බීර රන්වන් පානයේ කතාව
බීර රන්වන් පානයේ කතාව
චෙක් ජනරජයේ පිබිදෙව්! ලේඛක විසින්
දිව ගිලෙන්න යන තරම් පිපාසයක් තිබෙන කෙනෙකුගේ බොහෝවිට ආශාව වන්නේ කුමක්ද? බොහෝ රටවල, කම්කරුවෙකු වේවා, ව්‍යාපාරිකයෙකු වේවා සිතන්නේ ප්‍රියතම රන්වන් පානයේ වීදුරුවක් ඇත්නම් කියාය. මේ අවස්ථාවේදී, ඔහුගේ සිතේ ඇඳෙනු ඇත්තේ සුදු පෙණ තට්ටුවක් ඉහළට නඟින ප්‍රණීත තික්ත රසක් ඇති පානයයි. එවිට ඔහු තමාටම මෙසේ පැවසිය හැකියි. ‘කීයක් ගියත් කමක් නෑ මේ වෙලාවට සිසිල් බීර වීදුරුවක් ලැබෙනවා නම්!’
මිනිස් වර්ගයාට ඉපැරණි ඉතිහාසයක් තිබෙන්නා සේම බීරවලටද ඉපැරණි ඉතිහාසයක් තිබේ. මෙය සහස්‍ර ගණනාවක් පුරා තම ජනප්‍රියත්වය රැකගෙන තිබෙන අතර බොහෝ පළාත්වල දේශීය සංස්කෘතියට නැතුවම බැරි දෙයක්ද වී ඇත. එහෙත් ඇතැම් යුරෝපීය රටවල අධික ලෙස බීර පානයේ ගැලී සිටින්නන්ට ප්‍රශ්න ඇති වී තිබීම කනගාටුවට කරුණකි. කෙසේවෙතත්, මධ්‍යස්ථ ප්‍රමාණයකට ගන්නා විට එහි ඇති විශිෂ්ට ගුණයන් හා රසය නිසා එය රස නහර පිනවන්නක් වේ. මෙම ජනප්‍රිය බීමෙහි ඉතිහාසය ගැන අපි දැන් සෝදිසි කර බලමු.
එය කෙතරම් ඈත අතීතයකට දිව යන්නක්ද?
මෙසපොතේමියාවෙහි ඉපැරණි සුමේරියානුවන් විසූ පළාතෙන් සොයාගත් කීලාකාර ඵලකයන්වල දක්වා තිබෙන්නේ, ක්‍රි.පූ. තුන්වන සහස්‍රය තරම් ඈත කලක පටන් එහි බීර තිබුණු බවය. එම කාල වකවානුවේදීම මෙම පානය බැබිලෝනිවරුන් හා ඊජිප්තුවරුන් අතරද ප්‍රචලිත පානයක්ව තිබී ඇත. බීර ජාති 19ක් ප්‍රසිද්ධ වී තිබූ බැබිලෝනියෙහි හමුරාබි නීති සංග්‍රහයේ පනවා තිබූ නීති මගින් බීර සෑදීම පවා පාලනය කරන ලදි. උදාහරණයකට බීරවල මිල සම්බන්ධයෙන් සහ බීර සෑදීම සම්බන්ධයෙන් පනවා තිබූ ඕනෑම නීතියක් කඩ කරන්නෙකුට මරණීය දණ්ඩනය නියම කරනු ලැබීය. පුරාණ ඊජිප්තුවේ බීර සෑදීම පුළුල්ව කෙරීගෙන ගොස් ඇති අතර බීර ප්‍රියතම පානයක්ද වී තිබුණි. එහි සිදු කරන ලද පුරාවිද්‍යාත්මක කැණීම්වලදී බීර සෑදීම සඳහා යොදාගත් පැරණිතම ලිඛිත වට්ටෝරුව සොයාගෙන ඇත.
බීර සෑදීමේ තාක්ෂණය යුරෝපය දක්වාද දිව ගියේය. සෙල්ට් ජාතිකයන්, ජර්මන් ජාතිකයන් හා වෙනත් ගෝත්‍රිකයන් ඉතා ආශාවෙන් බීර පානය කරන බව ක්‍රිස්තු වර්ෂ ආරම්භයේදී ඇතැම් රෝමානු ඉතිහාසඥයෝ සඳහන් කළෝය. ස්කැන්ඩිනේවියානු මිථ්‍යා විශ්වාසයකට අනුව, අභීත සටන්කාමීන් මිය ගිය පසු යන්නාවූ ස්ථානය වන වැල්හැල නම් ස්ථානයෙහි පවා මිනිසුන්ගේ කුසලාන බීරවලින් පිරී ඉතිරී ගිය බව වෛකිං ජාතිකයෝ විශ්වාස කළහ.
