දෙවෙනි ලේකම් 20:1-37
20 ඊටපස්සේ මෝවබ්වරුයි,+ අම්මොන්වරුයි,+ අම්මොනිවරුන්ගෙන්* සමහරදෙනෙකුයි එකතු වෙලා යෙහෝෂපාට්ට විරුද්ධව යුද්ධ කරන්න ආවා.
2 එතකොට යෙහෝෂපාට්ට මේ ආරංචිය ලැබුණා. “ඔබට විරුද්ධව සටන් කරන්න මුහුද* අවට ප්‍රදේශයෙනුයි, ඒදොම්+ දේශයෙනුයි විශාල හමුදාවක් ඇවිත් ඉන්නවා. එයාලා දැන් ඉන්නේ හෂෂොන්තාමාර්වල ඒ කියන්නේ ඒන්ගෙදීවල.”+
3 ඒක අහලා යෙහෝෂපාට් හොඳටම බය වුණා. ඉතින් එයා යෙහෝවා දෙවියන්ගේ මඟ පෙන්වීම් හොයලා බලන්න අධිෂ්ඨාන කරගත්තා.+ යූදා දේශයේ හැමෝම නිරාහාරව ඉන්න ඕනෙ කියලත් එයා නිවේදනය කළා.
4 යෙහෝවාගේ උදව් ඉල්ලන්න+ යූදාවල හිටපු සෙනඟ එකට එකතු වුණා. යෙහෝවාගෙන් මඟ පෙන්වීම් ලබාගන්න යූදාවල තිබුණ හැම නගරයකම හිටපු අය ආවා.
5 යූදාවල සහ යෙරුසලමේ සෙනඟ යෙහෝවා දෙවියන්ගේ ගෘහයේ අලුතෙන් හදපු මළුවේ රැස් වෙලා හිටියා. එයාලා අතරේ හිටපු යෙහෝෂපාට් නැඟිටලා
6 මෙහෙම කිව්වා.
“අනේ යෙහෝවා, අපේ මුතුන්මිත්තන්ගේ දෙවියනි, ස්වර්ගයේ ඉන්න එකම දෙවියන් ඔබයි.+ හැම ජාතියකටම, හැම රාජ්‍යයකටම වඩා ඉහළින් ඉන්නේ ඔබ නෙමෙයිද?+ බලයත් ශක්තියත් තියෙන්නේ ඔබේ අතේ. ඔබට විරුද්ධව ඉන්න කාටවත් බැහැ.+
7 අපේ දෙවියනි, ඔබ මේ දේශයේ කලින් ජීවත් වුණ අයව ඔබේ සෙනඟ වන ඊශ්‍රායෙල්වරු ඉස්සරහින් පන්නලා දැම්මා. ඊටපස්සේ ඔබේ යාළුවා වුණ ආබ්‍රහම්ගෙන් පැවතෙන ඒ අයට ඔබ මේ දේශය හැමදාටම උරුමයක් විදිහට දුන්නා.+
8 එයාලා මෙහේ පදිංචි වෙලා ඔබේ නමට ගෞරවයක් ගේන්න දේවමාලිගාවක් හදලා+ මෙහෙම කිව්වා.
