මගේ අඳුරු ලොවට පෑයූ ආලෝකය

පැවසුවේ බොරිස් එන්. ගුලෂෙෆ්ස්කි විසින්

මම මේ සෑම දෙයක්ම අද්දුටුවේ මීට අවුරුදු 11කට විතර කලිනුයි. මම දරුණු හෘදයාබාධ දෙකකට මුහුණු දුන්නා. එතකොට මට අවුරුදු 65ක් විතර ඇති. මම අන්ධයි. මේ කාලයේදී මට දෙවිව හඳුනාගැනීමට ලැබුණු අවස්ථාව ගැන මම දෙවිට බොහෝසෙයින් ස්තුතිවන්ත වෙනවා.

මම උපත ලැබුවේ 1930දී යුක්රේනයේ කුඩා ගමකයි. වර්ෂ 1937දී ඇති වූ දරුණු දේශපාලනික තත්වය නිසා මගේ තාත්තාව “දේශ ද්‍රෝහියෙක්” කියා අත්අඩංගුවට ගත්තා. ඒ විතරක් නෙවෙයි අපේ නවාතැනත් රාජසන්තක කළා. අපිත් එක්ක ළඟින්ම ආශ්‍රය කළ අය පවා අපෙන් ඈත් වුණා. ඒත් වැඩි කල් යන්න මත්තෙන් ඒ අයගෙන් බොහෝදෙනෙක්වත් අත්අඩංගුවට ගත්තා. මේ කාලය එකිනෙකා අතර කිසිම විශ්වාසයක් නැති එකිනෙකාව පාවා දුන් කාලයක් කියා කියන්න පුළුවන්.

මගේ තාත්තාව අත්අඩංගුවට අරගෙන මාස දෙකකට පස්සේ මගේ නංගී ලීනා ඉපදුණා. මගේ අම්මයි, අයියා නිකෝලායි, නංගීයි, මමයි සීත කාලය ගත කළේ පුංචි කාමරයකයි. මේ කාමරයේ ජනෙල් තිබුණේ නැහැ. අපි හිටියේ තද සීතලේ ගැහිගැහීයි. ඊටපස්සේ අපි අපේ සීයාගේ ගෙදර නතර වෙන්න ගියා. මමයි අයියායි දර පැළුවා, කැඩුණු බිඳුණු බඩු හැදුවා, මේ ආකාරයට ගෙදර දොරේ හැම වැඩක්ම අපි කළා. මම දෑතේ වැඩවලටත් ආසයි. ඒ නිසා මම සපත්තු හැදුවා, වඩු වැඩත් කළා. ඒ වගේම සංගීතයටත් ඇල්මක් තිබුණ නිසා මට ලැබුණු ලීයකින් මම සංගීත භාණ්ඩයක් (balaika) හැදුවා. මෙය මැන්ඩලීනයක් වගේ වුණාට හැඩය ත්‍රිකෝණාකාරයි. මම මේක වාදනය කරන්නත් පුරුදු වුණා. පස්සේ කාලයකදී මම ගිටාරය හා මැන්ඩලීනය වයන්න පුහුණු වුණා.

මාව කතෝලික පල්ලියේ ක්‍රමයට බව්තීස්ම කරලයි තිබුණේ. ඒත් පල්ලියේ උගන්වන දේවල් මට තේරුණේ නැති නිසා මම දෙවි කෙනෙක් ගැන විශ්වාස කළේ නැහැ. දෙවෙනි ලෝක මහ යුද්ධයෙන් පස්සේ මම කොමියුනිස්ට් යෞවන සමාජයකට (Komsomol) බැඳුණා. අපිට අවස්ථාවක් ලැබුණු විට අපි කළේ  දෙවි කෙනෙක් ඉන්නවා කියලා විශ්වාස කරන අයගේ විශ්වාසය බිඳින්න තර්ක ඉදිරිපත් කිරීමයි.

