පළවෙනි සාමුවෙල් 4:1-22
4 සාමුවෙල් දිගටම ඊශ්රායෙල් සෙනඟට දෙවියන්ගේ පණිවිඩය දැනුම් දුන්නා.
ඒ කාලයේදී ඊශ්රායෙල්වරු පිලිස්තිවරුන්ට විරුද්ධව සටන් කරන්න ගියා. එයාලා කඳවුරු බැඳගත්තේ එබෙන්එසෙර් කියන තැනට කිට්ටුවෙන්. පිලිස්තිවරු කඳවුරු බැඳගෙන හිටියේ අපෙක් කියන තැන.
2 පිලිස්තිවරු පෙළ ගැහිලා ඊශ්රායෙල්වරු එක්ක සටනට ගියා. සටන එන්න එන්නම දරුණු වුණා. අන්තිමේදී ඊශ්රායෙල්වරු පිලිස්තිවරුන් අතින් පරාජයට පත් වුණා. පිලිස්තිවරු යුද පිටියේ සටන් කරකර හිටපු ඊශ්රායෙල්වරු 4,000ක් විතර මරලා දැම්මා.
3 පරාජයට පත් වුණ ඊශ්රායෙල්වරු ආයෙත් එයාලාගේ කඳවුරට ගියාම ඊශ්රායෙල් වැඩිමහල්ලෝ මෙහෙම කතා වුණා. “යෙහෝවා පිලිස්තිවරුන්ට අපිව පරද්දන්න ඉඩ දුන්නේ ඇයි?*+ අපි ෂීලෝවල තියෙන යෙහෝවා දෙවියන්ට අයිති ගිවිසුම් පෙට්ටිය අරගෙන එමු.+ ඒක අපි ළඟ තියාගත්තොත් සතුරන්ගෙන් අපිට ආරක්ෂාවක් ලැබෙයි.”
4 ඉතින් එයාලා ෂීලෝවලට මිනිස්සුන්ව යවලා කෙරුබ්වරුන්ට+ ඉහළින්* ඉඳගෙන ඉන්න, ස්වර්ගයේ සේනාවල අධිපති වන යෙහෝවාට අයිති ගිවිසුම් පෙට්ටිය එහෙට ගෙන්නගත්තා. සැබෑ දෙවියන්ට අයිති ගිවිසුම් පෙට්ටිය තිබුණ තැන හොප්නී සහ පිනෙහාස්+ කියන ඒලීගේ පුතාලා දෙන්නාත් හිටියා.
5 යෙහෝවා දෙවියන්ට අයිති ගිවිසුම් පෙට්ටිය කඳවුරට අරන් ආපු ගමන්ම ඊශ්රායෙල්වරු මහ හයියෙන් කෑගහන්න පටන්ගත්තා. එයාලාගේ සද්දේ ප්රදේශය පුරාම දෝංකාර දුන්නා.
6 ඒ සද්දේ අහපු ගමන්ම පිලිස්තිවරු මෙහෙම කතා වුණා. “හෙබ්රෙව්වරුන්ගේ කඳවුරේ ඉන්න අය එච්චර හයියෙන් කෑගහන්නේ ඇයි?” පස්සේ එයාලට ආරංචි වුණා යෙහෝවා දෙවියන්ට අයිති ගිවිසුම් පෙට්ටිය ඊශ්රායෙල්වරුන්ගේ කඳවුරට අරන් ඇවිත් කියලා.
7 ඒක දැනගත්තාම පිලිස්තිවරු හොඳටම බය වෙලා මෙහෙම කතා වුණා. “දෙවියන් කඳවුර ඇතුළට ඇවිත්!+ මේ වගේ දෙයක් මීට කලින් කවදාවත් වෙලා නැහැ! දැන් නම් අපිට බේරෙන්න බැහැ!
8 මෙච්චර බලවත් දෙවි කෙනෙක්ගේ අතින් අපිව බේරගන්න පුළුවන් කාටද? ඊජිප්තුවරුන්ට විරුද්ධව පීඩා ගෙනල්ලා පාළුකරයේදී එයාලව විනාශ කළේ මේ දෙවියන් නේද?+ අපිට දැන් කොහොමටවත් බේරෙන්න බැහැ!
9 පිලිස්තිවරුනි, බය නැතුව හිතට ධෛර්යය අරන් සටන් කරන්න. එහෙම කළේ නැත්තම් අපි හෙබ්රෙව්වරුන්ව යටත් කරගෙන හිටියා වගේ එයාලා අපිව යටත් කරගනියි.+ ඒ නිසා පුරුෂයන් වගේ සටන් කරමු!”
10 ඊටපස්සේ පිලිස්තිවරු සටනට ගිහින් ඊශ්රායෙල්වරුන්ව අන්ත පරාජයකට පත් කළා.+ ඊශ්රායෙල් සෙබළු තම තමන්ගේ කූඩාරම්වලට පලා ගියා. එදා හුඟදෙනෙක් පිලිස්තිවරුන්ගේ අතින් මැරුම් කෑවා. ඊශ්රායෙල්වරුන්ගේ පාබළ හමුදාවෙන් 30,000ක් මැරුණා.
