දෙවෙනි සාමුවෙල් 1:1-27
1 දාවිත් අමලෙක්වරුන්ව පරද්දලා ආපහු ෂික්ලග්වලට ආවා. ඒ වෙද්දී සාවුල් ජීවතුන් අතර හිටියේ නැහැ. දාවිත් දවස් දෙකක් ෂික්ලග්වල+ නැවතිලා හිටියා.
2 තුන්වෙනි දවසේදී සාවුල්ගේ කඳවුරේ ඉඳන් මිනිසෙක් ඇඳුම් ඉරාගෙන, ඔළුවට දූවිලි දාගෙන දාවිත් ළඟට දුවගෙන ආවා. එයා දාවිත් ඉස්සරහා දණින් වැටිලා ඔළුව බිමටම පහත් කළා.
3 දාවිත් ඒ මිනිසාගෙන් ඇහුවා “ඔයා කොහේ ඉඳන්ද ආවේ” කියලා. “මං ඊශ්‍රායෙල්වරුන්ගේ කඳවුරෙන් බේරිලයි මෙතනට ආවේ” කියලා ඒ කෙනා කිව්වා.
4 එතකොට දාවිත් ඇහුවා “ඇයි, එහේ මොනවාද වුණේ” කියලා. ඒ මිනිසා මෙහෙම කිව්වා. “ඊශ්‍රායෙල් හමුදාව යුද පිටියෙන් පලා ගියා. හුඟදෙනෙක් මැරුණා. සාවුල් රජත් ඔහුගේ පුතා යොනාතානුත් මැරුණා.”+
5 දාවිත් ඒ තරුණයාගෙන් මෙහෙම ඇහුවා. “සාවුල් රජයි, යොනාතානුයි මැරුණා කියලා ඔයා කොහොමද දන්නේ?”
6 තරුණයා මෙහෙම කිව්වා. “මං අහම්බෙන් වගේ ගිල්බෝවා කන්දට+ ආවා. එතකොට මං දැක්කා සාවුල් රජ හෙල්ලයත් අල්ලගෙන අමාරුවෙන් ඉන්නවා. ඔහුව අල්ලගන්න ආපු අශ්ව රථයි, අසරුවනුයි ඒ කිට්ටුවටම ඇවිත් හිටියා.+
7 සාවුල් රජ පිටිපස්ස හැරිලා බලද්දී මාව දැකලා මට අඬගැහුවා. මං ‘ඇයි මගේ ස්වාමීනි’ කියලා කිව්වාම
8 ඔහු මගෙන් ඇහුවා ‘ඔයා කවුද’ කියලා. මම ඔහුට කිව්වා ‘මං අමලෙක් ජාතිකයෙක්’+ කියලා.
9 ඒ වෙලාවේ ඔහු මට මෙහෙම කිව්වා. ‘මගේ ළඟට ඇවිත් මාව මරලා දාන්න. මට තාම පණ තිබුණත් මට කිසිම දෙයක් කරගන්න බැහැ. මං ඉන්නේ ලොකු වේදනාවකින්.’
10 ඔහු දරුණු විදිහට තුවාල වෙලයි හිටියේ. ඉතින් මට තේරුණා ඔහු ජීවත් වෙන එකක් නැහැ කියලා. ඒ නිසා මං ගිහින් ඔහුව මරලා දැම්මා.+ ඊටපස්සේ රජගේ ඔටුන්නයි, අතේ තිබුණ වළල්ලයි ගලවගෙන ඔබට දෙන්න ඒවා අරන් ආවා.”
11 ඒක ඇහුවාම දාවිත් සහ එයාත් එක්ක හිටපු හැමෝම එයාලාගේ ඇඳුම් ඉරාගත්තා.
12 එයාලට ලොකු දුකක් දැනුණා. ඒ නිසා හවස් වෙන කල්ම එයාලා කන්නේ බොන්නේ නැතුව හොඳටම ඇඬුවා.+ මොකද එදා සාවුල් සහ එයාගේ පුතා යොනාතාන් වගේම යෙහෝවාගේ සෙනඟ අතරෙනුත් ඊශ්‍රායෙල්වරු අතරෙනුත්+ හුඟදෙනෙක් කඩුවෙන් මැරුම් කාලා තිබුණා.
13 ඒ ආරංචිය ගෙනාපු තරුණයාගෙන් දාවිත් මෙහෙම ඇහුවා. “ඔයා කාගේ කවුද?” තරුණයා කිව්වා “මගේ තාත්තා විදේශිකයෙක්. එයා අමලෙක් ජාතිකයෙක්” කියලා.
