දෙවෙනි ලේකම් 15:1-19
-
ආසා බොරු නමස්කාරය අයින් කරයි (1-19)
15 දෙවියන් ඔහුගේ බලය ඕදෙද්ගේ පුතා වුණ අෂරියාට දුන්නා.
2 ඉතින් එයා ආසා රජ ළඟට ගිහින් මෙහෙම කිව්වා. “ආසා රජතුමනි, යූදා සහ බෙන්ජමින් සෙනඟෙනි, මට ඇහුම්කන් දෙන්න. ඔයාලා යෙහෝවා දෙවියන්ට ළං වෙලා ඉන්න කල් ඔහුත් ඔයාලා එක්කම ඉඳියි.+ ඔයාලා ඔහුව හඳුනගන්න උත්සාහ කළොත් ඔහු මොන වගේ කෙනෙක්ද කියලා තේරුම්ගන්න ඔහු ඔයාලට උදව් කරයි.+ ඒත් ඔයාලා ඔහුව අත්හැරියොත් ඔහුත් ඔයාලව අත්හරියි.+
3 සෑහෙන කාලයක් තිස්සේ ඊශ්‍රායෙල්වරු සැබෑ දෙවියන්ට නමස්කාර කළේ නැහැ. පූජකයෙක් එයාලට ඉගැන්නුවේ නැහැ. සෙනඟ නීතිය+ පිළිපැද්දෙත් නැහැ.
4 ඒත් ප්‍රශ්නවලට මුහුණ දෙද්දී එයාලා ආපහු ඊශ්‍රායෙල්වරුන්ගේ දෙවි වන යෙහෝවා ළඟට හැරිලා ඇවිත් ඔහුගේ මඟ පෙන්වීම් හොයන්න උත්සාහ කළා. එතකොට ඔහුට ළං වෙන්න ඔහු එයාලට උදව් කළා.+
5 ඒ කාලේ කාටවත් නිදහසේ ගමන්බිමන් යන්න පුළුවන්කමක් තිබුණේ නැහැ. මොකද දේශය පුරාම තිබුණේ නොසන්සුන් තත්වයක්.
6 එක පිරිසක් තව පිරිසකට පීඩා කළා.* එක නගරයක් තව නගරයක් විනාශ කළා. එයාලට එක එක ප්‍රශ්න ගැටලු අද්දකින්න දෙවියන් ඉඩහැරියා. ඒ නිසා එයාලට කිසි සහනයක් තිබුණේ නැහැ.+
7 හැබැයි දැන් ඔයාලා කිසිම දෙයක් නිසා අධෛර්යය වෙන්න එපා. එඩිතරව වැඩ කරන්න.+ ඔයාලා කරන දේවලට අනිවාර්යයෙන්ම ආශීර්වාද ලැබෙනවා.”
8 ඒ වචනයි, අනාගතවක්තෘ ඕදෙද්ගේ අනාවැකියයි අහපු ගමන්ම ආසාට ලොකු ධෛර්යයක් ලැබුණා. එයා ඉක්මනින්ම මුළු යූදා දේශයෙයි, බෙන්ජමින් දේශයෙයි, එෆ්‍රායිම් කඳුකර ප්‍රදේශයෙන් එයා අල්ලගත්ත නගරවලයි තිබුණ පිළිකුල්සහගත රූප හැම එකක්ම විනාශ කළා.+ යෙහෝවා දෙවියන්ගේ ගෘහයට ඇතුල් වෙන ශාලාව+ ඉස්සරහා තිබුණ යෙහෝවාගේ පූජාසනයත් එයා අලුත්වැඩියා කළා.
9 එයා යූදා සහ බෙන්ජමින් ගෝත්‍රවල හැමෝවමයි, එෆ්‍රායිම්, මනස්සේ සහ සිමියොන් ගෝත්‍රවලට අයිති ප්‍රදේශවලින් ඇවිත් එයාලා එක්ක පදිංචි වෙලා හිටපු අයවයි* එක් රැස් කළා.+ ඒ විදිහට ඇවිත් පදිංචි වෙලා හිටපු ඊශ්‍රායෙල්වරු විශාල පිරිසක් හිටියා. එයාලා ආසාගේ පැත්තට එන්න තීරණය කළේ එයාගේ දෙවි වන යෙහෝවා එයා එක්ක ඉන්නවා කියලා එයාලා දැක්ක නිසයි.