මගේ පෙනීම නැති වූ විට

ජර්මනියේ හමුදාව සෝවියට් ජනරජයට 1941දී පහර දීමෙන් පස්සේ දෙවෙනි ලෝක මහ යුද්ධ සමයේදී සොල්දාදු භටයන් අපේ ගම හරහා කිහිප වතාවක්ම ගමන්ගත්තා. වර්ෂ 1944 මාර්තු 16වෙනිදා සිදු වූ බෝම්බ ප්‍රහාරයෙන් මගේ ඇස් පෙනීම නැතුව ගියා. මට දැනුණේ මගේ මුළු ජීවිතයම අඳුරේ වැටුණා කියලයි. මගේ ඇස්වල වේදනාව වගේම මට ලොකු කලකිරීමකුත් ඇති වුණා.

හමුදා දෙක විසිරී ගියාට පස්සේ මම වැඩිපුර වේලාවක් වත්තේ ඉන්න පුරුදු වුණා. කුරුල්ලන්ගේ කීචි බීචි නාදයට මම හුඟක් ආශා කළා. මගේ තත්වය ගැන දුක හිතිලා අම්මා මට සැර බීම ජාතියක් (වොඩ්ගා) දුන්නා. ඒ වගේම අසල්වැසියෝ මට ඒ අයගේ උත්සවවලට ආරාධනා කළා. මම ඒ උත්සවවලදී සංගීත භාණ්ඩ වාදනය කළා. මගේ දුක වේදනාව තුනී කරගැනීමේ අදහසින් මම දුම්පානයටත් බීමටත් ඇබ්බැහි වුණා. වැඩි කලක් නොගොස් මම තේරුම්ගත්තා මේවා මගේ ප්‍රශ්නෙට පිළිතුර නෙවෙයි කියලා.

මගේ පුංචි අම්මා ගුරුවරියක්. ඇය අන්ධ අය සඳහා තිබෙන පාසැලක් ගැන තොරතුරු දැනගෙන ඒ පාසැලට මාව ඇතුලත් කරන්න කියලා අම්මාට කිව්වා. ඒ අනුව මම 1946දී මෙම පාසැලට ඇතුල් වී ඉගෙනීමේ කටයුතු වුවනාවෙන් කළා. මම බ්‍රේල්වලින් ලියන්න හා කියවන්න ඉගෙනගත්තා. සංගීතය සඳහා ආශාවක් තිබුණු නිසා ඒකත් ඉගෙනගත්තා. මම එකෝඩියන් එකට සමාන ඒත් ඊට වඩා කුඩා සංගීත භාණ්ඩයක් (concertina) හොඳින් වාදනය කිරීම සඳහා පැය ගණන් පුහුණු වුණා. මගේ මේ උත්සාහය දුටු උපවිදුහල්පති මට ඔහුගේ එකෝඩියන් එක වාදනය කරන්න අවසර දුන්නා. මම පසුව පියානෝව වාදනය කරන්නත් ඉගෙනගත්තා.

මගේ පුංචි කැදැල්ල

මගේ ඉගෙනීමේ කටයුතුවලට මට උපකාර කළ ගුරුවරියක් සමඟ මම 1948දී විවාහ වුණා. ඇගේ ස්වාමිපුරුෂයා යුද්ධ කාලයේදී මිය ගිහින් තිබුණු අතර ඇයට ගැහැනු දරුවෝ දෙන්නෙක් සිටියා. මම පාසැල් අධ්‍යාපනය අවසන් කළාට පසු ඇගේ නිවසේ පදිංචියට ගියා. හොඳ තාත්තා කෙනෙක් මෙන්ම හොඳ ස්වාමිපුරුෂයෙක් වීමට කරන්න පුළුවන් හැමදේම මම කළා. පවුලට අවශ්‍ය දේ සැපයීම සඳහා මුදල් සොයාගැනීමට මම සංගීත භාණ්ඩ වාදනය කළා. වර්ෂ 1952දී අපේ කැදැල්ලට තවත් එක්කෙනෙක් එකතු වුණා. ඒ අපේ පුතායි.

