හැම අවුරුද්දකම ගස් බිලියන ගාණක් මහ පොළොව සිපගන්නවා. මේකට මූලිකම හේතුව වගා කටයුතුවලට වනාන්තර එළිපෙහෙළි කරන එකයි. 1940 ගණන් එක්ක බලද්දී අද වෙද්දී වැසි වනාන්තරවලින් 1⁄2ක්ම විනාශ වෙලා ගිහින්.

වනාන්තර විනාශ වෙද්දී ඒවායේ සරුසාර ගස්වැල් විතරක් නෙවෙයි පුංචිම කෘමියාගේ ඉඳන් දැවැන්තයා දක්වා සත්ව ලෝකයත් අපිට අහිමි වෙනවා.

වනාන්තර විනාශ කරලා දැම්මත් ඒවා සදහටම නිදි කරවන්න මිනිසාට බැහැ. පරිසරවේදීන් කියන විදිහට, යම් කාලයක් ඇතුළත ආයෙත් සශ්‍රීකව වැඩෙන්න විතරක් නෙවෙයි කලින්ට වඩා ව්‍යාප්ත වෙන්නත් වනාන්තරවලට පුළුවන්. මේ උදාහරණ බලන්න.

• ඇමරිකාවේ සහ බටහිර අප්‍රිකාවේ වගා කරලා අතහැරලා දාපු වනාන්තර බිම් 2,200ක් පර්යේෂකයන් සෝදිසි කළා. ඒ අය කිව්වේ වනාන්තරයක් ඇති වෙන්න සුදුසු විදිහට පස ආයෙත් ස්වාභාවිකවම සකස් වෙන්න අවුරුදු 10ක්වත් යන්නේ නැහැ කියලා.

• එළිපෙහෙළි කරපු වනාන්තර බිමක් ආයෙත් ගස් කොළන්වලින් ගහණ වෙලා සත්තුන්ගේ රජදහනක් වෙන්න යන්නේ අවුරුදු 100ක් වගේ කාලයක් කියලා විද්‍යා සඟරාවක සඳහන් වුණා.—Science.

• මිනිසාගේ උදව් ඇතුව සහ නැතුව වනාන්තර වැවෙන විදිහ බ්‍රසීලයේ විද්‍යාඥයන් සන්සන්දනය කළා. දියුණු තාක්ෂණික ක්‍රම පාවිච්චි කරලා වනාන්තරයක් නිර්මාණය කරන්න ගත වුණ කාලයට වඩා ස්වාභාවිකවම වනාන්තරයක් ඇති වෙන්න ගත වුණ කාලය අඩුයි කියලා එයාලා හොයාගත්තා.

• ඒ අධ්‍යයනය ගැන ‘නැෂනල් ජියෝග්‍රැෆික්’ සඟරාවේ මෙහෙම වාර්තා කළා. “වනාන්තර ඇති කරන්න ගස් හිටවන්නම ඕනෙ නැහැ.” පුදුමේ කියන්නේ කිසිම දෙයක් නොකර තියපු බිම්වල “ගස් වැවෙන්න” ගත වුණේ අවුරුදු 5ක් වගේ සුළු කාලයක්!

ලෝකේ පුරාම වනාන්තර ආරක්ෂා කරන්න වගේම විනාශ වුණ ඒවා ආයෙත් යථා තත්වයට ගේන්න ලොකු වැඩ කොටසක් කෙරෙනවා. ඒකේ ප්‍රතිඵලයක් විදිහට පහුගිය අවුරුදු 25 ඇතුළත “ලෝකේ පුරා වනාන්තර විනාශය 50%කින් අඩු වෙලා තියෙනවා” කියලා එක්සත් ජාතීන්ගේ සංවිධානය කියලා තියෙනවා.

ඒත් වනාන්තර සුරකින්න ඒ දේ විතරක් මදි. “පහුගිය අවුරුදු කීපයේම නිවර්තන කලාපයේ වනාන්තරවලට වෙන විනාශය එන්න එන්නම වැඩි වෙලා තියෙනවා” කියලා එක සංවිධානයක් සඳහන් කරනවා.—Global Forest Watch.

ඒකට ප්‍රධානම හේතුව රජයේ අනවසරයෙන් ගස් කපන එකයි. ඒ වගේ සමාගම් ඩොලර් බිලියන ගාණක් ලාභ ලබනවා.

“යෙහෝවා දෙවි a ඇසට ප්‍රිය වූ කෑමට හොඳ වූ සියලු ගස් ඒ උයනේ හටගන්න සැලැස්වූවේය.”—උත්පත්ති 2:9.

මිනිස්සු කරන හානියෙන් සම්පූර්ණයෙන්ම ගොඩ එන්න පුළුවන් හැකියාව ඇතුවයි යෙහෝවා දෙවියන් වනාන්තර නිර්මාණය කරලා තියෙන්නේ. ගස් කොළන්වලින් වට වුණ පරිසරයේ සුන්දරත්වය අපි උපරිමයටම විඳිනවා දකින්න දෙවියන් ආසයි.

මේ පොළොවේ සම්පත්වලට වෙන විනාශය සම්පූර්ණයෙන්ම නවත්තලා පෘථිවිය ආරක්ෂා කරන්න දෙවියන් පියවර ගන්නවා කියලා බයිබලයේ කියනවා. 15වෙනි පිටුවේ තියෙන “පෘථිවියේ ආරක්ෂාව ගැන දෙවියන්ගෙන් සහතිකයක්!” කියන ලිපිය බලන්න.