• ඔයාගේ තාත්තාගේ රස්සාව නිසා පවුලටම වෙන තැනක පදිංචියට යන්න වෙලා.

• ඔයාගේ හොඳම යාළුවා ඈත පළාතක පදිංචියට ගිහින්.

• ඔයාගේ අක්කා හරි අයියා හරි බැඳලා වෙන ගෙදරකට යනවා.

ඒ වගේ වෙනස්කම්වලට ඔයා කොහොම මුහුණ දෙයිද?

ලොකු කුණාටුවක් එද්දී ගහකට පුළුවන් නම් ඒ හුළඟ හමන පැත්තට නැමෙන්න ඒ ගහ බිමට වැටෙන්නේ නැහැ. ඒ වගේ ඔයාටත් පුළුවන් ඕනෙම වෙනස්කමකට මුහුණ දෙන්න වෙද්දී ඒවාට අනුව හැඩගැහෙන්න ඉගෙනගන්න. ඒක කරන්න පුළුවන් විදිහ ගැන කතා කරන්න කලින් වෙනස්කම් ගැන දැනගන්න ඕන දේවල් ටිකක් තියෙනවා.

වෙනස්වීම් වෙන එක නවත්වන්න බැහැ. බයිබලයේ මෙහෙම කියනවා. ‘නොසිතන මොහොතක බලාපොරොත්තු නොවූ දේවල් සියලුදෙනාටම සිදු විය හැක.’ (දේශනාකාරයා 9:11) ඒ වචන ඇත්ත කියලා කවදා හරි ඔයාටත් අද්දකින්න ලැබෙයි. අපි නොහිතන විදිහට සිද්ධ වෙන හැම දේම නරකයි කියලා කියන්න බැහැ. මුලින් නරකයි වගේ පේන්න තියෙන දේකින් පස්සේ ඔයාට ප්‍රයෝජන ලැබෙන්නත් ඉඩ තියෙනවා. කොහොමවුණත් යම් ජීවන රටාවකට හුරු වෙලා ඉද්දී දේවල් ලේසියෙන් කරන්න පුළුවන් නිසා වෙනස්කම් වෙද්දී ඒවා හොඳ වුණත් නරක වුණත් ඒවාට හැඩගැහෙන්න හුඟක් අයට ලේසි නැහැ.

වෙනස්කම් වෙද්දී විශේෂයෙන්ම යෞවනයන්ට ඒවා දරාගන්න අමාරුයි. යෞවනයෙක් වන ඇලෙක්ස් * මෙහෙම කියනවා. “යෞවන කාලෙදී කොහොමත් ශාරීරික, මානසික වෙනස්කම්වලට මුහුණ දෙන්න වෙනවා. ඒ අතරේ තව වෙනස්කම්වලටත් මුහුණ දෙන්න වුණොත් ඒක දරාගන්න ලේසි නැහැ.”

තව හේතුවක්: වෙනස්කම්වලට මුහුණ දෙන්න වෙද්දී වැඩිහිටියෝ එයාලගේ අතීත අද්දැකීම් ප්‍රයෝජනයට ගන්නවා. ඒත් යෞවනයන්ට ඒ වගේ අද්දැකීම් අඩුයි.

හැඩගැහෙන්න ඉගෙනගන්න පුළුවන්. වෙනස්කම් වෙද්දී ඒකට මුහුණ දෙන එක ලේසි නැහැ. ඒත් දුක් වෙවී ඉන්නේ නැතුව ඉක්මනින්ම ඒකෙන් ගොඩ ඇවිත් අලුත් වෙනසට හැඩගැහෙන එක තමයි කරන්න පුළුවන් හොඳම දේ. එතකොට ඒකට හොඳින් මුහුණ දෙන්නත් ඒ වෙනස නිසා සිද්ධ වෙන යහපතක් ගැන හිතන්නත් ඔයාට පුළුවන් වෙයි. එතකොට ප්‍රශ්න එද්දී ඒවාට මුහුණ දෙන්න බැරුව මත්ද්‍රව්‍ය හරි මත්පැන් හරි ගන්න ඔයා පෙලඹෙන්නේ නැහැ.