යුරෝපයේ මධ්‍යතන යුගයේදී බීර සෑදීම බොහෝවිට සිදු කළේ ආරාම තුළදීය. යුරෝපියානු පූජකයන් එම ක්‍රියාවලිය සිදු කිරීම සඳහා යොදාගන්නා තාක්ෂණය දියුණු කළේ බීරමල් කරල් (හොප්ස්) සංරක්ෂණ ද්‍රව්‍යයක් වශයෙන් යොදාගනිමිනි. දහනවවන සියවසේ කර්මාන්ත බිහිවීමත් සමඟම යන්ත්‍ර සූත්‍ර මගින් බීර සෑදීම හඳුන්වා දුණි. මෙය මෙම ජනප්‍රිය පානයේ ඉතිහාසයෙහි වැදගත් සංධිස්ථානයක් බවට පත් විය. ඉන්පසු, ඉතා වැදගත් විද්‍යානුකූල සොයාගැනීම් කීපයක් සිදු කෙරුණි.
ප්‍රංශ රසායනඥයෙකු හා ක්ෂුද්‍රජීව විද්‍යාඥයෙකු වන ලුවී පාස්චර් බීර පැසීමට සලස්වන යීස්ට්වල ජීව ප්‍රාණීන් සිටින බව සොයාගත්තේය. මෙම සොයාගැනීම මගින් සීනි මධ්‍යසාර බවට පරිවර්තනය කිරීමේ ක්‍රියාවලිය වඩාත් නිවැරදිව සිදු කිරීමට මඟ සැලසුණි. ඩෙන්මාර්ක් ජාතික උද්භිද විද්‍යාඥ එමිල් ක්‍රිස්ටියැන් හැන්සන් බීර සෑදීමේ ඉතිහාසයේ කැපීපෙනෙන පුද්ගලයෙක් බවට පත් විය. ඔහු මුළු ජීවිත කාලය පුරාම විවිධ යීස්ට් වර්ග පර්යේෂණය කර වර්ගීකරණය කළේය. පර්යේෂණ කිරීමේදී ඔහුට තිබූ අභිප්‍රායන් අතර බීර සෑදීම සඳහා අමිශ්‍ර යීස්ට් වර්ගයක් රෝපණය කිරීමද විය. මේ ආකාරයෙන් හැන්සන් බීර කර්මාන්තයෙහි සැබෑ පෙරළියක් ඇති කළේය.
එහෙත් බීර සෑදීම ඒ තරම්ම විශාල අභියෝගයක්ද? ඒක එතරම් අමාරු වැඩක් නෙවෙයි කියා පෙනිය හැකියි. ඇත්තෙන්ම එය අරුම පුදුම වැඩකි. දිව පිනවන බීර වීදුරුවක රහස අපි කෙටියෙන් සලකා බලමු.
එය ඔබේ වීදුරුවට ළඟාවීමට පෙර
සියවස් ගණනාවක් පුරා බීර සෑදීමේ තාක්ෂණය සෑහෙන දුරකට වෙනස් වී ඇති අතර අද දින පවා එක් ඉස්කාගාරයක එය සාදන ක්‍රමයට වඩා වෙනත් ඉස්කාගාරයක එය සාදන ක්‍රමය වෙනස්ය. එහෙත් පොදුවේ ගත් කල, සෑම බීර වර්ගයකම බාර්ලි, බීරමල් කරල්, ජලය සහ යීස්ට් යන ද්‍රව්‍ය හතර අඩංගුය. බීර සාදන මුළු ක්‍රියාදාමයම පියවර හතරකට බෙදිය හැක. ඒවා නම් මෝල්ට් සෑදීම, සීනි ද්‍රාවණය සාදාගැනීම, පැසීමට සැලැස්වීම හා පදම් කිරීමය.
