දෙවෙනි රාජාවලිය 9:1-37
9 එලිෂා අනාගතවක්තෘවරුන්ගේ පුතාලාගෙන් කෙනෙක්ට එන්න කියලා මෙහෙම කිව්වා. “ඔයාගේ ඇඳුම ඉණ වටේට තදින් ගැටගහගෙන, දැන් ඉක්මනින්ම මේ තෙල් බඳුනත් අරගෙන රාමොත්ගිලියද්වලට යන්න.+
2 එහෙට ගිහිල්ලා යේහුව+ හොයන්න. එයා තමයි නිම්ෂිගේ පුතා වුණ යෙහෝෂපාට්ගේ පුතා. ගිහින් එයාට කතා කරලා අනිත් අය ඉන්න තැනින් එයාව ඇතුළේ තියෙන කාමරේකට එක්කගෙන යන්න.
3 ඊටපස්සේ තෙල් බඳුන අරගෙන එයාගේ ඔළුවට තෙල් වක් කරලා මෙහෙම කියන්න. ‘යෙහෝවා දෙවියන් කියන්නේ මේකයි. “මම ඔයාව ඊශ්‍රායෙල්වල රජ විදිහට අභිෂේක කරනවා.”’+ ඊටපස්සේ දොර ඇරගෙන එතනින් දුවගෙන එන්න.”
4 ඉතින් අනාගතවක්තෘවරයාගේ සේවකයා රාමොත්ගිලියද්වලට යන්න පිටත් වුණා.
5 එයා එහෙට යද්දී හමුදාවේ ප්‍රධානීන් එකට ඉඳගෙනයි හිටියේ. ඉතින් සේවකයා මෙහෙම කිව්වා. “හමුදාපතිතුමනි, ඔබට කියන්න පණිවිඩයක් තියෙනවා.” එතකොට යේහු “ඒ පණිවිඩේ කියන්න තියෙන්නේ අපෙන් කාටද” කියලා ඇහුවා. “හමුදාපතිතුමනි, ඒ පණිවිඩය ඔබටයි” කියලා සේවකයා කිව්වා.
6 ඉතින් යේහු එතනින් නැඟිටලා සේවකයාත් එක්ක ගේ ඇතුළට ගියා. සේවකයා යේහුගේ ඔළුවට තෙල් වක් කරලා මෙහෙම කිව්වා. “ඊශ්‍රායෙල්වරුන්ගේ දෙවි වන යෙහෝවාගේ පණිවිඩය මේකයි. ‘යෙහෝවා වන මගේ සෙනඟ ඒ කියන්නේ ඊශ්‍රායෙල් සෙනඟගේ රජ විදිහට අද මම ඔයාව අභිෂේක කරනවා.+
7 ඔයාගේ ස්වාමියා වන ආහබ්ගේ පවුලේ අයව ඔයා සම්පූර්ණයෙන්ම විනාශ කරලා දාන්න ඕනේ. ඒ විදිහට යෙසබෙල් අතින් මැරුම් කාපු+ මගේ සේවකයන් හැමෝගෙම ලේ වෙනුවෙන් මම යුක්තිය ඉටු කරනවා. එයා මගේ සේවකයන් වන අනාගතවක්තෘවරුන්වයි, යෙහෝවා වන මගේ තවත් සේවකයන්වයි මැරුවා.
8 මම ආහබ්ගේ පවුලේ හැමෝවම විනාශ කරනවා. ආහබ්ගෙන් පැවතෙන ඊශ්‍රායෙල් දේශයේ ඉන්න දුර්වල, අසරණ අය ඇතුළුව හැම පුරුෂයෙක්වම මම නැත්තටම නැති කරලා දානවා.+
9 නෙබාත්ගේ පුතා වුණ යෙරොබොවම්ගේ පවුලේ අයටයි,+ අහියාගේ පුතා වුණ බාෂාගේ පවුලේ අයටයි+ කරපු දේම මම ආහබ්ගේ පවුලේ අයටත් කරනවා.
10 යෙසබෙල්ගේ මළ කඳ යෙෂ්‍රෙයෙල්වල තියෙන ඉඩමේදී බල්ලෝ කාලා දානවා.+ කවුරුත් එයාව තැන්පත් කරන්නේ නැහැ.’” ඒක කියපු ගමන්ම සේවකයා දොර ඇරගෙන එතනින් දුවගෙන ගියා.+
11 යේහු ආයෙත් රජගේ හමුදාවේ ප්‍රධානීන් හිටපු තැනට ගියාම එයාලා එයාගෙන් මෙහෙම ඇහුවා. “මුකුත් ප්‍රශ්නයක් එහෙම නෑ නේද? ඇයි අර පිස්සු මිනිහා ඔයාව හම්බ වෙන්න ආවේ?” එතකොට යේහු “දන්නවානේ ඉතින් ඒ වගේ මිනිස්සු ගැන. පිස්සු කතාමනේ එයාලා කියන්නේ” කියලා කිව්වා.