මම අපිටම කියලා ගෙයක් හදන්න පටන්ගත්තා. අත්තිවාරම හා බිත්ති නග්ගන්න විතරක් මිනිසුන්ව කුලියට ගත්තත් අනිකුත් බොහෝ දේ නිම වුණේ මගේ දෑතින්මයි. දැනීම හා උපකල්පනය මට මගේ අන්ධභාවය මඟහරවාගෙන වැඩ කිරීමට ලොකු රුකුලක් වුණා. මම ලී කෑල්ලක් අතට අරගෙන එය හොඳට අත ගා බලලා ඒකෙන් හදන්න පුළුවන් දේ සිතින් මවාගන්නවා. ඊට පස්සේ මම ඒකෙන් භාණ්ඩයක් හදනවා. මේ විදිහට ගෙදරට අවශ්‍ය ගෘහ භාණ්ඩ ඇතුළු වෙනත් විවිධ දෑ හැදුවා.

සංගීත වාද්‍ය කණ්ඩායමක්

මම සංගීතය දිගටම හදාරා සංගීතඥයෙක් වුණා. බොහෝ සංගීත භාණ්ඩ වාදනය කිරීමේ හැකියාව දියුණු කරගත් පසු නළා වාදනය කරන්නත් ඉගෙනගත්තා. මට එක දවසක් කැඩුණු බට නළාවක් හදන්න ලැබුණා. ටික කාලයක් යන කොට තනියම නළා නිර්මාණය කරන්න මට පුළුවන් වුණා. ඒ කාලයේදී සංගීතඥයන් පහත් ස්වර (base notes) වාදනය කළ හැකි  නළා සෑදිය හැකි බව දැන සිටියේ නැහැ. නළා ලොකු වන විට එහි ශබ්දය බෙහෙවින් අඩු වෙයි කියා සිතුවා. නළා මගින් සංගීතය සැපයිය හැකි සංගීත වාද්‍ය කණ්ඩායම් (ochestra) බිහි නොවුණේ ඒ නිසයි.

කෙසේවෙතත් මට පහත් ස්වර වාදනය කළ හැකි නළාවක් හදන්න හැකි වුණා. මෙම ස්වරවල ශබ්දයේ අඩුවීමක් නැතිව වාදනය කළ හැකි වීම මම ලද ලොකු ජයග්‍රහණයක්. කාලයක් යන විට විවිධ ස්වර වාදනය කළ හැකි එකම කාණ්ඩයට අයත් නළා කිහිපයක් හදන්නත් මට හැකි වුණා.

මීට පෙර මම සම්ප්‍රදායි සංගීත භාණ්ඩ ඇතුළත් සංගීත වාද්‍ය කණ්ඩායම් සංවිධානය කර තිබුණා. මම සංවිධානය කළ එක් සංගීත වාද්‍ය කණ්ඩායමක සිටි සියලුදෙනාම අන්ධයි. මම 1960දී නළා පමණක් ඇතුළත් සංගීත වාද්‍ය කණ්ඩායමක් සංවිධානය කළා. මෙවැනි සංගීත කණ්ඩායමක් මුළු සෝවියට් ජනරජයේම තිබුණේ නැහැ. සමහරවිට මෙවැනි කණ්ඩායමක් ලෝකයේ වෙනත් කිසිම රටක නොතිබෙන්නත් ඇති.

සොයාගැනීම් හා සැක

වර්ෂ 1960දී මගේ සමහර සංගීත භාණ්ඩ අලුත්වැඩියා කළ ප්‍රවීණයෙක් මට ඔහුගේ ආගම ගැන විස්තර කිව්වා. මම දෙවි කෙනෙක් නැහැයි කියා ඔහු සමඟත් තර්ක කළා. ඔහු මට පැවසුවා, ඔහු බයිබලය කියවන විට එයට සවන් දෙන්න කියලා. මම කවදාවත් බයිබලය කියවා නැති නිසා ඔහු කියූ දෙයට මම එකඟ වුණා.

