පෘථිවියෙන් වැඩි හරියක්ම වැහිලා තියෙන්නේ වතුරෙන්. ලෝක කාලගුණ විද්‍යා සංවිධානය කියන විදිහට “පාවිච්චියට ගන්න පුළුවන් තත්වයේ තියෙන්නේ පෘථිවියේ ජලයෙන් 0.5%ක ප්‍රමාණයක්.” ඒක පොඩි කොටසක් වගේ පෙනුණත් ජීවයේ පැවැත්මට ඒක හොඳටම ඇති. ඒත් දැන් දැන් පරිසර දූෂණය නිසා, කාලගුණික විපර්යාස නිසා, වැඩි ඉල්ලුම නිසා ඒ ප්‍රමාණයත් අඩු වේගෙන යනවා. විශේෂඥයන් කියන විදිහට අවුරුදු 30කින් බිලියන පහක ජන සංඛ්‍යාවකට ප්‍රමාණවත් ජලය නැති වීමේ අවදානමක් තියෙනවා.

ජල සැපයුමට තියෙන තර්ජනය වළක්වන ස්වාභාවික ක්‍රියාවලි ඇතුවයි පෘථිවිය නිර්මාණය කරලා තියෙන්නේ. ඒ වගේම පස, ජලජ ජීවීන් සහ හිරු එළිය පවා වතුර පිරිසිදු කරන්න හවුල් වෙනවා. තර්ජනයට පෘථිවිය උත්තර දෙන විදිහ ගැන තව දැනගමු.

• වතුරේ තියෙන අපිරිසිදු දේවල් අයින් කරන හැකියාව පස්වලට තියෙනවා. වතුරවල තියෙන නයිට්‍රජන්, පොස්ෆරස් සහ පළිබෝධ නාශක වගේ දේවල් අයින් කරන්න තෙත් බිම්වල තියෙන සමහර ශාකවලට පුළුවන් කියලා හොයාගෙන තියෙනවා.

• වතුර පිරිසිදුව තියාගන්න උදව් වෙන ස්වාභාවික ක්‍රියාවලි ගැන විද්‍යාඥයන් හොයාගෙන තියෙනවා. උදාහරණයකට වතුර ගලාගෙන යද්දී ඒකේ තියෙන අපද්‍රව්‍ය කුඩා අංශුවලට කැඩෙනවා. ඊටපස්සේ වතුරේ ඉන්න ක්ෂුද්‍ර ජීවීන් ඒ අංශු තවත් කුඩා කෑලිවලට කඩලා වතුර පිරිසිදු කරනවා.

• මිරිදියේ ඉන්න බෙල්ලන් සහ මට්ටීන්ට පුළුවන් වතුරවල තියෙන සමහර හානිකර රසායනික ද්‍රව්‍ය දවස් කීපයකින් ඉවත් කරන්න. ජලය පිරිසිදු කරන බලාගාරවලටවත් බැහැ එච්චර වේගයෙන් සහ සාර්ථකව ඒ ක්‍රියාවලිය කරන්න.

• පෘථිවියේ තියෙන ජලය පෘථිවියෙන් පිටතට යන එක වළක්වන්න ජල චක්‍රය සහ තවත් ස්වාභාවික ක්‍රියාවලි උදව් වෙනවා.

ජල අර්බුදයට හොඳම විසඳුම අරපිරිමැස්මෙන් වතුර පාවිච්චි කරන එකයි. ඒ වගේම තෙල් කාන්දු වෙන තැන් හරිගස්සන එක, පාවිච්චි නොකරන බෙහෙත් වැසිකිළි හරහා ඉවත් නොකරන එක සහ විෂ රසායනික ද්‍රව්‍ය කාණුවලට හළන්නේ නැතුව ඉන්න එක වගේ දේවල් අපිට කරන්න පුළුවන්.

වතුරවල තියෙන ලුණු ඉවත් කරන්න පුළුවන් අලුත් ක්‍රම ඉංජිනේරුවන් හඳුන්වලා දීලා තියෙනවා. ඒ හරහා මුහුදු වතුරත් පාවිච්චියට ගන්න පුළුවන් තත්වයට ගේන එකයි එයාලාගේ ඉලක්කය.

ඒත් ඒ ක්‍රියාවලියේ අඩුපාඩු නැතුවම නෙවෙයි. උදාහරණයකට වතුරවලින් ලුණු ඉවත් කරන්න ලොකු මුදලක් වගේම බලශක්තියක් වැය වෙනවා. 2021දී ජල කළමනාකරණය ගැන නිකුත් කරපු වාර්තාවකට අනුව එක්සත් ජාතීන්ගේ සංවිධානය කිව්වේ “ලෝකේ පුරාම ජලය සුරකින්න කරන දේවල් දෙගුණ කළේ නැත්නම් ඉක්මනින්ම දරුණු ජල හිඟයක් ඇති වෙනවා” කියලයි.

“දෙවි දිය බිඳු පොළොවෙන් ඉහළට ඇදගත් පසු පොළොවට වැසි වස්සවා පින්නද වැටෙන්න සලස්වන්නේය. වලාකුළුවලින් වැහි බිඳු වැටෙන්නේය. වර්ෂාව නොඅඩුව පොළොවට ඇද හැළෙන්නේය.”—යෝබ් 36:26-28.

පෘථිවියේ ජලය රැකගන්න උදව් වෙන ස්වාභාවික චක්‍රයන් ඇතුවයි දෙවියන් පොළොව නිර්මාණය කළේ.—දේශනාකාරයා 1:7.

මේ ගැන හිතන්න: ජලය ස්වාභාවිකවම පිරිසිදු කරන ක්‍රියාවලියක් ඇතුව මේ පොළොව නිර්මාණය කරලා තියෙනවා නම් ඒ නිර්මාතෘට බැරිද මිනිස්සු නිසා මිරිදිය වතුරට වෙලා තියෙන හානිය හරිගස්සන්න? 15වෙනි පිටුවේ තියෙන “පෘථිවියේ ආරක්ෂාව ගැන දෙවියන්ගෙන් සහතිකයක්!” කියන ලිපිය බලන්න.