටත් රජමාලිගාවේ හැමෝටමත් කෑම ලබා දෙන එක පවරලා තිබුණේ එයාලට. අවුරුද්දකට සැරයක් මාසයක් පුරා ඒ එක් එක් කෙනා රජමාලිගාවට කෑම සැපයුවා.+
8 එයාලාගේ නම් තමයි මේ: එෆ්‍රායිම් කඳුකරය භාර දීලා තිබුණේ හූර්ගේ පුතාට.
9 මාකෂ්, ෂායල්බිම්,+ බෙත්ෂෙමෙෂ් සහ ඒලොන්බෙත්හානාන් භාර දීලා තිබුණේ දෙකෙර්ගේ පුතාට.
10 අරුබ්බොත් භාර දීලා තිබුණේ හෙසෙද්ගේ පුතාට. (සෝකෝ සහ මුළු හේෆෙර් දේශයත් එයා යටතේ තිබුණා.)
11 මුළු දෝර් කඳුවැටියම භාර දීලා තිබුණේ අබිනාදාබ්ගේ පුතාට. (එයාගේ බිරිඳ වුණේ සලමොන්ගේ දුවෙක් වුණ තාෆත්.)
12 තයනක්, මෙගිද්දෝ+ සහ බෙත්ෂෙයාන්+ වටේ තියෙන මුළු ප්‍රදේශයම භාර දීලා තිබුණේ අහිලුද්ගේ පුතා වුණ බානාට. මුළු බෙත්ෂෙයාන් ප්‍රදේශයම තියෙන්නේ යෙෂ්‍රයෙල්වලට පහළින්. ඒක මායිම් වෙලා තියෙන්නේ ෂාරෙතාන්වලට. බෙත්ෂෙයාන් ප්‍රදේශය ආබෙල්මෙහෝලා දක්වාත් යොක්මෙයාම්+ දක්වාත් විහිදිලා තිබුණා.
13 රාමොත්ගිලියද්+ භාර දීලා තිබුණේ ගෙබර්ගේ පුතාට. (ගිලියද්වල+ තිබුණ මනස්සේ ගෝත්‍රයට අයිති යායිර්ගේ+ පොඩි ගම්මානත් එයාගේ භාරයේ තිබුණා. බාෂාන්වල+ තියෙන අර්ගොබ්+ පළාතත් එයාගේ භාරයේ තිබුණා. ඒ පළාතේ පවුරුවලින් වට වුණ, දොරටුවලට තඹ පොලු දාලා තිබුණ විශාල නුවරවල් 60ක් තිබුණා.)
14 මහනායිම්+ භාර දීලා තිබුණේ ඉද්දෝගේ පුතා වුණ අහිනදාබ්ට.
15 නෆ්තලී දේශය භාර දීලා තිබුණේ අහිමයාෂ්ට. (එයා විවාහ වුණේ සලමොන්ගේ දුවෙක් එක්ක. එයාගේ නම බසෙමත්.)
16 ආෂෙර් දේශය සහ බෙයාලොත් පළාත භාර දීලා තිබුණේ හූෂයිගේ පුතා වුණ බානාට.
17 ඉසකාර් දේශය භාර දීලා තිබුණේ පරුවාගේ පුතා වුණ යෙහෝෂපාට්ට.
18 බෙන්ජමින්+ දේශය භාර දීලා තිබුණේ ඒලාගේ පුතා වුණ ෂිමෙයිට.+
19 ගිලියද්+ දේශය භාර දීලා තිබුණේ උරීගේ පුතා වුණ ගෙබර්ට. ඒ දේශය තමයි කලින් අමෝරිවරුන්ගේ රජ වුණ සීහොන්+ සහ බාෂාන්වල රජ වුණ ඕග්+ යටතේ තිබුණේ. ඒ ප්‍රධානීන් හැමෝගෙම වැඩ බලාගන්න තව ප්‍රධානියෙක්ව පත් කරලා තිබුණා.
20 යූදා සහ ඊශ්‍රායෙල් සෙනඟ මුහුදු වෙරළේ වැලි වගේ+ ගණන් කරන්න බැරි තරමක් හිටියා. එයාලා කාලා බීලා සතුටින් ජීවත් වුණා.+
21 මහ ගංගාවේ*+ ඉඳන් පිලිස්තිවරුන්ගේ දේශය දක්වාත් ඊජිප්තුවේ දේශ සීමාව දක්වාත් තිබුණ හැම රාජ්‍යයක්ම සලමොන්ගේ පාලනය යටතේ තිබුණා. සලමොන්ගේ මුළු ජීවිත කාලේ පුරාම ඒ හැම රාජ්‍යයක්ම එයාට බදු ගෙව්වා* වගේම එයාට සේවය කළා.+
22 සලමොන් රජගේ මාලිගාවට දවසකට අවශ්‍ය වුණ ආහාර ප්‍රමාණය තමයි මේ: සිහින්ව කොටාගත්ත පිටි කෝර් මිනුම්* 30යි. සාමාන්‍ය පිටි කෝර් මිනුම් 60යි.
23 තර කරපු ගවයන් 10යි. තණබිමෙන් ගත්ත ගවයන් 20යි. බැටළුවන් 100යි. මුවන්* සහ තර කරපු කුරුල්ලනුත්* ඒවාට අමතරව දුන්නා.
