පළවෙනි සාමුවෙල් 14:1-52
14 දවසක් සාවුල්ගේ පුතා වන යොනාතාන්+ එයාගේ ආයුධ අරන් යන සේවකයාට මෙහෙම කිව්වා. “අපි දෙන්නා එහා පැත්තේ තියෙන පිලිස්තිවරුන්ගේ මුරපොළ ළඟට යමු.” ඒත් යොනාතාන් එයාගේ තාත්තාට ඒ ගැන කිව්වේ නැහැ.
2 ඒ වෙද්දී සාවුල් හිටියේ ගිබෙයාවල+ දේශ සීමාව ළඟ තිබුණ මිග්‍රොන්වල දෙළුම් ගහ යට. එයාත් එක්ක මිනිස්සු 600ක් විතර හිටියා.+
3 (ඒ දවස්වල ඒෆොද් ඇඳුම+ ඇඳගෙන හිටියේ අහියා. අහියා, ඊකාබොද්ගේ+ සහෝදරයා වන අහිතුබ්ගේ+ පුතා. අහිතුබ්ගේ තාත්තා පිනෙහාස්.+ පිනෙහාස්ගේ තාත්තා, යෙහෝවා දෙවියන්ගේ පූජකයෙක් විදිහට ෂීලෝවල+ සේවය කරපු ඒලී.)+ යොනාතාන් එයා හිටපු තැනින් පිටත් වෙලා ගියා කියලා සෙනඟත් දැනන් හිටියේ නැහැ.
4 පිලිස්තිවරුන්ගේ මුරපොළට යන්න යොනාතාන් මාර්ගයක් හෙව්වා. ඒ මාර්ග තිබුණේ උල් පර්වත දෙකක් අතරේ. ඒ එක පර්වතයක් බෝෂෙෂ් කියලත් අනිත් එක සෙනේ කියලත් හැඳින්නුවා.
5 එක පර්වතයක් තිබුණේ උතුරු පැත්තේ. මික්මාෂ්වලට මුහුණ ලා තිබුණ ඒ පර්වතය පේන්න තිබුණේ හරියට කණුවක් වගේ. ගෙබාවලට+ මුහුණ ලා තිබුණ අනිත් පර්වතය තිබුණේ දකුණේ.
6 යොනාතාන් එයාගේ ආයුධ අරන් යන සේවකයාට මෙහෙම කිව්වා. “අපි දෙන්නා අර අචර්මච්ඡේදිතයන්ගේ*+ මුරපොළට යමු. සමහරවිට යෙහෝවා අපිට උදව් කරන්න ඉඩ තියෙනවා. මොකද ගැලවීම දෙන්න යෙහෝවාට ලොකු හමුදාවක්ම ඕනෙ නැහැ. ඕනෙ නම් ඔහුට පුළුවන් දෙතුන්දෙනෙක්ගෙන් වුණත් ගැලවීම දෙන්න.”+
7 ඒක ඇහුවාම එයාගේ ආයුධ අරන් ගිය කෙනා මෙහෙම කිව්වා. “ඔයා කැමති ඕනෙම දෙයක් කරන්න. ඔයාට හොඳයි කියලා හිතෙන පාරේ අපි යමු. ඔයා යන ඕනෙම තැනකට මාත් එන්න ලෑස්තියි.”
8 එතකොට යොනාතාන් මෙහෙම කිව්වා. “අපි ඒ පැත්තට ගිහින් සතුරන්ට අපිව පේන තැනක ඉමු.
9 ‘අපි එනකම් ඔතනට වෙලා ඉන්න’ කියලා එයාලා කිව්වොත් අපි මුකුත්ම නොකර එතනටම වෙලා ඉමු.
10 ඒත් ‘සටනට එන්න’ කියලා කිව්වොත් යෙහෝවා දෙවියන් එයාලව අපිට යටත් කරලා දෙනවා කියන්න ඒක ලකුණක්.+ එහෙම කිව්වොත් අපි එයාලට පහර දෙමු.”
11 ඉතින් ඒ දෙන්නා පිලිස්තිවරුන්ට පේන තැනකට ගිහින් හිටියා. පිලිස්තිවරු එයාලව දැකලා “අන්න, ගුහාවල හැංගිලා හිටිය හෙබ්‍රෙව්වරු දැන් එළියට ඇවිල්ලා”+ කියලා කිව්වා.
