දෙවෙනි රාජාවලිය 20:1-21
20 ඒ කාලේදී හෙසකියා අසනීප වෙලා මරණාසන්න වුණා.+ ආමොෂ්ගේ පුතා වුණ අනාගතවක්තෘ යෙසායා එයාව හම්බ වෙන්න ඇවිල්ලා මෙහෙම කිව්වා. “යෙහෝවා දෙවියන් කියන්නේ මේකයි. ‘ඔයාට හොඳ වෙන්නේ නැහැ. ඔයා මැරෙනවා. ඒ නිසා ඔයාගේ මරණෙන් පස්සේ දේවල් කෙරෙන්න ඕනෙ විදිහ පවුලේ අයට* කියන්න.’”+
2 එතකොට හෙසකියා බිත්තිය පැත්තට හැරිලා යෙහෝවාට මෙහෙම යාච්ඤා කළා.
3 “අනේ යෙහෝවා, මම විශ්වාසවන්තව ඔයාගේ මඟ පෙන්වීම් පිළිපැද්ද විදිහ සිහි කරන්න. මුළු හදවතින්ම ඔයාට ළැදි වෙලා ඔයා හරියි කියලා සලකන දේවල් කරපු විදිහ සිහි කරන්න කියලා බැගෑපත්ව ඉල්ලනවා.”+ එහෙම කියලා හෙසකියා හොඳටම අඬන්න පටන්ගත්තා.
4 යෙසායා මාලිගාවේ මැද මළුවට යන්නත් කලින් යෙහෝවා එයාට මේ දේ දැන්නුවා.+
5 “ආයෙත් ගිහින් මගේ සෙනඟගේ නායකයා වන හෙසකියාට මෙහෙම කියන්න. ‘ඔයාගේ මුතුන්මිත්තා වන දාවිත්ගේ දෙවි යෙහෝවා ඔයාට මේ දේ කියනවා. “ඔයාගේ යාච්ඤාව මට ඇහුණා. ඔයාගේ කඳුළු මම දැක්කා.+ දැන් මං ඔයාව සුව කරනවා.+ අනිද්දා වෙද්දී* ඔයාට යෙහෝවා දෙවියන්ගේ ගෘහයට යන්න පුළුවන් වෙනවා.+
6 මම ඔයාගේ ජීවිතේට තව අවුරුදු 15ක් එකතු කරනවා. මම ඔයාවයි, මේ නගරෙයි ඇසිරියාවේ+ රජගේ අතින් බේරගන්නවා. මගේ නම නිසාත් මගේ සේවකයා වුණ දාවිත් වෙනුවෙනුත් මම මේ නගරේ ආරක්ෂා කරනවා.”’”+
7 ඊටපස්සේ යෙසායා, රජගේ සේවකයන්ට මෙහෙම කිව්වා. “වේළගත්ත අත්තික්කා කුට්ටියක් අරන් එන්න.” ඉතින් එයාලා ඒක ගෙනල්ලා හෙසකියාගේ තුවාලෙට තිබ්බා. ඊටපස්සේ හෙසකියා ටිකෙන් ටික සුව වෙන්න පටන්ගත්තා.+
8 හෙසකියා රජ යෙසායාගෙන් මෙහෙම අහලා තිබුණා. “යෙහෝවා මාව හොඳ කරයි කියලත් අනිද්දා වෙද්දී මට යෙහෝවා දෙවියන්ගේ ගෘහයට යන්න පුළුවන් වෙයි කියලත් දැනගන්න මට මොකක් හරි ලකුණක් දෙන්න පුළුවන්ද?”+
9 එතකොට යෙසායා මෙහෙම කිව්වා. “යෙහෝවා කියපු දේ අනිවාර්යයෙන්ම කරනවා කියලා ඔයාට සහතික කරන්න යෙහෝවා දෙන ලකුණ මේකයි. ඔයාට ඕනෙ පඩි පෙළට වැටෙන හෙවණැල්ල* පඩි දහයක් ඉස්සරහට යනවා දකින්නද නැත්තං පඩි දහයක් ආපස්සට යනවා දකින්නද?”+
10 එතකොට හෙසකියා මෙහෙම කිව්වා. “හෙවණැල්ල පඩි දහයක් ඉස්සරහට යන එක සාමාන්‍යයෙන් වෙන දෙයක්. ඒත් හෙවණැල්ල පඩි දහයක් ආපස්සට යන එක නම් වෙන්න බැරි දෙයක්.”