14 ඒ වෙලාවේ දාවිත් “යෙහෝවා දෙවියන්ගේ අභිෂේක ලත් රජව ඔයා මරලා දැම්මේ ඇයි? කිසිම බයක් නැතුව ඒ වගේ දෙයක් කරන්න ඔයාට හයියක් ආවේ කොහෙන්ද”+ කියලා එයාගෙන් ඇහුවා.
15 ඊටපස්සේ දාවිත් ඒ ළඟ හිටපු තරුණයෙක්ට කිව්වා “මේ මිනිහාව මරලා දාන්න” කියලා. ඒ තරුණයා ඒ කෙනාව මරලා දැම්මා.+
16 දාවිත් ඒ වෙලාවේ මෙහෙම කිව්වා. “ඔයාගේ මරණයට වග කියන්න ඕනෙ ඔයාමයි. මොකද ‘යෙහෝවාගේ අභිෂේක ලත් රජව මැරුවේ මමයි’+ කියලා ඔයා ඔයාටම විරුද්ධව සාක්ෂි දුන්නා.”
17 පස්සේ, සාවුල් සහ එයාගේ පුතා යොනාතාන් වෙනුවෙන්+ දාවිත් ශෝක ගීයක් ගායනා කළා.
18 “දුන්න” විදිහට හඳුන්වපු ඒ ගීය යූදා සෙනඟට උගන්වන්න කියලා දාවිත් නියම කළා. ඒ ගීය යාෂාර් කියන ලියවිල්ලේ+ සටහන් කරලා තියෙනවා.
19 “අනේ ඊශ්‍රායෙල්, ඔබේ තේජස කඳු මුදුනේදී පහ වෙලා ගියා.+
ඔබේ බලවතුන් වැටී ගිය හැටි බලන්න!
20 ඒ පුවත ගාත්වල ප්‍රසිද්ධ කරන්න එපා.+අෂ්කෙලොන්වල මාවත් දිගේ ඒ ගැන දැනුම් දෙන්නත් එපා.එහෙම කළොත් පිලිස්තිවරුන්ගේ දූවරු සතුටු වෙයි.අචර්මච්ඡේදිතයන්ගේ දූවරු ප්‍රීති ඝෝෂා නඟයි.
21 ගිල්බෝවා+ කඳුකරයට පිනිවත් වර්ෂාවවත් නොවැටේවා!දෙවියන්ට ඔප්පු කරන්න ඒ කඳුකරයෙන් කිසි පලදාවක් නොලැබේවා!+බලවතුන්ගේ පලිස් පාගලා දැම්මේ එහෙදියි.තෙලින් ආලේප කරපු සාවුල්ගේ පලිහ විනාශ කළෙත් එහෙදියි.
22 යොනාතාන්ගේ ඊතල කවදාවත් සතුරන්ගේ ලේ වගුරුවන්නේ නැතුව,බලවතුන්ව පසාරු කරන්නේ නැතුව ආපහු හැරිලා ආවේ නැහැ.+කිසිම දවසක සාවුල්ගේ කඩුව ජය ගන්නේ නැතුව හැරිලා ආවේ නැහැ.+
23 හැමෝගෙම හිත් දිනාගත්ත, හැමෝම ආදරේ කරපු සාවුල් සහ යොනාතාන්+මරණයේදීවත් වෙන් වුණේ නැහැ.+
රාජාලීන්ටත් වඩා වේගයෙන්+ ගමන් කරපු ඒ දෙන්නා සිංහයන්ටත් වඩා බලවත් වුණා.+
24 ඊශ්‍රායෙල් දියණියෙනි, ඔබට අලංකාර රතු වස්ත්‍ර අන්දවලාඔබව රන් ආභරණවලින් සරසවපුසාවුල් රජ වෙනුවෙන් හඬා වැලපෙන්න.
25 අනේ, බලවන්තයන් යුද පිටියේ වැටිලා ගිය හැටි බලන්න!
යොනාතාන් කඳු මුදුනේ මැරුම් කෑවා.+
26 අනේ මගේ සහෝදර යොනාතාන්, මම ඔබ ගැන මොන තරම් දුක් වෙනවාද!ඔබේ මිතුදමෙන් මං කොයි තරම් සතුටක් ලැබුවාද!+
ඔබ මට පෙන්නපු ආදරේ මොන තරම්ද! ඒක ස්ත්‍රීන්ගෙන් ලැබුණ ආදරේටත් වඩා හුඟක් වටිනවා!+
27 අනේ, බලවතුන් වැටී ගිය හැටි බලන්න!යුධ අවි සුනුවිසුනු වුණ හැටි බලන්න!”