මෝල්ට් සෑදීම. මේ පියවරේදී බාර්ලි වර්ග කර, බර කිරා, අනවශ්‍ය කොටස් ඉවත් කර පිරිසිදු කෙරේ. ඉන්පසු ඒවා ජලයෙහි බහා තැබේ. බාර්ලි පැළවීමට නම් අනිවාර්යයෙන්ම එසේ කළ යුතුය. පැළවීම සිදු වන්නේ සෙල්සියස් අංශක 14දී දවස් පහක් සිට හතක් අතර කාල පරිච්ඡේදයක් තුළය. මෙම ක්‍රියාදාමය අවසානයේදී ලැබෙන මෝල්ට් පෝරණුවලට ප්‍රවාහණය කෙරේ. මේවා කොළ පැහැති මෝල්ට් වියළීම සඳහා සකස් කර තිබෙන විශේෂ උදුන්ය. පැළවීමේ ක්‍රියාවලිය නැවැත්වීම සඳහා කොළ පැහැති මෝල්ට්වල තෙතමනය සියයට 2 සිට 5 දක්වා ප්‍රමාණයකට අඩු කෙරේ. පෝරණුවේ දමා වියළීමෙන් පසුව මෝල්ට්වල මොටෙයියන් ඉවත් කර එම ඇට අඹරාගනු ලැබේ. දැන් එය ඊළඟ පියවර සඳහා සූදානම්ය.
සීනි ද්‍රාවණය සාදාගැනීම (වෝට් සෑදීම). තලපයක් සාදාගැනීම සඳහා අඹරාගත් මෝල්ට් ජලය සමඟ මිශ්‍ර කර ක්‍රම ක්‍රමයෙන් රත් කරනු ලැබේ. එක්තරා උෂ්ණත්වයක් යටතේ එන්සයිම මගින් පිෂ්ටය, සරල සීනි බවට පරිවර්තනය කෙරේ. පැය හතරකට වඩා වැඩි කාලයක් මෙම පියවරෙහි පැවති පසු වෝට් ලැබේ. ඉන්පසු එම ද්‍රාවණය පෙරන්නේ අනවශ්‍ය ද්‍රව්‍ය ඉවත් කිරීමටය. ඊළඟට එන්සයිමවල ක්‍රියාකාරිත්වය නතර කිරීමට එම ද්‍රාවණය උණු කෙරේ. මෙසේ උණු කරන අතරතුරේදී වෝට්වලට බීරමල් කරල් එකතු කරන්නේ බීරවලට ආවේණික තික්ත රසය ලබා දීමටය. පැය දෙකක් පමණ උණු කළ පසු එය නියමිත උෂ්ණත්වයකට පැමිණෙන තෙක් සිසිල් කෙරේ.
පැසීමට සැලැස්වීම. මෙය බීර සෑදීමේ ක්‍රියාවලියේ වැදගත්ම පියවර විය හැක. වෝට්වල අඩංගු සරල සීනි යීස්ට් මගින් මධ්‍යසාර හා කාබන් ඩයොක්සයිඩ් බවට පරිවර්තනය කරනු ලැබේ. උපරිම වශයෙන් සතියක් ගත වූ පසු, උෂ්ණත්වය ලබා දෙන ආකාරය අනුව ඒල් හෝ ලාගර් නම් බීර වර්ග සෑදෙයි. ඉන්පසු වෝට් පැසවීම සඳහා ගබඩා කාමරවල තිබෙන ටැංකිවලට යවනු ලැබේ.
පදම් කිරීම. මේ පියවරේදී බීරවලට ආවේණික රසය සහ සුවඳ ලැබේ. මුදාහැරෙන කාබන් ඩයොක්සයිඩ් මගින් බීරවලට දීප්තිමත්බවක්ද ලැබේ. බීර වර්ගයට අනුව පදම් වීමට නම් සති තුනේ සිට මාස කිහිපයක කාල පරිච්ඡේදයක් ගත විය හැක. අවසානයේදී, පදම් කළ බීර බැරල්වල හෝ බෝතල්වල අසුරන අතර යා යුතු තැන්වලට යෑමට දැන් එය සූදානමින් සිටී. සමහරවිට ඒවා නවතිනු ඇත්තේ ඔබේ මේසය මත විය හැකියි! එහෙත් ඔබ කැමති කුමනාකාරයේ බීර වර්ගයක් තොල ගා බලන්නද?