12 ඒත් එයාලා මෙහෙම කිව්වා. “බොරු කියන්න එපා! එයා කිව්වේ මොනවාද කියලා අපිටත් කියන්නකෝ.” එතකොට යේහු ඒ මනුස්සයා කියපු දේවල් එයාලට කිව්වා. ඒ මනුස්සයා මෙහෙමත් කිව්වා කියලා යේහු කිව්වා. “‘මම ඔයාව ඊශ්‍රායෙල්වල රජ විදිහට අභිෂේක කරනවා’+ කියලා යෙහෝවා කියනවා.”
13 ඒක අහපු ගමන්ම එයාලා එයාලාගේ සළු ගලවලා යේහුට ඇවිදගෙන යන්න ඒවා පඩි පෙළේ එළුවා.+ ඊටපස්සේ එයාලා හොරණෑව පිඹලා “යේහු රජ වෙලා”+ කියලා කියන්න පටන්ගත්තා.
14 ඊටපස්සේ නිම්ෂිගේ පුතා වුණ යෙහෝෂපාට්ගේ පුතා යේහු,+ යෙහෝරම් රජට විරුද්ධව කුමන්ත්‍රණය කළා.
ඒ කාලේදී යෙහෝරම් රජ ඊශ්‍රායෙල් හමුදාවත් එක්ක හිටියේ රාමොත්ගිලියද්වල.+ එයා එහෙට ගියේ සිරියාවේ රජ වුණ හසායෙල්ගෙන්+ ආපු ප්‍රහාරවලින් ඊශ්‍රායෙල් දේශය ආරක්ෂා කරගන්නයි.
15 ඒත් සිරියාවේ රජ වුණ හසායෙල්+ එක්ක කරපු සටනේදී යෙහෝරම්ට තුවාල වුණා. ඉතින් එයා ඒවා සුව කරගන්න ආපහු යෙෂ්‍රෙයෙල්වලට ගියා.+
යේහු එයාත් එක්ක හිටපු අයට මෙහෙම කිව්වා. “ඔයාලා මට සහයෝගය දෙනවා නම් කිසිම කෙනෙක්ට නගරෙන් එළියට ගිහින් යෙෂ්‍රෙයෙල්වලට මේ ගැන දැනුම් දෙන්න ඉඩ තියන්න එපා.”
16 ඊටපස්සේ යේහු අශ්ව රථයකට නැඟලා යෙෂ්‍රෙයෙල්වලට ගියා. මොකද ඒ වෙද්දී තුවාල වෙලා අසනීපෙන් හිටපු යෙහෝරම් රජ හිටියේ යෙෂ්‍රෙයෙල්වල. යූදාවල රජ වුණ අහසියාත් යෙහෝරම්ව බලන්න එහෙට ඇවිත් හිටියා.
17 යෙෂ්‍රෙයෙල්වල තිබුණ මුරකොටුවේ හිටපු මුරකරු යේහුගේ සේනාව එනවා දැකලා “ලොකු සේනාවක් මේ පැත්තට එනවා” කියලා කෑගහලා කිව්වා. එතකොට යෙහෝරම් රජ මෙහෙම කිව්වා. “‘ඔයාලා එන්නේ සටනට නෙමෙයි නේද’ කියලා අහන්න අසරුවෙක්ව එයාලා ළඟට යවන්න.”
18 ඉතින් අසරුවෙක් එයාව හම්බ වෙන්න ගිහින් මෙහෙම කිව්වා. “රජතුමා අහන්න කිව්වා ‘ඔයාලා එන්නේ සටනට නෙමෙයි නේද’ කියලා.” එතකොට යේහු “මං එන්නේ සටන් කරන්නද නැද්ද කියන එක ඔයාට වැඩක් නෑ. දැන් ඔයාත් අපිත් එක්ක එන්න” කියලා එයාට කිව්වා.
ඉතින් මුරකරු මෙහෙම දැනුම් දුන්නා. “අපේ පණිවිඩකරු එයාලා ළඟට ගියා. ඒත් එයා ආයේ එන පාටක් නම් පේන්න නෑ.”
