රාජ්‍ය ප්‍රකාශකයන්ගේ වාර්තාව

ළං විය නොහැකි හදකට ළං වී

රාජ්‍යයේ ශුභාරංචිය සමඟින් සියලුම ජනයා වෙත ළඟාවීමට යෙහෝවාගේ සාක්ෂිකරුවන් මහත් පරිශ්‍රමයක් දරනවා. ඔවුන්ට විශේෂ වෑයමක් දරන්න සිදු වී තිබෙන්නේ බොහෝවිට නිවෙස්වල නොමැති ජනයාට පණිවිඩය දීමටයි. (මාර්ක් 13:10) මේ සම්බන්ධයෙන් දකුණු අමෙරිකාවේ විශේෂ පුරෝගාමී සේවයේ නියුතු දේවසේවකයෙකු ලද අත්දැකීම පහත කියැවේ.

“දවසක් මට දැනගන්න ලැබුණා මගේ භාර්යාව සහ මම සේවය කරන ප්‍රදේශය බැහැදකින්න ආණ්ඩුකාරතුමා පැමිණෙන බව. මෙවැනි කෙනෙක්ව නිවසේදී හමුවීම දුෂ්කර නිසා මා ලිපියක් සමඟ දෙවිට අපෙන් ඕනෑ කරන්නේ කුමක්ද?, මෑන් කයින්ඩ් සර්ච් ෆො ගෝඩ්, සදාකාල ජීවනයට මඟ පෙන්වන දැනුම ඇතුළු බයිබලය මත පදනම් පොත් කිහිපයක් ඔහුට ලැබෙන්න සැලැස්සුවා. මේ හැම පොතකම අරමුණද ලිපියේ සඳහන් කළා.

“මේ පොත් පත් සම්බන්ධව ඔහු දරන අදහස් දැනගැනීමට මා තුළ ආශාවක් ඇති වූ නිසා, ඔහුව මුණගැසෙන්න වේලාවක් ඉල්ලා සිටියා. සති කිහිපයකට පසු මට ඒ අවස්ථාව උදා වුණා. මා ඔහු මුණගැසීමට යන විට ජෙහෝවාස් විට්නසස්—දි ඕගනයිසේෂන් බිහයින්ඩ් ද නේම් නමැති වීඩියෝ පටයද රැගෙන ගියා. අපේ සාකච්ඡාවට පැය දෙකක් පමණ ගත වූ අතර ඔහු සමඟ වීඩියෝ පටය නැරඹීමටත් අවස්ථාව ලැබුණා. ‘ඔබ මේ ගැන හිතන්නේ මොකක්ද’ කියා මා ඇසූ ප්‍රශ්නයට ඔහු පෙරළා කිව්වේ ‘මේ වගේ සංවිධානයක් ලෝකයේ කොහේවත් නැහැ. මගේ රජයේ ව්‍යාපෘති කරගෙන යන්න ඔයගොල්ලන් වගේ සෙනඟක් ඉන්නවා නම් කොච්චර හොඳද!’ කියලයි. ඊට පස්සේ ඔහු මගෙන් ඇහුවා මම කවදාහරි සංවිධානයේ ලෝක මූලස්ථානය බලන්න ගිහින් තියෙනවද කියලා. මම වයස අවුරුදු 14 ඉඳලා බෘක්ලින් නියූ යෝර්ක්හි තිබෙන ලෝක මූලස්ථානය බලන්න යෑම ගැන සිහින මැව්වා. නමුත් මට එය තවම ඉෂ්ට කරගන්න බැරි වුණු බව මම ඔහුට කිව්වා. ඔහු මහත් ඕනෑකමින් මා දෙස බලා සිට කිව්වා ‘මං ආසයි ඔයාට ඒ සිහිනය සැබෑ කර දෙන්න’ කියලා. ඔහු අපිට අවශ්‍ය නීතික බලපත්‍ර ලබා දීමට සැලසුම් කළා පමණක් නොව තෑගි වශයෙන් ගුවන් ගමන් බලපත්‍ර දෙකක්ද ලබා දුන්නා!

“ආණ්ඩුකාරතුමා දැන් නොකඩවාම මුරටැඹ සහ පිබිදෙව්! කලාප ලබාගනිමින් සිටින අතර නුදුරු අනාගතයේදී ඔහු හා බයිබල් පාඩමක් කිරීමේ අපේක්ෂාවෙන් අපි සිටිනවා.”