පළවෙනි සාමුවෙල් 17:1-58
17 පිලිස්තිවරු+ එයාලාගේ හමුදාව රැස් කරගෙන යුද්ධ කරන්න ලෑස්ති වුණා. එයාලා යූදා දේශයට අයිති සෝකෝ+ කියන ප්‍රදේශයේ රැස් වෙලා, සෝකෝ සහ අෂේකා+ අතරේ තිබුණ ඒපෙස්දම්මිම්වල+ කඳවුරු බැඳගත්තා.
2 සාවුල් සහ ඊශ්‍රායෙල් හමුදාව ඒලාහ් නිම්නයේ*+ කඳවුරු බැඳගෙන පිලිස්තිවරුන්ට විරුද්ධව සටන් කරන්න පෙළ ගැහුණා.
3 පිලිස්තිවරු එක කන්දක රැස් වෙලා හිටියා. ඊශ්‍රායෙල්වරු තවත් කන්දක රැස් වෙලා හිටියා. ඒ කඳු දෙක අතරේ නිම්නයක් තිබුණා.
4 පිලිස්තිවරුන්ගේ කඳවුරේ ඉඳන් ගොලියත්+ කියලා කෙනෙක් ඉස්සරහට ආවා. එයා ගාත්වලින්+ ආපු කෙනෙක්. එයා ආවේ පිලිස්තිවරුන් වෙනුවෙන් තනියෙන් සටන් කරන්නයි. ගොලියත් අඩි නවයහමාරක්* විතර උස කෙනෙක්.
5 එයා තඹ තොප්පියක් දාගෙන හිටියා. එයාගේ යුද ඇඳුම පුරාම එකකට එකක් සම්බන්ධ කරපු තඹ කැබලි අල්ලලා තිබුණා.+ ඒ ඇඳුම තඹ ෂෙකෙල් 5,000ක්* බරයි.
6 එයාගේ කකුල් සහ දණහිස් ආරක්ෂා කරන්න තඹවලින් හදපු උස ආවරණ දෙකක් එයා දාගෙන හිටියා. එයා තඹ හෙල්ලයකුත්+ පිටේ එල්ලන් ගියා.
7 එයාගේ දිග හෙල්ලයේ මිට හරියට රෙදි වියන්න පාවිච්චි කරන පොල්ලක් වගෙයි.+ ඒකේ තලය යකඩ ෂෙකෙල් 600ක්* බරයි. එයාගේ පලිහ අරන් ගිය කෙනා එයාට ඉස්සරහින් ගියා.
8 ගොලියත් ඊශ්‍රායෙල් හමුදාව ඉස්සරහට ඇවිත් කෑගහලා+ මෙහෙම කිව්වා. “උඹලා මොකටද සටන් බිමට ආවේ? පිලිස්තිවරුන්ගේ හොඳම සටන්කරුවා මම කියලා උඹලා දන්නේ නැද්ද? උඹලා නිකම්ම සාවුල්ගේ සේවකයෝ විතරයි. දැන් මාත් එක්ක සටන් කරන්න පුළුවන් කෙනෙක්ව එවපන්.
9 ඒ මිනිහා මාව මරලා දැම්මොත් පිලිස්තිවරු උඹලාගේ දාසයෝ වෙනවා. ඒත් මම ඒ මිනිහාව මරලා දැම්මොත් උඹලා අපේ දාසයෝ වෙන්න ඕනේ.”
10 පිලිස්තියා මෙහෙමත් කිව්වා. “මම ඊශ්‍රායෙල් හමුදාවට අභියෝග කරනවා.+ මාත් එක්ක සටන් කරන්න පුළුවන් කෙනෙක් ඉන්නවා නම් දැන්ම ඉස්සරහට වරෙන්!”
11 පිලිස්තියා කියපු දේ ඇහුවාම සාවුල් රජයි, ඊශ්‍රායෙල් සෙනඟයි හොඳටම බය වුණා.
12 යෙස්සේ+ ජීවත් වුණේ යූදා දේශයේ බෙත්ලෙහෙම්+ නගරයේ, ඒ කියන්නේ එෆ්‍රාතාවල.+ එයාට පුතාලා අටදෙනෙක් හිටියා.+ දාවිත් එයාගේ එක පුතෙක්. සාවුල් රජකම් කරපු කාලයේදී යෙස්සේ හුඟක් වයසට ගිහිල්ලයි හිටියේ.