19 ඉතින් රජ දෙවෙනි පාරටත් අසරුවෙක්ව යැව්වා. ඒ අසරුවත් එයාලව හම්බ වෙලා මෙහෙම කිව්වා. “රජතුමා අහන්න කිව්වා ‘ඔයාලා එන්නේ සටනට නෙමෙයි නේද’ කියලා.” එතකොට යේහු “මං එන්නේ සටන් කරන්නද නැද්ද කියන එක ඔයාට වැඩක් නෑ. දැන් ඔයාත් අපිත් එක්ක එන්න” කියලා එයාට කිව්වා.
20 එතකොට මුරකරු මෙහෙම දැනුම් දුන්නා. “ඒ පණිවිඩකරුත් එයාලා ළඟට ගියා. ඒත් එයා ආයේ එන පාටක් නම් පේන්න නෑ. අර අශ්ව රථය පදවගෙන එන විදිහෙන් මට කියන්න පුළුවන් ඔය එන්නේ නිම්ෂිගේ මුනුපුරා* යේහු කියලා. මොකද එයා අශ්ව රථය පදවන්නේ පිස්සෙක් වගේ.”
21 ඒක ඇහුවාම යෙහෝරම් මෙහෙම කිව්වා. “අශ්ව රථය ලෑස්ති කරන්න.” ඉතින් එයාගේ අශ්ව රථය ලෑස්ති කළා. ඊශ්‍රායෙල්වල රජ වුණ යෙහෝරම් එයාගේ අශ්ව රථයෙත් යූදාවල රජ වුණ අහසියා+ එයාගේ අශ්ව රථයෙත් නැඟලා යේහුව හම්බ වෙන්න පිටත් වෙලා ගියා. යෙෂ්‍රෙයෙල්වල කෙනෙක් වුණ නාබොත්ගේ+ ඉඩමේදී එයාලට යේහුව හම්බ වුණා.
22 යෙහෝරම් යේහුව දැක්ක ගමන්ම “යේහු, ඔයා එන්නේ සටනට නෙමෙයි නේද” කියලා ඇහුවා. ඒත් යේහු එයාට මෙහෙම කිව්වා. “ඔයාගේ අම්මා යෙසබෙල් ගණිකාවක් වගේ හැසිරෙද්දී,+ මෙච්චර මන්තර ගුරුකම් වැඩ කරද්දී+ ඔයාලා එක්ක මොන සමාදානයක්ද!”
23 ඒක අහපු ගමන්ම එතනින් පලා යන්න එයාගේ අශ්ව රථය හරවගත්ත යෙහෝරම් රජ අහසියාට මෙහෙම කිව්වා. “අහසියා, අපි කොටු වුණා.”
24 එතකොට යේහු දුන්න අරගෙන යෙහෝරම්ගේ පිටට ඊතලයක් විද්දා. ඒක එයාගේ පපුව පසාරු කරගෙන ගිහින් අනිත් පැත්තෙන් මතු වුණා. යෙහෝරම් එයාගේ අශ්ව රථය ඇතුළෙම මැරිලා වැටුණා.
25 ඊටපස්සේ යේහු එයාත් එක්ක හිටපු හමුදා නිලධාරියා වන බිද්කර්ට මෙහෙම කිව්වා. “මෙයාව උස්සලා යෙෂ්‍රෙයෙල්වල හිටපු නාබොත්ගේ ඉඩමට වීසි කරන්න.+ මතකද, අපි දෙන්නා මෙයාගේ තාත්තා වුණ ආහබ්ගේ අශ්ව රථය පිටිපස්සෙන් අපේ රථ පදවගෙන යද්දී දෙවියන් කිව්ව දේ? එයාට විරුද්ධව යෙහෝවාම මේ විනිශ්චය දුන්නා.+
26 ‘යෙහෝවා දෙවියන් මෙහෙම කියනවා. “ඊයේ මං දැක්කා නාබොත්වයි,+ එයාගේ පුතාලවයි මරපු විදිහ.” ඒ නිසා යෙහෝවා කියනවා “මේ ඉඩමේදීම ඒ වරදට මම අනිවාර්යයෙන්ම ඔයාට දඬුවම් කරනවා”+ කියලා.’ දැන් මෙයාව උස්සලා මේ ඉඩමට වීසි කරන්න. එතකොට යෙහෝවා කියපු දේ ඒ විදිහටම ඉටු වෙයි.”+
27 යූදාවල රජ වුණ අහසියා+ වෙච්ච දේ දැක්කාම උයනේ ගේ කිට්ටුව තිබුණ පාරෙන් පැනලා ගියා. (යේහු එයා පස්සෙන් එළවගෙන ගිහින් “මෙයාවත් මරලා දාන්න” කියලා කිව්වා. ඉතින් එයාලා ගුර්වලට යන පාරේදී අශ්ව රථයේ හිටපු අහසියාට පහර දුන්නා. ගුර් තිබුණේ ඉබ්ලෙයාම්වලට+ කිට්ටුවෙන්. කොහොමහරි අහසියා මෙගිද්දෝ වෙන කල්ම ගියා. ඒත් එහෙදී එයා මැරුණා.