12 ඊටපස්සේ මුරපොළේ හිටිය සෙබළු යොනාතාන්ටයි, එයාගේ ආයුධ අරන් යන කෙනාටයි මෙහෙම කිව්වා. “වරෙං සටනට! අද අපි උඹලට හොඳ පාඩමක් උගන්නනවා!”+ ඒක අහපු ගමන්ම යොනාතාන් එයාගේ සේවකයාට කිව්වා “අපි එයාලට පහර දෙමු. යෙහෝවා අනිවාර්යයෙන්ම එයාලව අපේ අතට අහු කරලා දෙනවා”+ කියලා.
13 එයාලා ඉන්න තැනට යන්න, යොනාතාන්ට දණගහගෙන ප්‍රපාතයක් දිගේ උඩට නැඟගෙන යන්න සිද්ධ වුණා. ආයුධ අරන් ගිය කෙනාත් එයාගේ පිටිපස්සෙන් ආවා. යොනාතාන් පිලිස්තිවරුන්ට පහර දෙන්න පටන්ගත්තා. එයාගේ සේවකයාත් පිටිපස්සෙන් ඇවිත් පිලිස්තිවරුන්ට පහර දීලා එයාලව මරලා දැම්මා.
14 පිලිස්තිවරුන්ට පහර දීපු මුල් වතාවේදී යොනාතානුයි, එයාගේ සේවකයායි හුඟක් පොඩි බිම් කොටසක* සටන් කරලා මිනිස්සු 20දෙනෙක්ව විතර මරලා දැම්මා.
15 ඊටපස්සේ පිලිස්තිවරුන්ගේ කඳවුරෙයි, මුරපොළෙයි හිටපු හැමෝමත් කණ්ඩායම් තුනේ හිටපු සෙබළුත්+ කලබල වුණා. පොළොවත් දෙදරන්න පටන්ගත්තා. එදා දෙවියන් එයාලාගේ හිත්වල ලොකු බයක් ඇති කළා.
16 බෙන්ජමින්වරුන්ගේ දේශයට අයිති ගිබෙයාවල+ හිටිය සාවුල්ගේ මුරකරුවෝ දැක්කා පිලිස්තිවරුන්ගේ කඳවුරේ ඉන්න හැමෝම හොඳටම කලබල වෙලා කියලා.+
17 ඒ ගැන ආරංචි වුණාම සාවුල් “සෙනඟව ගණන් කරලා කවුරු හරි කඳවුරෙන් එළියට ගිහිල්ලාද බලන්න” කියලා එයා එක්ක හිටපු අයට කිව්වා. සෙනඟව ගණන් කරලා බලද්දී යොනාතාන් සහ එයාගේ ආයුධ අරන් යන කෙනා එතන හිටියේ නැහැ කියලා දැනගත්තා.
18 එතකොට සාවුල් අහියාට+ මෙහෙම කිව්වා. “සැබෑ දෙවියන්ට අයිති ගිවිසුම් පෙට්ටිය මෙතනට ගේන්න.” (ඒ වෙනකොට* සැබෑ දෙවියන්ට අයිති ගිවිසුම් පෙට්ටිය තිබුණේ ඊශ්‍රායෙල්වරුන්ගේ කඳවුරේ.)
19 සාවුල් පූජකයා එක්ක කතා කරකර ඉද්දී පිලිස්තිවරුන්ගේ කඳවුරේ තිබුණ කලබල ගතිය එන්න එන්නම වැඩි වුණා. එතකොට සාවුල් පූජකයාට කිව්වා “ඔයා කරන්න යන දේ නවත්තන්න” කියලා.
20 ඊටපස්සේ සාවුල් එයා එක්ක හිටපු හැමෝවම එකතු කරගෙන සටනට ගියා. සටන් බිමට ආවාම එයාලා දැක්කා පිලිස්තිවරු හොඳටම කලබල වෙලා තමන්ගෙම අයට විරුද්ධව සටන් කරනවා.
21 පිලිස්තිවරුන්ගේ පැත්ත අරන් එයාලාගේ කඳවුරට ගිහින් හිටිය හෙබ්‍රෙව්වරුනුත් ඊශ්‍රායෙල්වරුන්ගේ පැත්තට ගිහින් සාවුල්ටයි, යොනාතාන්ටයි සහය දුන්නා.