13 යෙස්සේගේ වැඩිමල් පුතාලා තුන්දෙනා සාවුල් එක්ක යුද්දෙට ගියා.+ එයාගේ වැඩිමල් පුතා එලියාබ්.+ දෙවෙනියා අබිනාදාබ්.+ තුන්වෙනියා ෂම්මාහ්.+
14 දාවිත් එයාගේ බාල පුතා.+ සාවුල්ගේ හමුදාවට බැඳුණේ යෙස්සේගේ වැඩිමල් පුතාලා තුන්දෙනායි.
15 දාවිත් සාවුල්ට සේවය කරන අතරේ විටින් විට එයාගේ තාත්තාගේ බැටළුවන්ව බලාගන්න+ බෙත්ලෙහෙමටත් ගියා.
16 ඔය අතරේ පිලිස්තියා හැමදාම උදේ හවා ඊශ්‍රායෙල් හමුදාව ඉස්සරහට ආවා. එයා දවස් 40ක්ම ඒ විදිහට කළා.
17 යෙස්සේ එයාගේ පුතා දාවිත්ට මෙහෙම කිව්වා. “පුතා, ඉක්මනට කඳවුරට ගිහින් මේ බැදපු ධාන්‍ය ඒපාවයි,* රොටි දහයයි ඔයාගේ අයියලට දෙන්න.
18 මේ මුදවපු කිරි* පංගු දහය සෙබළුන්* භාරව ඉන්න ප්‍රධානියාට දීලා ඔයාගේ අයියලාගේ සැප දුක් බලාගෙන එන්න. එයාලා හොඳින් ඉන්නවා කියලා මට දැනගන්න පුළුවන් වෙන්න එයාලාගෙන් මොනවා හරි දෙයක් ඉල්ලගෙනත් එන්න.”
19 සාවුල් රජයි, දාවිත්ගේ අයියලා තුන්දෙනායි, ඊශ්‍රායෙල් හමුදාවේ අනිත් පුරුෂයෝයි පිලිස්තිවරුන්ට විරුද්ධව සටන් කරන්න+ ඒලාහ් කියන නිම්නයේ*+ රැස් වෙලයි හිටියේ.
20 දාවිත් උදෙන්ම නැඟිටලා බැටළුවෝ ටික වෙන කෙනෙක්ට භාර දීලා එයාගේ තාත්තා දුන්න කෑම ටිකත් අරගෙන කඳවුරට ගියා. කඳවුර ළඟට ආවාම එයා දැක්කා හමුදාව කෑගගහා යුද පිටිය පැත්තට යනවා.
21 ඊශ්‍රායෙල් හමුදාව සහ පිලිස්තිවරුන්ගේ හමුදාව ඉස්සරහට ඇවිත් එකිනෙකාට මුහුණ ලා හිටගත්තා.
22 දාවිත් එයා ගෙනාපු බඩු මල්ල, බඩු භාරව හිටපු කෙනාට දීලා යුද පිටිය පැත්තට දුවගෙන ගියා. එයා එතනට ගිහින් එයාගේ අයියලාගෙන් සැප දුක ඇහුවා.+
23 දාවිත් එයාලා එක්ක කතා කරකර ඉද්දී ගාත් ඉඳන් ආපු ගොලියත්+ කියන පිලිස්තියා ඉස්සරහට ආවා. එයා ඇවිත් කලින් වතාවලදී වගේ ඊශ්‍රායෙල්වරුන්ට අභියෝග කරන්න පටන්ගත්තා.+ එයා කියපු දේවල් දාවිත්ටත් ඇහුණා.
24 ගොලියත්ව දැක්කාම ඊශ්‍රායෙල් හමුදාව ගොඩක් බය වෙලා එතනින් පැනලා දිව්වා.+
25 එයාලා මෙහෙම කතා වුණා. “දැක්කාද ඒ මිනිහාව? එයා හැමදාම මෙතනට ඇවිත් ඊශ්‍රායෙල්වරුන්ට අපහාස* කරනවා.+ කවුරු හරි කෙනෙක් එයා එක්ක සටන් කරලා එයාව මරලා දැම්මොත් ඒ කෙනාට ලොකු වස්තුවක් දෙන්න රජ පොරොන්දු වෙලා තියෙනවා. එයාට රජගේ දුවව විවාහ කරලා දෙනවා+ කියලත් කියනවා. එයාගේ පවුලේ අයව බදු බරෙනුත් අනිවාර්ය සේවාවන්වලිනුත් නිදහස් කරනවලු.”