බීර වර්ග රැසක්
එක් බීර වර්ගයක් වෙනත් බීර වර්ගයකට වඩා සෑහෙන වෙනස් විය හැකි බව සැබෑවකි. ලා හෝ තද පැහැති, පැණි රස හෝ තික්ත රස බීර මෙන්ම බාර්ලි හෝ තිරිඟුවලින් සෑදූ බීර පානයේ රස බැලීමට ඔබට හැක. බීරවල රසය රඳා පවතින සාධක බොහොමයක් වේ. මීට ඇතුළත් වන්නේ, භාවිත කරන ජලයේ ගුණාත්මකභාවය, මෝල්ට් වර්ගය, යොදාගන්නා තාක්ෂණය හා පැසවීම සඳහා භාවිත කළ යීස්ට් යනාදියය.
විශිෂ්ට ගණයේ බීර වර්ගයකි පිල්ස්නර් ලෙස හැඳින්වෙන ලා පැහැති ලාගර්. මෙම බීර වර්ගය ලොව පුරා පිහිටි බීර කම්හල්වල සිය දහස් ගණනින් නිපදවන්නකි. කෙසේවුවද, නියම පිල්ස්නර් බීර සාදන්නේ චෙක් ජනරජයේ පිහිටි ප්ලුසෙන්‍යා හෙවත් පිල්සන් නම් නගරයේ පමණකි. එම නිෂ්පාදනයේ රහස රැඳී තිබෙන්නේ තාක්ෂණයෙහි පමණක් නොව භාවිත කරන අමුද්‍රව්‍යද මතය. එනම් මෘදු ජලය, අධිගුණැති මෝල්ට් හා බීර පැසීම සඳහා නිවැරදි යීස්ට් වර්ගය භාවිතයයි.—මෙහි තිබෙන කොටුව බලන්න.
තවත් විශිෂ්ට බීර වර්ගයකි වයිස් නමැති බීර වර්ගය. තිරිඟුවලින් සාදනු ලබන මෙය විශේෂයෙන්ම ජනප්‍රිය වී තිබෙන්නේ ජර්මනියේය. බ්‍රිතාන්‍යයේ ඉදිරියෙන් සිටින්නේ පෝටර් සහ ස්ටවුට් නම් බීර වර්ගයය. හොඳින් කර කළ මෝල්ට්වලින් සාදා ඇති නිසා දීප්තිමත් තද පැහැයක් ගන්නා, වැඩි උෂ්ණත්වයක් යටතේ පැසෙන්න සැලැස්වූ පෝටර් බීර වර්ගය සැර රසයක් දෙන පානයකි. දහඅටවන සියවසේදී මෙය මුලින්ම සාදන ලද්දේ ලන්ඩන්වලය. පෝටර් සෑදීමේ මුල් අභිප්‍රාය වී තිබුණේ පෝටර්වරුන් වැනි බර වැඩ කරන්නන් සඳහා “පෝෂ්‍යදායී” පානයක් වශයෙන් භාවිත කිරීමටය. ගිනිස් පවුල විසින් අයර්ලන්තයේ මෙන්ම ලොව පුරාම ජනප්‍රියත්වයට පත් කරන ලද ස්ටවුට් ඉතා තද පැහැති මෙන්ම සැර බියර් වර්ගයකි. එය සාම්ප්‍රදායික පෝටර්වලට වඩා වෙනස්ය. සාමාන්‍යයෙන් ලැක්ටෝස් අඩංගු (කිරිවල අඩංගු සීනි) මිහිරි රසැති එංගලන්ත ස්ටවුට් හෝ වැඩි මධ්‍යසාර ප්‍රමාණයක් අඩංගු තික්ත රසැති අයර්ලන්ත ස්ටවුට් පානය කර බැලීමට ඔබට හැක.
බෝතලයක, කෑනයක නැතහොත් බැරලයක බහා තිබුණත් බීරවල රස භුක්ති විඳින බොහෝදෙනෙකුට තවත් වැදගත් කරුණක් වන්නේ, එය පානයට ගන්නේ කුමන තත්වයකින්ද යන්නය. අමෙරිකානු ජාතිකයන් කැමැත්තක් දක්වන්නේ බෙහෙවින් ශීත කළ බීර පානය කිරීමටය. තවත් අය කැමති එය කාමර උෂ්ණත්වයේ හෝ යම් තරමක සිසිලකින් පානය කිරීමට මෙන්ම මත්පැන් හලෙහි බීර බැරල්වලින්ම රැගෙන පානය කිරීමටය.