9 ‘යුද්ධයක්, විනිශ්චයක්, වසංගතයක් නැත්නම් සාගතයක් නිසා අපි විපතකට මුහුණ දෙන්න ඉඩ තියෙනවා. (මේ ගෘහය ඔබේ නම දරන නිසා)+ අපේ දුකේදී අපි මේ ගෘහය ඉස්සරහටත් ඔබ ඉස්සරහටත් ඇවිත් ඔබේ උදව් ඉල්ලලා ඔබට කන්නලව් කරද්දී ඔබ අපිට සවන් දීලා අපිව බේරගන්න.’+
10 දෙවියනි, දැන් බලන්න අම්මොන්වලයි, මෝවබ්වලයි, සේයිර් කඳුකරයෙයි+ මිනිස්සු අපිට විරුද්ධව ඇවිත් ඉන්නවා. එයාලාගේ දේශ තමයි ඊශ්‍රායෙල්වරු ඊජිප්තුවෙන් පිට වෙලා ආවාම ඔබ යටත් කරගන්න ඉඩ දුන්නේ නැත්තේ. ඉතින් ඊශ්‍රායෙල්වරු එයාලව විනාශ කරන්නේ නැතුව ඒ දේශවලින් අයින් වෙලා ගියා.+
11 අපි කරපු ඒ හොඳ දේට එයාලා දැන් අපිට සලකන විදිහ බලන්න! එයාලා හදන්නේ ඔබ අපිට උරුමයක් විදිහට දුන්න ඔබේ දේශයෙන් අපිව පන්නලා දාන්නයි.+
12 අපේ දෙවියනි, ඔබ එයාලට දඬුවම් කරන්නේ නැද්ද?+ මොකද අපිත් එක්ක සටන් කරන්න එන මේ ලොකු හමුදාවට විරුද්ධව කිසිම දෙයක් කරන්න අපිට බලයක් නැහැ. කරන්න ඕනෙ මොනවාද කියලා අපි දන්නෙත් නැහැ.+ අපි බලාගෙන ඉන්නේ ඔබ දිහායි.”+
13 ඒ වෙලාවේ යූදා දේශයේ හිටපු හැමෝම එයාලාගේ භාර්යාවන්, ලොකු කුඩා දරුවන්* හැමෝමත් එක්ක යෙහෝවා ඉස්සරහා හිටගෙන හිටියා.
14 ඒ සෙනඟ අතරේ යහෂියෙල් හිටියා. එයා සෙකරියාගේ පුතා. සෙකරියා බෙනායාගේ පුතා. බෙනායා යෙයීයෙල්ගේ පුතා. යෙයීයෙල් මත්තනියාගේ පුතා. එයා ආසාෆ්ගේ පුතාලාගෙන් පැවතෙන ලෙවීවරයෙක්. ඒ වෙලාවේ යෙහෝවා ඔහුගේ බලය යහෂියෙල්ට දුන්නා.
15 එයා මෙහෙම කිව්වා. “යෙහෝෂපාට් රජතුමනි, යූදාවලයි, යෙරුසලමෙයි ඉන්න සෙනඟෙනි, මට ඇහුම්කන් දෙන්න! යෙහෝවා ඔයාලට මේ දේ කියනවා. ‘මේ ලොකු හමුදාවට බය වෙන්න එපා. එයාලව දැකලා කලබල වෙන්න එපා. මොකද මේ සටන ඔයාලාගේ සටනක් නෙමෙයි. ඔයාලා වෙනුවෙන් සටන් කරන්නේ ඔයාලාගේ දෙවියන් වන මමයි.+
16 හෙට එයාලට විරුද්ධව සටනට යන්න. එයාලා එන්නේ ෂීෂ් දුර්ගය හරහා. යෙරූයෙල් පාළුකරය ඉස්සරහා තියෙන නිම්නය කෙළවරේදී ඔයාලට එයාලව හම්බ වෙයි.
17 මේ යුද්දේදී ඔයාලා සටන් කරන්න ඕනෙ නැහැ. සටනට ගිහින් පෙළ ගැහිලා ඉන්න. නොසැලී ඉන්න.+ යෙහෝවා වන මම ඔයාලා වෙනුවෙන් මැදිහත් වෙලා ඔයාලව බේරගන්න විදිහ ඔයාලාගේ ඇස් දෙකෙන්ම බලාගන්න.+ යූදාවලයි, යෙරුසලමෙයි ඉන්න සෙනඟෙනි, කිසි දේකට බය වෙන්න එපා.+ හෙට එයාලට විරුද්ධව සටනට යන්න. යෙහෝවා වන මම ඔයාලා එක්කම ඉන්නවා.’”+
18 ඒ වෙලාවෙම යෙහෝෂපාට් දණින් වැටිලා එයාගේ ඔළුව බිමටම පහත් කළා. එකතු වෙලා හිටපු යූදාවල සහ යෙරුසලමේ මුළු සෙනඟත් යෙහෝවාට නමස්කාර කරන්න යෙහෝවා ඉස්සරහා දණින් වැටුණා.