26 දාවිත් එයා ළඟ හිටිය අයගෙන් මෙහෙම ඇහුවා. “ජීවමාන දෙවියන්ගේ සේනාවට අපහාස කරන්න අර පිලිස්තියාට තියෙන අයිතිය මොකක්ද? මේ අචර්මච්ඡේදිතයාව* මරලා ඊශ්‍රායෙල්වරුන්ට වෙලා තියෙන නින්දාව අයින් කරන කෙනාට මොනවාද හම්බ වෙන්නේ?”+
27 එතකොට එතන හිටපු අය “ගොලියත්ව මරන කෙනාට ලැබෙන්නේ මේවායි” කියලා කලින් කතා වුණ දේවල්ම දාවිත්ට කිව්වා.
28 දාවිත් එතන හිටපු අය එක්ක කතා කරපු දේවල් එයාගේ ලොකු අයියා වුණ එලියාබ්ට+ ඇහුණාම එයාට හුඟක් කේන්ති ගිහින් දාවිත්ට මෙහෙම කිව්වා. “ඔයා මොකටද මෙහෙට ආවේ? පාළුකරයේ ඉන්න අපේ බැටළුවෝ ටික කාට භාර දීලාද ඔයා ආවේ?+ ඔයා හැම තිස්සේම ඔයාට අයිති නැති දේවල්වලට අත දානවා. මං දන්නවා ඔයා මෙහෙට ආවේ හොඳ චේතනාවකින් නෙමෙයි කියලා. අපි සටන් කරනවා බලන්න නේද ඔයා ආවේ?”
29 එතකොට දාවිත් “මොකක්ද මං කරපු වරද? මං ප්‍රශ්නයක් ඇහුවා විතරයිනේ” කියලා කිව්වා.
30 ඊටපස්සේ දාවිත් වෙන කෙනෙක් ළඟට ගිහින් කලින් අහපු ප්‍රශ්නයම එයාගෙනුත් ඇහුවා.+ කලින් වතාවේ එයාට කියපු දේම එතන හිටපු අයත් එයාට කිව්වා.+
31 දාවිත් කිව්ව දේවල් සාවුල්ට ආරංචි වෙලා එයා දාවිත්ට එයා ළඟට එන්න කිව්වා.
32 දාවිත් සාවුල්ට කිව්වා “මගේ ස්වාමීනි, කවුරුත් කිසි දේකට බය වෙන්න ඕනෙ නැහැ. මං ගිහින් අර පිලිස්තියා එක්ක සටන් කරන්නම්”+ කියලා.
33 ඒත් සාවුල් මෙහෙම කිව්වා. “ඔයා කොහොමද ඒ පිලිස්තියා එක්ක සටන් කරන්නේ? ඔයා පොඩි කොල්ලෙක්නේ!+ එයා තරුණ කාලේ ඉඳන්ම සටන් කරන කෙනෙක්. ඉතින් ඔයා කොහොමද එයා එක්ක සටන් කරන්නේ.”
34 එතකොට දාවිත් සාවුල්ට මෙහෙම කිව්වා. “මගේ ස්වාමීනි, දවසක් මං මගේ තාත්තාගේ බැටළුවන්ව බලාගෙන ඉන්නකොට සිංහයෙක්+ ඇවිත් බැටළුවෙක්ව ඩැහැගෙන ගියා. තවත් දවසක වලහෙක් ඇවිත් බැටළුවෙක්ව අරන් ගියා.
35 මං උන් පස්සේ එළවගෙන ගිහින් උන්ට පහර දීලා උන්ගේ කටින් බැටළුවන්ව බේරගත්තා. උන් මට පහර දෙන්න හදද්දී මං උන්ගේ බෙල්ලෙන් අල්ලලා උන්ව පොළොවේ ගහලා මරලා දැම්මා.
