දෙවෙනි ලේකම් 1:1-17
1 දාවිත්ගේ පුතා වුණ සලමොන් තමන්ගේ රාජ්‍යයේ බලය තව තවත් වැඩි කරගත්තා. එයාගේ දෙවි වන යෙහෝවා එයා එක්ක ඉඳලා එයාව ගොඩක් ශ්‍රේෂ්ඨ කෙනෙක් කළා.+
2 දවසක් සලමොන් මුළු ඊශ්‍රායෙල් සෙනඟවම රැස් කළා. ඉතින් දාහ ගාණේ සහ සීය ගාණේ ඉන්න කණ්ඩායම්වල ප්‍රධානීන්, විනිශ්චයකරුවන්, ඊශ්‍රායෙල් සෙනඟ අතරේ ඉන්න ප්‍රධානීන් හැමෝම ඒ කියන්නේ පෙළපත්වල ප්‍රධානීන් එතනට එකතු වුණා.
3 ඊටපස්සේ සලමොන් රැස් වුණ ඒ හැමෝම එක්ක ගිබියොන්වල තිබුණ පූජනීය තැනට ගියා.+ යෙහෝවා දෙවියන්ගේ සේවකයෙක් වුණ මෝසෙස් පාළුකරයේදී හදපු සැබෑ දෙවියන්ගේ ශුද්ධ කූඩාරම තිබුණේ එතනයි.
4 ඒත් දාවිත් සැබෑ දෙවියන්ගේ ගිවිසුම් පෙට්ටිය කිර්යත්යෙයාරීම්+ ඉඳන් යෙරුසලමට ගෙනල්ලා තිබුණා. ඒ නිසා ගිවිසුම් පෙට්ටිය තිබුණේ ඒක තියන්න දාවිත් යෙරුසලමේ ලෑස්ති කරපු කූඩාරමේ.+
5 හූර්ගේ පුතා වුණ උරීගේ පුත් බෙසලෙල්+ හදපු තඹ පූජාසනය+ තියලා තිබුණේ යෙහෝවා දෙවියන්ගේ ශුද්ධ කූඩාරම ඉස්සරහයි. සාමාන්‍යයෙන් සලමොන් රජයි, ඊශ්‍රායෙල්වරු හැමෝමයි යාච්ඤා කරන්න* එතනට ගියා.
6 එදා සලමොන් ශුද්ධ කූඩාරම ළඟ තිබුණ තඹ පූජාසනය උඩ යෙහෝවා ඉස්සරහා දවන පූජා 1,000ක් ඔප්පු කළා.+
7 එදා රෑ දෙවියන් සලමොන් ඉස්සරහා පෙනී ඉඳලා එයාට මෙහෙම කිව්වා. “ඔයාට ඕනෙ දෙයක් තියෙනවා නම් ඒක මගෙන් ඉල්ලන්න.”+
8 එතකොට සලමොන්, දෙවියන්ට මෙහෙම කිව්වා. “මගේ තාත්තා වුණ දාවිත්ට ඔයා කොච්චර ලොකු ආදරයක්* පෙන්නුවාද!+ ඒ ආදරේ නිසා තමයි තාත්තාගෙන් පස්සේ ඔයා මාව රජ විදිහට පත් කළේ.+
9 අනේ යෙහෝවා දෙවියනි, මගේ තාත්තා වුණ දාවිත්ට ඔයා දුන්න පොරොන්දුව ඉටු කරන්න.+ මොකද ඔයා මාව රජ විදිහට පත් කළේ පොළොවේ තියෙන දූවිලි වගේ ගණන් කරන්න බැරි විශාල සෙනඟක්ව+ බලාගන්න.