යාකොබ් ඔහුගේ පවුලේ අයට අවශ්‍ය දේ ලබා දීම සඳහා මහන්සි වී වැඩ කළා යන කොටස මගේ සිතට තදින් කාවැදුණා. යෝසෙප්ව ඔහුගේ සහෝදරයන් වහල්කමට විකිණීම ගැනත් ඔහු අද්දුටු පීඩා ගැනත් ඉන්පසු ඔහු තමන්ගේ සහෝදරයන්ට සමාව දුන් ආකාරය ගැනත් කියවන විට මගේ ඇස්වලට කඳුළු ආවා. (උත්පත්ති පරිච්ඡේද 37, 39-45) ඒ වගේම මම රන් අණත් හුඟක් අගය කරනවා. ඒ කියන්නේ යම් කෙනෙක් අපිට යමක් කරනවාට කැමති නම් අපිත් ඒ දේම ඔහුට කළ යුතුයි කියන එක. (මතෙව් 7:12) මේ ආකාරයට මම බයිබලයේ තිබෙන දේවල් දැනගත් අතර ඒවාට ලොකු ලැදිකමක් දැක්වුවා.

මම මගේ යාළුවන් එක්ක බැප්ටිස්ට් පල්ලියට ගියා. මට එහිදී බ්‍රේල්වලින් “අලුත් ගිවිසුමක්” දුන්නා. මම ඒක වුවමනාවෙන් කියෙව්වා. පල්ලියේ කියන දේ හා බයිබලයේ තිබෙන දේ අතර වෙනස මම දැක්කා. උදාහරණයක් ලෙස දෙවි සහ යේසුස් කියන්නේ දෙදෙනෙකුට බවත් දෙවි යේසුස්ට වඩා උතුම් බවත් බයිබලයේ පැහැදිලි කර තිබෙනවා. (මතෙව් 3:16, 17; යොහන් 14:28; ක්‍රියා 2:32) ඒත් බැප්ටිස් පල්ලියේ උගන්වන්නේ දෙවි සහ යේසුස් යන දෙදෙනාම එක්කෙනෙක් කියලයි. ඒ වගේම ඔවුන් ත්‍රිත්වයේ කොටසක් කියලත් උගන්වනවා. මම “අලුත් ගිවිසුම” වාර ගණනාවක්ම කියෙව්වා. පල්ලියේ ඉගැන්වීම් බයිබලයට පටහැනි බව මම තේරුම්ගත්තා.

අපි භාවිත කළ බයිබලයේ “නිරය” යන වචනය යොදා තිබුණා. බැප්ටිස්ට් පල්ලියේ උගන්වන ආකාරයට නිරය කියන්නේ සාදාකාලිකවම පිළිස්සෙමින් වද විඳින ස්ථානයක්. බයිබලයේ පවසන්නේ දෙවි ප්‍රේමණීය කෙනෙක් කියලයි. එහෙමනම් නිරය වගේ තැනක මිනිසුන්ව දායිද කියන එක මට ලොකු ප්‍රහේළිකාවක් වුණා. (1 යොහන් 4:8) කාලයත් සමඟ මට බැප්ටිස්ට් පල්ලියේ ඉගැන්වීම් ගැන තිබුණු සැක වැඩි වුණා.

විශාල වෙනස්වීම්

මගේ භාර්යාවගේ දූවරුන් දෙදෙනා 1968 වන විට විවාහ වී ඔවුන්ටත් දරුවෝ සිටියා. මේ කාලයේදී මගේ භාර්යාවයි මායි අතර ලොකු ආරවුල් ඇති වුණා. මට ඒ කාලය ගැන දැන් මතක් වෙනකොටත් දුකයි. අපි දෙන්නා ඒ කාලයේදී එකිනෙකාට ප්‍රේමය පෙන්නුවේවත් අපිට ඉවසීම තිබුණේවත් නැහැ. අපි දික්කසාද වුණා. ඊට පස්සේ මම කරගත් විවාහ දෙකත් අසාර්ථක වී ඒවාත් දික්කසාදයෙන් කෙළවර වුණා.