36 සිංහයාවයි, වලහාවයි මරලා දැම්මා වගේ මං මේ අචර්මච්ඡේදිත පිලිස්තියාවත් මරලා දානවා. ජීවමාන දෙවියන්ගේ සේනාවට තවත් නම් අපහාස කරන්න මං එයාට ඉඩ දෙන්නේ නැහැ.”+
37 දාවිත් මෙහෙමත් කිව්වා. “සිංහයාගෙනුත් වලහාගෙනුත් මාව බේරගත්ත යෙහෝවා මේ පිලිස්තියාගෙනුත් මාව බේරගනියි.”+ එතකොට සාවුල් “එහෙනම් ඔයා දැන් යන්න. යෙහෝවා ඔයාට උදව් කරයි” කියලා කිව්වා.
38 ඊටපස්සේ සාවුල් එයාගේ ඇඳුම් දාවිත්ට අඳින්න දීලා එයාට දාන්න තඹ තොප්පියකුත් දුන්නා. සාවුල් දාවිත්ට යුද ඇඳුමකුත් ඇන්දුවා.
39 දාවිත් කඩුව ඉණේ බැඳගෙන ඇවිදින්න හැදුවා. ඒත් ඒ ඇඳුම එයා මීට කලින් ඇඳලා තිබුණේ නැති නිසා එයාට ඇවිදින්න අමාරු වුණා. ඒ නිසා එයා සාවුල්ට “මේවා ඇඳලා පුරුදු නැති නිසා මට ඇවිදගන්නවත් බැහැ” කියලා ඒවා ගලවලා දැම්මා.
40 ඊටපස්සේ දාවිත් නිම්නයෙන් රවුම් ගල් පහක් අහුලගෙන ඒවා එයාගේ මල්ලේ දාගත්තා. එයා එක අතකට සැරයටියත් අනිත් අතට ගල්පටියත්+ අරන් පිලිස්තියා හිටපු තැනට ගියා.
41 පිලිස්තියා දාවිත් ළඟට ඇවිදගෙන ආවා. එයාගේ පලිහ අරන් ගිය කෙනා එයාගේ ඉස්සරහින් ආවා.
42 දාවිත් රතට හුරු හමක් තිබුණ කඩවසම් තරුණයෙක් කියලා දැක්කාම පිලිස්තියා දාවිත්ට සමච්චල් කරන්න පටන්ගත්තා.+
43 පිලිස්තියා දාවිත්ට මෙහෙම කිව්වා. “උඹ පොල්ලක් අරන් මගේ ඉස්සරහට එන්නේ මං බල්ලෙක් කියලා හිතාගෙනද?”+ එහෙම කියලා පිලිස්තියා එයාගේ දෙවිවරුන්ගේ නම්වලින් දාවිත්ට ශාප කළා.
44 පිලිස්තියා දාවිත්ට මෙහෙමත් කිව්වා. “වරෙං මං ළඟට. මං උඹේ මස් කුරුල්ලන්ටත් වනසත්තුන්ටත් කන්න දෙනවා.”
45 එතකොට දාවිත් පිලිස්තියාට මෙහෙම කිව්වා. “ඔයා මං ළඟට එන්නේ කඩුවකුයි, දිග හෙල්ලයකුයි, පොඩි හෙල්ලයකුයි+ අරන්. ඒත් මං ඔයා ළඟට එන්නේ ඔයා නින්දා* කරපු+ ස්වර්ගයේ සේනාවල අධිපති වන යෙහෝවාගේ නමින්.+ ඊශ්‍රායෙල්වරුන්ගේ සේනාවේ දෙවියන් ඔහුයි.
46 අද යෙහෝවා අනිවාර්යයෙන්ම ඔයාව මගේ අතට අහු කරලා දෙනවා.+ මං ඔයාව මරලා ඔයාගේ බෙල්ල කපලා දානවා. මං අද පිලිස්තිවරුන්ගේ මළ මිනී කුරුල්ලන්ටත් වනසත්තුන්ටත් කන්න දෙනවා. එතකොට පොළොවේ ඉන්න හැමෝම දැනගනියි ඊශ්‍රායෙල්වරුන්ට දෙවි කෙනෙක් ඉන්නවා කියලා.+
47 යෙහෝවා දෙවියන් ගැලවීම දෙන්නේ කඩුවෙන්වත් හෙල්ලයෙන්වත් නෙමෙයි කියලා මෙතන ඉන්න හැමෝම අනිවාර්යයෙන්ම දැනගනියි.+ මේ යුද්දේ යෙහෝවාගේ.+ ඔහු අද ඔයාලා හැමෝවම අපේ අතට අහු කරලා දෙනවා.”+
48 පිලිස්තියා ටිකෙන් ටික දාවිත් ළඟට ආවා. ඒත් දාවිත් පිලිස්තියා ළඟට හයියෙන් දුවගෙන ගියා.
