සැලකිලිමත් දෙවි කෙනෙක්!

ඒදන් උයනේදී කැරලිගැසූ අය සමඟ දෙවි ක්‍රියා කළ විදිහෙන් ඔහු අප එක් එක්කෙනාට දක්වන නොසැලෙන ප්‍රේමය හා අපේ අනාගතය ගැන දක්වන සැලකිල්ල පැහැදිලි වෙනවා. ඒ ගැන තිබෙන සාක්ෂි කියවන අතරේ මෙහි සඳහන් ශුද්ධ ලියවිලි පදත් ඔබේම බයිබලයෙන් කියවා බලන්න.

● ඔහු පොළොව සාදා තිබෙන්නේ වෛවර්ණ සත්තු හා සාරවත් භූමියකින් හෙබි සොබාදහමේ අලංකාරය ඇතුවයි.—ක්‍රියා 14:17; රෝම 1:20.

● අපට ලබා දී තිබෙන්නේ දිනෙන් දින ප්‍රණීත ආහාරයක රස බලන්න, බැස යන හිරු දෙස බලා ඉන්න, සිඟිති සිනා හඬට සවන් දෙන්න, ආදරය කරන්නෙකුගේ ස්නේහය විඳින්න හැකි විශ්මයජනක ශරීරයක්.—ගීතාවලිය 139:14.

● ගැටලු හා පීඩනවලට ඔරොත්තු දීමට අවශ්‍ය වන නැණවත් උපදෙස් ඔහු අපට ලබා දී තිබෙනවා.—ගීතාවලිය 19:7, 8; 119:105; යෙසායා 48:17, 18.

● පාරාදීස පොළොවක ජීවත් වීමේ හා අපේ මිය ගිය ප්‍රේමණීයයන්ව නැවත නැඟිටුවනවා දැකීමේ අපූරු බලාපොරොත්තුවත් අපිට ලැබී තිබෙන්නේ ඔහුගෙන්.—ලූක් 23:43; යොහන් 5:28, 29.

● අපට සදහටම ජීවත් වීමේ බලාපොරොත්තුව ඇතුව සිටිය හැකි වන පිණිස ඔහුගේ එකම පුත්‍රයාව එව්වා අප වෙනුවෙන් දිවි පිදීමට.—යොහන් 3:16.

● ඔහු ස්වර්ගයෙහි දේවරාජ්‍යය පිහිටුවා තිබෙන අතර ළඟදීම පොළොවේ පාලනය සම්පූර්ණයෙන්ම එම රාජ්‍යය යටතට ගන්නා බවටද බහුල ලෙස අපට සාක්ෂි දී තිබෙනවා.—යෙසායා 9:6, 7; මතෙව් 24:3, 4, 7; එළිදරව් 11:15; 12:10.

● යාච්ඤාව මගින් අපේ සිතේ තිබෙන දේ කියන්න කියා ඔහු අපෙන් ඉල්ලනවා. අනිවාර්යයෙන්ම ඔහු අපට සවන් දෙනවා.—ගීතාවලිය 62:8; 1 යොහන් 5:14, 15.

● මිනිසුන් කෙරෙහි ඔහු දක්වන ගැඹුරු ප්‍රේමය හා සැලකිල්ල ගැන ඔහු යළි යළිත් සහතික කරනවා.—1 යොහන් 4:9, 10, 19.