පාඨකයන්ගෙන් ප්‍රශ්න

යෙහෝවා ආබ්‍රහම් සමඟ ගිවිසුමක් කළේ ඌර් දේශයේදීද නැතහොත් හාරාන් දේශයේදීද?

මුලින්ම යෙහෝවා ආබ්‍රහම් සමඟ කළ ගිවිසුම ගැන උත්පත්ති 12:1-3 පවසන්නේ මෙලෙසයි. “[යෙහෝවා] ආබ්‍රම්ට කථාකොට: නුඹේ දේශයෙන්ද නුඹේ නෑයන් කෙරෙන්ද නුඹේ පියාගේ ගෙදරින්ද පිටත්ව මා විසින් නුඹට පෙන්වන දේශයට යන්න. මම නුඹ මහත් ජාතියක් කරන්නෙමි. . . . පොළොවේ සියලු පවුල් නුඹ කරණකොටගෙන ආශීර්වාද ලබන්නෝයයි [කීවේය].” a යෙහෝවා මෙම ගිවිසුම ආබ්‍රහම් සමඟ ඌර් දේශයේදී කළා විය හැකි අතර, පසුව හාරාන් දේශයේදී එය යළිත් සනාථ කළා.

පළවන ශතවර්ෂයේ විසූ ස්තේපන් යෙහෝවා ආබ්‍රහම්ට කානාන් දේශයට යෑමට අණ කිරීම සම්බන්ධ සිද්ධිය ගෙනහැර දැක්වුවා. සැන්හීඩ්‍රින් සභාව අමතමින් ඔහු කියා සිටියේ “අපගේ පියවූ ආබ්‍රහම් හාරාන්හි විසීමට පළමුවෙන් මෙසොපොතාමියෙහි සිටි කාලයෙහි මහිමාන්විත [දෙවි] ඔහුට පෙනී: නුඹේ දේශයෙන්ද නෑයන් කෙරෙන්ද තුරන්ව, මා නුඹට පෙන්වන දේශයට [එන්නැයි]” කී බවයි. (ක්‍රියා 7:2, 3, අකුරු ඇල කළේ අපය.) ස්තේපන් අඟවා ඇති පරිදි ආබ්‍රහම්ගේ මුල් පදිංචිය වූයේ ඌර් දේශයයි. කානාන් දේශයට යෑමට ඔහුට මුලින්ම අණ ලැබුණේ මෙහිදීයි. (උත්පත්ති 15:7; නෙහෙමියා 9:7) දෙවි ආබ්‍රහම් සමඟ කළ ගිවිසුම ගැන ස්තේපන් සඳහන් කරන්නේ නැහැ. නමුත් උත්පත්ති 12:1-3හි පෙන්වන පරිදි කානාන් දේශයට යෑමට දුන් ආඥාව හා එම ගිවිසුම අතර සම්බන්ධයක් තිබෙනවා. මේ කරුණු නිසා යෙහෝවා ආබ්‍රහම් සමඟ ගිවිසුම ඇති කළේ ඌර් දේශයේදී බව සිතීම සාධාරණයි.

උත්පත්ති වාර්තාව හොඳින් අධ්‍යයනය කිරීමෙන් උකහාගත හැකි දේ නම් යෙහෝවා ආබ්‍රහම් සමඟ කළ ගිවිසුම හා බැඳි පුළුල් විස්තර කානාන් දේශයේදී කීප වතාවක්ම සඳහන් කළා හා සමානව හාරාන් දේශයේදීද එම ගිවිසුම ගැන නැවත මතක් කළ බවයි. (උත්පත්ති 15:5; 17:1-5; 18:18; 22:16-18) ආබ්‍රහම්ගේ පියා වූ තේරා ඌර් දේශයෙන් ආබ්‍රහම්, සාරා හා ලොත් කැටුව කානාන් දේශයට ගිය බව උත්පත්ති 11:31, 32හි වාර්තා වෙනවා. ඔවුන් තේරාගේ මරණය දක්වා හාරාන් දේශයේ පදිංචි වී සිටියා. ආබ්‍රහම්ට සැලකිය යුතු ප්‍රමාණයක් සම්පත් හිමි කරගැනීමට හාරාන් දේශයේ රැඳී සිටි කාලය ප්‍රමාණවත් වුණා. (උත්පත්ති 12:5) නිශ්චිතව කිව නොහැකි යම් කාලයකදී ආබ්‍රහම්ගේ සහෝදර නාහොර්ද මෙහි පදිංචියට පැමිණියා.