11 ඊටපස්සේ අනාගතවක්තෘ යෙසායා යෙහෝවාට යාච්ඤා කළා. එතකොට දෙවියන් ආහස්ගේ පඩි පෙළට වැටිලා තිබුණ හෙවණැල්ල පඩි දහයක් ආපස්සට යන්න සැලැස්සුවා.+
12 ඔය කාලේදී බලදාන්ගේ පුතා වුණ බැබිලෝනියේ රජ බෙරොදක්බලදාන්ට ආරංචි වුණා හෙසකියා අසනීපෙන් හිටියා කියලා.+ ඉතින් එයා හෙසකියාට ලිපි ලියලා ඒ එක්ක තෑග්ගකුත් එව්වා.
13 හෙසකියා ඒ පණිවිඩකරුවන්ව පිළි අරන්* එයාගේ මුළු වස්තු ගබඩාවම එයාලට පෙන්නුවා.+ එයාගේ භාණ්ඩාගාරවල තිබුණ රත්තරන්, රිදී, බෝල්සම් තෙල්, වෙනත් වටින තෙල් වර්ග, එයාගේ යුධායුධ සහ භාණ්ඩාගාරවල තිබුණ හැම දෙයක්ම එයාලට පෙන්නුවා. හෙසකියා එයාගේ මාලිගාවෙයි, මුළු රාජධානියෙයි තිබුණ හැම දෙයක්ම එයාලට පෙන්නුවා.
14 ඊටපස්සේ අනාගතවක්තෘ යෙසායා හෙසකියා රජව හම්බ වෙන්න ඇවිල්ලා මෙහෙම ඇහුවා. “මොනවාද අර මිනිස්සු කිව්වේ? කොහෙන්ද එයාලා ආවේ?” එතකොට හෙසකියා මෙහෙම කිව්වා. “එයාලා ආවේ ගොඩක් ඈත තියෙන බැබිලෝනියේ ඉඳලා.”+
15 එතකොට යෙසායා මෙහෙම ඇහුවා. “ඔයාගේ මාලිගාවේ තියෙන මොනවාද ඔයා එයාලට පෙන්නුවේ?” හෙසකියා මෙහෙම කිව්වා. “මගේ මාලිගාවේ තියෙන හැම දෙයක්ම එයාලා දැක්කා. මගේ ගබඩාවල තියෙන හැම දෙයක්ම මං එයාලට පෙන්නුවා.”
16 එතකොට යෙසායා හෙසකියාට මෙහෙම කිව්වා. “යෙහෝවා කියන මේ දේට ඇහුම්කන් දෙන්න.+
17 ‘ඔයාගේ මාලිගාවේ තියෙන හැම දෙයක්මයි, මේ වෙන කල් ඔයාගේ මුතුන්මිත්තන් රැස් කරලා තියෙන හැම දෙයක්මයි බැබිලෝනියට අරගෙන යන දවස් ළඟ ළඟම එනවා.+ කිසිම දෙයක් මෙහේ ඉතුරු වෙන්නේ නැහැ’ කියලා යෙහෝවා කියනවා.
18 ‘ඔයාගෙන් පැවතෙන සමහරදෙනෙක්ව බැබිලෝනියට අරන් යයි.+ එයාලා එහේ රජගේ මාලිගාවේ නිලධාරීන් විදිහට වැඩ කරයි.’”+
19 එතකොට හෙසකියා යෙසායාට මෙහෙම කිව්වා. “ඔයා මාර්ගයෙන් යෙහෝවා කියපු දේ සාධාරණයි.+ මගේ ජීවිත කාලේදී කරදරයක් නැතුව* සමාදානයෙන් ඉන්න පුළුවන් වෙන එක ගැන මං සතුටු වෙනවා.”+
20 හෙසකියාගේ ජීවිතේ අනිත් සිදුවීම් ගැන ඒ කියන්නේ එයාගේ ශ්‍රේෂ්ඨත්වය ගැනත් එයා පොකුණයි,+ දිය අගලයි හදලා නගරයට වතුර ගෙනාපු විදිහ ගැනත්+ යූදාවල රජවරුන්ගේ ඉතිහාසය වාර්තා කරලා තියෙන ලියවිල්ලේ සඳහන් වෙනවා.
21 ඊටපස්සේ හෙසකියා මැරුණා. එයාගේ මුතුන්මිත්තන් වගේ එයාවත් තැන්පත් කළා.+ එයාගෙන් පස්සේ එයාගේ පුතා වුණ මනස්සේ+ රජකමට පත් වුණා.+
පාදසටහන්
^ හෝ, “මාලිගාවේ අයට.”
^ මූ.අ., “තුන්වෙනි දවසේදී.”
^ සමහරවිට මේ පඩි පෙළට වැටෙන හෙවණැල්ල දිහා බලලා වෙලාව කීයද කියලා තීරණය කරන්න ඇති.
^ හෝ, “පණිවිඩකරුවන්ට සවන් දීලා.”
^ හෝ, “සත්‍යයෙන්.”