ඇත්තෙන්ම වර්ග රැසකින් යුත් පානයකි බීර. මෙය මධ්‍යම ප්‍රමාණයකට පානය කිරීමෙන් ඔබට සෞඛ්‍යමය අතින් යම් ප්‍රයෝජන ලබාගත හැකිය. ඇත්තවශයෙන්ම, එහි රයිබොෆ්ලේවින්, ෆෝලික් අම්ලය, ක්‍රෝමියම් සහ සින්ක් වැනි අත්‍යවශ්‍ය නොයෙක් විටමින් වර්ග හා ඛනිජ ලවණ අඩංගු වේ. සමහර අධිකාරීන් පවසන පරිදි, මධ්‍ය ප්‍රමාණයකට බීර පානය කිරීම හෘද රෝග හා සමේ රෝග වළක්වාලීමට උපකාරවත් විය හැක. තිබෙන්නාවූ විවිධ ජාතිවලින් හා වර්ගවලින් ඔබ හොඳ ඒවා තෝරගන්නවා නම් සහ ඔබ අධික ලෙස පානය නොකරනවා නම් රසයෙන් අනූන, ප්‍රබෝධය ගෙන දෙන මෙම පානය ඔබ ප්‍රීතියෙන් භුක්ති විඳිනු ඇත. එබැවින්, සුදු පෙණ තට්ටුවකින් කිරුළු පළන් රන්වන් පානයේ වීදුරුවක් ඉදිරිපිට ඔබ සිටින ඊළඟ මොහොතේදී එහි මනබඳින ඉතිහාසය ගැනත් මතකයට නඟන්න.
[29වන පිටුවේ කොටුව⁄පින්තූරය]
ඉදිරියෙන්ම සිටින්නෝ
අතීතයේදී පුහුණුව ලත් විශාල පිරිසක් බීර නිපදවීමෙහි හවුල් වී ඇත. මෙන්න ඔවුන්ගෙන් සමහරෙක්.
▪ මෝල්ස්ටර්—බීර සෑදීමේ කර්තව්‍යයෙහි මූලිකත්වය ගත් තැනැත්තාය. බාර්ලි හෝ තිරිඟුවලින් මෝල්ට් නිපදවීමට ඔහු පැවරුම් ලැබුවේය. ඔහු ධාන්‍ය පැළ වෙන බවත් කොළ පැහැති මෝල්ට් උදුනෙහි වියළාගත හැකි බවත් පරීක්ෂණය කර සොයාගත්තේය. බීරවල රසය සෑහෙන දුරකට රඳා පැවතියේ මෝල්ට්වල ගුණාත්මකභාවය මත බැවින් ඔහුගේ කර පිට බරපතළ වගකීමක් පැටවී තිබුණි.
▪ බෲවර් (ඉහත පෙන්වා ඇත)—උණු කිරීම භාර වී තිබුණ තැනැත්තාය. පළමුව, ඔහු ජලය සමඟ මෝල්ට් මිශ්‍ර කර තලපයක් සාදා එය උණු කරන අතරතුර බීරමල් කරල් ඊට එකතු කළේය. ඔහුගේ නිෂ්පාදනයේ අවසාන අදියර වූයේ වෝට් පිළියෙල කිරීමය.
▪ සෙලර් මාස්ටර්—කල්දේරම්වල බීර පැසෙන ආකාරයත්, එය ගබඩා කාමරයේ පදම් වෙන ආකාරයත් පරීක්ෂා කළ පළපුරුදු විශේෂඥයෙකි. ඉන්පසු, ඔහු සාදා අවසන් කළ බීර කුඩා භාජනවලට දැමුවේය.
[හිමිකම් විස්තර]
S laskavým svolením Pivovarského muzea v Plzni
[30වන පිටුවේ කොටුව⁄පින්තූර]
පිල්ස්නර්
[Caption on page 30]
වැඩියෙන්ම අනුකරණයට ලක් වූ ප්‍රථමයා
මෙහි පටන්ගැන්ම සිදු වූයේ 1295දීය. බොහෙමියාහි IIවන වෙන්සස්ලස් රජ ප්ලුසෙන්‍යා නගරය පිහිටෙවූ අතර ඊට ටික කලකට පසු එහි පුරවැසියන් 260දෙනෙකුට බීර සෑදීමේ අයිතිය පැවරුවේය. මුලදී, එම පුරවැසියන් තම නිවෙස්වලම බීර සෑදුවේ කුඩා පරිමාණයෙන් වුවත් පසු කලෙක ඔවුහු වෙළඳුන්ගේ සංගමයක් මෙන්ම ඉස්කාගාරද පිහිටෙව්වෝය. කෙසේවුවද, කල් යත්ම, බොහෙමියාහි ආර්ථිකය හා සංස්කෘතිය පහත වැටුණු අතර එය බීර සෑදීමට බලපෑවේය. අනුමැතිය ලත් තාක්ෂණය නොසලකාහරිමින් තමන්ට රිසි සේ යම් අමුද්‍රව්‍ය හා ක්‍රම භාවිත කරමින් බීර සාදන්නෝ බොහෝවිට නිෂ්පාදනය කළේ බීර කියා නම් කිරීමට පවා නොවටිනා අමිහිරි පානයකි.