මම අවුරුදු 35ක් පදිංචි වී සිටි නගරය අතහැර දමා 1981දී මොස්කොව් නගරයට කිලෝමීටර් 600ක් නැඟෙනහිරින් පිහිටි යෙෂ්කාර් ඕලා නගරයේ පදිංචියට ගියා. මම එහිදී නැවතත් මගේ සංගීතය හා සම්බන්ධ වැඩ කරන්න පටන්ගත්තා. මගේ එක් සංගීත වාද්‍ය කණ්ඩයාමක සාමාජිකයන් 45දෙනෙක් සිටියා. මේ අය හැමෝම විවිධ නළා වාදනය කළා. මේ නළා අතරින් කුඩාම නළාව වුණේ සෙන්ටිමීටර් 20ක් දිගැති, සෙන්ටිමීටරයකට වඩා අඩු විශ්කම්භයකින් යුත් උච්ච ස්වරයෙන් වාදනය කළ හැකි නළාවයි. එහි තිබූ විශාලතම නළාව මීටර් 3ක් දිග, විශ්කම්භය සෙන්ටිමීටර් 20ක් පමණ වෙනවා. මෙයින් පහත් ස්වර වාදනය කිරීමට හැකිකම තිබුණා. අපේ මෙම වැඩසටහන ගුවන්විදුලියෙන් මෙන්ම රූපවාහිනියෙන්ද ප්‍රචාරය කරනු ලැබුවා. අපි රට වටේම ගිහින් මෙම සන්දර්ශනය පැවැත්තුවා.

සෝවියට් ජනරජයේ 1986දී සංගීත කණ්ඩායම් සඳහා පවත්වනු ලැබු තරඟයකදී නළා සංගීතය දියුණු කිරීම සම්බන්ධයෙන් මට සහතිකයක් මෙන්ම පදක්කමක්ද ලැබුණා. ඉන් වසර කිහිපයකට පසු සංගීතඥයෙකුගේ සුරංගනා කතාව (the Fairy Tale of a Musician) නමින් චිත්‍රපටියක් නිර්මාණය වුණා. එක් පුවත්පතක ඒ ගැන මෙසේ සඳහන් වුණා. “මෙම චිත්‍රපටියේ ප්‍රධාන චරිතයෙන් පිළිඹිබු වූ බොරිස් එන්. ගුලෂෙෆ්ස්කි නළා පමණක් යොදාගැනුණු සංගීත කණ්ඩායමක් බිහි කළ සංගීතඥයෙක් ලෙස විශේෂ සහතිකයක් ලැබුවා. මෙය මුළු රුසියාවේම තිබෙන එකම නළා වාද්‍ය කණ්ඩායමයි.”—Mariiskaya Pravda නම් පුවත්පත ඇසුරෙනි.

 සත්‍යය සොයා

මම යෙෂ්කාර් ඕලා නගරයේ පිහිටි පුස්තකාලයේ සාමාජිකත්වය ලබාගත්තා. අන්ධ අයට කියවීමට අවශ්‍යය පොත් පත් රාශ්‍රියක් මෙහි තිබුණා. මට කතෝලික, පෙන්තකොස්ත හා මෙතෝදිස්ත ඉගැන්වීම් ගැන පුළුල් දැනුමක් ලබාගැනීමට මෙය උපකාරවත් වුණා. මම ඕතඩොක්ස් පල්ලියේ රැස්වීම්වලටත් සහභාගි වුණා. එහි ඉගැන්වූවේත් බැප්ටිස්ට් පල්ලියේ ඉගැන්වූ දේවල්මයි. ඒවා බයිබලයේ තිබෙන අදහස්වලට පටහැනියි කියා මම ඒ වන විට දැනගෙන සිටියා.

ඕතඩොක්ස් පල්ලියේ පූජකයෙක් දෙවිගේ නම යෙහෝවා බව පොතක සඳහන් කර තිබුණා. ඒ වගේම යුදෙව්වන් කලක් පවිත්‍ර නමස්කාරයක යෙදුණු බවත් ඒවා දූෂ්‍යය වුණේ මිථ්‍යා ඉගැන්වීම්වල බලපෑම නිසා බවත් එහි පෙන්වා තිබුණා. ඔහුගේ මෙම අදහස් මගේ සිතට තදින් කාවැදුණු නිසා සත්‍යය සෙවීමට තිබුණු මගේ ආශාව තවත් වැඩි වුණා.