19 ඊටපස්සේ කෝහාත්ගෙනුයි, කෝරාගෙනුයි පැවතෙන+ ලෙවීවරු නැඟිටලා ඊශ්‍රායෙල්වරුන්ගේ දෙවි වන යෙහෝවාට හඬ නඟලා ප්‍රශංසා කරන්න පටන්ගත්තා.+
20 සෙනඟ උදේ පාන්දරින්ම නැඟිටලා තෙකෝවා+ පාළුකරයට යන්න පිටත් වුණා. ඊට කලින් යෙහෝෂපාට් එයාලට මෙහෙම කිව්වා. “යූදාවල සහ යෙරුසලමේ වැසියෙනි! මට ඇහුම්කන් දෙන්න! ඔයාලාගේ දෙවි වන යෙහෝවා ගැන විශ්වාසය තියන්න. එතකොට ඔයාලට නොසැලී ස්ථිරව ඉන්න* පුළුවන් වෙයි. ඔහුගේ අනාගතවක්තෘවරුන්වත් විශ්වාස කරන්න.+ එහෙම කළොත් ඔයාලට වරදින්නේ නැහැ.”
21 සෙනඟගේ අදහස් ගත්තාට පස්සේ යෙහෝෂපාට් යෙහෝවාට ප්‍රශංසා ගී ගායනා කරන්න පිරිසක්ව තේරුවා.+ එයාලව තේරුවේ ශුද්ධ ඇඳුම් ඇඳලා හමුදාව ඉස්සරහින් මේ විදිහට ගායනා කරකර යන්නයි. “යෙහෝවාට ස්තුති කරන්න. මොකද ඔහුගේ ඉමහත් ආදරේ කවදාවත් වෙනස් වෙන්නේ නැහැ.”+
22 එයාලා සතුටින් ප්‍රශංසා ගී ගායනා කරන්න පටන්ගත්තාම යූදා දේශය අල්ලගන්න ආපු අම්මොන්වලයි, මෝවබ්වලයි, සේයිර් කඳුකරයෙයි මිනිස්සුන්ට විරුද්ධව යෙහෝවා හදිසි ප්‍රහාරයක් සැලසුම් කළා. ඉතින් එයාලා එකිනෙකාට පහර දෙන්න පටන්ගත්තා.+
23 අම්මොන්වරුයි, මෝවබ්වරුයි එකතු වෙලා සේයිර් කඳුකරයේ+ මිනිස්සුන්ව මරලා එයාලව සම්පූර්ණයෙන්ම විනාශ කරලා දැම්මා. සේයිර්වල මිනිස්සුන්ව නැත්තටම නැති කළාට පස්සේ ඒ දෙගොල්ලෝ එකිනෙකාව මරාගත්තා.+
24 යූදාවල හමුදාව පාළුකරයේ+ තිබුණ මුරකොටුවට ඇවිත් එයාලට විරුද්ධව ආපු හමුදාව හිටපු පැත්ත දිහා බැලුවා. එයාලා දැක්කේ හැම තැනම වැටිලා තිබුණ මළ කඳන් විතරයි.+ බේරුණ එක් කෙනෙක්වත් හිටියේ නැහැ.
25 යෙහෝෂපාට් රජයි, එයාගේ සෙනඟයි සතුරු හමුදාවේ අයට අයිති දේවල් අරගෙන යන්න ආවාම ඒ අයට ගොඩක් බඩු, ඇඳුම් සහ වටින දේවල් තිබුණා කියලා එයාලා දැක්කා. කොච්චර දේවල් තිබුණාද කියලා කියනවා නම් ඒ ඔක්කොම එකතු කරගන්න එයාලට දවස් තුනක් ගියා. ඒත් හැම දෙයක්ම අරගෙන යන්න එයාලට බැරි වුණා.+
26 හතරවෙනි දවසේදී එයාලා බෙරාකා නිම්නයේ* රැස් වෙලා යෙහෝවාට ප්‍රශංසා කළා. එයාලා ඒ තැනට බෙරාකා*+ නිම්නය කියන නම දුන්නේ ඒ නිසයි. අද වෙන කල්ම එතන ඒ නමින් හඳුන්වනවා.