ඒ කාලයේදී යුරෝපයෙහි බීර ජාති දෙකක් නිෂ්පාදනය කෙරුණි. වැඩි උෂ්ණත්වයේදී පැසීමට සැලැස්වූ බීර විශේෂයෙන්ම සාදන ලද්දේ බොහෙමියාහි වූ අතර අඩු උෂ්ණත්වයේ පැසීමට සැලැස්වූ ඊට වඩා හොඳ බීර වර්ගයක් ප්‍රධාන වශයෙන් බවේරියාහි ප්‍රසිද්ධ වී තිබුණි. බවේරියානු ලාගර් සහ ප්ලුසෙන්‍යා බීර අතර විශාල වෙනසක් තිබුණේය.
වැදගත් සංධිස්ථානයකට පැමිණියේ 1839දීය. උද්ගත වී තිබූ තත්වය සම්බන්ධයෙන් යමක් කිරීමට ප්ලුසෙන්‍යා ජාතිකයෝ 200දෙනෙක් පමණ තීරණය කළෝය. ඔවුන් බර්ජෙස් ඉස්කාගාරය පිහිටෙවූ අතර එහි සෑදුවේ අඩු උෂ්ණත්වයේ පැසීමට සැලැස්වූ බීර නොහොත් බවේරියන් වර්ගයේ බීර පමණකි. සුප්‍රසිද්ධ බීර සාදන්නෙකු වූ යෝසෙෆ් ග්‍රෝල්ව බවේරියාවෙන් ගෙන්වාගන්නා ලදි. නියම බවේරියානු බීර නිෂ්පාදනය සඳහා ඔහු අප්‍රමාදව වැඩේට අත ගැසුවේය. ඉතා වෙනස් ප්‍රතිඵලයක් ලැබුණත් ඔහු සිතුවාට වඩා බෙහෙවින් යහපත් තත්වයක්ද උදා වුණි. අග්‍රගණයේ දේශීය අමුද්‍රව්‍ය සමඟම ග්‍රෝල්ගේ පළපුරුද්ද ලෝකයේ ආදරය දිනාගත් බීර වර්ගයක් නිෂ්පාදනය කිරීමට උපකාරයක් විය. ඒ මන්ද? එයටම ආවේණික වූ රසය, පැහැය සහ සුවඳ නිසාය. කෙසේවෙතත්, ප්ලුසෙන්‍යා බීරවල කීර්තියෙහි අවාසිද නොතිබුණා නොවේ. මෙම සඵලත්වයෙන් වාසි ගැනීමේ අදහසින් බීර සාදන්නෝ බොහෝදෙනෙක් තම නිෂ්පාදනවලටද පිල්ස්නර් යන නම දැමූහ. මෙබැවින් පිල්ස්නර් ප්‍රසිද්ධියක් ලබාගෙන සිටිනවා පමණක් නොව වැඩියෙන්ම අනුකරණයට ලක් වූ පානය බවටද පත් වී සිටියි.
[පින්තූර]
යෝසෙෆ් ග්‍රෝල්
පිල්සන් ඉස්කාගාරයක වතුර ටැංකියක්
[හිමිකම් විස්තර]
S laskavým svolením Pivovarského muzea v Plzni
[30වන පිටුවේ සිතියම]
(මුද්‍රිත පිටපත බලන්න)
පිල්සන්
[28, 29වන පිටුවේ පින්තූරය]
පාන් හා බීර සාදන ආකාරය දැක්වෙන ඊජිප්තු ආකෘතියක්
[හිමිකම් විස්තර]
Su concessione del Ministero per i Beni e le Attività Culturali-Museo Egizio-Torino
[31වන පිටුවේ පින්තූර]
බීරමල් කරල්, මෝල්ට් සහ බීර සාදන ස්ථානය