යථාර්ථයට මුහුණ දෙන්න. ජීවිතේ හැම දේම ඔයාට ඕන විදිහට වෙනවා නම් ඔයා කැමති ඇති. ඒත් ඒක එහෙම වෙන්නේ නැහැ. යාළුවෝ පදිංචිය මාරු කරයි, නැත්නම් විවාහ වෙයි. අයියලා, අක්කලා, නංගිලා, මල්ලිලා වැඩිහිටියන් වුණාට පස්සේ ගෙදරින් පිට වෙයි. යම් තත්වයන් නිසා ඔයාට යාළුවන්වයි හුරුපුරුදු දේවලුයි දාලා යන්න වෙයි. ඒ වගේ දේවල් වෙද්දී කලකිරෙනවා වෙනුවට යථාර්ථයට මුහුණ දෙන එක තමයි හොඳම දේ.—බයිබල් ප්‍රතිපත්තිය: දේශනාකාරයා 7:10.

ඉදිරිය ගැන හිතන්න. අතීතය ගැනම හිතන එක හරියට පිටිපස්ස පේන කණ්ණාඩිය දිහා බලාගෙන වාහනයක් එළවනවා වගේ. ඒක දිහා ඉඳලා හිටලා බලන එක ප්‍රයෝජනවත් වුණත් ඔයා වැඩිපුර බලන්න ඕනෙ ඉදිරිය දිහා. වෙනස්කම් වෙද්දීත් ඔයා කරන්න ඕනෙ ඒ දේමයි. දිගටම අනාගතය දිහාම බලන්න උත්සාහ කරන්න. (හිතෝපදේශ 4:25) උදාහරණෙකට ඊළඟ මාසේ නැත්නම් ඊළඟ මාස හයේ ඔයාට තියාගන්න පුළුවන් මොන වගේ ඉලක්කද කියලා හිතන්න.

හොඳ පැත්ත ගැන විතරක් හිතන්න. යෞවනියක් වන ලෝරා මෙහෙම කියනවා. “වෙනස්කම් වෙද්දී ඒවාට හැඩගැහෙන්න පුළුවන් වෙන්නේ ඒ ගැන ඔයා හිතන විදිහ අනුවයි. ඔයා දැනට මුහුණ දෙන වෙනස්කම නිසා අද්දකින හොඳ පැති ගැන හිතන්න.” ඔයා අද්දකින අලුත් තත්වය නිසා අඩුම තරමින් ඔයාට ලැබෙන එක හොඳක් ගැන හරි හිතන්න ඔයාට පුළුවන්ද?—බයිබල් ප්‍රතිපත්තිය: දේශනාකාරයා 6:9.

යෞවන වයසේදී තමන්ගේ කිට්ටු මිතුරන් හැමෝම පදිංචිය මාරු කරපු එක ගැන වික්ටෝරියා මෙහෙම කියනවා. “මට ලොකු තනිකමක් දැනුණා. දේවල් වෙනස් වුණේ අපරාදේ කියලයි මං කොයි වෙලෙත් හිතුවේ. ඒත් ආපහු හැරිලා බලද්දී මට තේරෙනවා ඒ වෙනස්කම් වුණාට පස්සේ මං වෙනස් විදිහට හිතන්න පටන්ගත්තා කියලා. අලුතින් යාළුවෝ කරගන්න පුළුවන් තව කීදෙනෙක් මං වටේ ඉන්නවද කියලා මට තේරුණෙත් ඒ කාලෙම තමයි.”—බයිබල් ප්‍රතිපත්තිය: හිතෝපදේශ 27:10.

අනිත් අය වෙනුවෙන් දේවල් කරන්න. බයිබලයේ කියනවා “ඔබේම කාරණා ගැන පමණක් සිතමින් සිටිනවා වෙනුවට එකිනෙකා කෙරෙහිත් පෞද්ගලික සැලකිල්ල දක්වන්න” කියලා. (ෆිලිප්පි 2:4) වෙනස්කම්වලට හැඩගැහෙන්න පුළුවන් තවත් විදිහක් තමයි වෙනස්කම්වලට මුහුණ දෙන තවත් අයට උදව් කරන එක. අවුරුදු 17ක් වයස ඇනා මෙහෙම කියනවා. “කාලයත් එක්කම මං තේරුම්ගත්තා මං අද්දකින තත්වයම හරි ඊටත් වඩා අමාරු තත්වයක් හරි අද්දකින අයට උදව් කරන එකෙන් හුඟක් ප්‍රයෝජන ලැබෙනවා කියලා.”