ස්ථිර අධිෂ්ඨානයක්

මගේ එක් සංගීත වාද්‍ය කණ්ඩායමක ලීසා නම් තැනැත්තියක් සිටියා. ඇයගේ ඇස් පෙනීම කොතරම් දුර්වලද කියනවා නම් ඇයත් අන්ධ කෙනෙක් හා සමානයි. අපි දෙන්නා 1990දී විවාහ වුණා. ඇයත් දෙවි ගැන සත්‍යය දැනගැනීමට ලොකු කැමැත්තක් දැක්වූවා. මම ඒ අවුරුද්දේ මගේ නංගීගේ රැකවරණය යටතේ සිටි මගේ අම්මාව බලන්න ගියා. මවගේ දැඩි වුවමනාව නිසා මම කතෝලික පල්ලියට ගිහින් සත්ප්‍රසාද ලැබුවා. මේ කාලයේදී සෝවියට් ජනරජය විශාල වශයෙන් දේශපාලනික වෙනස්කම්වලට මුහුණ දෙමින් තිබූ කාලයක් නිසා පූජකයා ඔහුගේ දේශනාවේ වැඩියෙන් කතා කළේ දේශපාලන කටයුතු සම්බන්ධවයි. මෙය සත්‍යය ආගම නොවන බව එයින් මට තවත් තහවුරු වුණා.

වර්ෂ 1994දී මම දරුණු හෘදයාබාධා දෙකකට මුහුණ දුන් නිසා හුඟක් අසනීප වුණා. මගේ මවත් මියැදුණේ ඒ වසරේදීමයි. මේ මොන බාධා කරදර පැමිණියත් මම බයිබලය කියවන එක අත්හැරියේ නැහැ. මම මේ වන විට “අලුත් ගිවිසුම” 25වතාවක් කියවා තිබුණ නමුත් ඊට පස්සේ කියවූ වාර ගණන මම මතක තියාගත්තේ නැහැ. මම නැවත නැවත කියවන විට මට ඇති වූ ප්‍රශ්නත් එමටයි. මේ නිසා බයිබලය තනියම කියවා තේරුම්ගන්න බැහැ කියලා මට වැටහුණා.

තේරුම්ගැනීමට උපකාරයක්

යෙහෝවා දෙවිගේ සාක්ෂිකරුවන් අපේ ගෙදරට 1996දී පැමිණියා. ප්‍රවෘත්ති පත්‍රවල ඔවුන් භයානක කල්ලියක් කියා හඳුන්වන නිසා මට මේ අය ගැන සැකයක් තිබුණා. ඒත් මම හිතුවා ‘මේ අය මට මොනවා කරන්නද කියලා?’ මම ඒ අයගෙන් මුලින්ම ඇහුවේ ත්‍රිත්වය ගැන මොනවාද හිතන්නේ කියලයි. බයිබලයේ එවැනි ඉගැන්වීමක් නැති බවත් ත්‍රිත්වය යන වචනයවත් එහි සඳහන් වෙන්නේ නැති බවත් ඔවුන් පැවසුවා. මමත් ඒ වෙනකොට එවැනි නිගමනයකට එළඹී තිබුණු නිසා මට ලොකු සතුටක් දැනුණා.

මම රුසියානු භාෂාවෙන් තිබුණු බයිබලයේ නික්මයාම 6:3හි දෙවිගේ නම යෙහෝවා කියා කියෙව්වාම මගේ හද ගැස්ම නතර වුණා වගෙයි මට දැනුණේ. එතකොටයි මට වැටහුණේ දෙවිගේ නම අන් අය දැනගැනීමෙන් වළක්වන්න ආගම් කොතරම් ප්‍රෝඩාවක් කර තිබෙනවාද කියලා. අනිත් අතට යෙහෝවා දෙවිගේ සාක්ෂිකරුවන් විශ්වයේ නිර්මාතෘගේ නම දරනවා පමණක් නොව අන් අයටත් ඒ නම කියා දෙනවා. මෙය මොන තරම් විශිෂ්ට දෙයක්ද!—යෙසායා 43:10.