තේරාගේ මරණය ගැන සඳහන් කිරීමෙන් පසු යෙහෝවා විසින් ආබ්‍රහම්ට කී වචන බයිබලයේ තවදුරටත් මෙසේ වාර්තා වී තිබෙනවා. “ආබ්‍රම් [යෙහෝවා] තමාට කී ලෙස ගියේය.” (උත්පත්ති 12:4) උත්පත්ති 12:1-3හි වදන් යෙහෝවා පැවසුවේ තේරාගේ මරණින් පසු බව නිශ්චය කිරීමට උත්පත්ති 11:31-12:4 අනුබල දෙයි. යෙහෝවා මඟ පෙන්වූ දේශය වෙතට ගමන් කිරීම සඳහා ආබ්‍රහම් හාරාන් දේශයෙන් පිටත් වූයේ ඔහුට ඒ අවස්ථාවේදී ලැබුණු අණ හා ඊට අවුරුදු ගණනාවකට පෙර ඌර් දේශයේදී ලැබූ මඟ පෙන්වීමේ ප්‍රතිඵලයක් වශයෙනුයි.

උත්පත්ති 12:1ට අනුව යෙහෝවා ආබ්‍රහම්ට අණ කළේ “නුඹේ දේශයෙන්ද නුඹේ නෑයන් කෙරෙන්ද නුඹේ පියාගේ ගෙදරින්ද පිටත්ව මා විසින් නුඹට පෙන්වන දේශයට යන්න” කියායි. එක් කාලයකදී ආබ්‍රහම්ගේ ‘දේශය’ වූයේ ඌර් දේශයයි. ඔහුගේ ‘පියාගේ ගෙදර’ තිබුණේද එම දේශයේමයි. කෙසේනමුත් ආබ්‍රහම්ගේ පියා ඔහුගේ ගෙයි වැසියන් සමඟ හාරාන් දේශයට ගියා. එතැන් පටන් ආබ්‍රහම් හාරාන් දේශය තමන්ගේ දේශය ලෙස සැලකුවා. කානාන් දේශයේ වසර කිහිපයක් ගත කිරීමෙන් පසු ඔහු ඊසාක්ට භාර්යාවක් සෙවීමට ‘ඔහුගේම දේශයටද ඔහුගේම නෑයන් වෙතටද’ තම මෙහෙකරුව පිටත් කර යැව්වා. මෙහෙකරු ගියේ ‘නාහොර්ගේ නුවරටයි’ (හාරාන් හෝ ඒ අසල නුවරක්). (උත්පත්ති 24:4, 10) ඔහුට රෙබෙකා මුණගැසුණේ මෙහිදියි. ඇය ආබ්‍රහම්ගේ නෑදෑයන් අතරේ නාහොර්ගේ විශාල පවුලට අයත් තැනැත්තියක්.—උත්පත්ති 22:20-24; 24:15, 24, 29; 27:42, 43.

සැන්හිඩ්‍රීන් අධිකරණයේදී ස්තේපන් කළ කතාවේදී ඔහු ආබ්‍රහම් සම්බන්ධව කිව්වේ “ඔහුගේ පියා මළ කල්හි, [දෙවි] ඔහු එතැනින් නුඹලා දැන් වසන්නාවූ මේ දේශයට [ගෙනාවේය]” කියායි. (ක්‍රියා 7:4) මෙයින් තහවුරු වන්නේ හාරාන්හිදී යෙහෝවා ආබ්‍රහම් සමඟ අදහස් හුවමාරු කළ බවයි. එම අවස්ථාවේදී යෙහෝවා උත්පත්ති 12:1-3හි සඳහන් ගිවිසුම නැවතත් මතක් කළ බව සිතීම සාධාරණයි. කෙසේනමුත් මෙම ගිවිසුම ක්‍රියාත්මක වීමට තිබුණේ ආබ්‍රහම් කානාන් දේශයට යෑමෙන් අනතුරුවයි. මේ සියලුම සාධක සලකා බැලීමෙන් පසු එළඹිය හැකි නිගමනය නම් යෙහෝවා ආබ්‍රහම් සමඟ ඌර් දේශයේදී ගිවිසුමක් කළ බව හා හාරාන් දේශයේදී නැවතත් එය තහවුරු කළ බවයි.

[පාදසටහන]