49 එහෙම යන ගමන් දාවිත් එයාගේ මල්ලේ තිබුණ ගලක් අරන් ඒක ගල්පටියේ තියලා කීප සැරයක්ම ඒක කරකවලා පිලිස්තියා දිහාවට එල්ල කළා. ගල පිලිස්තියාගේ නළලේ තදින් වැදුණා. ඒත් එක්කම එයා මුණින් අතට වැටුණා.+
50 දාවිත් ගල්පටියක් සහ ගලක් පාවිච්චි කරලා පිලිස්තියාව පැරැද්දුවා. ඒ විදිහට දාවිත් අතේ කඩුවක්වත් නැතුව පිලිස්තියාව මරලා දැම්මා.+
51 ඊටපස්සේ දාවිත් දුවලා ගිහින් පිලිස්තියාගේ ඇඟ උඩට නැඟලා පිලිස්තියාගෙම කඩුවෙන්+ එයාගේ ඔළුව කඳෙන් වෙන් වෙන්නම කපලා දැම්මා. පිලිස්තිවරු එයාලාගේ වීරයා මැරුණා කියලා දැක්කාම එතනින් පැනලා දිව්වා.+
52 ඒක දැක්කාම ඊශ්‍රායෙල් සහ යූදා ගෝත්‍රවල පුරුෂයෝ කෑගගහා පිලිස්තිවරු පස්සේ පන්නගෙන ගියා. එයාලා නිම්නයේ+ ඉඳන් එක්‍රොන්වල+ දොරටුව වෙන කල් පිලිස්තිවරු පස්සේ පැන්නුවා. ෂායරයිම්+ ඉඳන් ගාත් සහ එක්‍රොන් වෙන කල් පිලිස්තිවරුන්ගේ මළ මිනී පාර දිගේ වැටිලා තිබුණා.
53 ඊශ්‍රායෙල් සෙනඟ පිලිස්තිවරුන් පස්සේ පන්නගෙන ගිහින් එයාලව පැරැද්දුවාට පස්සේ පිලිස්තිවරුන්ගේ කඳවුරට ඇවිත් එයාලාගේ බඩු පැහැරගත්තා.
54 ඊටපස්සේ දාවිත් පිලිස්තියාගේ ඔළුව යෙරුසලමට අරන් ආවා. ඒත් පිලිස්තියාගේ ආයුධ දාවිත් එයාගේ කූඩාරමට අරන් ගියා.+
55 දාවිත්, පිලිස්තියා ළඟට යද්දී සාවුල් එයාගේ හමුදාපති වන අබ්නේර්ගෙන්+ මෙහෙම ඇහුවා. “අබ්නේර්, අර තරුණයා කාගේ පුතාද?”+ එතකොට අබ්නේර් “රජතුමනි, මං මේ දිවුරලා කියන්නේ ඒ තරුණයා කවුද කියලා මං දන්නේ නැහැ” කියලා කිව්වා.
56 එතකොට රජ මෙහෙම කිව්වා. “ඒ තරුණයා කාගේ පුතාද කියලා හොයලා බලන්න.”
57 දාවිත් පිලිස්තියාව මරලා ආපු ගමන්ම අබ්නේර් එයාව සාවුල් රජ ඉස්සරහට එක්කගෙන ගියා. දාවිත් එතනට ගියේ පිලිස්තියාගේ ඔළුවත් අරගෙනයි.+
58 සාවුල් දාවිත්ගෙන් ඇහුවා “පුතේ, ඔයාගේ තාත්තා කවුද” කියලා. එතකොට දාවිත් කිව්වා “මම බෙත්ලෙහෙමේ+ ජීවත් වෙන ඔබේ සේවකයා වන යෙස්සේගේ පුතා”+ කියලා.
පාදසටහන්
^ හෝ, “තැනිතලාවේ.”
^ හෝ, “චීස්.”
^ ඒ කියන්නේ සෙබළුන් දාහක්.
^ හෝ, “තැනිතලාවේ.”
^ හෝ, “අභියෝග.”
^ “පැහැදිලි කිරීමක්” බලන්න.
^ හෝ, “අභියෝග.”