10 අනේ, ඔයාගේ මේ විශාල සෙනඟට මඟ පෙන්නන්න අවශ්‍ය ප්‍රඥාවත් දැනුමත් මට දෙන්න.+ එතකොට ඔයාගේ සෙනඟව හොඳින් විනිශ්චය කරන්න මට පුළුවන් වෙයි.”+
11 එතකොට දෙවියන් සලමොන්ට මෙහෙම කිව්වා. “ඔයාගේ හිතේ තියෙන ඒ ආසාව මං දැක්කා. ඔයා ධන සම්පත්වත් ගෞරවයවත් ඔයාට වෛර කරන අයව නැති කරලා දාන්න කියලවත් ඉල්ලුවේ නැහැ. ඔයාට ගොඩක් කල් ජීවත් වෙන්න අවස්ථාව දෙන්න කියලා ඉල්ලුවෙත් නැහැ. ඔයා මගෙන් ඉල්ලුවේ පාලනය කරන්න මම ඔයාට භාර දීපු මගේ සෙනඟව හොඳින් විනිශ්චය කරන්න ඕනෙ ප්‍රඥාවයි, දැනුමයි විතරයි.+
12 ඒ නිසා ඔයා ඉල්ලපු විදිහට ප්‍රඥාවයි, දැනුමයි මම ඔයාට දෙනවා. ඒ විතරක් නෙමෙයි ඔයාට කලින් හිටපු කිසිම රජ කෙනෙක්ට තිබුණේ නැති, ඔයාට පස්සේ ඉන්න වෙන කිසිම රජ කෙනෙක්ට ලැබෙන්නේ නැති ධන සම්පත් සහ ගෞරවය මම ඔයාට දෙනවා.”+
13 ඊටපස්සේ සලමොන් ගිබියොන්වල තිබුණ පූජනීය තැනින්+ ඒ කියන්නේ ශුද්ධ කූඩාරම තිබුණ තැනින් පිටත් වෙලා යෙරුසලමට ආවා. එහේ ඉඳන් එයා ඊශ්‍රායෙල්වරුන්ව පාලනය කළා.
14 සලමොන් රජ අශ්ව රථ වගේම අශ්වයනුත්* තව තවත් එකතු කරගත්තා. එයාට අශ්ව රථ 1,400කුයි, අශ්වයන්* 12,000කුයි හිටියා.+ රජ ඒ රථ සහ අශ්වයන් තිබ්බේ ඒ වෙනුවෙන්ම වෙන් කරපු නගරවල.+ ඒ නගර තිබුණේ රජ හිටපු යෙරුසලමට කිට්ටුවෙනුයි.+
15 රජ රිදී සහ රන් විශාල ප්‍රමාණයක් යෙරුසලමට ගෙන්නගත්ත නිසා ගල් වගේ හැම තැනකම රිදී සහ රන් තිබුණා.+ එයා එකතු කරපු දේවදාර ලී ප්‍රමාණය කොච්චරද කියනවා නම් ඒවා හරියට ෂෙපේලා ප්‍රදේශයේ තිබුණ සිකමෝර් ගස් තරම් විශාල ප්‍රමාණයක් වුණා.+
16 සලමොන් රජ අශ්වයන්ව ගෙන්නගත්තේ ඊජිප්තුවෙන්.+ රජගේ වෙළෙන්දෝ ගිහින් කතා කරගත්ත ගාණකට අශ්වයන් රංචු පිටින් මිල දීලා ගත්තා.*+
17 ඊජිප්තුවෙන් ගෙන්නගත්ත අශ්ව රථයක ගාණ රිදී ෂෙකෙල්* 600යි. අශ්වයෙක්ගේ ගාණ රිදී ෂෙකෙල් 150යි. එහෙම ගෙන්නගත්ත අශ්වයන්ව එයාලා හිත්තීවරුන්ගේ රජවරු හැමෝටමත් සිරියාවේ රජවරුන්ටත් විකුණුවා.
පාදසටහන්
^ හෝ, “දෙවියන්ගෙන් මඟ පෙන්වීම් පතන්න.”
^ හෝ, “නොසැලෙන ආදරයක්.” “පැහැදිලි කිරීමක්” බලන්න.
^ හෝ, “අසරුවනුත්.”
^ හෝ, “අසරුවන්.”
^ හෝ සමහරවිට, “සලමොන් රජ අශ්වයන්ව ගෙන්නගත්තේ ඊජිප්තුවෙන් සහ කියුවලින්; රජගේ වෙළෙන්දන් කියුවලින් උන්ව මිල දීලා ගත්තා.” කියු කියන්නේ සිලීසියාව වෙන්න පුළුවන්.
