තමන්ටම ගෞරව කරන එක එච්චරම වැදගත්ද?

• ඒත් තමන්ව අඩු තක්සේරු කරගන්න කෙනෙක් හැම වෙලේම ඉන්නේ අසතුටෙන්, පීඩනයෙන්. ඒක එයා කන බොන විදිහටත් බලපානවා. ඒ වගේ කෙනෙක් මත්පැන්, මත්ද්‍රව්‍යවලට ඇබ්බැහි වෙන්න තියෙන ඉඩකඩත් වැඩියි.

• තමන් ගැන හොඳ හැඟීමක් තියෙන කෙනෙක් අනිත් අය එක්ක තමන්ව සන්සන්දනය කරන්නේ නැහැ. ඒ නිසා ඒ වගේ කෙනෙක්ට හොඳ යාළුවෝ හොයාගන්න ලේසියි. ඒත් තමන් ගැන හොඳ හැඟීමක් නැති කෙනෙක් නිතරම අනිත් අයත් එක්ක ගැටෙනවා, එයාලාගේ වැරදි හොයනවා. ඒ වගේ අයගෙන් මිනිස්සු ඈත් වෙනවා.

• හොඳ ආත්ම ගෞරවයක් තියෙන කෙනෙක් ජීවිතේට මොන අභියෝග ආවත් හැම දේම අතහැරලා දාන්නේ නැහැ. බාධක බිඳගෙන දිනුම් කණුව වෙන කල්ම යනවා. ඒත් එහෙම නැති අය පොඩි ගලක් වැදුණත් මහ කන්දක් පාත් වුණා වගෙයි හැසිරෙන්නේ. එයා නිකම්ම තරඟය අතහැරලා දානවා.

 ඔයාට කරන්න පුළුවන් දේ

හොඳ යාළුවෝ හොයාගන්න. ඔයාට ගරු කරන, ඔයා ගැන හිතන, ඔයාට හයියක් වෙන අයව ළං කරගන්න.

අනිත් අයට උදව් කරන්න. අනිත් අයට, විශේෂයෙන් ඔයාට ආපිට උදව් කරන්න බැරි අය වෙනුවෙන් දේවල් කරන්න. එතකොට ඔයාට ලොකු සතුටක් ලැබෙයි. ඔයාට ඔයා ගැනම හොඳ හැඟීමක් ඇති වෙයි. කාගෙන්වත් ඔයාට ප්‍රශංසාව ලැබුණේ නැති වුණත් ඒ හැඟීම හැම දේටම වඩා වටිනවා.

තමන් ගැන ගෞරවයක් ඇති කරගන්න දරුවන්ට උදව් කරන්න. එයාලාගේ ප්‍රශ්න එයාලටම විසඳගන්න දෙන්න. උදව් අවශ්‍යම තැනේදී විතරක් මැදිහත් වෙන්න. ජීවිතේ ගැටගැහෙන තැන් ලිහාගන්න එතකොට එයාලා පුරුදු වෙනවා. ඒකෙන් දරුවාගේ ආත්ම විශ්වාසය වැඩි වෙයි. වැඩිහිටියෙක් වුණාට පස්සෙත් ඕනෙම ප්‍රශ්නෙකට මුහුණ දෙන්න ඒක එයාට උදව් වෙයි.