24 තිප්සා ඉඳන් ගාසා+ වෙන කල් මහ ගඟෙන් මෙහා පැත්තේ*+ තිබුණ මුළු ප්‍රදේශයම එයාගේ පාලනය යටතේ තිබුණා. ගඟෙන් මෙහා පැත්තේ හිටපු රජවරු හැමෝමත් එයාට යටත් වෙලා හිටියා. එයා වටේට තිබුණ හැම ප්‍රදේශයකම සාමය තිබුණා.+
25 යූදා සහ ඊශ්‍රායෙල් සෙනඟ සුරක්ෂිතව ජීවත් වුණා. සලමොන් රජකම් කරපු කාලේ පුරාම දාන් ඉඳන් බෙයර්ෂෙබා වෙන කල් හිටපු හැමෝම තම තමන්ගේ මිදිවැල යටයි, තම තමන්ගේ අත්තික්කා ගහ යටයි සතුටින් ජීවත් වුණා.
26 සලමොන්ට එයාගේ අශ්ව රථ ඇදගෙන යන්න අශ්වයන්* 12,000ක් හිටියා. ඒ අශ්වයන් ගාල් කරන්න ගාල් 4,000ක්* තිබුණා.+
27 ඒ ප්‍රධානීන් සලමොන් රජටයි, එයාගේ මේසයෙන් කන හැමෝටමයි කෑම සැපයුවා. එයාලට නියම කරලා තිබුණ මාසේදී කිසි අඩුපාඩුවක් නැතුව අවශ්‍ය දේවල් එයාලා ලබා දුන්නා.+
28 අශ්ව රථ ඇදගෙන ගිය අශ්වයන් ඇතුළුව අනිත් අශ්වයන්ට අවශ්‍ය වුණ බාර්ලි සහ පිදුරුත් ඒ අය සැපයුවා. අශ්වයන් කොහේ හිටියත් එයාලා ඒ දේවල් ලබා දුන්නා. එයාලට නියම කරලා තිබුණ විදිහටම ඒ එක් එක් කෙනා ඒක කළා.
29 දෙවියන් කිසිම අඩුවක් නැතුව ප්‍රඥාවයි, තේරුම්ගැනීමේ හැකියාවයි සලමොන්ට දුන්නා. ඒ වගේම හැම දෙයක්ම හොඳින් අවබෝධ කරගන්න පුළුවන් හිතකුත් එයාට දුන්නා. එයාගේ අවබෝධය කොච්චරද කියනවා නම් ඒක හරියට මුහුදු වෙරළේ වැලි වගේ මැනලා ඉවර කරන්න බැහැ.+
30 පෙරදිග රටවලයි, ඊජිප්තුවෙයි හිටපු හැමෝටම වඩා වැඩි ප්‍රඥාවක්+ සලමොන්ට තිබුණා.
31 එයා හැම මනුස්සයෙක්ටම වඩා ප්‍රඥාවන්තයි. එයා සේරාගෙන් පැවතෙන ඒතන්ට+ වඩා ප්‍රඥාවන්තයි. මාහොල්ගේ පුතාලා වුණ හේමාන්ටයි,+ කල්කොල්ටයි,+ දර්දාටයි වඩා ප්‍රඥාවන්තයි. අවට හිටපු හැම ජාතියකටම අයිති අය අතර සලමොන් ප්‍රසිද්ධ වුණා.+
32 එයා හිතෝපදේශ* 3,000ක්+ ලිව්වා.* ගීතිකා+ 1,005කුත් රචනා කළා.
33 ලෙබනොන්වල හැදෙන විශාල දේවදාර ගහේ ඉඳන් බිත්තිවල වැවෙන පුංචි හිසොප් පැළේ+ වෙන කල් ඕනෙම පැළෑටියක් ගැන විස්තර කරන්න එයාට හැකියාව තිබුණා. ඒ විතරක් නෙමෙයි සත්තු,+ කුරුල්ලන්,+ උරගයන්, කෘමීන්+ සහ මාළු ගැනත් විස්තර කරන්න හැකියාව එයාට තිබුණා.
34 සලමොන් කියපු ප්‍රඥාවන්ත දේවල් අහන්න හැම ජාතියකටම අයිති මිනිස්සු ආවා. එයාගේ ප්‍රඥාව ගැන ආරංචි වුණ රජවරුත්* පොළොවේ හැම තැනකම ඉඳන් ආවා.+
පාදසටහන්
^ හෝ, “අධිපතීන්ගේ.”
^ පේන විදිහට උත්තම පූජකයා.
^ හෝ, “තෑගි දුන්නා.”
^ ඒ කියන්නේ යුප්‍රටීස් ගඟේ.
^ හෙබ්‍රෙව් භාෂාවෙන් මුව වර්ග තුනක් ගැන කියනවා. ඒ කියන්නේ මුවා, ගසෙල් මුවා (කුරංගයා) සහ ගෝනාට ටිකක් සමාන රෝබක් මුවා.
^ ඒ කියන්නේ කොවුල් වර්ගයක්.
^ ඒ කියන්නේ යුප්‍රටීස් ගඟේ බස්නාහිර පැත්ත.
^ හෝ, “අසරුවන්.”
^ මේ ගාණ සමහර අත්පිටපත්වල සහ මේ ගැන කතා කරන වෙනත් බයිබල් පදවලත් සඳහන් වෙනවා. තවත් සමහර අත්පිටපත්වල 40,000ක් කියලා සඳහන් වෙනවා.
^ ඒ කියන්නේ ප්‍රඥාවන්ත කියමන්.
^ හෝ, “කිව්වා.”
^ රජවරු එවපු නියෝජිතයන් වෙන්නත් පුළුවන්.