22 පිලිස්තිවරු පලා යනවා කියලා දැනගත්තාම එෆ්‍රායිම් කඳුකරයේ හැංගිලා හිටිය ඊශ්‍රායෙල්වරුත්+ සතුරන් පස්සේ පන්නගෙන ගියා.
23 ඊශ්‍රායෙල්වරු බෙත්ආවෙන්+ වෙන කල්ම එයාලත් එක්ක සටන් කරකර ගියා. ඔය විදිහට එදා යෙහෝවා දෙවියන් ඊශ්‍රායෙල්වරුන්ව බේරගත්තා.+
24 එදා ඊශ්‍රායෙල් සෙබළු හිටියේ හොඳටම මහන්සි වෙලා. මොකද සාවුල් සෙනඟගෙන් දිවුරුමක් අරන් මෙහෙම කියලා තිබුණා. “මං මගේ සතුරන්ගෙන් පළිගන්න කල් කිසිම කෙනෙක්ට කෑම කන්න බැහැ. කවුරු හරි කෙනෙක් හවස් වෙන්න කලින් කෑවොත් එයාට ශාප වෙන්න ඕනේ!” ඒ නිසා කිසි කෙනෙක් කෑම කාලා තිබුණේ නැහැ.+
25 ඊටපස්සේ මුළු සෙනඟම කැලෑවට ගියා. එතකොට එයාලා දැක්කා කැලෑවේ බිම හැම තැනම මීපැණි තියෙනවා.
26 මීවදවලින් පැණි වැක්කෙරෙනවා කියලා දැක්කත් කවුරුත් මීපැණිවල රස බලන්න ගියේ නැහැ. මොකද සාවුල් රජ එයාලාගෙන් අරන් තිබුණ දිවුරුම නිසා එයාලා ඒක කරන්න බය වුණා.
27 ඒත් සාවුල් සෙනඟගෙන් ගත්ත දිවුරුම ගැන යොනාතාන් දැනගෙන හිටියේ නැහැ.+ ඉතින් එයාගේ අතේ තිබ්බ සැරයටියෙන් එයා මීපැණි ටිකක් අරන් ඒකේ රස බැලුවා. එතකොට එයාගේ ඇඟට ලොකු පණක් ආවා.*
28 කෙනෙක් ඒක දැකලා යොනාතාන්ට මෙහෙම කිව්වා. “ඔයාගේ තාත්තා සෙනඟගෙන් දිවුරුමක් අරන් තදින්ම කිව්වා ‘අද කවුරු හරි කෑම කෑවොත් එයාට ශාප වෙන්න ඕනෙ’+ කියලා. සෙනඟ මෙච්චර මහන්සියෙන් ඉන්නේ ඒ නිසයි.”
29 එතකොට යොනාතාන් මෙහෙම කිව්වා. “මගේ තාත්තා මේ සෙනඟට කරලා තියෙන්නේ මොන අපරාධයක්ද! මීපැණි ටික කාපු ගමන්ම මගේ ඇඟට කොච්චර ශක්තියක් ආවාද!
30 ඉතින් සතුරන් දාලා ගිය දේවල් අතරේ තිබුණ කෑම සෙනඟට කන්න දුන්නා නම්+ අද අපිට කොච්චර ලොකු ජයග්‍රහණයක් ලබාගන්න තිබුණාද! අපිට මීට වඩා ලොකු සෙනඟක් මරන්නත් තිබුණා.”
31 එදා එයාලා මික්මාෂ්වල ඉඳන් ආයාලොන්+ නගරය වෙන කල්ම ගිහින් පිලිස්තිවරුන්ට පහර දීලා එයාලව මරලා දැම්මා. ඒ වෙනකොට සෙනඟ හිටියේ හොඳටම හෙම්බත් වෙලා.
32 ඉතින් එයාලා සතුරන්ගෙන් ගත්ත බැටළුවන්ව, ගවයන්ව සහ වස්සන්ව බිම පෙරළගෙන උන්ව මරලා හරිම කෑදර විදිහට ලේත් එක්කම උන්ගේ මස් කෑවා.+
33 ඊටපස්සේ සාවුල්ට මෙහෙම ආරංචි වුණා. “සෙනඟ යෙහෝවාට විරුද්ධව ලොකු වරදක් කරලා! එයාලා ලේත් එක්ක මස් කනවා.”+ එතකොට සාවුල් “ඔයාලා ඇයි මේ වගේ දෙයක් කළේ? ඔයාලට දෙවියන් ගැන කිසිම විශ්වාසයක් නැද්ද? දැන් මං ළඟට ලොකු ගලක් අරගෙන එන්න” කියලා කිව්වා.