මම ඔවුන්ගෙන් ප්‍රශ්න වැලක් ඇහුවා. උදාහරණයක් ලෙස “බයිබලයේ නිරයක් ගැන සඳහන් වෙන්නේ ඇයි? රුසියාවේ පිළිගත් බයිබලයක (synodal version) පොළොව ගින්නෙන් විනාශ වන බව පවසා තිබෙන්නේ ඇයි?” මේ හැම ප්‍රශ්නයකට මට බයිබලයෙන් පිළිතුරු ලැබුණු විට මම දැනගත්තා මම කාලයක් තිස්සේ හොයමින් සිටි සත්‍ය ආගම මට සම්බ වුණා කියලා. මම කඳුළු පිරුණු දෑසින් යුතුව දණින් වැටී දෙවිට ස්තුති කළා.

සාක්ෂිකරුවන් මාව වැඩිකල් නොගොස් රැස්වීම්වලට ගෙන ගියා. රැස්වීම්වලදී තිබූ නිහඬතාවයෙන් හා බයිබලයේ පිටු පෙරළෙන හඬින් ඔවුන් දැක්වූ අවධානය මගේ සිත්ගත්තා. කථිකයා බයිබල් පදයක් පැවසූ විට සබයේ සිටි සියලුදෙනාම තමන්ගේ බයිබල්වලින් එය පෙරළා බැලුවා. මම කවදාවත් එවැනි දෙයක් දැක තිබුණේ නැහැ. එක රැස්වීමකදී සාක්ෂිකරුවන් ගැයූ ගීතිකාවක් පදනම් වී තිබුණේ යෙසායා 35:5 මතයි. එහි මුල් වදන් පෙළ ගලා ගියේ මෙසේයි. “අන්ධ දෙ ඇස් ඇරී දකියි.”

මම යෙහෝවා දෙවිගේ සාක්ෂිකරුවන් සමඟ සතියකට හතර වතාවක් උනන්දුවෙන් බයිබලය පාඩම් කළා. දෙවි ප්‍රශ්න ගැටලු හා යුද්ධ පැවතීමට ඉඩහැර තිබෙන්නේ ඇයි කියාත් ඒවාට විසඳුමක් ලබා දෙන්නේ  කෙසේද කියාත් මම ඉගෙනගත්තා. විශේෂයෙන් දේවරාජ්‍යය මගින් ධර්මිෂ්ඨ ජනයාට ලබා දීමට යන සදාකාල ජීවනය පිළිබඳව ඔහු දී තිබෙන ප්‍රේමණීය පොරොන්දුව මගේ සිත්ගත්තා. (උත්පත්ති 1:28; යෙසායා 65:17-25; එළිදරව් 21:1-5) මට බයිබල් සත්‍යයන් හොඳින් තේරුම්ගැනීමට හැකි වූ අතර 1997 නොවැම්බර් 16වෙනිදා මම මගේ ජීවිතය දෙවිට කැප කිරීමේ සංකේතයක් ලෙස වතුරෙන් බව්තීස්ම වුණා.

දෙවිගේ සේවයේ එක්සත්ව

මගේ බව්තීස්මයෙන් අනතුරුව ලීසාත් බයිබලය පාඩම් කරන්න පටන්ගත්තා. ඇය අංශභාග රෝගී තත්වයෙන් සිටියත් ඉක්මණින් සත්‍යය තුළ වර්ධනය වූ අතර 1998දී බව්තීස්ම වුණා. ඇයව බව්තීස්ම කිරීමට වතුර තටාකයට ගෙන ගියේ ඔසවාගෙනයි. ඇයගේ ශරීර සෞඛ්‍යය පවත්වාගැනීම සඳහා සම්බාහන චිකිත්සකයෙකුගේ උපකාරය ලබාගත්තා. කාලයක් යන විට ඇයගේ රෝගී තත්වය සුව වුණා. ඇය දැන් සියලුම රැස්වීම්වලට සහභාගි වන අතර ගෙයින් ගෙට සේවයේත් යෙදෙනවා. ඇය ඈත ගම්මානවලත් සේවයේ යෙදෙනවා.