10 එයාලව ඒ විදිහට යෙරුසලමට එක් රැස් කළේ ආසා පාලනය කරපු 15වෙනි අවුරුද්දේ තුන්වෙනි මාසේදී.
11 යුද්දෙන් අල්ලගෙන ආපු සත්තුන්ගෙන් ගවයන් 700කුයි, බැටළුවන් 7,000කුයි එදා එයාලා යෙහෝවා දෙවියන්ට පූජා කළා.
12 ඒ වගේම එයාලාගේ මුතුන්මිත්තන්ගේ දෙවි වන යෙහෝවාට මුළු හදවතින්ම සේවය කරනවා කියලත් ඒ වෙනුවෙන් එයාලට කරන්න පුළුවන් හැම දේම කරනවා* කියලත් පොරොන්දු වෙලා සෙනඟ එයාලා අතරේ ගිවිසුමකුත් ඇති කරගත්තා.+
13 කෙනෙක් ඊශ්‍රායෙල්වරුන්ගේ දෙවි වන යෙහෝවාට සේවය කරන්නේ නැත්නම් බාල මහලු* ස්ත්‍රී පුරුෂ කියලා භේදයක් නැතුව එයා කවුරු වුණත් එයාව මරලා දාන්න ඕනෙ කියලත් එයාලා තීරණය කළා.+
14 ඒ ගිවිසුමට එකඟව වැඩ කරනවා කියලා හොරණෑ සහ නළා හඬ මැද එයාලා හරිම සතුටින් කෑගහලා යෙහෝවාට පොරොන්දු වුණා.
15 යූදාවල හිටපු හැමෝම ඒ පොරොන්දුව ගැන ගොඩක් සතුටු වුණා. මොකද එයාලා ඒ පොරොන්දුව දුන්නේ මුළු හදවතින්ම පෙලඹිලයි. ඒ වගේම දෙවියන් කැමති දේ කරන්න එයාලා ලොකු උත්සාහයක් දැරුවා. ඒ නිසා ඔහු එයාලව පිළි අරන් එයාලට උදව් කළා.+ ඉතින් දේශය පුරාම සාමකාමී වාතාවරණයක් දිගටම තියෙන්න යෙහෝවා ඉඩහැරියා.+
16 නමස්කාර කරන්න තිබුණ කණුව* ළඟ තියන්න ආසා රජගේ ආච්චි වුණ මයකා+ පිළිකුල් රූපයක් හදලා තිබුණා.+ ඒ නිසා ආසා මව් රැජින විදිහට එයාට තිබුණ තනතුරෙන් ආච්චිව අයින් කළා. ඊටපස්සේ ආසා ඒ පිළිකුල් රූපය කෑලිවලට කඩලා ඒක කුඩු කරලා කිද්‍රොන් නිම්නයේදී ඒක පුච්චලා දැම්මා.+
17 ඒත් නමස්කාරයට හදපු උස් තැන් ඊශ්‍රායෙල්වල+ ඒ විදිහටම තිබුණා.+ ඒ වුණත් ආසා එයාගේ ජීවිත කාලේ පුරාම මුළු හදවතින්ම දෙවියන්ට ළැදි වෙලා හිටියා.*+
18 ආසා එයායි, එයාගේ තාත්තායි දෙවියන්ට කැප කරපු* රිදී, රත්තරන් සහ වෙනත් භාණ්ඩ සැබෑ දෙවියන්ගේ ගෘහයට ගෙනාවා.+
19 ආසා පාලනය කරපු 35වෙනි අවුරුද්ද වෙන කල් දේශයේ යුද්ධයක් ඇති වුණේ නැහැ.+
පාදසටහන්
^ හෝ, “ජාතියේ එක කොටසක් තවත් කොටසකට පීඩා කළා.”
^ මූ.අ., “විදේශිකයන්වයි.”
^ හෙබ්‍රෙව් භාෂාවෙන් නෙෆෙෂ්. “පැහැදිලි කිරීමක්” බලන්න.
^ හෝ, “උස් පහත්.”
^ “පැහැදිලි කිරීමක්” බලන්න.
^ හෝ, “සම්පූර්ණ භක්තියක් පෙන්නුවා.”
^ මූ.අ., “ශුද්ධයි කියලා වෙන් කරපු.”