34 ඊටපස්සේ සාවුල් මෙහෙමත් කිව්වා. “සෙනඟට මෙහෙම කියන්න. ‘ගවයන්වයි, බැටළුවන්වයි මෙතනට අරන් ඇවිත් උන්ව මරලා කන්න. ඒත් මස් එක්ක ලේ කන්න එපා. මොකද ඒක යෙහෝවාට විරුද්ධව කරන ලොකු පාපයක්.’”+ එදා රෑ හැමෝම එයාලා ළඟ හිටිය ගවයන්ව එතනට අරන් ඇවිත් මැරුවා.
35 සාවුල් එතන යෙහෝවා දෙවියන් වෙනුවෙන් පූජාසනයක් ඉදි කළා.+ ඒක එයා යෙහෝවා වෙනුවෙන් ඉදි කරපු පළවෙනි පූජාසනයයි.
36 ඊටපස්සේ සාවුල් මෙහෙම කිව්වා. “අපි අද රෑට පිලිස්තිවරුන්ව හොයාගෙන ගිහින් එයාලව මරලා දාලා එළිය වැටෙන කල්ම එයාලාගේ බඩු පැහැරගමු.” එතකොට සෙනඟ “ඔයාට හොඳයි කියලා හිතෙන ඕනෙම දෙයක් කරන්න” කියලා කිව්වා. ඒත් පූජකයා “අපි සැබෑ දෙවියන්ගෙන් මේ ගැන අහලා බලමු”+ කියලා කිව්වා.
37 ඉතින් සාවුල් දෙවියන්ගෙන් මෙහෙම ඇහුවා. “මම පිලිස්තිවරු පස්සේ පන්නගෙන යන්නද?+ ඔබ එයාලව අපිට යටත් කරලා දෙනවාද?” ඒත් එදා දෙවියන් සාවුල්ට උත්තර දුන්නේ නැහැ.
38 ඒ නිසා සාවුල් මෙහෙම කිව්වා. “ප්‍රධානීන් හැමෝම මං ළඟට එන්න. අද මේ වගේ දෙයක් වුණේ කාගේ වරදක් නිසාද කියලා හොයලා බලන්න.
39 වරද කළේ කවුරු වුණත් එයාව මරලා දාන්න ඕනේ. වරද කළේ මගේ පුතා යොනාතාන් වුණත් මම ඒ දඬුවමින් එයාව නිදහස් කරන්නේ නැහැ. ඊශ්‍රායෙල්වරුන්ව බේරගත්ත ජීවමාන දෙවි යෙහෝවා ඉස්සරහා මම දිවුරලා ඒ දේ කියනවා.” ඒත් කවුරුත්ම එයාට උත්තර දුන්නේ නැහැ.
40 ඊටපස්සේ සාවුල් සෙනඟට මෙහෙම කිව්වා. “ඔයාලා හැමෝම එක පැත්තකට යන්න. මායි, යොනාතානුයි විතරක් අනිත් පැත්තට යන්නම්.” එතකොට සෙනඟ සාවුල්ට කිව්වා “ඔයාට හොඳයි කියලා හිතෙන දෙයක් කරන්න” කියලා.
41 එතකොට සාවුල් යෙහෝවා දෙවියන්ට මෙහෙම කිව්වා. “ඊශ්‍රායෙල්වරුන්ගේ දෙවියනි, තුම්මීම්+ මාර්ගයෙන් අපිට උත්තරයක් දෙන්න.” ඊටපස්සේ සෙනඟ අතරින් සාවුල්වයි, යොනාතාන්වයි තේරුණා.
42 “වැරැද්ද කළේ මමද නැත්නම් මගේ පුතා යොනාතාන්ද කියලා දැනගන්න දාදු දාන්න”+ කියලා සාවුල් කිව්වා. ඒ වෙලාවේ තේරුණේ යොනාතාන්වයි.
43 එතකොට සාවුල් යොනාතාන්ගෙන් මෙහෙම ඇහුවා. “ඔයා මොනවාද කළේ?” යොනාතාන් මෙහෙම කිව්වා. “මං මගේ සැරයටියෙන් මීපැණි ටිකක් අරන් රස බැලුවා.+ මං කරපු වැරැද්දට දැන් මාව මරලා දාන්න.”