11 ඒ විතරක් නෙමෙයි පිලිස්තිවරු දෙවියන්ට අයිති ගිවිසුම් පෙට්ටියත් පැහැරගත්තා. එදා ඒලීගේ පුතාලා වන හොප්නී සහ පිනෙහාසුත් මිය ගියා.+
12 එදා බෙන්ජමින් ගෝත්රයට අයිති කෙනෙක් එයාගේ ඇඳුම් ඉරාගෙන ඔළුවට දූවිලි දාගෙන යුද පිටියේ ඉඳන් ෂීලෝවලට දුවගෙන ආවා.+
13 එයා එද්දී ඒලී පාර ළඟ බංකුවක ඉඳගෙන මඟ බලාගෙනයි හිටියේ. මොකද සැබෑ දෙවියන්ට අයිති ගිවිසුම් පෙට්ටියට මොනා වෙයිද කියන එක ගැන එයා හිටියේ හුඟක් බයෙන්.+ නුවරට දුවගෙන ආපු කෙනා වෙච්ච දේවල් ගැන කිව්වාම නුවරේ හිටපු හැමෝම හයියෙන් අඬන්න පටන්ගත්තා.
14 මිනිස්සු අඬන සද්දේ ඇහුණාම ඒලී ඇහුවා “මිනිස්සු මෙච්චර හයියෙන් කෑගහන්නේ ඇයි” කියලා. එතකොට ඒ කෙනා වෙච්ච හැම දෙයක් ගැනම කියන්න ඒලී ළඟට ගියා.
15 (ඒ වෙනකොට ඒලීගේ වයස අවුරුදු 98යි. පේන්නේ නැති තරමටම එයාගේ ඇස් දුර්වල වෙලා තිබුණා.)+
16 ඒ කෙනා ඒලීට මෙහෙම කිව්වා. “යුද පිටියේ ඉඳන් ආපු කෙනා මමයි. මං අද එහෙන් බේරිලා මෙහෙට දුවගෙන ආවා.” ඒලී මෙහෙම ඇහුවා. “ඇයි පුතේ, එහේ මොනවාද වුණේ?”
17 එතකොට පණිවිඩේ අරන් ආපු කෙනා මෙහෙම කිව්වා. “පිලිස්තිවරු ඊශ්රායෙල්වරුන්ව පරද්දලා හුඟදෙනෙක්ව මරලා දැම්මා.+ ඒ නිසා එයාලා පිලිස්තිවරුන්ගෙන් බේරෙන්න පලා ගියා. ඔයාගේ පුත්තු දෙන්නා වුණ හොප්නී සහ පිනෙහාසුත් මැරුණා.+ පිලිස්තිවරු සැබෑ දෙවියන්ට අයිති ගිවිසුම් පෙට්ටියත් පැහැරගත්තා.”+
18 පණිවිඩකරු සැබෑ දෙවියන්ට අයිති ගිවිසුම් පෙට්ටිය ගැන කිව්ව ගමන්ම දොරටුව ළඟ බංකුවක් උඩ ඉඳගෙන හිටපු ඒලී පිටිපස්සට වැටුණා. එයා හුඟක් වයසට ගිය තරබාරු කෙනෙක් නිසා එයාගේ බෙල්ල කැඩිලා එයා මැරුණා. ඒ වෙද්දී ඒලී අවුරුදු 40ක් පුරා විනිශ්චයකරුවෙක් විදිහට ඊශ්රායෙල්වරුන්ට සේවය කරලා තිබුණා.
19 එයාගේ ලේළිට, ඒ කියන්නේ පිනෙහාස්ගේ බිරිඳට දරුවෙක් ලැබෙන්නයි හිටියේ. ඒ වෙද්දී දරුවාව බිහි කරන කාලය ළං වෙලා තිබුණා. සැබෑ දෙවියන්ට අයිති ගිවිසුම් පෙට්ටිය පැහැරගෙන ගිහින් කියලත් එයාගේ මාමණ්ඩියි, සැමියායි දෙන්නාම මිය ගියා කියලත් ආරංචි වුණාම එයාට ප්රසව වේදනාව ඇති වෙලා ඒ වෙලාවෙම එයා දරුවාව බිහි කළා.
20 පස්සේ එයාත් මිය ගියා. ඒත් එයා මිය යන වෙලාවේ එයා ළඟ හිටපු කාන්තාවන් එයාට මෙහෙම කිව්වා. “බය වෙන්න එපා. ඔයාට පුතෙක් ලැබුණා.” ඒත් එයා ඒ වෙලාවේ කිසිම දෙයක් කිව්වේ නැහැ. එයාලා කියපු කිසිම දේකට අවධානය දුන්නෙවත් නැහැ.*
21 ඒ වුණත් එයා පුතාට ඊකාබොද්*+ කියන නම තියලා මෙහෙම කිව්වා. “ඊශ්රායෙල් දේශයේ තේජස නැති වෙලා ගිහින්.”+ එයා එහෙම කිව්වේ සැබෑ දෙවියන්ට අයිති ගිවිසුම් පෙට්ටිය සතුරන් පැහැරගෙන ගිය නිසා වගේම එයාගේ මාමණ්ඩිත් සැමියාත් මිය ගිය නිසයි.+
22 එයා ආයෙත් මෙහෙම කිව්වා. “සැබෑ දෙවියන්ට අයිති ගිවිසුම් පෙට්ටිය සතුරන් අරන් ගිය නිසා ඊශ්රායෙල් දේශයේ තේජස දැන් නැති වෙලා ගිහින්.”+
පාදසටහන්
^ මූ.අ., “යෙහෝවා අපිව පැරැද්දුවේ ඇයි?”
^ හෝ සමහරවිට, “කෙරුබ්වරුන් අතරේ.”
^ හෝ, “කිසිම දෙයක් එයාගේ ඔළුවට ගියෙත් නැහැ.”
^ තේරුම, “තේජස කොතනද?”