27 යූදාවල සහ යෙරුසලමේ සෙනඟ හැමෝම එයාලට ඉස්සරහින් ගිය යෙහෝෂපාට් එක්ක හරිම සතුටින් ආයෙත් යෙරුසලමට ආවා. මොකද යෙහෝවා එයාලාගේ සතුරන්ව පරාජය කළා.+
28 වීණා+ සහ කුඩා වීණා වාදනය කරකර, හොරණෑ+ පිඹපිඹ යෙරුසලමට ආපු එයාලා යෙහෝවා දෙවියන්ගේ ගෘහයට ගියා.+
29 යෙහෝවා දෙවියන් ඊශ්‍රායෙල්වරුන්ගේ සතුරන්ට විරුද්ධව සටන් කළා+ කියලා අවට තිබුණ රාජ්‍යයන්ට ආරංචි වුණාම එයාලට දෙවියන් ගැන ලොකු බයක් ඇති වුණා.
30 යෙහෝෂපාට්ගේ රාජ්‍යයට සාමකාමී කාලයක් ඇති වුණේ ඒ නිසයි. එයාගේ දෙවියන් එයා වටේ හිටපු සතුරන්ගෙන් එයාට සම්පූර්ණ නිදහසක් ලබා දුන්නා.+
31 යෙහෝෂපාට් දිගටම යූදාවල පාලනය කළා. එයා රජකමට පත් වෙද්දී එයාට වයස අවුරුදු 35යි. එයා යෙරුසලමේ ඉඳන් අවුරුදු 25ක් පාලනය කළා. එයාගේ අම්මාගේ නම අෂූබා. එයා ෂිල්හීගේ දුව.+
32 යෙහෝෂපාට් එයාගේ තාත්තා වුණ ආසාගේ+ අඩිපාරේ දිගටම ගියා. එයා ඒකෙන් පිට පනින්නේ නැතුව යෙහෝවා හරියි කියලා සලකන දේවල් කළා.+
33 ඒත් නමස්කාරයට හදපු උස් තැන් ඒ විදිහටම තිබුණා.+ ඒ වෙද්දී සෙනඟ එයාලාගේ මුතුන්මිත්තන්ගේ දෙවියන්ට නමස්කාර කරන්න එයාලාගේ හදවතින්ම අධිෂ්ඨාන කරගෙන හිටියේ නැහැ.+
34 යෙහෝෂපාට්ගේ ජීවිතේ අනිත් සිදුවීම් ගැන මුල ඉඳන් අගට හනානිගේ+ පුතා වුණ යේහු+ කියපු දේවල් තියෙන ලියවිල්ලේ සඳහන් වෙනවා. ඒ තොරතුරු ඊශ්‍රායෙල්වරුන්ගේ රජවරු ගැන වාර්තා කරලා තියෙන ලියවිල්ලටත් ඇතුළත් කරලා තියෙනවා.
35 ඊටපස්සේ යූදාවල රජ වුණ යෙහෝෂපාට් ඊශ්‍රායෙල්වල රජ වුණ අහසියා එක්ක මිත්‍රත්වයක් ඇති කරගත්තා. අහසියා හරිම දුෂ්ට විදිහට වැඩ කරපු කෙනෙක්.+
36 යෙහෝෂපාට් එයාව හවුල් කරගෙන තර්ෂිෂ්වලට යවන්න නැව් හදන්න පටන්ගත්තා.+ එයාලා ඒවා හැදුවේ එෂියොන්ගෙබෙර්වලදී.+
37 ඒත් මරේෂාවල කෙනෙක් වුණ දෝදාවාහුගේ පුතා එලියේසර් යෙහෝෂපාට්ට විරුද්ධව මේ අනාවැකිය කිව්වා. “ඔබ අහසියා එක්ක මිත්‍රත්වයක් ඇති කරගත්ත නිසා යෙහෝවා ඔබ කරන දේවල් කඩාකප්පල් කරනවා.”+ ඉතින් එයාලාගේ නැව් කැඩිලා බිඳිලා ගියා.+ ඒ නිසා එයාලට තර්ෂිෂ්වලට යන්න බැරි වුණා.
පාදසටහන්
^ හෝ සමහරවිට, “මෙයුනිවරුන්ගෙන්.”
^ පේන විදිහට මළ මුහුද.
^ මූ.අ., “පුතාලා.”
^ හෝ, “බය වෙන්නේ නැතුව ඉන්න.”
^ හෝ, “තැනිතලාවේ.”
^ තේරුම, “ප්‍රශංසාව.”