මම දේශනා සේවයේ යන සෑම අවස්ථාවකදීම දෙවිගේ උපකාරය ඉල්ලා යාච්ඤා කරනවා. ඉන්පස්සේ මම සුදු සැරයටිය ගෙන මට හොඳින් හුරු පුරුදු තැනක් වන බස් නැවතුම්පොළට යනවා. මගේ ළඟින් අඩි ශබ්දයක් ඇසෙන විට මම බයිබලයේ යමක් ගැන කතා කරන්න පටන්ගන්නවා. මම බස්වල ගමන් කරන විට මැද ආසනයක් තෝරාගෙන අවට සිටින අයට කතා කරන අතර පොත් පත් බෙදා දෙනවා. කෙනෙක් පණිවිඩය ගැන උනන්දුවක් දක්වනවා නම් අපි දුරකථන අංක හුවමාරු කරගන්නවා.

මම නිවාඩුවක් ගත කිරීමට ගිය අවස්ථාවකදී සංගීත ගුරුවරයෙකුට බයිබලයේ තිබෙන සත්‍යය ගැන කතා කරන්න අවස්ථාවක් ලැබුණා. එහි තිබෙන සත්‍යයන් ගැන ඔහු ඇත්තෙන්ම පුදුම වුණා. ඔහු ආපසු තම නිවසට ගිය පසු සාක්ෂිකරුවන් සමඟ බයිබලය පාඩම් කරන්න පටන්ගත්තා. මේ නිවාඩු කාලයේදී මට කර්මාන්තශාලාවක අධ්‍යක්ෂකවරයෙක්වත් මුණගැසුණා. ඔහුගේ පුතා අන්ධයි. මම මගේ බලාපොරොත්තුව ගැන ඔහුට කතා කළා. ඔහුත් බයිබලයේ තිබෙන පොරොන්දු ගැන දැනගත් විට ඒවා අගය කළා.

මම බව්තීස්ම වුණාට පස්සේ අටදෙනෙකුට දෙවි පිළිබඳ සත්‍යය කියා දී රාජ්‍යය ප්‍රචාරකයන් කිරීමටත් තවත් බොහෝදෙනෙකුට සත්‍යය කියා දීමටත් හැකි වී තිබෙනවා. යෙහෝවා දෙවි අපේ සෙසු සහෝදර සහෝදරියන් මාර්ගයෙන් අපට බොහෝ උපකාර කර තිබෙනවා. ඔවුන් අපට පොත්වල තිබෙන තොරතුරු කියවනවා. අපිත් එක්ක ඒවා සාකච්ඡා කරනවා. ඒ වගේම ඔවුන් සමුළුවල හා එක්රැස්වීම්වල කතා පටිගත කර ගෙනත් දෙනවා. මෙය අපට සත්‍යය අපේ හිත්වල ස්ථිරව තබාගැනීමටත් අන් අය සමඟ ඒ සත්‍යයන් බෙදාගැනීමටත් උපකාරවත් වී තිබෙනවා. අපිට සභාවේ අය ඇත්තෙන්ම ‘ශක්තිය සපයන උපකාරකයෝයි.’—කොලොස්සි 4:11.

මම ජීවිතයේ බොහෝ කාලයක් සංගීතය සඳහා කැප කළා. දැන් මට රාජ්‍යය ගීතිකා සතුටින් ගායනා කරන්න පුළුවන්. මට මේවා කටපාඩම්. මට සත්‍යය ලබා දීම තුළින් යෙහෝවා දෙවි මගේ ජීවතය ආලෝකවත් කළා. මට අනාගතයේදී නැවතත් පෙනීම ලැබී මේ ලෝකයේ සුන්දරත්වය දැකගන්න ලැබෙන බව නම් ස්ථිරයි.

[19වන පිටුවේ පින්තූරය]

නළාවක් වාදනය කරමින්

[20වන පිටුවේ පින්තූරය]

වර්ෂ 1960දී එකෝඩියන් එක වාදනය කරමින්

[20, 21වන පිටුවේ පින්තූරය]

නළා පමණක් වාදනය කරන සංගීත වාද්‍ය කණ්ඩායම

[23වන පිටුවේ පින්තූරය]

ලීසා සමඟ