28 ඊටපස්සේ අහසියාගේ සේවකයෝ එයාගේ මළ සිරුර අශ්ව රථයක දාගෙන යෙරුසලමට ගෙනල්ලා එයාගේ සොහොන් ගෙයි තැන්පත් කළා. ඒ විදිහට එයාගේ මුතුන්මිත්තන් වගේ එයාවත් දාවිත්ගේ නුවරේ තැන්පත් කළා.+
29 ආහබ්ගේ පුතා වුණ යෙහෝරම් පාලනය කරපු 11වෙනි අවුරුද්දේදී තමයි අහසියා+ යූදාවල රජකමට පත් වුණේ.)
30 යේහු යෙෂ්‍රෙයෙල්වලට+ ආවාම ඒ ගැන යෙසබෙල්ට+ ආරංචි වුණා. ඉතින් එයා කලු පාටින් එයාගේ ඇස් වටේ පාට කරගෙන,* කොණ්ඩේ ලස්සනට හදාගෙන ජනේලේ ළඟට වෙලා පහළ බලාගෙන හිටියා.
31 යේහු දොරටුවෙන් ඇතුල් වුණ ගමන්ම යෙසබෙල් මෙහෙම ඇහුවා. “තමන්ගේ ස්වාමියාව මරපු සිම්රීට වෙච්ච දේ මතක නැද්ද?”+
32 එතකොට යේහු ජනේලේ දිහා බලලා මෙහෙම කිව්වා. “කවුද මගේ පැත්තේ ඉන්නේ? කවුද මට උදව් කරන්නේ?”+ එතකොටම රජමාලිගාවේ නිලධාරීන් දෙතුන්දෙනෙක් ජනේලයෙන් පහළ බැලුවා.
33 යේහු එයාලට මෙහෙම කිව්වා. “දාන්න එයාව පල්ලෙහට.” ඉතින් එයාලා යෙසබෙල්ව උස්සලා පහළට දැම්මා. එයා වැටුණ පාරට එයාගේ ලේ බිත්තියටයි, අශ්වයන්ටයි වීසි වුණා. ඊටපස්සේ යේහුගේ අශ්වයෝ එයාව පාගලා දැම්මා.
34 යේහු මාලිගාවට ගිහින් කාලා බීලා ටිකක් හිටියා. ඊටපස්සේ එයා මෙහෙම කිව්වා. “කරුණාකරලා අර දුෂ්ට ගෑනිව අරන් ගිහින් තැන්පත් කරන්න. මොනවා වුණත් එයා රජ කෙනෙක්ගේ දුවෙක්නේ.”+
35 ඉතින් එයාව තැන්පත් කරන්න හිතාගෙන එයාලා මළ කඳ තිබුණ තැනට ගියා. ඒත් ඉතුරු වෙලා තිබුණේ එයාගේ ඔළු කට්ටයි, අත් කකුල්වල කෑලි ටිකකුයි විතරයි.+
36 එයාලා ආපහු ඇවිත් යේහුට ඒ ගැන කිව්වාම යේහු මෙහෙම කිව්වා. “යෙහෝවා ඔහුගේ සේවකයෙක් වුණ තිෂ්බේවල හිටපු එලියා මාර්ගයෙන් කියපු දේ එහෙනම් ඒ විදිහටම ඉටු වුණා.+ ඔහු මෙහෙම කියලා තිබුණා. ‘යෙෂ්‍රෙයෙල්වල තියෙන ඉඩමේදී යෙසබෙල්ගේ මළ කඳ බල්ලෝ කාලා දානවා.+
37 “මේ යෙසබෙල්” කියලා අඳුරගන්නවත් බැරි වෙන විදිහට යෙසබෙල්ගේ මළ කඳ යෙෂ්‍රෙයෙල්වල තියෙන ඉඩමට පොහොර වෙලා යනවා.’”