44 ඒක ඇහුවාම සාවුල් යොනාතාන්ට කිව්වා “ඔයාව මරලා දැම්මේ නැත්නම් දෙවියන් මට දරුණු විදිහට දඬුවම් කරන්න ඕනෙ” කියලා.+
45 ඒත් සෙනඟ සාවුල්ට මෙහෙම කිව්වා. “මෙච්චර ලොකු ජයග්‍රහණයක්+ ඊශ්‍රායෙල්වරුන්ට ලැබුණේ යොනාතාන් නිසයි. ඒක එයාට කරන්න උදව් කළේ දෙවියන්.+ ඉතින් එයාව මරන්නේ කොහොමද? ඒක අපිට කොහොමටවත් කරන්න බැහැ. යොනාතාන්ගේ එක කෙස්ගහක්වත් බිම වැටෙන්න අපි ඉඩ දෙන්නේ නැහැ. ජීවමාන දෙවි යෙහෝවා ඉස්සරහා අපි ඒක දිවුරලා කියනවා.” ඒ විදිහට සෙනඟ යොනාතාන්ගේ ජීවිතේ බේරගත්තා.
46 ඊටපස්සේ සාවුල් පිලිස්තිවරු පස්සේ පන්නගෙන යන එක නැවැත්තුවා. පිලිස්තිවරුත් එයාලට අයිති ප්‍රදේශවලට හැරිලා ගියා.
47 සාවුල් එයාගේ හැම සතුරෙක්ටම විරුද්ධව සටන් කරලා ඊශ්‍රායෙල් දේශය පුරාම එයාගේ රජකම ස්ථිර කරගත්තා. එයා මෝවබ්වරුන්ට,+ අම්මොන්වරුන්ට,+ ඒදොම්වරුන්ට,+ ෂොබාවල+ රජවරුන්ට සහ පිලිස්තිවරුන්ට+ විරුද්ධව සටන් කළා. ගියගිය තැන හිටපු සතුරන් හැම කෙනෙක්වම එයා යටත් කරගත්තා.
48 එයා හුඟක් නිර්භීතව අමලෙක්වරුන්ට+ විරුද්ධව සටන් කරලා එයාලවත් යටත් කරගත්තා. ඒ විදිහට සාවුල් ඊශ්‍රායෙල්වරුන්ව එයාලාගේ සතුරන්ගෙන් බේරගත්තා.
49 සාවුල්ට යොනාතාන්, ඉෂ්වී සහ මල්කීෂුවා+ කියලා පුතාලා තුන්දෙනෙක් හිටියා. එයාට දුවලා දෙන්නෙකුත් හිටියා. වැඩිමල් දුවගේ නම මේරබ්.+ බාල දුවගේ නම මීකල්.+
50 සාවුල්ගේ බිරිඳගේ නම අහිනොවම්. එයා අහිමයාෂ්ගේ දුව. සාවුල්ගේ හමුදාපති විදිහට වැඩ කළේ සාවුල්ගේ බාප්පා වන අබ්නේර්. අබ්නේර්ගේ+ තාත්තා නේර්.
51 සාවුල්ගේ තාත්තා කිෂ්.+ අබ්නේර්ගේ තාත්තා වන නේර්+ අබියෙල්ගේ පුතා.
52 සාවුල් ශක්තිමත්, නිර්භීත පුරුෂයෙක්ව දැක්කාම ඒ කෙනාව එයාගේ හමුදාවට බඳවගත්තා.+ සාවුල්ගේ ජීවිත කාලය පුරාම සාවුල් සහ පිලිස්තිවරුන් අතරේ දරුණු යුද්ධ තිබුණා.+
පාදසටහන්
^ හෝ, “චර්මච්ඡේදනය කරපු නැති අයගේ.” “පැහැදිලි කිරීමක්” බලන්න.
^ ඒ බිම් ප්‍රමාණයේ දිග හරක් දෙන්නෙක් දවසකින් සීසාන බිම් ප්‍රමාණයකින් භාගයක් වුණා. ඒ කියන්නේ අක්කර භාගයක් විතර.
^ මූ.අ., “එදා.”
^ මූ.අ., “එයාගේ ඇස් දීප්තිමත් වුණා.”
